ដោយ ថាច់ ប្រីជា គឿន l សារព័ត៌មាន ព្រៃនគរ
ព្រះតេជព្រះគុណ សាសនត្ថេរ ថាច់ រ៉េន គង់នៅវត្តមជ្ឈិមារាម (កណ្តាល) ស្រុកកំពង់ស្ពាន ខេត្តព្រះត្រពាំង បានអនិច្ចធម្ម កាលពីវេលាម៉ោង ១២ និង ៣០ នាទី ថ្ងៃអង្គារ ១ កើត ខែពិសាខ ឆ្នាំមមី ឆស័ក ព. ស. ២៥៥៧ ត្រូវនឹងថ្ងៃទី ២៩ ខែមេសា ឆ្នាំ ២០១៤ ដោយព្រះរោគាពាធ ក្នុងព្រះជន្មាយុ ៣៥ ឆ្នាំ ។ ពិធីបូជាព្រះសពរបស់ព្រះអង្គ នឹងប្រារព្ធនៅវត្តមជ្ឈិមារាម (កណ្ដាល) នៅថ្ងៃព្រហស្បតិ៍ ៣ កើត ខែពិសាខ ឆ្នាំ មមី ឆស័ក ព. ស. ២៥៥៧ ត្រូវនឹងថ្ងៃទី ១ ខែឧសភា ឆ្នាំ ២០១៤ នេះ ។
(សំឡេងព្រះធម៌ទេសនា)
ចុចស្តាប់ ពិធីបូជាព្រះសពព្រះតេជព្រះគុណ ថាច់ រ៉េន ថ្ងៃនេះ
នេះជាសំឡេងព្រះធម៌ទេសនាដែលបានសម្ដែងដោយ ព្រះតេជព្រះគុណ សាសនត្ថេរ ថាច់ រ៉េន ព្រះសង្ឃ វត្តមជ្ឈិមារាម (កណ្តាល) ស្រុកកំពង់ស្ពាន ខេត្តព្រះត្រពាំង ដែលព្រះអង្គបានសម្ដែងនៅក្នុងពិធីបុណ្យឈាបនកិច្ចមួយ នៅ ក្នុងខេត្ តព្រះត្រពាំង ។ តែនៅពេលនេះ ព្រះអង្គនឹងមិនអាចបន្តសម្ដែងធម៌ទេសនាប្រោសដល់ពុទ្ធបរិស័ទបានទៀត ទេ ព្រោះ ព្រះអង្គបានទទួលអនិច្ចធម្មហើយ កាលពី ថ្ងៃអង្គារ ១ កើត ខែពិសាខ ឆ្នាំមមី ឆស័ក ព. ស. ២៥៥៧ ត្រូវនឹងថ្ងៃទី ២៩ ខែមេសា ឆ្នាំ ២០១៤ ដោយព្រះរោគាពាធ ក្នុងព្រះជន្មាយុ ៣៥ ឆ្នាំ ។
ព្រះសង្ឃវត្តមជ្ឈិមារាម (កណ្ដាល) ដែលនៅប្រចាំការក្នុងកម្មវិធីបុណ្យមួយនេះ បានប្រាប់វិទ្យុសំឡេងកម្ពុជាក្រោម ថា ពិធីបូជាសព ព្រះតេជព្រះគុណ ថាច់ រ៉េន នឹងធ្វើនៅ វេលាម៉ោង ១០ រាត្រី ថ្ងៃព្រហស្បតិ៍ ទី ១ ខែឧសភា នេះ នៅក្នុង វត្តមជ្ឈិមារាម (កណ្ដាល) ។
ព្រះតេជព្រគុណ ថាច់ រ៉េន ជាព្រះសង្ឃធម្មកថិក មួយអង្គល្បីខាងសម្ដែងព្រះធម៌ទេសនានៅក្នុងខេត្តព្រះត្រពាំង ដែលត្រូវ បាន គណៈសង្ឃខេត្តទទួលស្គាល់ និងបានផ្ដល់វិញ្ញាបនប័ត្រ ជាលើកដំបូង ។
ព្រះតេជព្រះគុណ ត្រឹង វ៉ាំង យុង ព្រះសង្ឃវត្តខេមររង្សី នាទីក្រុង សាន់ ហូស្សេ រដ្ឋកាលីហ្វញ៉ា ដែលទើប តែនិមន្តចេញ ពីកម្ពុជាក្រោម មកតាំងទីលំនៅៗទឹកដីសហរដ្ឋអាមេរិក នាពេលថ្មីៗ នេះ បានមានថេរដីកាប្រាប់វិទ្យុ សំឡេងកម្ពុជាក្រោម ថា ព្រះតេជព្រះគុណ សាសនត្ថេរ ថាច់ រ៉េន ជាអង្គធម្មកថិកដៃគូរក្នុងការសម្ដែងព្រះធម៌ ទេសនាសង្គាយនា គ្រែពីរជា មួយព្រះអង្គជារៀងរហូតមក នៅក្នុងខេត្តព្រះត្រពាំង នៅតាមពិធីបុណ្យទានធំ ដូចជា បុណ្យកឋិនទាន និងបុណ្យ បញ្ចុះ ខណ្ឌសីមា នៅតាមវត្តអារាមជាដើម ។
ព្រះតេជព្រះគុណ ត្រឹង វ៉ាំង យុង បានបន្តទៀតថា នៅក្នុងខែមេសា កន្លងទៅនេះ មុនពេលព្រះអង្គនិមន្តមកអាមេរិក ព្រះអង្គបានចេញមុខបវារណាបច្ច័យញាតិញោមនៅតាមបណ្ដាញសង្គម Facebook ដើម្បីព្យាបាលជំងឺព្រះតេជ ព្រះគុណ ថាច់ រ៉េន នៅមន្ទីរពេទ្យ នាទីក្រុងព្រនគរ ដែរ តែមិនអាចព្យាបាលជាសះស្បើយបាន ៕
ខាងក្រោមជារូបថតទិដ្ឋភាព នៃពិធីដង្ហែព្រះសព ព្រះតេជព្រះគុណ ថាច់ រ៉េន ប្រទក្សិណ ព្រះវិហារ ថ្ងៃទី ១ ខែមេសា ឆ្នាំ ២០១៤ ៕
