ថ្នាក់ដឹកនាំសាខាសហព័ន្ធ និងប្រជាពលរដ្ឋខ្មែរក្រោម នៅទីក្រុងមែលប៊ន ប្រទេសអូស្ត្រាលីជួបជុំគ្នាអបអរឆ្នាំថ្មី
ដោយ គឹម សាវតា
បន្ទាប់ពីអាជ្ញាធរទីក្រុងម៉ែលប៊ន ប្រទេសអូស្ត្រាលីអនុញ្ញាតិឲ្យមានការជួបជុំគ្នាឡើងវិញបានដោយសារកូវីត១៩បានស្ងប់ស្ងាត់ជាង២ខែមកហើយនោះ ថ្នាក់នាំសហព័ន្ធខ្មែរកម្ពុជាក្រោមពិភពលោកប្រចាំទីក្រុង និងប្រជាពលរដ្ឋខ្មែរកម្ពុជាក្រោមប្រមាណ ៥០ រូប បានប្រារព្វពិធីជួបជុំគ្នាមួយដើម្បីបានដឹងពីសុខទុក្ខ និងអបអរឆ្នាំថ្មី ឆ្នាំសកលផងដែរ ។
ថ្នាក់នាំសាខាសហព័ន្ធខ្មែរកម្ពុជាក្រោម ប្រចាំទីក្រុងម៉ែលប៊ន ប្រទេសអូស្ត្រាលី និងប្រជាពលរដ្ឋខ្មែរក្រោមប្រមាណ ៥០ រូប នៅថ្ងៃ ២ ខែមករា ឆ្នាំ ២០២១ បានប្រារព្វពិធីជួបជុំគ្នា ពិសារអាហារសាមគ្គី ដើម្បីបានដឹងពីសុខទុក្ខ និងអបអរឆ្នាំថ្មី ឆ្នាំសកល ។ ក្នុងឱកាសនោះ ក៏មានពិធីរៃអង្គាសប្រាក់ ដើម្បីជួយទ្រទ្រង់ដល់សកម្មភាពរបស់សហព័ន្ធខ្មែរកម្ពុជាក្រោម ផងដែរ ។
ក្នុងពិធីជួបជុំដែលធ្វើឡើង នៅសួនឧទ្យានក្រោយ វត្តខ្មែរបែលប៊ននោះ មានអ្នកចូលរួម ដូចជា លោក ថាច់ ច័ន្ទោ ប្រធានសាខាសហព័ន្ធខ្មែរកម្ពុជាក្រោម ប្រចាំទ្វីបអូស្យានី លោក ថាច់ លេង អនុប្រធានសាខាសហព័ន្ធខ្មែរកម្ពុជាក្រោម ប្រចាំទ្វីបអូស្យានី និងជាប្រធានសមាគមខ្មែរទីក្រុងមែលប៊ន លោក យ័ញ បូណត ប្រធានសាខាសហព័ន្ធខ្មែរក្រោម ចាំទីក្រុងមែលប៊ន លោក ថាច់ ណាលីន អនុប្រធានសាខាសហព័ន្ធខ្មែរកម្ពុជាក្រោម ប្រចាំទីក្រុងមែលប៊ន ព្រមទាំងបងប្អូនខ្មែរក្រោមប្រមាណ ៥០ រូប ។
លោក យ័ញ បូណាត ប្រធានសាខាសហព័ន្ធខ្មែរក្រោម ចាំទីក្រុងមែលប៊ន បានឲ្យសំឡេងកម្ពុជាក្រោម (VOKK) ដឹងថា ដោយសារតែការរាតត្បាតនៃជំងឺកូវីត-១៩ ទៅទូទាំងពិភពលោក បានធ្វើឲ្យប្រជាពលរដ្ឋខ្មែរក្រោម មិនបានជួបសួរសុខទុក្ខគ្នាដោយផ្ទាល់ តែរយៈពេលប្រមាណ ២ ខែចុងក្រោយនេះ នៅទីក្រុងមែលប៊ន ប្រទេសអូស្ត្រាលី គឺជំងឺកូវីត-១៩ បានស្ងប់ស្ងាត់ ហើយអាជ្ញាធរបានអនុញ្ញាតិឲ្យមានការជួយជុំឡើងវិញ ដោយគ្រាន់តែអនុវត្តន៍តាមសេចក្តីណែនាំរបស់អាជ្ញាធរសុខាភិបាល ។ លោកបន្តថា សម្រាប់ការជួបជុំរបស់ប្រជាពលរដ្ឋខ្មែរនេះ គឺដើម្បីភ្ជាប់ទំនាក់ទំនងគ្នាឡើងវីញ និងបន្ថែមភាពកក់ក្ដៅជាមួយគ្នាបន្ថែម ។
លោក យ័ញ បូណាត៖ «គោលបំណងរបស់យើងចង់បានភាពពកក់ក្តៅ និងស្និទ្ធស្នាលបន្ថែម ដោយសារតែស្ងាត់ស្ងៀម ហើយដើម្បីឈានដល់កម្មវិធីជួនជុំជាបន្តបន្ទាប់ទៀត» ។
លោក យ័ញ បូណាត បញ្ជាក់ថា បើទោះជាកន្លងមកប្រជាពលរដ្ឋខ្មែរក្រោម នៅទីក្រុងមែល ប៊ន មិនបានជួបជុំគ្នាក្តី ប៉ុន្តែនៅតែនឹករលឹកដល់ប្រជាពលរដ្ឋខ្មែរក្រោម នៅទូទាំងពិភពលោក ជាពិសេស គឺប្រជាពលរដ្ឋខ្មែរក្រោម ដែលកំពុងរស់នៅក្នុងដែនដីកម្ពុជាក្រោម តែម្ដង ។
ប្រជាពលរដ្ឋខ្មែរក្រោម ដែលកំពុងរស់នៅក្នុងទីក្រុងមែលប៊នប្រទេសអូស្ត្រាលី មានប្រមាណ ១០០ គ្រួសារស្មើរ នឹង ជាងបួនរយនាក់ ៕
