សហព័ន្ធខ្មែរកម្ពុជាក្រោមស្វែងរកការគាំទ្រពី មន្ត្រីអាមេរិកដើម្បីចូលជាសមាជិក ECOSOC ឡើងវិញ
ដោយ ថាច់ ប្រីជា គឿន l សារព័ត៌មាន ព្រៃនគរ
នៅថ្ងៃសុក្រ ទី ២៨ ខែមីនា កន្លងទៅនេះ ប្រតិភូសហព័ន្ធខ្មែរកម្ពុជាក្រោមមួយក្រុម ដឹកនាំ ដោយ លោក ត្រឹង យ៉ាប ប្រធានផ្នែករដ្ឋបាល, លោក ហាង វឿង ទទួលបន្ទុកផ្នែកហិរញ្ញវត្ថុ, លោក តាំង ឡេនី តំណាងក្រុមយុវជន និង លោក ទ្រីវ ជីម បានចូលទៅជួបមន្ត្រីស្ថានទូតសហរដ្ឋអាមេរិក ប្រចាំអង្គការសហប្រជាជាតិ នៅទីក្រុង New York សហរដ្ឋអាមេរិក ដើម្បីស្វែងរកកិច្ចគាំទ្រដល់សហព័ន្ធខ្មែរកម្ពុជាក្រោម ក្នុងការដាក់ពាក្យចូលជាសមាជិក នៃក្រុមប្រឹក្សាសេដ្ឋកិច្ច និងសង្គមកិច្ច អង្គការសហប្រជាជាតិ ហៅកាត់ថា ECOSOC ឡើងវិញ ។
លោក ហាង វឿង បានមានប្រសាសន៍ប្រាប់វិទ្យុសំឡេងកម្ពុជាក្រោមថា មន្ត្រីស្ថានទូតសហរដ្ឋអារិកដែលពួកគាត់ បានជួប នោះ បានសន្យាជាមួយនឹងសហព័ន្ធខ្មែរកម្ពុជាក្រោមថា មន្ត្រីសហរដ្ឋអាមេរិក នឹងខិតខំជួយធ្វើយ៉ាង ណាដើម្បីឲ្យ សហព័ន្ ធខ្មែរកម្ពុជាក្រោម បានចូលជាសមាជិកក្រុមប្រឹក្សាសេដ្ឋកិច្ច និងសង្គមកិច្ចអង្គការសហប្រជា ជាតិនាពេលខាងមុខនេះ ។
សូមបញ្ជាក់ថា កាលពី ទី ២៣ ខែ កក្កដា ឆ្នាំ ២០១២ គណៈកម្មការអង្គការមិនមែនរដ្ឋាភិបាល នៃក្រុម ប្រឹក្សា សេដ្ឋកិច្ច និងសង្គមកិច្ច អង្គការសហប្រជាជាតិ (ECOSOC– Economic and Social Council) បានបោះ ឆ្នោតបដិសេធ សហព័ន្ធខ្មែរកម្ពុជាក្រោមហៅកាត់ថា KKF ចំពោះការសុំចូលជាសមាជិក ក្នុងនាមជាអ្នកផ្ដល់ យោបល់ ។
លទ្ធផលនៃការបោះឆ្នោតនេះ គឺ មាន ២៧ ប្រទេស គាំទ្រវៀតណាម មិនឲ្យសហព័ន្ធខ្មែរកម្ពុជាក្រោមចូល រួមនៅក្នុង ECOSOC ក្នុងនាមជាអ្នកផ្ដល់ប្រឹក្សា , ១៤ ប្រទេសជំទាស់វៀតណាម គាំទ្រសហព័ន្ធខ្មែរកម្ពុជាក្រោម និង ១០ ប្រទេស អនុបវាទ ។
១៤ ប្រទេសដែលបោះឆ្នោតគាំទ្រខ្មែរក្រោម ជំទាស់វៀតណាម មានដូចជា Bulgaria, Canada, Finland, បារាំង (France), អាល្លឺម៉ង់ (Germany), Ireland, Italy, Lativa, ហូឡង់ (Netherlands), Slovakia, ឥស្បាញ (Spain), ស្វិស (Switzerland), អង់គ្លេស (United Kingdom) និង សហរដ្ឋអាមេរិក (United States of America) ។
លោក ហាង វឿង មានប្រសាសន៍បន្តទៀតនៅថ្ងៃដដែលនោះ ប្រតិភូសហព័ន្ធខ្មែរកម្ពុជាក្រោម ដែលមានគ្នា ៤ រូប ដដែល បានទៅជួប លោក ឆែម វាំង ថាច់ ( James Văn Thạch) ជាអតីតនាយទាហាន អាមេរិកចូលនិវត្តន៍ កំណើតខ្មែរក្រោមម្នាក់ ដែលបានទៅច្បាំងនៅអ៊ារ៉ាក់ នាពេលកន្លងមកនេះ ។
ក្នុងកិច្ចពិភាក្សាជាមួយនាយទាហាននេះ លោក ហាង វឿង បានមានប្រសាសន៍ថា លោក ឆែម បានសុំ ស្ម័គ្រចិត្តចូលបំរើសហព័ន្ធខ្មែរកម្ពុជាក្រោម ដើម្បីរួមចំណែកក្នុងការទាមទារសិទ្ធិសម្រេចវាសនាខ្លួនដោយខ្លួនឯង ជូនពល រដ្ឋខ្មែរក្រោម នៅកម្ពុជាក្រោម ។
លោក ហាង វឿង បានបន្តថា មូលហេតុដែលនាំឲ្យ លោក ឆែម វ៉ាំង ថាច់ ស្មគ្រចិត្តចូលបំរើសហព័ន្ធខ្មែរកម្ពុជា ក្រោមនោះ ព្រោះគាត់បានតាមដានតាមរយៈគេហទំព័រ នូវគោលការណ៍តស៊ូដោយសន្តិវិធីរបស់សហព័ន្ធ ខ្មែរកម្ពុជាក្រោម យ៉ាងច្បាស់ ហើយដឹងថា សកម្មភាពតស៊ូរបស់សហព័ន្ធខ្មែរកម្ពុជាក្រោម មានផែនការច្បាស់លាស់ សម្រាប់ពលរដ្ឋខ្មែរក្រោម ៕
