ដោយ យន់ សាមៀន | RFA Khmer
សហគមន៍ខ្មែរកម្ពុជាក្រោម នៅក្នុង និងក្រៅប្រទេស ស្នើរដ្ឋាភិបាលរបស់លោក ហ៊ុន សែន ឱ្យពិចារណាប្ដឹងតុលាការអន្តរជាតិ ដើម្បីទាមទារទឹកដីកម្ពុជាក្រោម មកឲ្យកម្ពុជាគ្រប់គ្រងឡើងវិញ នៅពេលខាងមុខនេះ ។ សំណើនេះ ធ្វើឡើងស្របពេលដែលខ្មែរក្រោមនៅទូទាំងពិភពលោក បានប្រារព្ធខួបលើកទី ៧១ ឆ្នាំ នៃថ្ងៃដែលបារាំងបានកាត់ទឹកដីខ្មែរក្រោម ទៅឲ្យវៀតណាម គ្រប់គ្រងទាំងខុសច្បាប់ ។
តំណាងមេដឹកនាំអង្គការ និងសមាគមខ្មែរកម្ពុជាក្រោម ក្នុងទិវាបាត់បង់ទឹកដីកម្ពុជាក្រោម កាលពីថ្ងៃទី ៤ មិថុនា បានប្តេជ្ញាបន្តធ្វើយុទ្ធនាការ ទាមទារសិទ្ធិស្វ័យសម្រេចវាសនាដោយខ្លួនឯងឲ្យខ្មែរក្រោម នៅលើទឹកដីកំណើតទៅថ្ងៃអនាគត ហើយឈានទៅទាមទារទឹកដីខ្មែរកម្ពុជាក្រោមមកវិញ ។ លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោម ដែលមានមូលដ្ឋាននៅកម្ពុជា ប្រាប់អាស៊ីសេរីថា រដ្ឋាភិបាលកម្ពុជាបច្ចុប្បន្ន មានកាតព្ធកិច្ចបើកការស៊ើបអង្កេត តវ៉ាទៅតុលាការអន្តរជាតិ ដើម្បីទាមទារដីខ្មែរពីវៀតណាមមកវិញ ។ លោកអះអាងថា កម្ពុជាមានភស្តុតាងគ្រប់គ្រាន់ ដើម្បីធ្វើជាសំអាង ក្នុងការប្តឹងទាមទារដីខ្មែរពីវៀតណាមមកវិញ ។ លោកថា ភស្តុតាងសាមញ្ញបំផុតនោះ គឺឈ្មោះទីកន្លែង ដូចជាខេត្ត ស្រុក ឃុំ ភូមិជាដើម ពីព្រោះទោះបីជាវៀតណាម ខំប្រឹងប្តូរឈ្មោះទីកន្លែងជាភាសាខ្មែរទៅជាឈ្មោះភាសាវៀតណាម ក៏ដោយ ក៏មិនអាចបិទបាំងប្រវត្តិដើមពិតបានដែរ៖ «យើងអាចទាមទារបាន ប៉ុន្តែវាឋិតនៅលើឆន្ទៈរបស់រដ្ឋាភិបាលចង់ទាមទារ ឬក៏មិនទាមទារ ។ យើងត្រូវតែបង្ហាញថា តើភូមិសាស្ត្រនោះ វាយ៉ាងម៉េច? បើយើងនិយាយភស្តុតាងប្រវត្តិសាស្ត្រ ផែនទី គឺខ្មែរមានគ្រប់គ្រាន់» ។
លោក ថាច់ សេដ្ឋា ថា ការតស៊ូទាមទារដីកម្ពុជាក្រោមមកវិញ នឹងជំរុញឲ្យពលរដ្ឋជំនាន់ក្រោយបានដឹងពីការបាត់បង់ទឹកដីខ្មែរ ហើយកីជាការបង្ហាញការដឹងគុណដល់វីរជនខ្មែរក្រោម ដែលបានតស៊ូបូជាជីវិត ដើម្បីការពារទឹកដីមាតុភូមិខ្មែរ ។
ចំណែកប្រធាននាយកដ្ឋានព័ត៌មាននៃសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិកព្រះតេជព្រះគុណ ស៊ឺង យ៉ឹងរតនា មានថេរដីកាគាំទ្រ សំណើឲ្យរដ្ឋាភិបាលកម្ពុជា ពិចារណាតវ៉ាទាមទារដីខ្មែរពីវៀតណាមមកវិញ ។ ព្រះអង្គបន្តថា សហព័ន្ធខ្មែរកម្ពុជាក្រោម ក៏ នឹងបន្តធ្វើយុទ្ធនាការ ទាមទារសិទ្ធិស្វ័យសម្រេចជោគវាសនាដោយខ្លួនឯង សម្រាប់ពលរដ្ឋខ្មែរក្រោម ដែលកំពុងរស់នៅលើទឹកដីកំណើតជាបន្តទៀត៖ «ទឹកដីខ្មែរកម្ពុជាក្រោម ខ្មែរក្រោមមិនមែនជាអ្នកបាត់បង់ទេ ។ ទឹកដីខ្មែរក្រោម ជាទឹកដីរបស់ព្រះរាជាណាចក្រកម្ពុជា ជាអ្នកបាត់បង់ ដូច្នោះហើយរដ្ឋាភិបាលកម្ពុជាគ្រប់សម័យកាលទាំងអស់ត្រូវទាមទារអន្តរជាតិ ដើម្បីទាមទារទឹកដីខ្មែរកម្ពុជាក្រោមមកវិញ» ។
ពាក់ព័ន្ធ នឹងសំណើសុំឲ្យរដ្ឋាភិបាលខ្មែរ ប្តឹងទាមទារទឹកដីខ្មែរមកវិញនេះដែរ ប្រធានផែនការ សហព័ន្ធខ្មែរកម្ពុជាក្រោម លោក ត្រឹង ម៉ាន់រិន ប្រាប់អាស៊ីសេរីថា កម្ពុជា នឹងមានពេល ដើម្បីទាមទារដីខ្មែរក្រោម ពីវៀតណាមមកវិញ ប្រសិនបើវៀតណាម ធ្លាក់ចូលក្នុងវិបត្តិ នឹងប្រទេសចិន ឬមានការបះបោរងើបឡើងរបស់ពលរដ្ឋវៀតណាម ប្រឆាំង នឹងរដ្ឋាភិបាល កុម្មុយនិស្តវៀតណាម៖ «វៀតណាម នឹងចិនអត់ត្រូវគ្នាទេ ជាសត្រូវ ទីពីរទៀតយួនមិនអាច នឹងអ៊ីចឹងបានទេ ដោយសារពលរដ្ឋយួនមិនសប្បាយចិត្ត» ។
ឆ្លើយតប នឹងសំណើឲ្យរដ្ឋាភិបាលកម្ពុជាពិចារណាទាមទារទឹកដីខ្មែរមកពីវៀតណាម មកវិញនេះ ទេសរដ្ឋមន្ត្រី ទទួលបន្ទុកបេសកកម្មពិសេសកិច្ចការព្រំដែន លោក វ៉ា គឹមហុង ប្រាប់អាស៊ីសេរី កាលពីថ្ងៃទី ៦ មិថុនាថា លោកមិនបកស្រាយថា តើរដ្ឋាភិបាលកម្ពុជា មានភស្តុតាងគ្រប់គ្រាន់ ដើម្បីទាមទារទឹកដីខ្មែរក្រោម មកវិញនោះទេ ។
លោកស្នើឲ្យ លោក ថាច់ សេដ្ឋា ពិនិត្យមើលភស្តុតាង និងច្បាប់ឲ្យបានគ្រប់ជ្រុងជ្រោយ មុន នឹងដាក់សំណើទាមទារខ្មែរក្រោមពីវៀតណាមមកវិញ៖ «កុំនិយាយថា ដឹងពីមាត់មួយទៅមាត់មួយ ។ ទៅដល់តុលាការគេទាររកឯកសារណា» ។
ដោយឡែក មន្រ្តីនាំពាក្យក្រសួងការបរទេសកម្ពុជា លោក កុយ គួង មិនឆ្លើយតប នឹងសំណួររបស់អាស៊ីសេរីថា តើក្រសួង នឹងពិនិត្យសំណើរបស់សមាគមខ្មែរកម្ពុជាក្រោម សើ្នឲ្យរដ្ឋាភិបាល ទាមទារយកដីខ្មែរក្រោមមកវិញទេ កាលពីថ្ងៃទី ៦ ខែមិថុនា ។
នាយកប្រតិបត្តិសហគមន៍ខ្មែរកម្ពុជាក្រោម លោក ថាច់ សេដ្ឋា លើកឡើងថា ទឹកដីកម្ពុជាក្រោមជាទឹកដីរបស់កម្ពុជា ដូច្នោះរដ្ឋាភិបាលកម្ពុជាត្រូវមានតួនាទី ដើម្បីទាមទារមកវិញ ។ លោកសង្កេតឃើញថា រដ្ឋាភិបាលកន្លងមកមិនមានចេតនាណាមួយ ដើម្បីទាមទារទឹកដីខ្មែរក្រោមមកវិញទេ ។ លោកថា សហគមន៍លោក នឹងបន្តទាមទារសិទ្ធិជាម្ចាស់ដើមកំណើតសម្រាប់ ពលរដ្ឋខ្មែរក្រោមជាបន្តទៅទៀត៖ «កម្ពុជាជាទឹកដីរបស់ព្រះរាជាណាចក្រកម្ពុជា ជារួមទាំងអស់គ្នា មិនមែនដោយឡែក កម្ពុជាផ្សេង ខ្មែរក្រោមផ្សេងនោះទេ ។ អ៊ីចឹងការទទួលខុសត្រូវជាប្រវត្តិសាស្ត្រ សិទ្ធិទាមទារជារបស់អស់លោក» ។
អាណានិគមនិយមបារាំងបានកាត់ទឹកដីខ្មែរក្រោម មានចំនួន ២១ ខេត្ត ទៅឲ្យវៀតណាមទាំងខុសច្បាប់ កាលពីថ្ងៃទី ៤ មិថុនា ឆ្នាំ ១៩៤៩ ដោយគ្មានការយល់ព្រមពីកម្ពុជា ។ អង្គការសមាគមខ្មែរកម្ពុជាក្រោមថា បច្ចុប្បន្ននេះ វៀតណាមកំពុងធ្វើទុក្ខបុកម្នេញពលរដ្ឋខ្មែរក្រោម លើគ្រប់វិស័យ ហើយខ្មែរក្រោមកំពុងរស់នៅយ៉ាងវេទនា ៕
