មើលចន្ទនឹកស្រុក | ថាច់ តៀង
[twocol_one]១*ជំនោរកក្ដិករឭកស្រុកស្រែ
នឹកពុកនឹកម៉ែឯកម្ពុជាក្រោម
រាត្រីខែភ្លឺខ្ញុំឮសត្វយំ
ធ្វើអោយអារម្មណ៍ក្រៀមក្រំរិតទ្វេ។
២*អង្គុយភ្លូកភ្លឹកនឹកគ្រាកន្លង
ជួបជុំប្អូនបងក្រោមម្លប់ពុកម៉ែ
នឹកគ្រូនឹកមិត្តនឹកញាតិហូរហែ
នឹកមាតុភូមិកេរ្ដ៍ដីខ្មែរថ្លៃថ្លា។
៣*នឹកវត្តអារាមធ្លាប់រៀនយប់ថ្ងៃ
រៀនខ្មែរបាលីអក្សរសាសនា
នឹកបុណ្យកឋិនបុណ្យសែនដូនតា
សប្បាយអស្ចារ្យថ្ងៃបុណ្យចូលឆ្នាំ។
៤*សំពះព្រះខែបុណ្យអកអំបុក
មានប្រណាំងទូកងជាប្រចាំ
មានលយប្រទីបនិងបង្ហោះគោម
មានល្ខោនមានរាំល្បាំប្រពៃណី។[/twocol_one] [twocol_one_last]
៥*នឹកបុណ្យភ្នំពាន់បញ្ចុះសីមា
បុណ្យឆ្លងសាលាបុណ្យផ្កាសាមគ្គី
បុណ្យកំសាន្ដស្រុកបុណ្យនឹកស្នាដៃ
ធ្លាប់រួមសប្បាយប្រែក្លាយជាព្រាត់។
៦*នឹកគ្រារាំវង់នៅក្នុងរោងការ
នឹកធ្លាប់ទស្សនារឿងល្ខោនកំសត់
នឹកគ្រាកន្លងធ្លាប់ជាក្មេងវត្ត
រស់ដោយបាយបាត្ររៀនអក្សរខ្មែរ។
៧*នឹកល្ខោនបាសាក់រស្មីប្រទីប
ឆ្លងព្រែកទឹកប្រៀបកាត់វាលស្រូវស្រែ
ឮស្គរឆ្លើយឆ្លងចង់ភ្លេចសុំម៉ែ
ខ្ញុំនឹកម្ល៉េះទេនឹកគ្រាអតីត។
៨*ឱកម្ពុជាក្រោមមាតុភូមិខ្ញុំអើយ
ខ្ញុំព្រាត់យូរហើយព្រាត់ព្រោះជីវិត
តើថ្ងៃណាទៅទើបបានជួបជិត
រួមរក្សស្នេហ៍ស្និទ្ធដូចគ្រាកន្លង ៕[/twocol_one_last]
