អាជ្ញាធយួន ពិន័យប្រាក់សកម្មជនខ្មែរក្រោម ជាង ៧ លានដុង បន្ទាប់ពីហៅទៅគំរាមកំហែងចំនួន ៣ លើក
ដោយ ស៊ឺន ចែងចើន
អាជ្ញាធរវៀតណាម នៅខេត្តឃ្លាំង នៅថ្ងៃទី ៣១ ខែមករា ឆ្នាំ ២០២៣ បានពិន័យលុយ យុវជនខ្មែរក្រោម ចំនួនទឹកប្រាក់ ៧ លានកន្លះ (ដុង) ឬប្រមាណ ៣២០ ដុល្លារ ករណីចែករំលែកព័ត៌មានរឿងខ្មែរក្រោម នៅលើបណ្ដាញសង្គមហ្វេសប៊ុក (Facebook) ។ អាជ្ញាធរវៀតណាម ចោទប្រកាន់ យុវជន ត្រេវ ស៊ីវ ហៅ ហ៊ីវ ថា កេងចំណេញលើសិទ្ធិសេរីភាព និងបំពានលើផលប្រយោជន៍របស់រដ្ឋ ។ ទោះបីជាយ៉ាងនេះក្តី យុវជនខ្មែរក្រោម រូបនេះ អះអាងថា លោកនឹងមិនបង់ប្រាក់ ពិន័យទៅឲ្យអាជ្ញាធរវៀតណាមនោះទេ ដោយសារតែលោកមិនបានប្រព្រឹត្តិខុសច្បាប់ ដូចការចោទប្រកាន់នោះទេ ។
យុវជនខ្មែរក្រោម ត្រេវ ស៊ីវ ត្រូវអាជ្ញាធរវៀតណាម កោះហៅទៅគំរាមគំហែងចំនួន ៣ លើករួចមកហើយ ដោយហាមមិនឲ្យបង្ហោះព័ត៌មានទាក់ទងនឹងប្រវត្តិសាស្រ្តទឹកដីកម្ពុជាក្រោម និងសៀវភៅឯកសារ ស្តីពីសិទ្ធិជនជាតិដើមរបស់អង្គការ សហប្រជាជាតិ នៅលើបណ្ដាញសង្គមហ្វេសប៊ុក ។ ដំបូងឡើយអាជ្ញាធរវៀតណាម ចោទយុវជនខ្មែរក្រោមរូបនោះថា បំពានទៅលើសិទ្ធិសេរីភាពស្របច្បាប់ នៅក្នុងប្រទេសវៀតណាម តែក្រោយមកពួកគេ បានកែប្រែបទចោទវិញ ដោយថា យុវជន ត្រេវ ស៊ីវ បានទាញយកប្រយោជន៍ពីការប្រើប្រាស់បណ្តាញសង្គម ដើម្បីផ្តល់ និងចែករំលែកព័ត៌មានក្លែងក្លាយ ព័ត៌មានមិនពិត បំភ្លៃ បង្ខូចកេរ្តិ៍ឈ្មោះស្ថាប័ន អង្គការចាត់តាំង មូលបង្កាច់កិត្តិយស និងសេចក្តីថ្លៃថ្នូររបស់បុគ្គលទៅវិញ ។ អាជ្ញាធរវៀតណាម យកមាត្រា ១០១ នៃ ក្រិត្យលេខ 15/2020/NĐ-CP របស់រដ្ឋាភិបាល ចុះថ្ងៃទី ៣ ខែកុម្ភះ ឆ្នាំ ២០២០ ដែលចែងអំពីការដាក់ទណ្ឌកម្ម ប្រឆាំង នឹងការរំលោភផ្នែករដ្ឋបាល ក្នុងវិស័យប្រៃសណីយ៍ ទូរគមនាគមន៍ ព័ត៌មានវិទ្យា ប្រេកង់វិទ្យុ បច្ចេកវិទ្យាព័ត៌មាន និងប្រតិបត្តិការអេឡិចត្រូនិច មកប្រើ ដើម្បីបង្ខំឲ្យយុវជនខ្មែរក្រោម បង់ប្រាក់ពិន័យជាង ៣០០ ដុល្លារ ។
