វេទិកា ស្ដីពីកិច្ចព្រមព្រៀងសន្ដិភាពទីក្រុងប៉ារីស ក្រោមប្រធានបទ «ខ្មែរកម្ពុជាក្រោម ដើម្បីសន្ដិភាព»
ដោយ ស៊ឺន ចែងចើន| VOKK
សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ សហការណ៍ជាមួយអង្គការចំនួន ២ ទៀត គឺអង្គការយុវជនសន្តិភាព និងអង្គការវិទ្យាស្ថានសន្តិភាពកម្ពុជា នៅថ្ងៃទី ១១ មីនា ២០១៧ កន្លងទៅ បានរៀបចំវេទិកាមួយ ស្ដីពីកិច្ចព្រមព្រៀងសន្ដិភាពទីក្រុងប៉ារីស ក្រោមប្រធានបទ «ខ្មែរកម្ពុជាក្រោម ដើម្បីសន្ដិភាព» នៅទីស្នាក់ការសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ ស្ថិតនៅសហគមន៍បុរីព្រៃនគរ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
លោក លោក សឺន ជុំជួន ប្រធានបណ្តាញយុវជនខ្មែរកម្ពុជាក្រោម និងជានាយកកម្មវិធីនៃសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បានលើកឡើងនៅក្នងវេទិកានោះ ថា ការផ្ដើមគំនិតនេះ ធ្វើឡើងក្នុងគោលបំណងលើកស្ទួយឲ្យមានការគាំទ្រ និងការយល់ដឹងដល់ពលរដ្ខខ្មែរក្រោម ពីកិច្ចព្រមព្រៀងសន្តិភាព និងទ្រឹស្តីសន្តិភាព ដែលផ្សារភ្ជាប់ជាមួយកម្ពុជាក្រោម ។
ក្រៅពីផ្សព្វផ្សាយ ពីសារៈសំខាន់ និងគុណតម្លៃនៃកិច្ចព្រមព្រៀងសន្តិភាពទីក្រុងប៉ារីស ។ វេទិកាមួយនេះ ក៏បានដាក់បង្ហាញការតាំងពិពណ៌ ស្តីអំពីការយល់ដឹងកិច្ចព្រមព្រៀងសន្តិភាព រួមទាំងការចាក់បញ្ចាំងវីដេអូឯកសារ ដោយបាសម្ភាសន៍ ក្រុមអ្នកពាក់ព័ន្ធ ដែលបានចូលរួមផ្តួចផ្តើមឲ្យមានកិច្ចព្រមព្រៀងសន្តិភាពទីក្រុងប៉ារីសផង ។
គិតមកដល់ពេលនេះ កិច្ចព្រមព្រៀងសន្តិភាពទីក្រុងប៉ារីស មានអាយុកាល ២៥ ឆ្នាំមកហើយ ពោលគឺ កាលពីថ្ងៃទី ២៣ ខែតុលា ឆ្នាំ ១៩៩១ កិច្ចព្រមព្រៀងសន្តិភាពទីក្រុងប៉ារីស ត្រូវបានចុះហត្ថលេខា ដោយមានការចូលរួម ពីអគ្គលេខាធិការ នៃអង្គការសហប្រជាជាតិ ប្រមុខការទូតនៃប្រទេសចំនួន ១៨ និងភាគីខ្មែរទាំង ៤ ភាគីរួមមាន ១- ភាគីរបស់អតីតព្រះមហាក្សត្រ នរោត្តម សីហនុ ២- ភាគីអ្នកជាតិនិយម រណសិរ្សជាតិរំដោះប្រជាពលរដ្ឋខ្មែរ របស់លោកតា សឺន សាន ៣- ភាគីខ្មែរក្រហមរបស់ប៉ុល ពត និង ៤- ភាគីរដ្ឋកម្ពុជា របស់លោកនាយករដ្ឋមន្ត្រី ហ៊ុន សែន។
លោក សឺន ស៊ូប៊ែរ្តិ៍ ឧត្តមប្រឹក្សាផ្ទាល់ព្រះមហាក្សត្រ និងជាកូនប្រុសរបស់លោក សឺន សាន ដែលមនុស្សជាច្រើនស្គាល់ថា ជាពូជពង្សអ្នកសេ្នហាជាតិ ហើយក៏ជាភាគីមួយនៃកិច្ចព្រមព្រៀងក្រុងប៉ារីសផងនោះ បានឡើងធ្វើបទអន្តរាគមន៍ ដោយរំឭកពីកិច្ចខិតខំប្រឹងប្រែងមួយចំនួន ដែលធ្វើឡើង មុន នឹងភាគីជម្លោះនយោបាយកម្ពុជា ទាំង ៤ ភាគី បានចូលតុចរចា ដើម្បីចុះហត្ថលេខា លើកិច្ចព្រមព្រៀងសន្តិភាពទីក្រុងប៉ារីស នាថ្ងៃទី ២៣ តុលា ឆ្នាំ ១៩៩១ ។
ទាក់ទិន នឹងប្រាធានបទ ទ្រឹស្តីសន្តិភាពនៃកិច្ចព្រមព្រៀងទីក្រុងប៉ារីស ផ្សារភ្ជាប់ជាមួយកម្ពុជាក្រោម ។ លោក សឺន ស៊ូប៊ែរ្តិ៍ លើកឡើងថា កិច្ចព្រមព្រៀងទីក្រុងប៉ារីសនេះ មិនមានពាក់ព័ន្ធ និងគ្មានគុណតម្លៃចំពោះពលរដ្ឋខ្មែរក្រោមឡើយ ។
លោកបានមានប្រសាសន៍ដោយបញ្ជាក់ថា ខ្មែរក្រោមដែលត្រូវការសិទ្ធិសម្រេចវាសនាខ្លួនដោយខ្លួនឯងនោះ គឺចួលរួមសកម្មភាពដោយធ្វើការតស៊ូមតិ ស្របតាមគោលការណ៍សិទ្ធិមនុស្ស ។ ក្នងន័យនេះ លោកចង់ឲ្យពលរដ្ឋខ្មែរក្រោមគ្រប់រូប ចូលរួមជាមួយចលនាណា ដែលតស៊ូដោយសន្តិវិធី និងអហិង្សា ក្នុងនោះមានសហព័ន្ធខ្មែរកម្ពុជាក្រោមជាដើម ដែលបច្ចុប្បន្នកំពុងធ្វើសកម្មភាព នៅលើឆាកអន្តរជាតិ ដើម្បីទាមទារសិទ្ធិសម្រេចវាសនាខ្លួនដោយឯងជូនពលរដ្ឋខ្មែរក្រោម នៅក្នុងស្រុក ។
គួររំឭកថា កិច្ចព្រមព្រៀងសន្តិភាពទីក្រុងប៉ារីសនោះ បាននាំឲ្យកម្ពុជារៀបចំការបោះឆ្នោតជាតិ នៅឆ្នាំ ១៩៩៣ ជាថ្ងៃដែលបាននាំមកនូវលទ្ធិប្រជាធិបតេយ្យ សន្តិភាព ការផ្សះផ្សាបង្រួបបង្រួមជាតិ ឯកភាពជាតិ អធិបតេយ្យភាព ឯករាជ្យភាព អព្យាក្រឹតភាព និងបូរណភាពទឹកដីកម្ពុជា សម្រាប់ខ្មែរគ្រប់ជំនាន់ ៕
រូបភាពខ្លះៗ នៃវេទិកាមួយ ស្ដីពីកិច្ចព្រមព្រៀងសន្ដិភាពទីក្រុងប៉ារីស ក្រោមប្រធានបទ “ខ្មែរកម្ពុជាក្រោម ដើម្បីសន្ដិភាព” ។ រូបថតៈ ស៊ឺន ចែងចើន
Comments are closed.