សាខាសហព័ន្ធខ្មែរកម្ពុជាក្រោម នៅ Origon ប្រារព្ធខួប ៦៤ ឆ្នាំ នៃទិវា ០៤ មិថុនា
ដោយ ថាច់ ប្រីជា គឿន -សារព័ត៌មាន ព្រៃនគរ
នៅថ្ងៃទី ១៥ ខែមិថុនា សាខាសហព័ន្ធខ្មែរកម្ពុជាក្រោម នៅ Origon សហរដ្ឋអាមេរិក ដែលមាន លោក សឺង ថាញ់ ជាប្រធាន បានប្រារព្ធខួប ៦៤ ឆ្នាំ នៃទិវា ០៤ មិថុនា ដើម្បីរំឭកដល់ថ្ងៃដែលបារាំងបានផ្ទេរដែនដីកម្ពុជាក្រោម ឬ កូស័ងស៊ីនឲ្យឋិតនៅក្រោមរដ្ឋចំណុះវៀតណាម ។ កម្មវិធីនេះ មានការចូលរួមពី លោក ចៅ រៀប ប្រធានសភា ព្រឹទ្ធាចារ្យ នៃសហព័ន្ធខ្មែរកម្ពុជាក្រោម , លោក ថាច់ សាមី លេខាធិការ នៃការិយាល័យសភាព្រឹទ្ធាចារ្យ មកពីរដ្ឋ Washington និងព្រះតេជព្រះគុណ សឺង យ៉ឹង រតនា ប្រធាននាយកដ្ឋានព័ត៌មាន នៃសហព័ន្ធខ្មែរកម្ពុជាក្រោម មកពីរដ្ឋកាលីហ្វកញ៉ា (California) និងផ្ញៀវកិត្តិយសជាច្រើនទៀត ។
អ្នកចូលរួមបានបានរៀបចំកម្មវិធីតាមពុទ្ធសាសននិយមកិច្ច មានវេរភត្តប្រគេនដល់ព្រះសង្ឃ ដើម្បីឧទ្ទិសកុសល ដល់វីរជនខ្មែរក្រោមគ្រប់រូប ដែលបានបូជាជីវិតក្នុងបុព្វហេតុដែនដីកម្ពុជាក្រោម ។
នៅក្នុងពិធីនេះ លោក ចៅ រៀប ប្រធានសភាព្រឹទ្ធាចារ្យ នៃសហព័ន្ធខ្មែរកម្ពុជាក្រោម បានថ្លែងថា លោកមិនចង់ឮ ពាក្យថា “បាត់បង់ដែនដីកម្ពុជាក្រោម” ពីមួយឆ្នាំទៅមួយឆ្នាំទៀតទេ ព្រោះពាក្យទាំងនេះ វាហាក់ដូចជាឆ្លុះបញ្ចាំងឲ្យ ឃើញពី “ភាពអាប់ឱនរបស់ជាតិខ្មែរ” ។
ដើម្បីលុបបំបាត់ចោលនូវពាក្យ “បាត់បង់ដែនដីកម្ពុជាក្រោម” នេះ លោក ចៅ រៀប បានថ្លែងថា សហព័ន្ធខ្មែរកម្ពុជា ក្រោម បានខំប្រឹងប្រែងគ្រប់ពេលវេលា ដើម្បីជម្រុញឲ្យអង្គការសហប្រជាជាតិទទួលស្គាល់ខ្មែរក្រោមជាជនជាតិ ដើម នៃដែនដីកម្ពុជាក្រោម ។
លោក ចៅ រៀប បានបន្តទៀត សហព័ន្ធខ្មែរកម្ពុជាក្រោម ធ្លាប់បានធ្វើសន្និសីទអន្តរជាតិស្ដីពី “សិទ្ធិសម្រេច វាសនាខ្លួនដោយខ្លួនឯង” តាមច្បាប់អន្តរជាតិ នៅតុលាការអន្តរជាតិ នាទីក្រុងឡាអេ កាលពីឆ្នាំ ២០០៦ ដើម្បី ឲ្យអ្នកច្បាប់អន្តរជាតិ ជួយផ្ដល់អនុសាសន៍ដល់សហព័ន្ធខ្មែរកម្ពុជាក្រោម ក្នុងការទាមទារនូវ “សិទ្ធិសម្រេច វាសនា ខ្លួនដោយខ្លួនឯង” ជូនពលរដ្ឋខ្មែរក្រោមម្ចាស់ស្រុក ។
លោក ចៅ រៀប បានបន្ថែមទៀតថា បច្ចុប្បន្ន សហព័ន្ធខ្មែរកម្ពុជាក្រោម ជាសមាជិកនៃវេទិកាអចិន្ត្រៃយ៍ស្ដីពីបញ្ហា ជនជាតិដើម របស់អង្គការសហប្រជាជាតិ ហៅកាត់ជាសាភាអង់គ្លេសថា (UNPFII) ដែលជាឱកាសមួយបានធ្វើឲ្យ ខ្មែរក្រោម បានចូលថ្លែងការណ៍នៅក្នុងការិយាល័យនៃអង្គការសហប្រជាជាតិ នាបុរី New York ជារៀងរាល់ឆ្នាំ ។
សូមបញ្ជាក់ថា កាលពី ថ្ងៃទី ០៤ ខែមិថុនា ឆ្នាំ ១៩៤៩ ប្រធានាធិបតីបារាំងឈ្មោះ វ៉ែនសង់ អូរិយោល (Vincent Auriol) បានផ្ទេរ ដែនដីកម្ពុជាក្រោម ឬ ដែនដីកូស័ងស៊ីន ដែលមានផ្ទៃដីទំហំប្រមាណ ៦៧ ពាន់ គីឡូមែត្រក្រឡា ឲ្យឋិតនៅក្រោមរដ្ឋចំណុះវៀតណាម តាមសេចក្ដីប្រកាសច្បាប់ លេខ ៤៩-៧៣៣ ។ ចាប់តាំងពីថ្ងៃនោះមក ពលរដ្ឋខ្មែរក្រោមរាប់លាននាក់ បានរស់នៅក្រោមនឹមអាណានិគមយួនរហូតមកដល់សព្វថ្ងៃ ៕
