San Francisco – California ៖ នៅល្ងាចថ្ងៃទី ០៧ ខែមេសា វត្តខេមររង្សី នៅទីក្រុង San Jose បានទទួលដំណើរនិមន្ត មករបស់ព្រះសង្ឃខ្មែរ ក្រោមពីរព្រះអង្គ ដើម្បីចូលរួមក្នុងពិធីបុណ្យចូលឆ្នាំខ្មែរនៅក្នុងវត្តមួយនេះដែល នឹងប្រព្រឹត្តទៅនៅថ្ងៃ សៅរ៍ ទី ១២ ខែមេសា ខាងមុខនេះ ។
ព្រះសង្ឃទាំងពីរនេះ រួមមាន ព្រះតេជព្រះគុណ នាថសីលោ ត្រឹង វ៉ាំង យ៉ុង និមន្តមកពីដែនដីកម្ពុជាក្រោម និង ព្រះតេជព្រះ គុណ យឿង តារា ប្រធានសម្ព័ន្ធសមណនិស្សិត – និស្សិតខ្មែរកម្ពុជាក្រោមដែលមានមូលដ្ឋាន នៅប្រ ទេសកម្ពុជា ។
ព្រះតេជព្រះគុណ សឺង យ៉ឹង រតនា ព្រះចៅអធិការវត្តខេមររង្សី និងជាប្រធាននាយកដ្ឋានព័ត៌មាននៃសហព័ន្ធខ្មែរ កម្ពុជាក្រោម បានថ្លែងប្រាប់ វិទ្យុសំឡេងកម្ពុជាក្រោមថា ក្រៅពីធានាព្រះសង្ឃមកដើម្បីចូលរួមពិធីបុណ្យចូលឆ្នាំខ្មែរ គណៈកម្មការវត្ត ខេមររង្សី ក៏បានធានា ព្រះតេជព្រះគុណ នាថសីលោ ត្រឹង វ៉ាំង យ៉ុង មកពីកម្ពុជាក្រោមផ្ទាល់ជា លើកដំបូងឲ្យគង់នៅក្នុងវត្ត ដើម្បីជួយផ្សព្វផ្សាយព្រះព្រះពុទ្ធសាសនា និងវប្បធម៌ខ្មែរដល់ពលរដ្ឋខ្មែរនៅលើទឹកដីសហរដ្ឋអាមេរិក ជាពិសេស ពុទ្ធ បរិសទ ចំណុះជើងវត្តខេមររង្សី របស់ព្រះអង្គ ៕
