ដោយៈ សារព័ត៌មាន ព្រៃនគរ
បាងកក៖ នៅថ្ងៃទី ១២ ខែឧសភា នេះ សមណនិស្សិតខ្មែរក្រោមចំនួន ១៣ អង្គ បានទទួលសញ្ញាបត្រថ្នាក់ បរិញ្ញាបត្រ និងអនុបណ្ឌិតពីសកលវិទ្យាល័យមហាចុឡាឡុងករណ៍រាជវិទ្យាល័យ នៅប្រទេសថៃ ។ ពិធីប្រគល់ និងទទូលសញ្ញា ប័ត្រត្រូវបានធ្វើឡើងនៅមជ្ឈមណ្ឌលសកលវិទ្យាល័យមហាចុឡាឡុងករណ៍រាជវិទ្យាល័យ ឋិតនៅ ក្នុងស្រុកវាំងណយ ខេត្តអយុធ្យា ។
ព្រះតេជព្រះគុណ គឹម កឿង សមណនិស្សិតខ្មែរក្រោមដែលកំពុងសិក្សនៅក្នុងប្រទេស បានប្រាប់ សារព័ត៌មាន ព្រៃនគរ ព្រឹកនេះថា សមណនិស្សិតទាំង ១៣ អង្គនោះ ១១ អង្គ បានទទួលថ្នាក់បរិញ្ញា និង ២ អង្គ ទទួលថ្នាក់ អនុបណ្ឌិត ។
ព្រះតេជព្រះគុណ បានបន្តទៀតថា នៅក្នុងពិធីដែលមានមនុស្សមកចូលរួមរាប់ពាន់អ្នកនៅកក្នុងបរិវេណសកលវិទ្យា ល័យនោះ សាលារៀនក៏បានអនុញ្ញាតឲ្យសមណនិស្សិតខ្មែរក្រោមតាំងពិពណ៌វប្បធម៌ខ្មែរ ក្នុងនោះ មានការដាក់ តាំងរូបព្រះវិហារវត្តសម្បួររង្សី ដែលមានអាយុកាលជិត ២.០០០ ឆ្នាំនៅកម្ពុជាក្រោម ដើម្បីបង្ហាញដល់អ្នកចូល រួមផងដែរ ។
ព្រះតេជព្រះគុណ គឹម កឿង បានមានថេរដីកាបន្តទៀតថា ក្នុងឱកាសសមណនិស្សិតខ្មែរក្រោមទទួលសញ្ញាបត្រ នេះ មូលនិធីរបស់ព្រះអង្គដែលជាអង្គការមួយតំណាងឲ្យសមណនិស្សិតខ្មែរក្រោមចេញមកពីកម្ពុជាក្រោមនោះបាន ធ្វើបណ្ណសរសើរប្រគេនដល់សមាជិករបស់ខ្លួន ផងដែរ ។
សូមបញ្ជាក់ថា សព្វថ្ងៃ មានសមណនិស្សិតខ្មែរក្រោម ប្រមាណជិត ២០០ អង្គ កំពុងសិក្សានៅតាម សកលវិទ្យា ល័យនានា ក្នុងប្រទេសថៃ ក្នុងនោះ ភាគច្រើន នៅសកលវិទ្យាល័យមហាចុឡាឡុងករណ៍រាជវិទ្យាល័យ ។
កាលពីថ្ងៃទី ៤ ខែឧសភា កន្លងទៅនេះ សម្ព័ន្ធសមណនិស្សិត-និស្សិតខ្មែរកម្ពុជាក្រោមដែល មានមូលដ្ឋាននៅ ប្រទេសកម្ពុជា បានផ្ដល់អាហារូបករណ៍បញ្ជូនសមណនិស្សិតខ្មែរក្រោមចំនួន ១៤ អង្គទៅបន្តការសិក្សាថ្នាក់បរិញ្ញា នៅក្នុងប្រទេសថៃ ផងដែរ ៕
