ព្រះសង្ឃ​វត្ត​សេរី​តាសេក ៧ អង្គ ភៀសខ្លួន​ទៅ​កម្ពុជា ក្រោយពី​វៀតណាម​ចាប់​ព្រះចៅអធិការ​វត្ត​ជាក់​ពន្ធនាគារ​

0 99

ដោយ ថាច់ ប្រីជា គៀន l សារព័ត៌មាន ព្រៃនគរ​

​ព្រះសង្ឃ​វត្ត​សិរី​តាសេក នៃ​ខេត្ត​ឃ្លាំង ៧ អង្គ  បាន​ភៀស​ព្រះកាយ​មក​ស្នាក់​នៅក្នុង​ទីក្រុង​ភ្នំពេញ នៃ​ប្រ ទេស​កម្ពុជា ដើម្បី​គេច​ពី​ការ​ធ្វើទុក្ខបុកម្នេញ​ពី​សំណាក់​រដ្ឋាភិបាល​វៀតណាម បន្ទាប់​ព្រះចៅអធិការ​វត្ត ព្រះនាម លីវ នី និង ព្រះគ្រូ​ពហុ​សូត្រ ព្រះនាម ថាច់ ធឿន ត្រូវបាន​រដ្ឋាភិបាល​វៀ​ត​ណា​ម ចាប់​ផ្សឹក និង​ដាក់ពន្ធនាគារ កាលពី​ថ្ងៃទី ២១ ខែមិថុនា កន្លងទៅនេះ ។

ទីក្រុងភ្នំពេញថ្ងៃទី ២៩ ខែមិថុនា ឆ្នាំ ២០១៣៖ ព្រះសង្ឃភៀសខ្លួនមកពីវត្តសិរីតាសេក ៧ អង្គ បានទទួលប្រាក់ឧបត្ថម្ភពីសប្បុរសជននៅក្រៅប្រទេសតាមរយៈវិទ្យុសំឡេងកម្ពុជាក្រោមមួយ អង្គចំនួន ២០០ ដូល្លារ ។
ទីក្រុងភ្នំពេញថ្ងៃទី ២៩ ខែមិថុនា ឆ្នាំ ២០១៣៖ ព្រះសង្ឃភៀសខ្លួនមកពីវត្តសិរីតាសេក ៧ អង្គ បានទទួលប្រាក់ឧបត្ថម្ភពីសប្បុរសជននៅក្រៅប្រទេសតាមរយៈវិទ្យុសំឡេងកម្ពុជាក្រោមមួយ អង្គចំនួន ២០០ ដូល្លារ ។

​នៅ​ថ្ងៃទី ២៩ ខែមិថុនា នេះដែរ ព្រះសង្ឃ​ទាំង ៧ អង្គ​នេះ បានទទួល​ប្រាក់ឧបត្ថម្ភ​ពី​សប្បុរសជន​នៅក្រៅ ប្រទេស​តាមរយៈ​វិទ្យុ​សំឡេង​កម្ពុជា​ក្រោម ចំនួន ១.៥០០ ដូ​ល្លារ ផងដែរ  ។​

​ព្រះតេជព្រះគុណ ថាច់ សម័យ ព្រះជន្ម ២៤ វស្សា ព្រះសង្ឃ​វត្ត​សិរី​តាសេក ដែល​ទើបបាន​ភៀសខ្លួន ទៅ​ប្រទេស​កម្ពុជា កាលពី​ថ្ងៃទី ០១ ខែមិថុនា បាន​ប្រាប់ វិទ្យុ​សំឡេង​កម្ពុជា​ក្រោម អំពី​មូល​ហេតុដែល ជម្រុញ ឲ្យ​ព្រះអង្គ និង ព្រះសង្ឃ​ដទៃទៀត​ភៀស​ព្រះកាយ​ទៅ​ប្រទេស​កម្ពុជា​ថា ព្រោះ​មានការ​គំរាមកំហែង ពី​រដ្ឋាភិបាល​វៀតណាម ទាក់ទិន​នឹង​រឿង​ព្រះតេជព្រះគុណ លីវ នី និង ព្រះតេជព្រះគុណ ថាច់ ធឿន ។​

​ព្រះតេជព្រះគុណ ថាច់ សម័យ មាន​ថេរ​ដីកា​ថា​៖ “​មុននឹង​អាត្មា​ភៀសខ្លួន​ឡើងមក៍  មាន​គេ​អញ្ជើញ លោកមា​អាត្មា និង​ញោម  និយាយ​រួមមួយ​ពូជ​អាត្មា​តែម្ដង ។ គេ​អញ្ជើញ​ទៅ​សួរ ហើយ​ឮ​ពាក្យ​ដែល​អាជ្ញា ធរ វៀតណាម គេ​និយាយ​មក៍ ……​គេ​ថា អាត្មា​ហ្នឹង គេ​អត់​ឲ្យ​នៅ​សុខ​ទេ ។ គេ​គិតពីរ​អង្គ [​លីវ នី និង ថាច់ ធឿន​] ហ្នឹង​រួច ហើយ​គេ​គិតពីរ​អង្គ​ទៀត ។ ពីរ​អង្គ​មាន ព្រះអង្គ គឹម ធី និង​អាត្មា ។ ចឹ​ង​ទេ មាមីង និង ញាតិ​អាត្មា​នៅ​កម្ពុជា​ក្រោម​ហ្នឹង​ភ័យ​នឹង​អាជ្ញាធរ​វៀតណាម​ចាប់​អាត្មា ……​ក៏​សម្រេចចិត្ត​ឲ្យ​អាត្មា​ចេញ ពី​ស្រុក ” ។​

​ព្រះតេជព្រះគុណ ថាច់ សម័យ បាន​បន្តទៀតថា បច្ចុប្បន្ន ព្រះតេជព្រះគុណ លីវ នី និង ព្រះតេជព្រះគុណ ថាច់ ធឿន ព្រមទាំង​ពលរដ្ឋ​ខ្មែរក្រោម ២ រូប គឺ លោក ថាច់ ភូមិ​រិ​ទ្ធ និង លោក ត្រា ថា ត្រូវបាន​រដ្ឋាភិបាល​វៀ​ត​ណា​ម​ចាប់ខ្លួន រហូតមកទល់​ពេលនេះ គេ​នៅ​មិនទាន់​ដឹងថា នៅទីណា​ឡើយ ។​

​ព្រះតេជព្រះគុណ ថាច់ សម័យ បាន​បន្តទៀតថា ៖ “​ពរ ! ឥឡូវ​មាន​ពីរ​អង្គ [​ព្រះតេជព្រះគុណ លីវ នី និង ព្រះ​តេជ​ព្រ​គុណ ថាច់ ធឿន ] និង​គ្រហស្ថ​ពីរ​នាក់ [​លោក ភូមិ​រិ​ទ្ធ និង លោក ត្រា ថា​] ទៅជា​មួយ​ហ្នឹង យើង​មិនទាន់​ដឹងថា អាជ្ញាធរ​យួន​យកទៅ​ដាក់គុក នៅ​កន្លែង​ណា​ទេ ” ។​

​ព្រះតេជព្រះគុណ លីវ នេន ត្រូវ​ប្អូនប្រុស​របស់ ព្រះតេជព្រះគុណ លីវ នី ដែល​ទើបតែ​បាន​ភៀស ព្រះកាយ មក​ស្រុក​ខ្មែរ  មាន​ថេរ​ដីកា​ថា នៅ​ថ្ងៃទី ២៩ ខែមិថុនា នេះ ព្រះសង្ឃ​ទាំង ៧ ដែល​ទើបតែ​បាន​ភៀសខ្លួន មកដល់​ប្រទេស​កម្ពុជា បានទទួល​ថវិកា​ឧបត្ថម្ភ​ពី​សប្បុរសជន​នៅក្រៅ​ប្រទេស តាមរយៈ​វិទ្យុ​សំឡេង កម្ពុជា​ក្រោម​ក្នុង​មួយអង្គ ២០០ ដូ​ល្លារ  ។

​ព្រះតេជព្រះគុណ លីវ នេន មាន​ថេរ​ដីកា​ថា​៖ “​លោកគ្រូ [​យឿ​ង តារា​] គាត់​និមន្ត​មកពី​សហរដ្ឋអាមេរិក  គាត់​បាន​ប្រាប់​អាត្មា​ថា ផ្ញើ [​លុយ​] មក​មួយ​ពាន់​ប្រាំ [១.៥០០ ដូ​ល្លារ​] ញោម ។ មួយ​ពាន់​ប្រាំ​ហ្នឹង គឺ​ប្រគេន​មួយអង្គ ២០០ [​ដូ​ល្លារ​] និង​ប្រគេន​ព្រះសង្ឃ​ជូន​ផ្លូវ​មួយរយ [១០០ ដូ​ល្លារ​] ” ។​

​សូមបញ្ជាក់ថា ព្រះតេជព្រះគុណ យឿ​ង តារា ប្រធាន សម្ព័ន្ធ​សមណ​និស្សិត​-​និស្សិត​ខ្មែរ​កម្ពុជា​ក្រោម បាន​នាំយក​ថវិកា​ទាំងនេះ​ទៅ​ប្រ​គេ ព្រះសង្ឃ​ទាំង ៧ អង្គ​នេះ ពេលដែល​ព្រះអង្គ​បាន​និមន្ត​ត្រឡប់ ពី សហរដ្ឋអាមេរិក​ទៅ​ស្រុក​ខ្មែរ​វិញ ។​

​ពេញ​បានទទួល​ថវិកា ព្រះតេជព្រះគុណ ថាច់ សម័យ បាន​ថ្លែងអំណរគុណ ដល់​សប្បុរសជន​យ៉ាង នេះ​ថា ៖ “​ពរ ! ចំពោះ​ថវិកា​ដែល​បងប្អូន​នៅក្រៅ​ប្រទេស ដែល​បាន​ឧបត្ថម្ភ​ដល់​អាត្មា​ទាំង​ប៉ុន្មាន​អង្គ​នេះ ។ [​អាត្មាភាព ] សូម​អរគុណ​យ៉ាងច្រើន ហើយក៏​សូម​បួងសួង​ដល់​សក្កទេវរាជ ស្ដេច​ទេវតា និង​វត្ថុ​សក្ដិ​សិទ្ធិ ដែលមាន​នៅក្នុង​លោក ជួយ​ទុក​បម្រុង​ញាតិ​ញោម​ឲ្យ​បាន​ជួបតែ​សេចក្ដីសុខ សេចក្ដីចម្រើន  និង​ជួប​នូវ ពុទ្ធពរ​ទាំង ៤ ប្រការ គឺ អាយុ វណ្ណៈ សុខ  ពលៈ និង​ជាទី​អវសាន​ជាតិ បាន​ជួបប្រទះ​សម្បត្តិ​ទាំងឡាយ ៣ ប្រការ គឺ សម្បត្តិ​មនុស្ស ទេវតា និង​ព្រះ​និព្វាន កុំបី​ឃ្លៀងឃ្លាត​ឡើយ ” ។​

​ព្រះសង្ឃ​ភៀសខ្លួន​ទាំងនេះ បាន​អំពាវនាវ​ដល់​អង្គការ​សិទ្ធិមនុស្ស​នានា ជួយ​ធ្វើ​អន្តរ​គម​ន៍​ទៅ​រដ្ឋាភិបាល​វៀតណាម ឲ្យ​បញ្ឈប់​ការរំលោភ​សិទ្ធិមនុស្ស​លើ​ពលរដ្ឋ​ខ្មែរក្រោម នៅ​កម្ពុជា​ក្រោម យ៉ាងនេះ​ថា​៖ “​ពរ ! អាត្មា ក៏ដូចជា​ព្រះសង្ឃ​ភៀសខ្លួន និង​ពុទ្ធបរិស័ទ​ដែល​រស់​នៅឯ​ដែនដី​កម្ពុជា​ក្រោម​នោះ សូម​អំពាវនាវ ដល់​អង្គការ ជាពិសេស គឺ​អង្គការសិទ្ធិមនុស្ស ឲ្យ​ចុះទៅ​បង្ហាត់បង្រៀន​ដល់​ពួក​អាជ្ញាធរ​វៀតណាម​ហ្នឹង ប្រហែលជា​ពួកគេ មិន​យល់​ពី​សិទ្ធិមនុស្ស​ច្បាស់លាស់​ទេ​មើលទៅ ។ ចឹ​ង​ទេ អាត្មា​ក៏​សូម​អំពាវនាវ​ឲ្យ អង្គការ​ហ្នឹង​ចុះទៅ​ជួយ​បង្រៀន​អំពី​សិទ្ធិមនុស្ស​ដល់​អាជ្ញាធរ​វៀតណាម​ឲ្យ​វា​បាន​ចេះដឹង និង​សូមកុំ​ឲ្យ​ធ្វើ បាប​ព្រះសង្ឃ និង​ប្រជាពលរដ្ឋ​ខ្មែរក្រោម ដែល​កំពុង​រស់​នៅឯ​ដែនដី​កម្ពុជា​ក្រោម ជា​បន្តទៀត ។ ពរ ! ” ៕

Leave A Reply

Your email address will not be published.