លោក គឹម ប៊ុក កែវ ជាសហស្ថាបនិក “រណសិរ្សរំដោះកម្ពុជាក្រោម” ក្នុងឆ្នាំ ១៩៧៦ បានទទួលមរណភាពក្នុងជន្មាយ ៦៩ ឆ្នាំ
ដោយ ស៊ឺន ចែងចើង និង ថាច់ ប្រីជា គឿន
លោក គឹម ប៊ុក កែវ ជាអតីតមេដឹកនាំម្នាក់នៃ រណសិរ្សសេរីភាពជាតិរំដោះខ្មែរកម្ពុជាក្រោម នៅដែនដីកម្ពុជាក្រោម កាលពីឆ្នាំ ១៩៧៦ ទើបតែទទួលអនិច្ចកម្ម នៅព្រឹកថ្ងៃសុក្រ ៣ រោច ខែស្រាពណ៍ ឆ្នាំជូត ទោស័ក ព. ស. ២៥៦៤ ត្រូវ នឹងថ្ងៃទី ៧ ខែសីហា គ. ស. ២០២០ ក្នុងជន្មាយុ ៦៩ ឆ្នាំ ដោយរោគាពាធ នៅទីស្នាក់ការកណ្តាលនៃមិត្តសមាគមខ្មែរកម្ពុជាក្រោម នារាជធានីភ្នំពេញ ព្រះរាជាណាចក្រកម្ពុជា ។ សហព័ន្ធខ្មែរកម្ពុជាក្រោម និងអង្គការ សមាគមខ្មែរកម្ពុជាក្រោមទាំងអស់នៅក្នុងប្រទេសកម្ពុជា បានរួមគ្នារៀបចំពិធីបុណ្យឈាបនកិច្ចនេះ នៅក្នុងវត្តសាមគ្គីរង្សី នាសង្កាត់ស្ទឹងមានជ័យ ខណ្ណមានជ័យ រាជធានីភ្នំពេញ ។
លោក គឹម ប៊ុក កែវ ប្រសូត នៅថ្ងៃទី ២២ ខែវិច្ឆិកា ឆ្នាំ ១៩៥១ នៅភូមិបន្ទាយក្រ ឃុំបឹង្រៃ ស្រុកថ្កូវ ខេត្តព្រះត្រពាំង ដែនដីកម្ពុជាក្រោម ។
យោងតាមគណៈកម្មការបុណ្យ ពិធីបុណ្យឈបនកិច្ច លោក គឹម ប៊ុក កែវ នឹងប្រារព្ធចាប់ពីថ្ងៃទី ៧ ខែសីហា ដល់ថ្ងៃទី ៩ ខែសីហា ឆ្នាំ ២០២០ ។ នៅវេលាម៉ោង ២ រសៀលថ្ងៃអាទិត្យទី ៩ ខែសីហា នឹងដង្ហែទៅបូជា នៅវត្តសិរីសោភា ហៅវត្តអង្គតាម៉ិញ នាទីក្រុងភ្នំពេញ ។
សូមបញ្ជាក់ថា លោក គឹម ប៊ុក កែវ អាយុ ៦៩ ឆ្នាំ ជាមេដឹកនាំម្នាក់ក្នុងចលនាតស៊ូរំដោះទឹកដីកម្ពុជាក្រោម មានឈ្មោះថា “រណសិរ្សសេរីភាពជាតិរំដោះខ្មែរកម្ពុជាក្រោម” ដែលបានងើបឡើងរំដោះទឹកដីកម្ពុជាក្រោមដោយកម្លាំងប្រដាប់អាវុធនៅក្នុងខេត្តព្រះត្រពាំង កាលពី ៤៤ ឆ្នាំមុន ។ រណសិរ្សនេះ បានក្រោកឡើងតស៊ូរំដោះទឹកដីកម្ពុជាក្រោម នៅថ្ងៃទី ១៦ វិច្ឆិកា ឆ្នាំ ១៩៧៦ ដែលមាន លោក សឺន ញ៉ ជាប្រធាន និងលោក លោក កៀង ហ៊ាន ជាអនុប្រធាន ។
បន្ទាប់ពីបានវាយដណ្ដើមយកទីតាំង និងកាន់កាប់ខេត្តព្រះត្រពាំង ជាពិសេស នៅក្នុងស្រុក កញ្ចោងបានមួយរយៈខ្លី រដ្ឋាភិបាលយួនក៏បានប្រមូលកម្លាំងប្រដាប់អាវុធតូចធំពីខេត្តនានា ជួយប្រយុទ្ធបណ្ដាលឲ្យចលនាតស៊ូនេះមិនទទួលបានជោគជ័យ ។
ឆាកប្រយុទ្ធមួយរវាងខ្មែរក្រោម និងកងទ័ពកុម្មុយនិស្តយួន ដែលខ្លាំងជាងគេនោះ គឺសមរភូមិ នៅក្នុងស្រុកកញ្ចោង ពេលនោះ លោក ថាច់ ភី និង សមាជិកនៃចលនានេះពីររូបទៀតនៅលើស្តែនទឹក ឬអាងស្តុកទឹក ដែលមានអាវុធគ្រប់ធុនដូចជាគ្រាប់បែក M79,12,8l បានបាញ់សំដៅចូលទៅសាលាស្រុក ដែលកាន់កាប់ដោយយួនកុម្មុយនិស្ត បានបណ្តាលឲ្យកម្មាភិបាលយួនស្លាប់និងរងរបួសជាច្រើន ។
លុះដល់ ពេលរសៀលរដ្ឋាភិបាលបក្សកុម្មុយនិស្តយួន ក៏បាននាំទ័ពជំនួយរបស់គេមកពីខេត្តលង់ហោរ ដែលយួនហៅថា វិញឡុង ធ្វើអន្តរាគមន៍ មានទាំងរថក្រោះកាំភ្លើងធំមកផង ។ ដោយសារកម្លាំងរបស់ចលនានេះ មិនអាចទប់ទល់នឹងកម្លាំងរបស់រដ្ឋាភិបាលយួនបានក៏នាំគ្នាដកថយនៅសល់តែ ៣ នាក់ប៉ុណ្ណោះដែលនៅលើស្តែនទឹក ។ គ្រានោះ កងទ័ពយួនបានឡោមព័ទ្ធជុំវិញស្តែនទឹក ហើយបញ្ជាឲ្យរថក្រោះកាំភ្លើងធំបាញ់សម្រុកចូលស្តែនទឹក ធ្វើឲ្យ លោក ថាច់ ភី និង សមាជិកពីររូបទៀត បានស្លាប់នៅក្នុងសមរភូមិនេះ ។ ពេលបានឃើញ រថក្រោះ កំពុងបាញ់សម្រុកស្តែនទឹកដូច្នោះ លោក ថាច់ ភឿង និងកូនប្រុសរបស់គាត់ម្នាក់ទៀតឈ្មោះ ថាច់ ភឿន បានឱបគ្រាប់បែក លោតឡើងលើរថក្រោះបោក ធ្វើអត្តឃាតបណ្តាលឲ្យទ័ពយួនស្លាប់ជាច្រើន ។
បន្ទាប់មក លោក គឹម ប៊ុក កែវ ត្រូវរដ្ឋាភិបាលនៃបក្សកុម្មុយនិស្តវៀតណាម កាត់ទោសឲ្យជាប់គុក ១៥ ឆ្នាំ ដោយចោទពីបទប្រឆាំងនឹងរបបបក្សកុម្មុយនិស្តយួន ។ ក្រៅពីរូបលោក មានមេដឹកនាំ ព្រមទាំងសមាជិក ជាច្រើនទៀត នៃចលនាតស៊ូនេះ អ្នកខ្លះត្រូវយួនចាប់ដាក់គុកពី ៣ ទៅ ២០ ឆ្នាំ ; ខ្លះស្លាប់ក្នុងសមរភូមិ ; ខ្លះត្រូវយួនកាត់ទោសប្រហារជីវិត និងខ្លះទៀតត្រូវកាត់ទោសកំបាំងមុខឲ្យជាប់គុកពី ៣ ឆ្នាំ រហូតដល់អស់មួយជីវិត ។
ព្រះតេជព្រះគុណ ថាច់ ស ជាព្រះចៅអធិការ និងព្រះឧបជ្ឈាយ៍ វត្តកញ្ចោងកំពង់លាវ ត្រូវយួនចងជាប់នឹងបង្គោលទង់ចំកណ្តាលវត្ក ហើយបាញ់ប្រហារជីវិត ដោយយួនចោទពីបទចូលដៃជាមួយចលនានេះ ។
ចំណែក លោក ថាច់ គុណ ថាច់ ឌាក និង គឹម រី ដែលរដ្ឋាភិបាលបក្សកុម្មុយនិស្តយួនកាត់ទោសប្រហារជីវិតនោះ ត្រូវយួនយកទៅប្រហារជីវិតនៅព្រលានយន្តហោះ ខេត្តត្រពាំង នៅថ្ងៃទី ១៦ ខែវិច្ឆិកា ឆ្នាំ ១៩៨១ ។
