សាលារាជធានីភ្នំពេញ មិនអនុញ្ញាតឲ្យខ្មែរក្រោមធ្វើបាតុកម្មមុខស្ថានទូតវៀតណាម
ដោយ ថាច់ ប្រីជា គឿន-សារព័ត៌មាន ព្រៃនគរ
សាលារាជធានីភ្នំពេញ នៃប្រទេសកម្ពុជា មិនអនុញ្ញាតឲ្យសមាគមខ្មែរក្រោម ធ្វើបាតុកម្មមុខស្ថានទូត វៀតណាម នៅទីក្រុងភ្នំពេញ ដែលនឹងរៀបចំធ្វើនៅថ្ងៃទី ២៥ ខែមិថុនា ខាងមុខនេះទេ តែអាចធ្វើនៅបាន នៅទីលានប្រជាធិបតេយ្យ ។
នេះបើយោងតាមសេចក្ដីជូនដំណឹងតាមរយៈសារអ៊ីម៉ែលពី លោក សឺង ជុំជួន ប្រធានបណ្ដាញយុវជនខ្មែរក្រោម ដែលមានមូលដ្ឋាននៅក្នុងប្រទេសកម្ពុជា នៅថ្ងៃទី ២១ ខែមិថុនា នេះ ។
សារអ៊ីមែលនេះបានបន្តទៀតថា ការធ្វើបាតុកម្មនេះ នឹងប្រព្រឹត្តទៅនៅ “ ថ្ងៃទី ២៥ ខែមិថុនា ឆ្នាំ ២០១៣ នៅវេលាម៉ោង ៨ ដល់ ម៉ោង ១០ ព្រឹក នៅទីលានប្រជាធិបតេយ្យ ។ ក្នុងក្បួនបាតុកម្មសាលាក្រុង នឹងមកទទួលញតិ ហើយញតិនោះសាលាក្រុងនឹងយកទៅដាក់ជូនក្រសួងការបរទេស នៃប្រទេសកម្ពុជា ដើម្បីដាក់បន្តទៅរដ្ឋាភិបាលវៀតណាម” ។
សូមបញ្ជាក់ថា កាលពីថ្ងៃទី ១៧ ខែធ្នូ ឆ្នាំ ២០០៧ ក្រុមប៉ូលិស្តខ្មែរបានបង្ក្រាបទៅលើក្រុមព្រះសង្ឃខ្មែរ ក្រោមយ៉ាងចាស់ដៃ ខណៈដែលព្រះសង្ឃខ្មែរក្រោមទាំងនោះ បាននាំគ្នាយកញ្ញតិទៅជូនមន្ត្រីស្ថានទូត វៀតណាម នៅទីក្រុងភ្នំពេញ ដើម្បីទាមទារឲ្យរដ្ឋាភិបាលវៀតណាម ដោះលែងព្រះតេជព្រះគុណ ទឹម សាខន អតីតៈព្រះចៅអធិការវត្តភ្នំដិនខាងជើង នៃខេត្តតាកែវ និងព្រះសង្ឃទាំង ៥ អង្គនៅខេត្តឃ្លាំង ដែល ត្រូវរដ្ឋាភិបាលវៀតណាម ចាប់ផ្សឹកនិងដាក់ពន្ធនាគារ កាលពីឆ្នាំ ២០០៧ ។ ករណីបង្ក្រាបនេះ រដ្ឋាភិបាលខ្មែរ ត្រូវបានអង្គការឃ្លាំងមើលសិទ្ធិមនុស្ស (Human Rights Watch) ថ្កោលទោសថា ជាការ រំលោភសិទ្ធិមនុស្សយ៉ាងធ្ងន់ធ្ងរ និងសង្គមស៊ីវិលខ្មែរបានលើកឡើងថា រដ្ឋាភិបាលរបស់ លោក ហ៊ុន សែន នៃប្រទេសកម្ពុជាឋិតនៅក្រោមការបញ្ជារបស់រដ្ឋាភិបាលបក្សកុម្មុយនិស្តវៀតណាម ៕
