ដោយ ថាច់ ប្រីជា គឿន
នៅរាត្រីថ្ងៃសុក្រ ទី ៣ ខែសីហា សប្ដាហ៍នេះ សហព័ន្ធខ្មែរកម្ពុជាក្រោម បានប្រារព្ធពិធីរាត្រីសមោ សរ ដើម្បីអបអរសាទរដល់ ខួប ២២ ឆ្នាំ នៃការបង្កើតសហព័ន្ធខ្មែរកម្ពុជាក្រោម ៤ សីហា ១៩៩៦ – ៤ សីហា ២០១៨ ។ ពិធីនេះ ប្រារព្ធនៅក្នុង ភោជនិយដ្ឋាន មួយ នា ទីក្រុង Long Beach រដ្ឋ California ចាប់ពីម៉ោង ៧ ព្រលប់ ដល់ម៉ោង ១២ អធ្រាត្រ ។ ពិធីនេះ រៀបចំដោយ លោក កៀង រម្មណី ជាប្រធានសាខាសហព័ន្ធខ្មែរកម្ពុជាក្រោម ប្រចាំរដ្ឋ California ភាគខាងត្បូង និង លោក ថាច់ ជីវ ជាប្រធានសាខាព័ន្ធខ្មែរកម្ពុជាក្រោម ប្រចាំទីក្រុង Long Beach ។ មុនពេលទទួលភោជនាហារជុំគ្នា ភ្ញៀវចូលរួមបានស្ដាប់នូវសេចក្ដីថ្លែងការណ៍របស់ ថ្នាក់ដឹកនាំ នៃ សហព័ន្ធខ្មែរកម្ពុជាក្រោម អំពីប្រវត្តិ និង ទិសដៅរបស់សហព័ន្ធខ្មែរកម្ពុជាក្រោម ក្នុងការតស៊ូមតិ នៅលើឆាកអន្តរជាតិ ដើម្បីឲ្យរបបកុម្មុយនិស្តយួន គោរពសិទ្ធិជនជាតិដើមខ្មែរក្រោម នៅកម្ពុជាក្រោម ។
គណៈកម្មការនាយក នៃ សហព័ន្ធខ្មែរកម្ពុជាក្រោម ដែលចូលរួមពិធី នេះ រួមមានដូចជា លោក ប្រាក់ សេរីវុឌ្ឍ ជាប្រធានប្រតិបត្តិ, លោក ម៉ៅ មុនី ជាអនុប្រធានប្រតិបត្តិ, លោក ស៊ឺន ហ៊ួរ ជាអគ្គលេខាធិការ និង លោក សឺង សម្រេច ជាឧត្ដមទីប្រឹក្សា ។ ក្រៅពីនេះ ក៏មាន ថ្នាក់ដឹកនាំប្រចាំតំបន់ និងសាខានានា នៃសហព័ន្ធខ្មែរកម្ពុជាក្រោម មកចូលរួម ផងដែរ ដូចជា លោក ថាច់ តង ជាប្រធានតំបន់អាមេរិក ខាងលិច, លោក ថាច់ ជូន ជាប្រធានសាខាប្រចាំទីក្រុង San Jose, អ្នកស្រី សឺន សាមេធ ជាប្រធាន សាខាប្រចាំទីក្រុង San Bernardino , លោក យ័ញ ដូរ ជាប្រធានគណៈកម្មការវត្ត រតនគិរីវង្ស នៅទីក្រុង San Bernardino និង អ្នកស្រី កៀង សាខន អ្នកនិពន្ធបទចម្រៀងជាតិនិយមខ្មែរក្រោម ប្រចាំ សហព័ន្ធខ្មែរ កម្ពុជា ក្រោម ។
លោក សឺង សម្រេច ជាទីប្រឹក្សា និងជាសហស្ថាបនិក នៃ សហព័ន្ធខ្មែរកម្ពុជាក្រោម បានថ្លែងទៅកាន់ ភ្ញៀវចូលរួមអំពីប្រវត្តិ និងទិសដៅរបស់សហព័ន្ធខ្មែរកម្ពុជាក្រោម ថា សហព័ន្ធខ្មែរកម្ពុជាក្រោម បានបង្កើត ឡើង នៅឆ្នាំ ១៩៩៦ នៅទីក្រុង Toronto ប្រទេសកាណាដា និង ធ្វើការតស៊ូដោយ សន្តិវិធី ដើម្បី ទាមទារសិទ្ធិជូនពលរដ្ឋខ្មែរក្រោម នៅកម្ពុជាក្រោម ដែលកំពុងតែនៅក្រោម នឹមត្រួតត្រារបស់របប កម្មុយនិស្តយួន សព្វថ្ងៃ ។
លោក ប្រាក់ សេរីវុឌ្ឍ ជាប្រធានប្រតិបត្តិ នៃ សហព័ន្ធខ្មែរកម្ពុជាក្រោម បានថ្លែងថា គោលដៅរបស់សហ ព័ន្ធខ្មែរកម្ពុជាក្រោម ធ្វើការតស៊ូផ្ដោតលើទំនាក់ទំនងការទូតអន្តរជាតិ ដើម្បីដាក់គំនាបទៅរបបកុម្មុយនិស្ត យួនគោរពសិទ្ធិជនជាតិដើមខ្មែរក្រោម នៅកម្ពុជាក្រោម និងពន្យល់ឲ្យពលរដ្ឋខ្មែរក្រោមចេះប្រើប្រាស់នូវ សិទ្ធិសម្រេចវាសនាខ្លួនដោយខ្លួនឯង នៅលើទឹកដីកំណើតរបស់ខ្លួន ។
យោងតាមសៀវភៅ លក្ខន្តិកៈ និង បទបញ្ញាត្តិ នៃ សហព័ន្ធខ្មែរកម្ពុជាក្រោម ដែលទើបតែបាន បោះពុម្ព នៅក្នុងឆ្នាំ ២០១៨ នេះ បានបញ្ជាក់ថា សហព័ន្ធខ្មែរកម្ពុជាក្រោម ដែលហៅកាត់ជាភាសា អង់គ្លេសថា KKF បានបង្កើតឡើងនៅថ្ងៃទី ៤ ខែសីហា ឆ្នាំ ១៩៩៦ នៅក្នុងមហាសន្និបាតសកល លើកទី ៥ នៃខ្មែរកម្ពុជាក្រោម នៅទីក្រុង Toronto នៃ ប្រទេសកាណាដា ដោយបានប្ដូរពីសភា កម្ពុជាក្រោម មកជាសហព័ន្ធខ្មែរកម្ពុជាក្រោម ។
ចំពោះគោលដៅ នៃការតស៊ូ សហព័ន្ធខ្មែរកម្ពុជាក្រោម បានបញ្ជាក់ថា ខ្លួននឹងធ្វើការតស៊ូដោយ សន្តិវិធី នៅលើឆាកអន្តរជាតិ ដើម្បីជម្រុញឲ្យរបបកុម្មុយនិស្តយួនគោរពសិទ្ធិជនជាតិដើមខ្មែរក្រោម និងធ្វើការ ពន្យល់ ឲ្យពលរដ្ឋខ្មែរក្រោម នៅក្នុងស្រុក ចេះប្រើនូវ “សិទ្ធិសម្រេចវាសនាខ្លួនដោយខ្លួន ឯង” ក្នុងនាម ខ្លួនជាជនជាតិដើម នៃ ដែនដីកម្ពុជាក្រោម ស្របតាមសេចក្ដីប្រកាសជាសកលរបស់ អង្គការសហប្រជា ជាតិស្ដីពីសិទ្ធិមនុស្ស និង សិទ្ធិជនជាតិដើម ដែលវៀតណាមជាប្រទេសហត្ថលេខី ៕
