កិច្ចប្រជុំប្រចាំឆ្នាំ ២០១៩ របស់សហព័ន្ធខ្មែរកម្ពុជាក្រោម
ទីក្រុង Las Vegas រដ្ឋ Nevada សហរដ្ឋអាមេរិក
ចាប់ពីថ្ងៃទី ៣០ ខែសីហា ដល់ថ្ងៃទី ១ ខែកញ្ញា ឆ្នាំ ២០១៩
សហព័ន្ធខ្មែរកម្ពុជាក្រោម បានបើកកិច្ចប្រជុំប្រចាំឆ្នាំ ២០១៩ រយៈពេលពេលបីថ្ងៃ ចាប់ពីថ្ងៃសុក្រ ទី ៣០ ខែសីហា ដល់ថ្ងៃអាទិត្យទី ១ ខែកញ្ញា នៅទីក្រុងឡាសវេហ្គាស (Las Vegas) រដ្ឋនេវ៉ាដា (Nevada) សហរដ្ឋអាមេរិក ។ ថ្ងៃទីមួយ ប្រជុំគណៈកម្មការនាយក ថ្ងៃទីពីរ អង្គប្រជុំបានពិភាក្សាលើរបាយការណ៍សកម្មភាព និង សមិទ្ធផលដែលបាន អនុវត្តក្នុង ឆ្នាំ ២០១៩ និងថ្ងៃទីបី ចេញផែនការណ៍សម្រាប់ឆ្នាំ ២០២០ ។ ថ្នាក់ដឹកនាំ នៃសហព័ន្ធខ្មែរកម្ពុជាក្រោម ជា គណៈកម្មការនាយក ប្រធានតំបន់ ប្រធានសាខា សមាជិក សមាជិកា និង អ្នកគាំទ្រ មកពីប្រទេសនានាជុំវិញពិភពលោក ក្នុងនោះ មានសហរដ្ឋអាមេរិក កាណាដា អ៊ីតាលី បារាំង និង កម្ពុជា បានជួបជុំគ្នានៅក្នុងវត្តពុទ្ធិកខ្មែរ ។
នៅថ្ងៃសុក្រ ១ កើត ខែភទ្របទ ឆ្នាំ កុរ ឯកស័ក ព. ស. ២៥៦៣ ត្រូវ នឹងថ្ងៃទី ៣០ ខែសីហា គ. ស. ២០១៩ ជាថ្ងៃទីមួយនៃកិច្ចប្រជុំគណៈកម្មការនាយក នៃសហព័ន្ធខ្មែរកម្ពុជាក្រោម បានប្រជុំនៅក្នុងផ្ទះរបស់ លោក លី កើត ចាប់ផ្ដើមពីម៉ោង ៩ ព្រឹក ។
វត្តមាន សមាជិក គណៈកម្មការនាយក ទីប្រឹក្សា និង ជំនួយការ រួមមាន៖
- លោក ថាច់ វៀន ជាអធិបតី មកពីប្រទេសបារាំង
- លោក ចៅ រៀប ជាប្រធានសភាពព្រឹទ្ធាចារ្យ មកពី រដ្ឋ Washington State សហរដ្ឋអាមេរិក
- លោក ប្រាក់ សេរីវុឌ្ឍ ជាប្រធានប្រតិបត្តិ មកពី រដ្ឋ California សហរដ្ឋអាមេរិក
- លោក ម៉ៅ មុនី ជាអនុប្រធានប្រតិបត្តិ មកពី រដ្ឋ California សហរដ្ឋអាមេរិក
- លោក ត្រឹង ម៉ាន់ រិន ជាប្រធានផែនការ មកពី រដ្ឋ Pennsylvania សហរដ្ឋអាមេរិក
- អ្នកស្រី សឺង ធី ណិត ជាប្រធានស្រ្តី មកពី រដ្ឋ Pennsylvania សហរដ្ឋអាមេរិក
- លោក ចៅ សេរី ជាហេរញ្ញិក មកពី រដ្ឋ Washington State សហរដ្ឋអាមេរិក
- លោក ថាច់ សាម៉ន ជាហេរញ្ញិក មកពី រដ្ឋ Washington State សហរដ្ឋអាមេរិក
- លោក ត្រឹង យ៉ាប ជាអគ្គរដ្ឋបាល មកពី រដ្ឋ New Jersey សហរដ្ឋអាមេរិក
- ព្រះតេជព្រះគុណ សឺង យ៉ឹង រតនា ជាប្រធាននាយកដ្ឋានព័ត៌មាន
- លោក តោ គិម ថុង ជាទីប្រក្សា មកពីប្រទេសកាណាដា
- លោក សឺង សម្រេច ជាទីប្រឹក្សា មកពី រដ្ឋ California សហរដ្ឋអាមេរិក
នៅថ្ងៃសៅរ៍ ២ កើត ខែភទ្របទ ឆ្នាំ កុរ ឯកស័ក ព. ស. ២៥៦៣ ត្រូវ នឹងថ្ងៃទី ៣១ ខែសីហា គ. ស. ២០១៩ ជាថ្ងៃទីពីរនៃកិច្ចប្រជុំ កិច្ចប្រជុំបានចាប់ផ្ដើមពីម៉ោង ៩ ព្រឹក នាសាលប្រជុំ Elegante Banquet Hall ។ ជាកិច្ចចាប់ផ្ដើម លោក ថាច់ វឿង ជាអ្នកសម្របសម្រួលកម្មវិធីជាភាសាខ្មែរ និង អ្នកស្រី ថាច់ សុមាលីន ជាអ្នកសម្របសម្រួលកម្មវិធីជាភាសាអង់គ្លេស បានដឹកនាំធ្វើកិច្ចគោរពទង់ជាតិកម្ពុជាក្រោម កិច្ចគោរពចំពោះវីរបុរសជាតិ ដែលបានបូជាជីវិត ដើម្បីបុព្វហេតុជាតិ និង ព្រះពុទ្ធសាសនា ព្រមទាំងព្រះសង្ឃសូធ្យជយន្តោ (ជយបរិត្ត) ជាកិច្ចចម្រើនជ័យមង្គលដល់អង្គប្រជុំ ។
ដំបូងបង្អស់ ព្រះតេជព្រះគុណ ថាច់ ហាន់ ជាព្រះចៅអធិការវត្តពុទ្ធិកខ្មែរ តំណាងសាខា សហព័ន្ធខ្មែរកម្ពុជាក្រោម ប្រចាំទីក្រុងឡាសវេហ្គាស ដែលជាម្ចាស់ផ្ទះរៀបចំកិច្ចប្រជុំ បានថ្លែងសុន្ទរកថាស្វាគមន៍ភ្ញៀវកិត្តិយសជិតឆ្ងាយ ដែលបាននិមន្ត និងអញ្ជើញមកប្រជុំ នៅទីក្រុង Las Vegas ។
(វីដេអូ)
លោក ថាច់ វៀន ជាអធិបតី នៃសហព័ន្ធខ្មែរកម្ពុជាក្រោម បានថ្លែងបើកអង្គប្រជុំ ដោយធ្វើសេចក្ដីថ្លែងអំណរគុណ ដល់គណៈកម្មការរៀបចំអង្គប្រជុំ និង ថ្នាក់ដឹកនាំ សមាជិក និងអ្នកគាំទ្រ សហព័ន្ធខ្មែរកម្ពុជាក្រោម នៅជុំវិញពិភពលោក ដែលបានអញ្ជើញមកចូលរួមប្រជុំ ។ លោកបានអំពាវនាវឲ្យបន្តការគាំទ្រសហព័ន្ធខ្មែរកម្ពុជាក្រោម ក្នុងការ តស៊ូមតិរហូតដល់បានទទួលនូវ សិទ្ធិសម្រេចវាសនាខ្លួនដោយខ្លួនឯង នាពេលអនាគត ។
(វីដអូ)
លោក សឺង សម្រច ជាទីប្រឹក្សា នៃសហព័ន្ធខ្មែរកម្ពុជាក្រោម ថ្លែងអំពី ដំណើរឆ្ពោះទៅកាន់មាតុភូមិកម្ពុជាក្រោម ។ លោក បានមានប្រសាសន៍ថា ពលរដ្ឋខ្មែរក្រោមគ្រប់រូបត្រូវតែតស៊ូ ដើម្បីកម្ពុជាក្រោម ទោះបីមានគ្នាតិច ឬច្រើនក៏ដោយ ត្រូវដើរទៅមុខទាំងអស់គ្នា ។ លោកបានបន្តទៀតថា សូម្បីតែសត្វបក្សីដែលជាប់នៅក្នុងទ្រុងក៏នៅចេះត្រដរ ដូច្នេះ ខ្មែរក្រោមដែលកំពុងតែរស់នៅក្រោមនឹមអាណានិគមយួន ក៏ត្រូវតែចេះក្រោកឡើងតស៊ូទាំងអស់គ្នា ដើម្បីសិទ្ធិសេរីភាពដែរ ។ ជាពិសេសវ័យកណ្តាលត្រូវតែត្រៀមខ្លួនបន្តវេនដឹកនាំសហព័ន្ធខ្មែរកម្ពុជាក្រោម ដើម្បីតស៊ូទាមទារសិទ្ធិសម្រេចវាសនាខ្លួនដោយខ្លួនឯង ។
(វីដេអូ)
លោក ប្រាក់ សេរីវុឌ្ឃ ជាប្រធានប្រតិបត្តិ និង លោក ម៉ៅ មុនី ជាអនុប្រធានប្រតិបត្តិ នៃសហព័ន្ធខ្មែរកម្ពុជាក្រោម បានធ្វើរបាយការណ៍ ស្ដីពីសកម្មភាពប្រចាំ ឆ្នាំ ២០១៩ របស់ សហព័ន្ធខ្មែរកម្ពុជាក្រោម ចាប់ពី ខែមករា ដល់ ខែសីហា ។ យោងតាមរបាយការណ៍នេះ សហព័ន្ធខ្មែរកម្ពុជាក្រោម បានទទួលជោគជ័យយ៉ាងច្រើនក្នុងបេសកកម្ម នៅលើឆាកអន្តរជាតិក្នុងការទាមទារសិទ្ធិជូនពលរដ្ឋខ្មែរក្រោម ក្នុងនោះរួមមាន ការចូលប្រជុំនៅក្នុង វេទិកាជនជាតិដើម នៅអង្គការសហប្រជាជាតិ នៅទីក្រុង New York សហរដ្ឋអាមេរិក និង នៅទីក្រុងហ្សឺណែវ នៃប្រទេសស្វិស និងការរៀបចំ សន្និសីទអន្តរជាតិនៅក្នុងវិមានសន្តិភាព នាទីក្រុងឡាអេ នៃប្រទេសហូឡង់ ក្រោមប្រធានបទ សិទ្ធិសម្រេចវាសនាខ្លួនដោយខ្លួនឯងរបស់ខ្មែរក្រោម ដើម្បីរំឭដល់ខួប ៧០ ឆ្នាំ កម្ពុជាក្រោម នៅក្រោមនឹមអាណានិគមយួន ជាដើម ។
បន្ទាប់មក ជារបៀបវារៈនៃកិច្ចពិភាក្សាជាក្រុម ។ របៀបវារៈនេះ ចែកចេញជាបីក្រុម ។ ក្រុមទីមួយ ជាក្រុមរបស់ សហស្ថាបនិក និង ចាស់ព្រឹទ្ធាចារ្យ នៃ សហព័ន្ធខ្មែរកម្ពុជាក្រោម ថ្លែងអំពី សិទ្ធិសម្រេចវាសនាខ្លួនដោយខ្លួនឯង រួមមាន លោក តោ កឹម ថុង ជាអធិបតី, លោក ចៅ រៀប ជាប្រធានសភាព្រឹទ្ធាចារ្យ, លោក ត្រឹង ម៉ាន់ រិន ជាប្រធានផែនការ, លោក សឺន ហ៊ួរ ជាអគ្គលេខាធិការ, លោក ត្រឹង យ៉ាប ជាប្រធានរដ្ឋបាល និង លោក ចៅ សេរី ជាអគ្គហេរញ្ញិក ។ ក្រុមទីពីរ ជាក្រុមយុវជន រួមមាន លោក ម៉ៅ មុនី ជាអនុប្រធានប្រតិបត្តិ, លោក គឹម ស៊ីរា ជាប្រធានយុវជនប្រចាំកាណាដា, លោក លី កើត ជាសមាជិកប្រចាំទីក្រុង ឡាសវេហ្គាស , លោក ថាច់ សាមន ជាជំនួយការហេរញ្ញិក, អ្នកស្រី ថាច់ សុមាលីន ជាសមាជិកក្រុមយុវជន និង ភិក្ខុ ថាច់ ប្រីជា គឿន ជាអនុប្រធាននាយកដ្ឋានព័ត៌មាន និង ជានិពន្ធនាយក នៃសារព័ត៌មាន ព្រៃនគរ ។ ក្រុមទីបី ជាក្រុមប្រធានតំបន់ ប្រធានសាខា និង ព្រះសង្ឃនៃសហព័ន្ធខ្មែរកម្ពុជាក្រោម រួមមាន លោក ត្រឹង សារុង ជាប្រធានសហព័ន្ធខ្មែរកម្ពុជាក្រោម ប្រចាំទ្វីបអឺរ៉ុប, លោក សឺន យឿង ជាប្រធានសមាគមខ្មែរកម្ពុជាក្រោម ដើម្បីសិទ្ធិមនុស្ស និង អភិវឌ្ឍន៍ មកពីប្រទេសកម្ពុជា, ព្រះតេជព្រះគុណ ថាច់ ហាន់ ជាព្រះចៅអធិការវត្តពុទ្ធិកខ្មែរ, អ្នកស្រី សឺង សាមេត ជាប្រធានសាខាប្រចាំទីក្រុង San Bernardino នៃរដ្ឋ California , អ្នកស្រី ថាច់ សុជាតា ជាក្រុមយុវជនមកពីប្រទេសកាណាដា និងជាសហការី នៃវិទ្យុសំឡេងកម្ពុជាក្រោម និង ទូរទស្សន៍ ព្រៃនគរ, លោក ថាច់ តង ជាប្រធានតំបន់ភាគលិចសហរដ្ឋអាមេរិក, លោក សឺង សារុម ជាប្រធានសាខា ប្រចាំរដ្ឋ Colorado សហរដ្ឋអាមេរិក , លោក គឹម សូនី ជាប្រធានសាខាប្រចាំរដ្ឋ California ភាគខាងជើង, លោក ថាច់ ជូន ជាប្រធានសាខាប្រចាំទីក្រុង San Jose រដ្ឋ California , លោក សឺង ចាន់ កុសល ជាប្រធានសាខាប្រចាំទៅក្រុង Orlando រដ្ឋ Florida, លោក សឺន ថាយ ធន ជាលេខាធិការ នៃសាខាប្រចាំរដ្ឋ North Carolina និង ជាសហការី នៃ វិទ្យុសំឡេងកម្ពុជាក្រោម និង ទូរទស្សន៍ ព្រៃនគរ , លោក អេនឌី ឡឹម ជាប្រធានសាខាប្រចាំទីក្រុង Las Vegas , លោក កៀង រម្មណី ជាប្រធានសាខាប្រចាំរដ្ឋ California ភាគខាងត្បូង ។
ចុងបញ្ចប់ នៃកិច្ចប្រជុំ លោក សឺន ហ៊ួរ ជាអគ្គលេខាធិការ នៃសហព័ន្ធខ្មែរកម្ពុជាក្រោម បានប្រកាសអំពីគម្រោងបោះឆ្នោតជ្រើសរើសគណៈកម្មការនាយក នៅឆ្នាំ ២០២០ ខាងមុខ និងប្រកាសអំពីលក្ខន្តិកៈ សម្រាប់ការបោះឆ្នោត និងអំពីសមាសភាព គណៈកម្មការរៀបចំការបោះឆ្នោត រួមមាន ព្រះតេជព្រះគុណ ថាច់ ហាន់, ព្រះតេជព្រះគុណ ឡឹម ខាយ, ព្រះតេជព្រះគុណ អៀង ភិរុណ, លោក លី សេត និង អ្នកនាង ថាច់ សុមាលីន ។
សំណួរ និង ចម្លើយ ផ្សេងៗ ពីសមាជិក សមាជិកា នៃសហព័ន្ធខ្មែរកម្ពុជាក្រោម និងអ្នកចូលរួមប្រជុំ ។ កិច្ចប្រជុំថ្ងៃទី ២ បានបញ្ចប់នៅវេលាម៉ោង ៥ រសៀល ។
ថ្ងៃទីបីនៃកិច្ចប្រជុំ បានប្រព្រឹត្តទៅ នៅថ្ងៃអាទិត្យ ៣ កើត ខែភទ្របទ ឆ្នាំ កុរ ឯកស័ក ព. ស. ២៥៦៣ ត្រូវ នឹងថ្ងៃទី ១ ខែកញ្ញា គ. ស. ២០១៩ ចាប់ពីម៉ោង ៩ ព្រឹក នា សាលប្រជុំដដែល ។
កិច្ចប្រជុំបានចាប់ផ្ដើមដោយ ដោយមាន លោក ថាច់ វឿង ជាអ្នកសម្របសម្រួលកម្មវិធីជាភាសាខ្មែរ និង អ្នកស្រី កៀង សាខន ជាអ្នកសម្របសម្រួលកម្មវិធីជាភាសាអង់គ្លេស ដឹកនាំធ្វើកិច្ចគោរពទង់ជាតិកម្ពុជាក្រោម កិច្ចគោរពចំពោះវីរបុរសជាតិដែលបានបូជាជីវិត ដើម្បីបុព្វហេតុជាតិ និង ព្រះពុទ្ធសាសនា នៅដែនដីកម្ពុជាក្រោម ព្រមទាំងព្រះសង្ឃសូធ្យជយន្តោ (ជយបរិត្ត) ជាកិច្ចចម្រើនជ័យមង្គលដល់អង្គប្រជុំ ។
ជាដំបូង បន្ទាប់ពី លោក ថាច់ វៀន ជាអធិបតី នៃសហព័ន្ធខ្មែរកម្ពុជាក្រោម ថ្លែងបើកអង្គប្រជុំ លោក ប្រាក់ សេរីវុឌ្ឍ ជាប្រធានប្រតិបត្តិ និង លោក ម៉ៅ មុនី ជាអនុប្រធានប្រតិបត្តិ នៃសហព័ន្ធខ្មែរកម្ពុជាក្រោម បានធ្វើបទបង្ហាញអមដោយរូបភាព Slide Shows នូវសកម្មភាពលើឆាកអន្តរជាតិ ដែលសហព័ន្ធខ្មែរកម្ពុជាក្រោម បានអនុវត្ត និង បានទទួលជោគជ័យ ក្នុងឆ្នាំ ២០១៩ និង បង្ហាញផែនការសម្រាប់អនុវត្តក្នុងឆ្នាំ ២០២០ ។
លោក ត្រឹង ម៉ាន់ រិន ជាប្រធានប្រធានផែនការ នៃសហព័ន្ធខ្មែរកម្ពុជាក្រោម បានថ្លែងបង្ហាញនូវសុទិដ្ឋិនិយមរបស់ខ្លួន ចំពោះជោគជ័យរបស់សហព័ន្ធខ្មែរកម្ពុជាក្រោម ថា សហព័ន្ធខ្មែរកម្ពុជាក្រោម បានធ្វើឱ្យបរទេស បានស្គាល់ទឹកដីកម្ពុជាក្រោម និងបានស្គាល់ខ្មែរក្រោម ជាជនជាតិដើម ក្នុងនោះ សហព័ន្ធខ្មែរកម្ពុជាក្រោម បានចូលរួមប្រណាំងទូកងជាលក្ខណៈអន្តរជាតិ, ចូលរួមប្រជុំវេទិកាអចិន្រ្តៃយ៍របស់អង្គការសហប្រជាតិ ស្តីពីបញ្ហាសិទ្ធិជនជាតិដើម នៅទីក្រុងញ៉ូវយ៉ក (New York) , ហ្សឺណែវ (Geneva), ប្រូសសែល (Brussels ) និង ក្រសួងការបរទេស នៃប្រទេសមហាអំណាច មាន សហរដ្ឋអាមេរិក ជាដើម ។
លោក សឺន ហ៊ួរ ជាអង្គលេខាធិការ នៃសហព័ន្ធខ្មែរកម្ពុជាក្រោម បានប្រកាសនូវសេចក្ដីសម្រេច នៃកិច្ចកិច្ចប្រជុំរយៈពេលពីរថ្ងៃ ។ សេចក្ដីសម្រេចសម្រាប់អនុវត្តក្នុងឆ្នាំ ២០២០ រួមមាន ២ ចំណុចធំៗ គឺ កិច្ចការអន្តរជាតិ និង កិច្ចការនៅកម្ពុជាក្រោម និង តំបន់ ។
ទីមួយ កិច្ចការអន្តរជាតិ ចែកចេញជា ៣ ផ្នែកសំខាន់ៗ រួមមាន៖
- សិក្សាគំរូពីប្រទេសនានា ដើម្បីបន្តអនុវត្តនូវគោលដៅ សម្រេចវាសនាខ្លួនដោយខ្លួនឯង
- ការពារ និងបំរើខ្មែរក្រោម ក្នុងស្រុកតាមរយៈគោលការណ៍ SDGs របស់សហព័ន្ធខ្មែរកម្ពុជាក្រោម
- ធ្វើការជាមួយ នឹងរដ្ឋាភិបាល ទីភ្នាក់ងារអន្តរជាតិ នៃអង្គការសហប្រជាជាតិ សភាអឺរ៉ុប និងអាស៊ាន
ទីពីរ- កិច្ចការនៅកម្ពុជាក្រោម និង កិច្ចការនៅតាមតំបន់ ចែកចេញជា ៦ ផ្នែកសំខាន់ៗ រួមមាន៖
- ពង្រឹងសមាជិក និង ធ្វើការជាមួយ នឹងតំបន់ និង សាខា
- អប់រំសមាជិកអំពីសិទ្ធិ និង កាតព្វកិច្ចរបស់ខ្លួន
- រៀបចំ មហាសន្និបាតពិភពលោក លើកទី ១១ នៃសហព័ន្ធខ្មែរកម្ពុជាក្រោម នៅទីក្រុង Tacoma រដ្ឋ Washington State ដើម្បីបោះឆ្នោតជ្រើសគណៈកម្មការនាយក អាណត្តិថ្មី
- បន្តលើកកម្ពស់ការយល់ដឹង និងតស៊ូមតិ ដើម្បីទាមទារ សិទ្ធិសម្រេចវាសនាខ្លួនដោយខ្លួនឯង របស់ជនជាតិដើមខ្មែរក្រោម
- រៀបចំកិច្ចប្រជុំ គណៈកម្មការប្រតិបត្តិ ជាមួយ នឹងថ្នាក់ដឹកនាំតំបន់ និង សាខា តាមទូរសន្និបាត
- រៀបចំសិក្ខាសាលាបណ្ដុះបណ្ដាលថ្នាក់ដឹកនាំ
លោក ចៅ សេរី ជាអគ្គហេរញ្ញិក និង លោក ថាច់ សាម៉ន ជាអ្នកជំនួយការហេរញ្ញិក បានថ្លែងអំពី ប្រាក់ចំណូល និងចំណាយ របស់សហព័ន្ធខ្មែរកម្ពុជាក្រោម ក្នុងឆ្នាំ ២០១៩ និង គំរោងថវិកាសម្រាប់ ឆ្នាំ ២០២០ ។
លោក សឺង សម្រេច ជាទីប្រក្សា នៃសហព័ន្ធខ្មែរកម្ពុជាក្រោម បានថ្លែងអំពី សិទ្ធិសម្រេចវាសនាខ្លួនដោយខ្លួនឯង ដោយលោកបានដាស់ស្មារតីឲ្យពលរដ្ឋខ្មែរក្រោមគ្រប់រូបត្រូវចេះរើបំរះ ពេលណាត្រូវគេជិះជាន់ ឬ ត្រូវគាបសង្កត់ ។ លោកបានបង្ហាញនូវមោទនភាពរបស់ខ្លួន ចំពោះទង់ជាតិកម្ពុជាក្រោមថា រាល់ពលិកម្ម និងការលះបង់អ្វីៗគ្រប់យ៉ាង របស់ថ្នាក់ដឹកនាំ និងសមាជិក នៃសហព័ន្ធខ្មែរកម្ពុជាក្រោម នៅជុំវិញពិភពលោក បានប្រមូលទៅលើទង់ជាតិ កម្ពុជាក្រោម ៣ ពណ៌ គឺ ខៀវ លឿង និងក្រហម ដែលជាពណ៌នៃសាច់ឈាមរបស់ពលរដ្ឋខ្មែរក្រោមគ្រប់រូប ធ្វើឲ្យពិភពលោកបានស្គាល់ខ្មែរក្រោមជានរណា ។
អ្នកស្រី សឺង ធី ណិត ជាប្រធានស្ត្រី នៃសហព័ន្ធខ្មែរកម្ពុជាក្រោម បានថ្លែងអំពី សមិទ្ធផលជោគជ័យនានា របស់សហព័ន្ធខ្មែរកម្ពុជាក្រោម ថា បានមកពីកម្លាំងគាំទ្ររបស់សមាជិកនៃសហព័ន្ធខ្មែរកម្ពុជាក្រោម ទាំងអស់គ្នា មិនមែន បានដោយសារតែគណៈកម្មការនាយកប៉ុន្មានរូបនោះទេ ។ អ្នកស្រី បានថ្លែងថា ស្រ្តីសម័យនេះ ត្រូវតែចេះហ៊ានតស៊ូមតិ ដើម្បីសិទ្ធិសេរីភាពរបស់ខ្លួន ក្នុងនាមជាជនជាតិដើមនៃដែនដីកម្ពុជាក្រោម ។ ចុងក្រោយអ្នកស្រីបានថ្លែងជូនអង្គប្រជុំនូវកំណាព្យស្ដីពី “បណ្ដាំដូនតាខ្មែរក្រោម” ដែលមានអត្ថន័យយ៉ាងជ្រាលជ្រៅ ។
(កំណាព្យ)
លោក ថាច់ វៀន ជាអធិបតី នៃសហព័ន្ធខ្មែរកម្ពុជាក្រោម បានធ្វើសេចក្ដីអរគុណ ដល់គណៈកម្មការរៀបចំកិច្ចប្រជុំ នៅទីក្រុង Las Vegas ហើយបានអញ្ជើញពួកគាត់ឡើងវេទិកា ដើម្បីមានមតិម្ដងម្នាក់ អំពីភារកិច្ចរបស់ខ្លួន ដែលបានរៀបចំទទួលភ្ញៀវតាំងពីដើមដល់ចប់ មានដូចជា ការដឹកជញ្ជូនភ្ញៀវ ការដាំស្ល និង កន្លែងស្នាក់នៅ ជាដើម ឲ្យប្រព្រឹត្តទៅយ៉ាងរលូន និង ជោគជ័យ ។ សមាជិក គណៈកម្មការរៀបចំកិច្ចប្រជុំ នៅទីក្រុង Las Vegas រួមមាន ព្រះតេជព្រះគុណ ថាច់ ហាន់ ព្រះចៅអធិការវត្តពុទ្ធិកខ្មែរ, ព្រះតេជព្រះគុណ ថាច់ ផាន, លោក លី កើត, អ្នកស្រី ថាច់ ណារី, លោក អែនឌី ឡឹម, លោក ថាច់ សែន, លោក គឹម មៀន និង លោក សួស វុឌ្ឍី ។
បន្ទាប់ ពីនាទី សំនួរ និង ចម្លើយ ព្រះតេជព្រះគុណ សឺង យ៉ឹង រតនា បានថ្លែងអំណរគុណដល់សប្បុរស ដែលបានឧបត្ថម្ភប្រាក់ដល់កិច្ចប្រជុំនេះ និងបានអាននូវនាមសប្បុរសទាំងអស់ជូនអង្គប្រជុំបានជ្រាប ។
កិច្ចប្រជុំបានបញ្ចប់នៅវេលាម៉ោង ៥ រសៀល ដោយព្រះសង្ឃសូត្រជយន្តោចម្រើនជយមង្គល និង ផ្សាយមេត្តធម៌ ដល់សព្វសត្វឲ្យរួចចាកពៀរវេរា នឹងគ្នា ។
សុន្ទរកថា ឬ សេចក្ដីថ្លែងការណ៍នីមួយៗរបស់អ្នកចូលរួម នឹងមានចាក់ផ្សាយពិស្ដារជាបន្តបន្ទាប់នៅលើ ទូរទស្សន៍ ព្រៃនគរ និង គេហទំព័រ វិទ្យុសំឡេងកម្ពុជាក្រោម (VOKK.net) ។
