វត្ដខ្មែរក្រោមមួយកន្លែងនៅក្រុងស៊ីដនីយ៍ កើតអំពើហិង្សាធ្វើឲ្យព្រះសង្ឃ និងប្រធានវត្តរងរបួសធ្ងន់
វត្ដអារាមខ្មែរមួយកន្លែង នៅអូស្ដ្រាលីដែលគួរតែជាកន្លែងស្ងប់ស្ងាត់ប្រតិបត្ដិធម៌មេត្ដាករុណាហាត់ចិត្ដសណ្ដោសប្រណីគ្នា ទៅវិញទៅមក កាលពីរសៀលថ្ងៃពុធ ទី ៣០ ខែតុលា ម្សិលមិញ ប៉ូលិសបានឲ្យដឹងថា មានបញ្ហាជម្លោះហិង្សាមួយបានកើតឡើងរវាងពលរដ្ឋខ្មែរក្រោមអូស្ដ្រាលី ២ រូប នៅវត្ដកេតនៈខ្មែរកម្ពុជាក្រោម នៅក្នុងសង្កាត់ Rossmore ក្នុងតំបន់បែកនិរតីនៃក្រុងស៊ីដនីយ៍ ។
ប្រភពពីព័ត៌មានពីគេហទំព័រ ឌឺ ដេលី តេឡេក្រាប (THE DAILY TELEGRAPH) បានផ្សាយនៅថ្ងៃទី ៣១ ខែតុលា ថា ភិក្ខុ គឹម ករុណា អាយុ ២៩ ឆ្នាំ កំពុងស្ថិតនៅក្នុងស្ថានភាពធ្ងន់ធ្ងរនៅមន្ទីរពេទ្យ Liverpool ក្រុងស៊ីដនីយ៍ ដោយត្រូវរបួសខួរក្បាលខ្លាំង ក្រោយពីត្រូវគ្រាប់ដែកគោល បាញ់ចេញពីម៉ាស៊ីនបាញ់ដែកគោល ។
ចំណែក លោក ឡឹម ថា ជាប្រធានវត្ត អាយុ ៥៩ ឆ្នាំ ក៏ត្រូវចូលមន្ទីរពេទ្យផងដែរដោយសាររបួសក្បាលនៅក្រោយត្រចៀកខាងស្ដាំ ។
មានរបាយការណ៍មកថា ព្រះសង្ឃបានវាយប្រហារទៅលើបុរសប្រធានវត្ត មុនពេលប្រើឧបករណ៍បាញ់ដែកគោលបាញ់ខ្លួន ឯង ។
លោក James Johnson ប៉ូលិសនៅតំបន់នោះនិយាយថា គ្រាប់ដែកគោល គឺនៅជាប់ក្នុងក្បាលព្រះសង្ឃ គឹម ករុណា នៅ ឡើយ ។
ឥឡូវប៉ូលិសនៅតំបន់នោះកំពុងតែធ្វើការស៊ើបអង្កេតហេតុការណ៍ជម្លោះនោះ ។ ប៉ូលិសបានលើកឡើងថា បញ្ហាភាសាស្ដាប់គ្នាមិនបានជាឧបសគ្គរារាំងដល់ការស៊ើបអង្កេតនេះ ។
តាមព័ត៌មាននៅលើវ៉ិបសាយថ៍របស់មជ្ឈមណ្ឌលប្រវត្ដិជនអន្ដោប្រវេសន៍ វត្ដកេតនៈខ្មែរកម្ពុជាក្រោមនេះបានបង្កើតឡើងនៅ ឆ្នាំ១៩៩៨ ៕
Comments are closed.