ពលរដ្ឋខ្មែរចុះទៅលក់គ្រែនៅកម្ពុជាក្រោម បារម្ភអាជ្ញាធរវៀតណាមចាប់ខ្លួន
(សារព័ត៌មាន ព្រៃនគរ ) នៅពេលថ្មីៗនេះ ពលរដ្ឋខ្មែរជាច្រើននៅតាមខេត្តមួយចំនួនជាប់ព្រំដែនវៀតណាម ដូចជាខេត្តកំពង់ចាម និង តាកែវ ជាដើម បាននាំគ្នាចុះទៅលក់តុតាំង និងគ្រែ នៅកម្ពុជាក្រោម ព្រោះជីវភាពខ្វះខាត ។ ឈ្មួញទាំងនេះ បារម្ភត្រូវ អាជ្ញាធរវៀតណាម នៅខេត្តព្រះត្រពាំងចាប់ខ្លួន និងត្រូវបានអាជ្ញាធរវៀតណាមហាម បន្ត ដើរលក់នៅតាមភូមិស្រុក នៅដែនដីកម្ពុជាក្រោម ព្រមទាំងហាមពលរដ្ឋខ្មែរក្រោមទិញរបស់ដែលនាំមក ពីប្រទេសកម្ពុជាទាំងនោះ ។
ពលរដ្ឋខ្មែរចុះទៅលក់គ្រែនៅកម្ពុជាក្រោម បារម្ភអាជ្ញាធរវៀតណាមចាប់ខ្លួន
ពលរដ្ឋខ្មែរក្រោមម្នាក់ នៅខេត្តព្រះត្រពាំង បានប្រាប់វិទ្យុសំឡេងកម្ពុជាក្រោម នៅថ្ងៃទី ៣០ ខែសីហា ថា បច្ចុប្បន្ន នេះ មានពលរដ្ឋខ្មែរនៅប្រទេសកម្ពុជាជាច្រើន បានចុះទៅលក់តុតាំង និង គ្រែឈើ នៅស្រុកគាត់ ជាបន្តបន្ទាប់ ព្រោះជីវិភាពក្រីក្រ និងលក់របស់ទាំងនេះនៅក្នុងស្រុកខ្មែរមិនដាច់ ។
លោកបានបន្តទៀតថា ពលរដ្ឋខ្មែរក្រោមជាច្រើនបាននាំគ្នាទិញគ្រែឈើទាំងនេះ ព្រោះថា របស់ទាំងនេះល្អ និង តម្លៃថោកជាងរបស់ដែលយួនផលិតនៅកម្ពុជាក្រោម ។
ព្រះសង្ឃមួយអង្គនៅស្រុកថ្កូវ បានមានថេរដីកាថា គ្រែដែលនាំមកពីប្រទេសកម្ពុជា មួយគ្រឿងតម្លៃតែប្រមាណ ១ លានដុងប៉ុណ្ណោះ តែបើទិញរបស់វៀតណាមវិញ វាអាចតម្លៃ ២ លានដុង ។ ក្រៅពីទិញសម្រាប់ប្រើប្រាស់នៅក្នុង ផ្ទះ មានពលរដ្ឋខ្មែរក្រោមខ្លះបានទិញគ្រែ និងតុតាំងទាំងនោះ ទុកសម្រាប់លក់បន្តដល់ខ្មែរក្រោមឯទៀតផងដែរ ។
កាលពីថ្ងៃអង្គារ ទី ២៧ ខែសីហា នៅក្នុងកិច្ចប្រជុំមួយរបស់រដ្ឋាភិបាលវៀតណាម នៅស្រុកថ្កូវ ខេត្តព្រះត្រពាំង តំណាងអាជ្ញាធរវៀតណាម បាននិយាយដាស់តឿនដល់ពលរដ្ឋខ្មែរក្រោមថា កុំឲ្យនាំគ្នាទិញរបស់របរដែលពលរដ្ឋខ្មែរនាំមកពីប្រទេសកម្ពុជា ។ តំណាងអាជ្ញាធរវៀតណាមរូបនេះបានបន្តទៀតថា ការដែលពលរដ្ឋខ្មែរមកលក់របស់នៅកម្ពុជាក្រោម ពេលនេះ វាអាចបណ្ដាលមកពីស្រុកខ្មែរបច្ចុប្បន្ន កំពុងតែជ្រួលច្របល់រឿងបោះឆ្នោត និងថា ឲ្យពលរដ្ឋខ្មែរក្រោមប្រុងស្មារតី ប្រយ័ត្នចាញ់បោក ឈ្មួញទាំងនេះ ។
តំណាងអាជ្ញាធរវៀតណាម បានថ្លែងថា៖ “ឥឡូវនេះ បែរជាមានមនុស្សមកពីប្រទេសកម្ពុជា ដើរលក់គ្រែ តុតាំង ពេញស្រុក ។ អស់ពីលក់កន្លែងនេះ ទៅលក់កន្លែងណោះ ដែលពីមុនមកមិនធ្លាប់មានទេ ។ នេះ មកពីស្ថានការណ៍អស្ថិរភាព នៅកម្ពុជា បែរជាមានរឿងយ៉ាងនេះ ។ ចឹងទេ សូមឲ្យបងប្អូនយើងប្រុង ប្រយ័ត្នឲ្យមែននែន ។ ប្រយត្នពួកវាបោកប្រាស់” ។
ពលរដ្ឋខ្មែរក្រោម បានលើកឡើងថា ជនជាតិយួននៅស្រុកខ្មែរខុសច្បាប់ រដ្ឋាភិបាល លោក ហ៊ុន សែន មិនដែល ចាប់បញ្ជូនទៅវៀតណាមវិញទេ តែពលរដ្ឋខ្មែរគ្រាន់តែចុះទៅលក់គ្រៃនៅកម្ពុជាក្រោម ដោយមានលិខិតឆ្លងដែនត្រឹម ត្រូវបែរជារដ្ឋាភិបាលវៀតណាមរារាំងទៅវិញ ៕
