អាជ្ញាធររារាំងមិនឲ្យខ្មែរក្រោម ហែញត្តិទៅរដ្ឋសភា សុំដាក់បញ្ចូលថ្ងៃទី ៤ មិថុនា ជាទិវាកាន់ទុក្ខជាតិ
ដោយ ស៊ឺន ចែងចើន| VOKK
អង្គការ-សមាគមខ្មែរកម្ពុជាក្រោម នៅប្រទេសកម្ពុជា នៅព្រឹកថ្ងៃទី ២៦ មិថុនា បានហែញត្តិទៅដាក់នៅរដ្ឋសភាកម្ពុជា ដើម្បីសុំដាក់បញ្ចូលថ្ងៃទី ៤ មិថុនា ជាទិវាកាន់ទុក្ខជាតិ ក្រោយបារាំងបានកាត់ដែនដីកម្ពុជាក្រោម ទៅឲ្យយួនធ្វើអាណានិគមបន្តលើប្រជាជាតិខ្មែរក្រោមអស់រយៈ ៦៨ ឆ្នាំ ។
លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោម បានដឹកនាំក្រុមយុវជនប្រមាណ ៥០ នាក់ ចេញពីវត្តពោធិយារាម ហៅវត្តចាស់ ស្ថិតតាមបណ្ដោយទន្លេសាបត្រើយខាងកើត ក្នុងខណ្ឌជ្រោយចង្វារ ឆ្ពោះទៅកាន់រដ្ឋសភា ។ ប៉ុន្តែ ត្រូវបានរារាំងដោយកម្លាំងសមត្ថកិច្ចក្រុងភ្នំពេញប្រមាណ ២០០ នាក់ ប្រដាប់ដោយខែល និងអាវុធក្នុងដៃ ព្រមទាំងឡាងរនាំងបិទផ្លូវ មិនអនុញ្ញាតឲ្យធ្វើដំណើរទៅដាក់ញត្តិនៅរដ្ឋសភាឡើយ ។
យ៉ាងនេះក្តី ក្រោយពីចរចារមួយសន្ទុះរួចមក អាជ្ញាធរបានសម្រេចឲ្យរថយន្តចំនួន ៣ គ្រឿង ដែលមានពលរដ្ឋប្រមាណជា ១០ នាក់ អាចធ្វើដំណើរទៅដាក់ញត្តិនៅរដ្ឋសភា ។
លោក ថាច់ សេដ្ឋា ដែលជាមេដឹកនាំក្នុងការដាក់ញត្តិនេះ បានថ្លែងប្រាប់អ្នកសារព័ត៌មាន ក្រោយចេញពីដាក់ញត្តិនៅរដ្ឋសភាថា
ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយ (“គណៈកម្មការទី ១០”) នៃរដ្ឋសភា និងប្រធានគណៈកម្មការទី ១ នៃរដ្ឋសភា (គណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងជាមួយរដ្ឋសភាព្រឹទ្ធសភា) បានទទួលយកញត្តិរបស់លោករួចហើយ និងសន្យាថា នឹងនាំយកញត្តិនេះ ដាក់ជូនប្រធានរដ្ឋសភាសម្រេច នៅពេលកិច្ចប្រជុំពេញអង្គសភា នៅថ្ងៃខាងមុខ ។
បើតាមគម្រោង សហគមន៍ខ្មែរកម្ពុជាក្រោម គ្រោង នឹងដឹកនាំសមាជិករបស់ខ្លួន ចំនួនជាង ២០០ នាក់ ដើម្បីហែញ្ញត្តិទៅរដ្ឋសភា សុំដាក់បញ្ចូលថ្ងៃទី ៤ មិថុនា ជាថ្ងៃឈប់សម្រាកបុណ្យជាតិ និងជាទិវាកាន់ទុក្ខរបស់ប្រជាពលរដ្ឋទូទាំងប្រទេសកម្ពុជា ។ ក៏ប៉ុន្តែការហែញ្ញត្តិនេះ ត្រូវបានទប់ស្កាត់ដោយកម្លាំងសមត្ថកិច្ចក្រុងភ្នំពេញ ដោយចាត់ទុកថា សកម្មភាពហែញត្តិរបស់សហគមន៍ខ្មែរកម្ពុជាក្រោម ធ្វើឲ្យប៉ះពាល់ដល់សន្តិសុខ និងសណ្តាប់ធ្នាប់សាធារណៈ ហើយ និងបង្កឲ្យមានការកកស្ទះចរាចរណ៍ ។
លោក ថាច់ សេដ្ឋា បានសម្តែងការសោកស្តាយយ៉ាងដូច្នេះ៖
សូមបញ្ជាក់ថា ក្នុងខ្លឹមសារនៃញត្តិនោះ សហគមន៍ខ្មែរកម្ពុជាក្រោម បានស្នើសុំឲ្យលោក ហេង សំរិន ប្រធានរដ្ឋសភានៃព្រះរាជាណាចក្រកម្ពុជា ទទួលយកនូវសំណើរនេះ ទៅពិចារណា និងបញ្ចូលជាទិវាបុណ្យជាតិ តាមសំណើររបស់សហគមន៍ខ្មែរកម្ពុជាក្រោម ជាមិនខាន ។
បើតាមញត្តិដដែល បានបញ្ជាក់ថា ទឹកដីខ្មែរមួយភាគធំ ស្ថិតនៅប៉ែកខាងក្រោមនៃដីដណ្តទន្លេមេគង្គ ដែលហៅថា ទឹកដីកម្ពុជាក្រោម បារាំងហៅថា កូសាំងស៊ីន នោះ ត្រូវបានអាណានិគមបារាំងកាត់ផ្ទេរទៅឲ្យអាណានិគមវៀតណាម ត្រួតត្រាបន្តរហូតដល់សព្វថ្ងៃ នៅថ្ងៃទី ០៤ ខែមិថុនា ឆ្នាំ ១៩៤៩ ។ ការកាត់ផ្ទេរនេះ បានធ្វើឡើង ដោយការឃុបឃិតគ្នារវាងបារាំង-វៀតណាម តែប៉ុណ្ណោះ ដោយពុំបានសួរនាំ ឬពិគ្រោះយោបល់ជាមួយព្រះរាជាណាចក្រកម្ពុជា ដែលជាម្ចាស់នៃទឹកដីនោះឡើយ ។
រដ្ឋាភិបាលសាធារណរដ្ឋបារាំង បានប្រកាសឲ្យប្រើច្បាប់ ស្តីអំពីការកែប្រែលក្ខន្តិកៈកូសាំងស៊ីន លេខ ៤៩/៧៣៣ ចុះថ្ងៃទី ០៤ ខែមិថុនា ឆ្នាំ ១៩៤៩ គឺជាច្បាប់ដ៏អាក្រក់បំផុត ដែលបានភ្ជាប់ទឹកដីកម្ពុជាក្រោម ទៅឲ្យវៀតណាមទាំងអយុត្តិធម៌បំផុត ។ នេះបើតាមខ្លឹមសារ ដែលមាននៅក្នុងញត្តិរបស់សហគមន៍ ។
ក្នុងខ្លឹមសារនៃញត្តិនោះ ក៏បានបរិយាយបន្ថែមថា បន្ទាប់ពីច្បាប់នេះ ចូលជាធរមាន ទឹកដីកម្ពុជាក្រោម បានស្ថិតនៅក្រោមការត្រួតត្រារបស់អាជ្ញាធរអាណានិគមរបស់វៀតណាមរហូតសព្វថ្ងៃ ។ មិនតែប៉ុណ្ណោះ អាណានិគមថ្មី (វៀតណាម) នេះ បានអនុវត្តនយោបាយរំលាយពូជសាសន៍ខ្មែរកម្ពុជាក្រោម យ៉ាងឃោឃៅព្រៃផ្សៃជាទីបំផុត ។ បុព្វបុរសរបស់ខ្មែរ បានតស៊ូប្តូរជីវិត ដើម្បីការពារពូជសាសន៍ សាសនា វប្បធម៌ខ្មែរ និងទាមទារទឹកដីកម្ពុជាក្រោមមកវិញយ៉ាងច្រើនរាប់មិនអស់ ។
គួររំឭកថា នៅថ្ងៃទី ២៤ មិថុនា ២០១៧ កន្លងទៅនេះ អង្គការ-សមាគមខ្មែរកម្ពុជាក្រោម ដែលមានមូលដ្ឋាន នៅប្រទេសកម្ពុជា ទើបតែបានប្រារព្វខួប ៦៨ ឆ្នាំនៃទិវាកម្ពុជាក្រោម នៅក្រោមនឹមអាណានិគមយួន ដែលកាលណោះ អាណានិគមបារាំង បានកាត់ផ្ទេរទឹកដីខ្មែរកម្ពុជាក្រោម ដែលមានខេត្តសរុបចំនួន ២១ ខេត្តទៅឲ្យវៀតណាម ។
បន្ទាប់ពីបារាំងបានផ្ទេរដែនដី កម្ពុជាក្រោម ឬដែនដីកូស័ងស៊ីនទៅឲ្យវៀតណាមបន្តធ្វើអាណានិគមលើពលរដ្ឋខ្មែរក្រោម កាលពីថ្ងៃទី ៤ ខែមិថុនា ឆ្នាំ ១៩៤៩ មក សិទ្ធិសេរីភាពរបស់ជនជាតិខ្មែរក្រោម ត្រូវរដ្ឋាភិបាលយួនរំលោភបំពានជាបន្តបន្ទាប់ ក្នុងនោះ មានការចាប់ព្រះសង្ឃ និងពលរដ្ឋដាក់ពន្ធនាគារពីបទប្រឆាំងរដ្ឋាភិបាលជាដើម ។
ដើម្បីឲ្យប្រជាជាតិខ្មែរទាំងមូល ចងចាំទិវាជាប្រវត្តិសាស្ត្រដ៏សែនឈឺចាប់នេះ ជារៀងរាល់ឆ្នាំ ឲ្យតែដល់ថ្ងៃទី ៤ ខែមិថុនា ពលរដ្ឋខ្មែរក្រោម ទូទាំងពិភពលោក ដូចជាប្រទេសកម្ពុជា ថៃ សហរដ្ឋអាមេរិក កាណាដា អូស្ត្រាលី New Zealand និងប្រទេសមួយចំនួននៅអឺរុប ដូចជា បារាំង ស្វិស អ៊ីតាលី ហូឡង់ ជាដើម តែងតែប្រារព្ធទិវា ៤ មិថុនា ដើម្បីសម្ដែងការសោកស្ដាយចំពោះការបាត់បង់ទឹកដីកម្ពុជាក្រោម និងការឈឺចាប់ចំពោះការធ្វើទុក្ខបុកម្នេញលើពលរដ្ឋខ្មែរក្រោម ពីសំណាក់រដ្ឋាភិបាលអាណានិគមយួនសព្វថ្ងៃ ៕
ខាងក្រោមនេះ ជាវីដេអូ និងរូបភាពខ្លះៗ នៃសកម្មភាពហែញត្តិទៅកាន់រដ្ឋសភាកម្ពុជា ។ រូបថតៈ ស៊ឺន ចែងចើន
Comments are closed.