ពិធីបុណ្យអុំទូក នៅខេត្តឃ្លាំង រយៈពេល ២ ថ្ងៃ បិទបញ្ចប់ដោយមានពលរដ្ឋខ្មែរក្រោម និងភ្ញៀវទេសចរណ៍ រាប់ម៉ឺននាក់បានចូលរួមទស្សនា
ដោយ ស៊ឺន ចែងចើន
រយៈពេល ២ ថ្ងៃ នៃ ពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ដែលរៀបចំឡើង នៅទីក្រុងឃ្លាំង នៃ ខេត្តឃ្លាំង នៅថ្ងៃទី ៧ ដល់ថ្ងៃទី ៨ ខែវិច្ឆិកា ឆ្នាំ ២០២២ នេះ ប្រព្រឹត្តទៅយ៉ាងរលូន ត្រចះត្រចង់ពោរពេញទៅដោយសម្រែកហ៊ោរកញ្ជ្រៀវ សប្បាយរីករាយ ពីសំណាក់ប្រជាពលរដ្ឋខ្មែរក្រោម និងភ្ញៀវទេសចរណ៍បរទេស រាប់ម៉ឺននាក់ រួមជាមួយនឹងក្រុមកីឡាករ កីឡាការិនី ចំណុះទូកទាំងអស់ ។
ព្រឹត្តិការណ៍ប្រណាំងទូកង ប្រព្រឹត្តទៅរយៈពេល ២ ថ្ងៃ នៅដងទន្លេម៉ាស់ស្ប៉េរ៉ូ (Maspero) ឬទន្លេបាសាក់ ឋិតនៅក្នុងសង្កាត់ទី ៨ ទីក្រុងឃ្លាំង នៃ ខេត្តឃ្លាំង ក្នុងឆ្នាំ ២០២២ នេះ មានទូកដែលមកចូលរួមប្រកួតប្រជែង ទាំងទូកងផ្នែកបុរស និងនារី ចំនួន ៥៤ ក្រុមទូកង នៅក្នុង និងក្រៅខេត្តចូលរួម ក្នុងនោះ មានទូកអុំផ្នែកបុរសចំនួន ៤៥ ក្រុមទូក និង ៩ ក្រុមជាទូកផ្នែកនារី ។ ចំណែកខេត្តផ្សេងៗ ក្រៅពីខេត្តឃ្លាំងជាម្ចាស់ផ្ទះ ដែលមកចូលរួមអុំប្រណាំងរួមមាន ខេត្តព្រះត្រពាំង (Tra Vinh) ខេត្តលង់ហោ (Vinh Long) ខេត្តហូវយ៉ាង (Hau Giang) ខេត្តក្រមួនស (Kien Giang) ខេត្តពលលាវ (Bac Lieu) និងខេត្តទឹកខ្មៅ (Ca Mau) ដោយសរុបអត្តពលិកចូលរួមជិត ៦ ពាន់នាក់ ។
ជាលទ្ធផល ចំណាត់ថ្នាក់លេខ ១ ទូកង ផ្នែកបុរស បានទៅលើទូកង មកពី វត្តពេជ្រមង្គល នៅទីរួមខេត្តជ្រោយញ លេខ ២ បានទៅលើទូកង មកពី វត្តមុនីសោភ័ណ (ពងទឹកចាស់) និងទូកង មកពី វត្តរេន្ទរង្សី (អុងខ) ទទួលបានជ័យាភីលេខ ៣ (ទូកងលេខ ២ និងលេខ ៣ មកពីស្រុកពងទឹកដូចគ្នា) ។
សម្រាប់ទូកងផ្នែកនារីវិញ ចំណាត់ថ្នាក់លេខ ១ បានទៅលើទូកង មកពីវត្តអូរជុំអារាម (ព្រែកចេក) នៅស្រុកពងទឹក លេខ ២ បានទៅលើទូកង មកពី វត្តបទុមរង្សី (ទំនប់) នៅស្រុកកំពង់ធំ និងទូកង មកពី វត្តសិរីគង្គា (គ្រញូង) នៅស្រុកអំពាចវែង ខេត្តក្រមួនស ទទួលបានជយាភីលេខ ៣ ។
ចំពោះ ចំណាត់ថ្នាក់ជយលាភីពានរង្វាន់ នៃ ការប្រណាំងទូក ង នៅកម្ពុជាក្រោម ឆ្នាំ ២០២២ នេះ សម្រាប់ក្រុមជើងឯកទូកបុរស ទទួលបានប្រាក់រង្វាន់ជាទឹកប្រាក់ចំនួន ២០០ លានដុង រង្វាន់លេខ ២ ចំនួន ១៥០ លានដុង រង្វាន់លេខ ៣ ចំនួន ១០០ លានដុង រង្វាន់លេខ ៤ ចំនួន ៨០ លានដុង ។ សម្រាប់ជើងឯកទូកនារី ទទួលបានប្រាក់រង្វាន់ចំនួន ១៥០ លានដុង រង្វាន់លេខ ២ ចំនួន ១០០ លានដុង រង្វាន់លេខ ៣ ចំនួន ៨០ លានដុង និងរង្វាន់លេខ ៤ ចំនួន ៥០ លានដុង ។ បន្ថែមពីលើនេះ គណៈកម្មាធិការរៀបចំកម្មវិធីបុណ្យអុំទូក ក៏បានផ្តល់ប្រាក់រង្វាន់លើកទឹកចិត្ត ចាប់ពី ២ ដល់ ៨ លានដុង ទៅដល់ក្រុមទូកលេខ ១ និង លេខ ២ សម្រាប់ក្រុមជម្រុះរបស់គូប្រកួតនីមួយៗ រហូតដល់វគ្គពាក់កណ្តាលផ្តាច់ព្រ័ត្រ ។
ខ្មែរក្រោម នៅដែនដីកម្ពុជាក្រោម តែងតែប្រារព្វពិធីបុណ្យអកអំបុក ប្រណាំងទូក លយប្រទីប សំពះព្រះខែ និងបង្ហោះគោម នៅតាមវត្តអារាម និងទីកម្សាន្តនានា ជារៀងរាល់ឆ្នាំ ទៅតាមប្រពៃណីជាតិ មិនដែលអាក់ខានឡើយ បើទោះបីជាបច្ចុប្បន្ននេះ ពលរដ្ឋខ្មែរក្រោម កំពុងរស់នៅក្រោមការគ្រប់គ្រងរបស់ប្រទេសវៀតណាម ក៏ដោយ ។
ពលរដ្ឋខ្មែរក្រោម បាននាំគ្នាបញ្ជូនទូកង នៅតាមវត្ត ទៅអុំប្រណាំងគ្នា នៅទីតាំងពីរធំៗ គឺទន្លេបាសាក់ ក្នុងខេត្តឃ្លាំង និងទន្លេកំពង់ នៅទីក្រុងព្រះត្រពាំង ។ ក្រៅពីនេះ នៅខេត្តក្រមួនស ក៏មានរៀបចំពិធីប្រណាំងទូកងផង ដោយមានក្រុមទូកង នៅក្នុងខេត្តមួយនេះ មិនតិចជាង ២០ ទូក ចូលរួមអុំប្រកួត ។
សូមបញ្ជាក់ថា ទូក ង ដែលអុំប្រណាំង នៅដែនដីកម្ពុជាក្រោម ត្រូវបានរចនាឡើង សុទ្ធតែជាប្រភេទទូកវែង ចំណុះជាង ៥០ នាក់ និងលាបពណ៌ទូក ដោយមានក្បូរក្បាច់រចនាយ៉ាងល្អប្រណិត ដូចទូកងប្រណាំង នៅប្រទេសកម្ពុជាដែរ ។ ចំណែកឈ្មោះទូកវិញ ត្រូវបានខ្មែរក្រោមប្រសិទ្ធិនាម ឲ្យដូចឈ្មោះវត្ត ឬឈ្មោះស្រុក (និគម) របស់ពួកគេ ។ ប៉ុន្តែ ឈ្មោះទូកងទាំងនោះ ខ្លះសរសេរម្ខាងជាអក្សរខ្មែរ និងម្ខាងទៀត ជាភាសាវៀតណាម ។
បន្ថែមពីលើកម្មវិធីកម្សាន្តផ្សេងៗ នៅពេលថ្ងៃ ដើម្បីអបអរសាទរពិធីអកអំបុក មានដូចជាសកម្មភាពប្រកួតប្រជែងកីឡារួមមាន ប្រណាំងទូក ង លេងបាលទះ បាលទាត់ និងល្បែងលេងប្រជាប្រិយ មានជាអាទិ៍ វាយឆ្នាំដី រុញដំបង លោតការុង ទាញព្រ័ត្រ និងមហោស្រពម្ហូបអាហារ ។ ចំណែក នៅពេលយប់វិញ ពលរដ្ឋខ្មែរនាំគ្នាសំដែងសិល្បៈ ក្បូនដង្ហែផ្ការបស់វត្តនានា និងលយប្រទីប ។ ដោយឡែក នៅយប់ ១៥ កើត ខែកត្តិក គឺជាពេលសំពះព្រះខែ និងអកអំបុក ។ ពលរដ្ឋខ្មែរក្រោម នាំគ្នាធ្វើពិធីបង្អកអំបុក ចេកដំបូង គ្នាទៅវិញទៅមក ហើយសំពះព្រះខែ នៅតាមវត្តអារាម និងមានការបង្ហោះគោមផង ៕
