(សារព័ត៌មាន ព្រៃនគរ) – អាជ្ញាធរវៀតណាមនៅថ្ងៃ ០៦ ខែកញ្ញា បានឲ្យដឹងថា យ៉ាងហោចមនុស្ស ២១ នាក់ បានស្លាប់ ក្រោយពីព្យុះកំបុតត្បូង និងការបាក់ដីនៅតំបន់ភ្នំភាគខាងជើង ក្នុងអំឡុងពេល ៣ ថ្ងៃកន្លងទៅនេះ ។
គណៈកម្មការការពារទឹកជំនន់ នៃរដ្ឋាភិបាលវៀតណាម បានថ្លែងប្រាប់ទីភ្នាក់ងារព័ត៌មាន AFP ថា ក្រៅពីមនុស្សស្លាប់ ផ្ទះចំនួន ៣៧ ខ្នង និងដីចម្ការប្រមាណ ១.៧០០ ហែកតា ត្រូវបានបំផ្លាញ ។
នៅខេត្តឡាវកាយ (Lao Cai) ព្យុះកំបុតត្បូង និងដីបាក់ បានបោកថ្ម និងភក់ ចំស្រុកមួយបណ្ដាល ឲ្យមនុស្សស្លាប់ ក្នុងនោះ មានក្មេងម្នាក់អាយុ ៣ ឆ្នាំ ផងដែរ ។
ក្រុមសមត្ថកិច្ចកំពុងស្វែងរកមនុស្ស ៣ នាក់ ដែលកំពុងបាត់ខ្លួន នៅសាប៉ា កន្លែងមួយដែលនៅជិតតំបន់ នោះ ប៉ុន្តែមិនមានព័ត៌មានពីភ្ញៀវទេសចរណ៍ទេ ។
គណៈកម្មការការពារទឹកជំនន់ បានជូនដំណឹងថា នឹងមានភ្លៀងជាបន្តបន្ទាប់ក្នុងអំឡុពេលប៉ុន្មានថ្ងៃខាង មុខនេះ ។
កាលពីឆ្នាំទៅមិញ វៀតណាម មានមនុស្សប្រមាណ ២៦០ នាក់បានស្លាប់ ព្រោះទឹកជំនន់ ៕
