សហព័ន្ធខ្មែរកម្ពុជាក្រោម ថ្កោលទោសវៀតណាម ករណីកាត់ទោសកសិករខ្មែរក្រោម ៤ រូប
ដោយ ថាច់ វឿង
សហព័ន្ធខ្មែរកម្ពុជាក្រោម បានចេញសេចក្ដីថ្លែងការណ៍នៅក្នុងទិវាសិទ្ធិមនុស្សអន្តរជាតិ ១០ ធ្នូ ថ្កោលទោសអាជ្ញាធរវៀតណាម ដែលបានប្រកាសសាលក្រមផ្ដន្ទាទោសកសិករខ្មែរក្រោមចំនួន ៤ ឲ្យជាប់គុក ពី ៦ ខែទៅ ២ ឆ្នាំកន្លះ និងជំរុញឲ្យវៀតណាមត្រូវគោរពសិទ្ធិមនុស្សជាមូលដ្ឋានចំពោះពលរដ្ឋខ្មែរក្រោម ។
សហព័ន្ធខ្មែរកម្ពុជាក្រោម នៅថ្ងៃទី ១០ ខែធ្នូ បានរៀបចំវេទិកាពិភាក្សាស្ដីពី ទិវាសិទ្ធិមនុស្សអន្តរជាតិ ១០ ធ្នូ ក្រោមប្រធានបទ «ក្រោកឈរដើម្បីសិទ្ធិមនុស្ស» ដើម្បីទាមទារឲ្យរដ្ឋាភិបាលវៀតណាម គោរពសិទ្ធិមនុស្សនៅកម្ពុជាក្រោម ខណៈដែលពួកគេមើលឃើញថា រដ្ឋាភិបាលវៀតណាម បានបង្កើនការរឹតត្បិតសិទ្ធិសេរីភាព និងការចាប់ខ្លួនពលរដ្ឋខ្មែរក្រោមដាក់ពន្ធនាគារ ដោយសារតែពួកគេទាមទារសិទ្ធិដីធ្លី ។ វេទិកានេះ ធ្វើតាម Online និងផ្សាយផ្ទាល់នៅលើបណ្ដាញសង្គម Facebook នៃ វិទ្យុសំឡេងកម្ពុជាក្រោម ។ គណៈកម្មការនាយក នៃ សហព័ន្ធខ្មែរកម្ពុជាក្រោម ដែលធ្វើជាវាគ្មិននៅក្នុងវេទិកាពិភាក្សានេះ រួមមាន ព្រះតេជព្រះគុណ សឺង យ៉ឹង រតនា ជាប្រធាននាយកដ្ឋានព័ត៌មាន លោក ប្រាក់ សេរីវុឌ្ឍ ជាប្រធានប្រតិបត្តិ នៃ សហព័ន្ធខ្មែរកម្ពុជាក្រោម លោក Joshua Cooper ជានាយកប្រតិបត្តិ នៃ វិជ្ជាស្ថានហាវ៉ៃដើម្បីសិទ្ធិមនុស្ស និងលោក ទៀ ថេន ជាទីប្រឹក្សា នៃ សហព័ន្ធខ្មែរកម្ពុជាក្រោម ។
មុននឹងវេទិកាចាប់ផ្ដើមពិភាក្សា ព្រះតេជព្រះគុណ សឺង យ៉ឹង រតនា ជាប្រធាននាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម បានអាននូវសេចក្តីថ្លែងការណ៍របស់សហព័ន្ធខ្មែរកម្ពុជាក្រោម រំឭកពីគោលបំណងនៃការប្រាព្ធទិវាសិទ្ធិមនុស្សអន្តរជាតិ និងបានថ្កោលទោសចំពោះតុលាការវៀតណាម ដែលបានកាត់ទោសកសិករខ្មែរក្រោម ៤ នាក់ នៅខេត្តក្រមួស ឲ្យជាប់ពន្ធនាគារ ចាប់ពី ៦ ខែ ទៅ ២ ឆ្នាំកន្លះ ។
(សំឡេង)
បណ្ឌិត Joshua Copper ជាទីប្រឹក្សា នៃ សហព័ន្ធខ្មែរកម្ពុជាក្រោម និងជានាយកប្រតិបត្តិវិជ្ជាស្ថានហាវ៉ៃ ដើម្បីសិទ្ធិមនុស្ស បានថ្លែងអំពីប្រវត្តិនៃការអនុម័តសេចក្ដីប្រកាសជាសកលរបស់អង្គការសហប្រជាជាតិស្ដីពីសិទ្ធិមនុស្ស (UNDHR) និងមាត្រាផ្សេងៗ របស់កតិកាសញ្ញាអន្តរជាតិ និងសិទ្ធិជនជាតិដើម ទាក់ទងនឹងសិទ្ធិដែលខ្មែរក្រោមគ្រប់រូបត្រូវទទួលបាន ។ លោកក៏បានរំឭកឡើងវិញផងដែរ នូវសកម្មភាពផ្សេងៗ លើឆាកអន្តរជាតិរបស់ សហព័ន្ធខ្មែរកម្ពុជាក្រោម ដើម្បីឲ្យសហគមន៍អន្តរជាតិបានដឹង អំពីករណីរំលោភសិទ្ធិមនុស្សរបស់របបយួនកុម្មុយនិស្តលើពលរដ្ឋខ្មែរក្រោម ។
(សំឡេង)
លោក ប្រាក់ សេរីវុឌ្ឍ ជាប្រធានប្រតិបត្តិ នៃ សហព័ន្ធខ្មែរកម្ពុជាក្រោម បានថ្លែងអំពីកតិកាសញ្ញាអន្តរជាតិទាំង ៧ ដែលប្រទេសវៀតណាម បានចុះហេត្ថលេខាជាមួយនឹងអង្គការសហប្រជាជាតិ ដោយបានសន្យាថា នឹងត្រូវអនុវត្តតាមជាដាច់ខាតក្នុងការគោរពនូវសិទ្ធិប្រជាពលរដ្ឋរបស់ខ្លួន ក្នុងនោះរួមមាន សិទ្ធិបង្កើជាគណបក្សនយោបាយ សិទ្ធិបង្កើតជាសមាគម សិទ្ធិបញ្ចេញមតិ សិទ្ធិជួបជុំគ្នា សិទ្ធិក្នុងការផ្សព្វផ្សាយ និងទទួលបានព័ត៌មាន និង សិទ្ធិសម្រេចវាសនាដោយខ្លួនឯង ជាដើម ។ កតិកាសញ្ញាអន្តរជាតិទាំង ៧ ដែលរបបយួនកុម្មុយនិស្តបានចុះហត្ថលេខាជាមួយនឹងអង្គការសហប្រជាជាតិនោះ រួមមាន កតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ (ICCPR) កតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គម និង វប្បធម៌ (ICESR) អនុសញ្ញាស្ដីពីការប្រឆាំងនឹងការធ្វើទារុណកម្ម (CAT) អនុសញ្ញាស្តីពីការលុបបំបាត់រាល់ទម្រង់នៃការរើសអើងពូជសាសន៍ (CERD) អនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងស្ត្រី (CEDAW) អនុសញ្ញាស្តីពីសិទ្ធិកុមារ (CRC) និង អនុសញ្ញាស្តីពីសិទ្ធិជនពិការ (CRPD) ។ ក្រៅពីនេះ រដ្ឋាភិបាលរបបយួនកុម្មុយនិស្តក៏បានចុះហេត្ថលេខាទទួលស្គាល់នូវសេចក្ដីប្រកាសជាសកលរបស់អង្គការសហប្រជាជាតិចំនួន ២ ទៀត នោះគឺ ស្ដីពីសិទ្ធិមនុស្ស (UNDHR) និង សិទ្ធិជនជាតិដើម (UNDRIP) ផងដែរ ។
(សំឡេង)
លោក ទៀ ថេន ជាទីប្រឹក្សា នៃ សហព័ន្ធខ្មែរកម្ពុជាក្រោម បានថ្លែងអំពីការប្រារព្ធខួប ៧១ ឆ្នាំ នៃទិវាសិទ្ធិមនុស្សអន្តរជាតិ ១០ ធ្នូ ដែលបានរៀបចំដោយពលរដ្ឋខ្មែរក្រោមនៅប្រទេសអូស្រ្តាលី អំពីសិទ្ធិផ្សេងៗ ដែលពលរដ្ឋខ្មែរក្រោម ត្រូវទទួលបាន និងការរំលោភសិទ្ធិមនុស្សរបស់របបយួនកុម្មុយនិស្តលើខ្មែរក្រោម ។ លោកបន្ដទៀតថា សហព័ន្ធខ្មែរ កម្ពុជាក្រោម នឹងបន្តតវ៉ាទៅសហគមន៍អន្តរជាតិអំពីករណីដែលយួនរំលោភសិទ្ធិលើខ្មែរក្រោម ក្នុងនោះ មានជម្រាបទៅរដ្ឋាភិបាលប្រទេសអូស្ត្រាលី ជាដើម ។ លោកបានបញ្ជាក់ថា ខ្មែរក្រោមជាជនជាតិដើមនៃដែនដីកម្ពុជាក្រោម ត្រូវតែទទួលបាននូវសិទ្ធិគ្រប់យ៉ាងនៅលើទឹកដីរបស់ខ្លួន ដោយរបបយួនកុម្មុយនិស្តគ្មានសិទ្ធិមករំលោភបំពានឡើយ ។
(សំឡេង)
សូមបញ្ជាក់ថា កាលពី ៧២ ឆ្នាំមុន អង្គការសហប្រជាជាតិបានអនុម័តសេចក្ដីប្រកាសជាសកលស្ដីពីសិទ្ធិមនុស្ស នៅថ្ងៃទី ១០ ខែធ្នូ ឆ្នាំ ១៩៨៤ ដែលមាន ៣០ មាត្រា ណែនាំឲ្យប្រទេសហត្ថលេខីត្រូវគោរពសិទ្ធិមនុស្សជាមូលដ្ឋាន ក្នុងនោះ មនុស្សគ្រប់រូបកើតមកត្រូវមានសេរីភាព និងភាពស្មើៗ គ្នាក្នុងសិទ្ធិ និងសេចក្ដីថ្លៃថ្នូរ ជាដើម ៕
