មេធាវី នឹងដាក់ពាក្យស្នើតុលាការ សុំឲ្យអតីតអ្នកកាសែតអាស៊ីសេរី បាននៅក្រៅឃុំ នៅសប្តាហ៍ក្រោយនេះ
មេធាវីការពារក្តីឲ្យអតីតអ្នកកាសែតអាស៊ីសេរី គឺលោកកែវ វន្នី បានបញ្ជាក់ប្រាប់វិទ្យុបារាំងអន្តរជាតិនៅព្រឹកនេះថា នៅសប្តាហ៍ក្រោយនេះ លោក នឹងដាក់ពាក្យស្នើទៅតុលាការក្រុងភ្នំពេញ ដើម្បីសុំឲ្យកូនក្តីរបស់លោកបាននៅក្រៅឃុំបណ្តោះអាសន្ន ។ ជាមួយ នឹងការបញ្ជាក់ដូច្នេះ លោកមេធាវីកែវ វន្នី ក៏ នឹងទៅជួបកូនក្តីរបស់លោកនៅពន្ធនាគារព្រៃស នៅថ្ងៃព្រហស្បតិ៍ស្អែក ដើម្បីពិភាក្សាគ្នាបន្ថែមជុំវិញរឿងនេះ ។
បើទោះបីជាអតីតអ្នកកាសែតវិទ្យុអាស៊ីសេរីពីរនាក់ គឺលោកអ៊ួន ឈិន និងលោកយាង សុជាមេត្តា ត្រូវបានតុលាការឃុំខ្លួននៅក្នុងពន្ធនាគារប៉ុន្មានថ្ងៃទៅហើយក្តី ក៏នៅសប្តាហ៍នេះ មេធាវីមិនទាន់អាចដាក់ពាក្យស្នើសុំឲ្យពួកគេបាន នៅក្រៅឃុំនៅឡើយទេ ។ មូលហេតុសំខាន់ បើតាមលោកមេធាវីកែវ វន្នី គឺដោយសារតែលោកមិនទាន់ទទួលបានសំណុំរឿង ពីចៅក្រមស៊ើបសួរ ពីព្រោះតែមានការផ្លាស់ប្តូរចៅក្រមស៊ើបសួរនេះ ។ មូលហេតុនៃការផ្លាស់ប្តូរនេះ គឺដោយសារតែចៅក្រមស៊ើបសួរ ដែលកាន់សំណុំរឿងអតីតអ្នកកាសែតអាស៊ីសេរី ជាចៅក្រមប្រចាំការនៅចុងសប្តាហ៍ ដូច្នេះហើយគេត្រូវផ្តល់សំណុំរឿងនេះ ទៅកាន់ចៅក្រមផ្សេងទៀត ដើម្បីចាត់ការបន្តទៅតាមនីតិវិធី ។ លោកមេធាវី កែវ វន្នី បានអះអាងថា ប្រសិនបើលោកទទួលបានសំណុំរឿង នៅក្នុងដៃនៅអំឡុងសប្តាហ៍នេះ លោក នឹងអាចរៀបចំពាក្យស្នើសុំនៅក្រៅឃុំទៅកាន់តុលាការនៅសប្តាហ៍ក្រោយ ។
លោកអ៊ួន ឈិន និងលោក យាង សុជាមេត្តា ដែលជាអតីតអ្នកកាសែតវិទ្យុអាស៊ីសេរី ត្រូវបានតុលាការឃុំខ្លួនបណ្តោះអាសន្ន នៅក្នុងពន្ធនាគារកាលពីចុងសប្តាហ៍មុន ដោយចោទប្រកាន់ពីបទប្រគល់ឲ្យរដ្ឋបរទេសនូវព័ត៌មានជាអាទិ៍ ដែលអាចធ្វើឲ្យអន្តរាយការការពារជាតិ តាមក្រមព្រហ្មទណ្ឌរបស់កម្ពុជា ។ ជាបទចោទដែលអាចឲ្យពួកគេប្រឈម នឹងការជាប់ពន្ធនាគារពី ៧ ឆ្នាំ ទៅ ១៥ ឆ្នាំ ។ បទចោទនេះទៀតសោត ក៏ត្រូវបានក្រុមអ្នកកាសែតកម្ពុជា មកពីចម្រុះអង្គភាពសារព័ត៌មានចាត់ទុកថា មានលក្ខណៈធ្ងន់ធ្ងរពេកហើយៗ វាកំពុងតែបង្កភាពភ័យខ្លាចដល់អ្នកសារព័ត៌មាន ដែលកំពុងបំពេញវិជ្ជាជីវៈ ក៏ដូចជាធ្វើឲ្យសេរីភាពសារព័ត៌មាននៅកម្ពុជាធ្លាក់ចុះផងដែរ ។ ហេតុដូច្នេះហើយ តាមរយៈលិខិតចំហមួយ ក្រុមអ្នកកាសែតបានស្នើសុំឲ្យតុលាការពិចារណាទម្លាក់ចោលបទចោទប្រកាន់លើអតីតអ្នកកាសែតទាំងពីររូប ។
ដោយឡែកសម្រាប់មេធាវីការពារក្តីវិញ លោក កែវ វន្នី ក៏យល់ថា ការចោទប្រកាន់ដ៏ធ្ងន់ធ្ងរមកអតីតអ្នកកាសែតទាំងពីរនេះ គឺជារឿងអយុត្តិធម៌ ។ អយុត្តិធម៌ ក៏ព្រោះថា បើផ្អែកតាមចម្លើយសារភាពរបស់កូនក្តីរបស់លោក គឺមិនមានធាតុផ្សំណាមួយស៊ីសង្វាក់គ្នា នឹងបទចោទប្រកាន់នេះទាល់តែសោះ ។ តែទោះបីជាយ៉ាងណាក៏ដោយ ចំពោះការដាក់ពាក្យស្នើសុំឲ្យ នៅក្រៅឃុំនៅសប្តាហ៍ក្រោយនេះ លោកកែវ វន្នី សង្ឃឹមថា តុលាការកម្ពុជា នឹងផ្តល់ភាពយុត្តិធម៌ដល់កូនក្តីរបស់លោក ដោយ នឹងសម្រេចដោះលែងពួកគេឲ្យមានសេរីភាពឡើងវិញ ៕ RFI
