(សារព័ត៌មាន ព្រៃនគរ) ពលរដ្ឋខ្មែរក្រោម ប្រកាសថា ពួកគេនឹងធ្វើបាតុកម្មនៅមុខស្ថានទូតវៀតណាម ទូទាំងពិភពលោក ដើម្បី ជម្រុញឲ្យរដ្ឋាភិបាលវៀតណាមដោះលែងព្រះសង្ឃ និងពលរដ្ឋខ្មែរក្រោមនៅ កម្ពុជាក្រោម ។ បាតុកម្មដែល នឹងរៀបចំធ្វើនេះ បន្ទាប់ពី តុលាការបក្សកុម្មុយនិស្តវៀតណាម បានផ្ដន្ទា ទោស ព្រះសង្ឃ និងពល រដ្ឋខ្មែរក្រោម នៅក្នុង ទឹកដីខេត្តឃ្លាំង កាលពីថ្ងៃទី ២៥ និង ២៧ ខែកញ្ញា កន្លងទៅនេះ ឲ្យជាប់គុក ម្នាក់ៗពី ១០ ខែ ទៅ ៦ ឆ្នាំ ។
អង្គការសមាគមខ្មែរកម្ពុជាក្រោម ដែលមានមូលដ្ឋាននៅកម្ពុជា គ្រោងនឹងធ្វើបាតុកម្មនៅមុខស្ថានទូតវៀតណាម នៅចុងសប្ដាហ៍ក្រោយ បន្ទាប់ពីពិធីបុណ្យភ្ជុំបិណ្ឌ ដើម្បីទាមទារឲ្យអាជ្ញាធរវៀតណាម ដោះលែងព្រះសង្ឃ ២ អង្គ និងពលរដ្ឋខ្មែរក្រោម ៦ នាក់ ឲ្យមានសេរីភាព ។
ប្រធានបណ្ដាញយុវជនខ្មែរកម្ពុជាក្រោម លោក សឺន ជុំជួន មានប្រសាសន៍នៅថ្ងៃទី ១ ខែតុលា ថា អង្គការសមាគមខ្មែរកម្ពុជាក្រោម បានដាក់ញត្តិរួចហើយទៅស្ថានទូតចំនួន ៥ ប្រចាំនៅកម្ពុជា រួមមានស្ថានទូតសហរដ្ឋអាមេរិក អូស្ត្រាលី អាល្លឺម៉ង់ ស៊ុយអែត និងចក្រភពអង់គ្លេស ដើម្បីសុំឲ្យមន្ត្រីទូតទាំងនោះជួយអន្តរាគមន៍នូវរាល់អំពើរំលោភសិទ្ធិមនុស្សរបស់អាជ្ញាធរវៀតណាម មកលើពលរដ្ឋខ្មែរក្រោម ។
តាមការអះអាងរបស់លោក សឺន ជុំជួន ថា ពលរដ្ឋខ្មែរក្រោមប្រមាណ ២០០ នាក់ គ្រោងនឹងធ្វើបាតុកម្មនៅមុខស្ថានទូតវៀតណាម ប្រចាំនៅកម្ពុជា និងមុខក្រសួងការបរទេស ដើម្បីទាមទារឲ្យមានការដោះលែងពលរដ្ឋខ្មែរទាំង ៨ នាក់នោះ៖ «ធ្វើបាតុកម្មហ្នឹង គឺយើងទាមទាររកយុត្តិធម៌ជូនជនរងគ្រោះខ្មែរកម្ពុជាក្រោម ដែលត្រូវបានតុលាការប្រជាជនវៀតណាម ទើបតែកាត់ទោសថ្មីៗ»។
កាលពីថ្ងៃទី ២៥ និងថ្ងៃទី ២៧ ខែកញ្ញា តុលាការប្រជាជនវៀតណាម ខេត្តឃ្លាំង បានបើកសវនាកាត់ទោសព្រះសង្ឃចំនួន ២ អង្គ និងពលរដ្ឋខ្មែរក្រោមចំនួន ៧ នាក់ ឲ្យជាប់ពន្ធនាគារពី ១០ ខែទៅ ៦ ឆ្នាំ ដោយចោទប្រកាន់ពីបទបង្កឲ្យមានការខូចខាតសណ្ដាប់ធ្នាប់សាធារណៈ ការផ្តល់ផ្ដល់សម្ភាសន៍ដល់ វិទ្យុ សំឡេងកម្ពុជាក្រោម និង វិទ្យុអាស៊ីសេរី ទាក់ទងនឹងសហព័ន្ធខ្មែរកម្ពុជាក្រោម ដែលមានមូលដ្ឋាន នៅសហរដ្ឋអាមេរិក និងពីបទប៉ងរត់ចេញទៅក្រៅប្រ ទេសដើម្បីប្រឆាំងរដ្ឋាភិបាលវៀតណាម ។
ព្រះសង្ឃ ២ និង ពលរដ្ឋខ្មែរក្រោមទាំង ៧ រូបដែលត្រូវតុលាការវៀតណាមផ្ដន្ទាទោសនេះ ស្ត្រី អ្នក ភូមិព្រៃជាប់ម្នាក់ ត្រូវបានកាត់កំបាងមុខ ព្រោះគាត់បានភៀសខ្លួនចេញទៅ ក្រៅប្រ ទេសមុន ពេល អាជ្ញាធរវៀតណាមចាប់ខ្លួន ។ បច្ចុប្បន្ន មានព្រះសង្ឃ ២ អង្គ និង ពលរដ្ឋខ្មែរ ក្រោម ៦ រូប ប៉ុណ្ណោះ ដែលកំពុងជាប់ពន្ធនាគារ ។
កាលពីថ្ងៃទី ០៤ ខែមិថុនា កន្លងទៅនេះ ព្រះសង្ឃ និង ពលរដ្ឋខ្មែរក្រោម បានធ្វើមហាបាតុកម្មទូទាំង ពិភពលោក ដើម្បីទារឲ្យវៀតណាមដោះលែងព្រះសង្ឃ និងពលរដ្ឋខ្មែរក្រោមទាំងនេះផងដែរ ។ ការធ្វើ នោះ ស្របពេលដែលព្រះសង្ឃ និងពលរដ្ឋខ្មែរក្រោមទាំងនេះ ត្រូវបានរដ្ឋាភិបាលវៀតណាមចាប់ផ្សឹក និង ដាក់គុក កាលពីខែឧសភា កន្លងទៅនេះ ។
សហព័ន្ធខ្មែរក្ពុជាក្រោម ដែលមានមូលដ្ឋាន នៅសហរដ្ឋអាមេរិក បានចេញសេចក្ដីថ្លែងការណ៍ និងធ្វើ របាយការណ៍ស្ដីពីបញ្ហានេះ ទៅសហគន៍ អន្តរជាតិជាបន្តបន្ទាប់ ដើម្បីជម្រុញឲ្យវៀតណាមដោះលែង ព្រះសង្ឃ និងពលរដ្ឋខ្មែរក្រោមទាំងនេះ ផងដែរ ។
តាមប្រភពព័ត៌មាន ពី លោក ថាច់ សិរា នៅប្រទេសកាណាដា ដែលការិយាល័យវិទ្យុសំឡេងកម្ពុជា ក្រោម បានទទួលនៅថ្ងៃទី ០១ ខែតុលា នេះ ថា សហព័នខ្មែរកម្ពុជាក្រោម គ្រោងនឹងដឹកនាំពលរដ្ឋ ខ្មែរក្រោមដែលរស់នៅក្រៅប្រទេស ចេញធ្វើបាតុកម្មនៅមុខស្ថានទូតវៀតណាម នៅជុំវិញពិភពលោកក្នុង ពេលឆាប់ខាងមុខមុខនេះ ។
កាលពី ឆ្នាំ ២០០៧ ព្រះសង្ឃខ្មែរក្រោមប្រមាណ ១០០ អង្គ បានធ្វើបាតុកម្មនៅមុខស្ថានទូតវៀតណាម ប្រចាំនៅកម្ពុជា ដើម្បីទាមទារឲ្យអាជ្ញាធរវៀតណាម ដោះលែងពលរដ្ឋខ្មែរកម្ពុជាក្រោម ៥ នាក់ ដែលត្រូវបានចាប់ និងឃុំខ្លួនក្នុងបទចោទស្រដៀងគ្នានឹងការចាប់ខ្លួនព្រះសង្ឃ និងពលរដ្ឋខ្មែរទាំង ៩ នាក់លើកនេះ ។ បាតុកម្មនោះ សមត្ថកិច្ចបានវាយបង្ក្រាបទៅលើព្រះសង្ឃជាក្រុមបាតុករយ៉ាងចាស់ដៃ ដែលធ្វើឲ្យព្រះសង្ឃជាង ១០ អង្គ មានរបួសស្រាល និងធ្ងន់ ហើយក្រោយមកមានព្រះសង្ឃមួយអង្គក្នុងចំណោមនោះ ត្រូវបានឃាតកធ្វើគត់ដោយមិនដឹងមូលហេតុ ៕
