ដោយ ថាច់ ប្រីជា គឿន l សារព័ត៌មាន ព្រៃនគរ
អ្នកសរសេរប្លក់ដ៏មានប្រជាប្រិយភាពម្នាក់នៅប្រទេសវៀតណាម ត្រូវបានតុលាការបក្សកុម្មុយនិស្តវៀត ណាមផ្ដន្ទាទោស ឲ្យជាប់គុក ១៥ ខែ ក្រោយពីបានសរសេរអត្ថបទរិះគន់ដល់ក្រុមមន្ត្រីបក្សកុម្មុយនិស្ត វៀតណាម ។ ក្រោយពីកាត់ទោសមួយ រយៈពេលខ្លី នៅថ្ងៃពុធ ទី ១៩ ខែមីនា នេះ នៅរដ្ឋធានីហាណូយ តុលាការបានរកឃើញកំហុសរបស់អ្នកសរសេរប្លក់ រូបនេះអំពីអ្វីមួយ ដែលបក្សកុម្មុយនិស្សយួន ហៅថា បានរំលោភលើសេរីភាពប្រជាធិបតេយ្យដែលប៉ះពាល់ដល់ ផលប្ រយោជន៍រដ្ឋ តាមមាត្រា ២៥៨ នៃច្បាប់ ព្រហ្មទណ្ឌ ។ ចៅក្រមបាននិយាយថា អត្ថបទរបស់ លោក ផាម វៀត ដាវ (Phạm Viết Đào) អាយុ ៦២ ឆ្នាំ រូបនេះ បានបង្ខូចឈ្មោះបក្ស និងមេដឹកនាំប្រទេសនេះ ដែលបណ្ដាលឲ្យមានកង្វល់ក្នុងចំណោម សាធារណជន ហើយកាត់បន្ថយទំនុកចិត្តពីប្រជាពលរដ្ឋទៅលើបក្សកុម្មុយនិស្តវៀតណាម ។
លោក ផាម វៀត ដាវ បានសុំទោសចំពោះកំហុសឆ្គងខ្លះនៃការផ្សាយនៅលើទំព័រប្លក់ដែលមាន ព័ត៌មានខ្លះមិនត្រឹមត្រូវ តែលោកបានបដិសេធចំពោះអ្វី ដែលតុលាការបានចោទប្រកាន់ថា សកម្មភាព របស់លោកមានគ្រោះថ្នាក់ដល់សង្គមនោះ ។
ការផ្ដន្ទាទោសលើអ្នកសរសេរប្លក់រូបនេះ ត្រូវបានគេមើលឃើញថា រដ្ឋការទីក្រុងហាណូយកំពុងតែបើក យុទ្ធនាការបង្ក្រាប ទៅ លើក្រុមរិះគន់រដ្ឋាភិបាលនៅលើប្រព័ន្ធអិនធើណិត ។
យោងតាមសាលក្រម គេហទំព័រប្លក់របស់ លោក ដាវ បានចុះផ្សាយព័ត៌មាន “បង្ខូច” ដល់អ្នកដឹកនាំជាន់ ខ្ពស់របស់ មេដឹកនាំបក្សកុម្មុយនិស្តយួន ។ លោក ដាវ ជាអតីតៈមន្ត្រីនៅក្នុងក្រសួងវប្បធម៌ និងជា សមាជិកបក្សកុម្មុនិស្តយួនដ៏មាន ចំណាស់ម្នាក់ ផងដែរ ។ លោកបានជ្រើសរើសយកវិធីការពារខ្លួនដោយ ខ្លួនឯង នៅក្នុងសវនាការនេះ ។
លោក ផាម វៀត ដាវ ជាអ្នកសរសេរប្លក់ម្នាក់ ក្នុងចំណោមអ្នកសរសេរប្លក់ទាំង ៣ រូប ដែលត្រូវវៀត ណាមចាប់ខ្លួនកាលពីឆ្នាំ ២០១៣ ។ អ្នកទាំងនេះមាន លោក ត្រឿង យី ញឹក (Trương Duy Nhất) ត្រូវផ្ដន្ទាទោសឲ្យជាប់គុក ២ ឆ្នាំ នៅដើមខែនេះ និង លោក ដិន ញឹក វី (Đinh Nhật Uy) ត្រូវផ្ដន្ទាទោស ព្យួរ ១៥ ខែ ។
លោក ភីល រ៉ូប៊ើតសឺន (Phil Robertson) នាយករងប្រចាំអាស៊ី នៃអង្គការឃ្លាំមើលសិទ្ធិមនុស្ស (Human Rights Watch) ដែលមានការិយាល័យនៅទីក្រុង New York បានថ្លែងថា នេះជាវិធីមួយ របស់បក្សកុម្មុយនិស្តវៀតណាម ដើម្បីបំបិទមាត់ ក្រុមអ្នកបញ្ចេញមតិរិះគន់រដ្ឋាភិបាល ។
លោក ភីល រ៉ូប៊ើតសឺន ថ្លែងថា៖
“រាល់ទង្វើ [ចាប់ខ្លួនអ្នកសរសេរប្លក់ទាំងនេះ] ដើម្បីរកវិធីកំទេចរាល់សកម្មភាពផ្ដល់ ព័ត៌មានរ បស់ក្រុម អ្នក តស៊ូមតិ អ្នកដែលនៅតែ មានសកម្មភាពដាក់សម្ពាធដល់រដ្ឋាភិបាលវៀតណាម អំពី បញ្ហាទាក់ទងនឹងដីធ្លី សិទ្ធិមនុស្ស និងអំពើពុករលួយ” ។
អង្គការឃ្លាំមើលសិទ្ធិមនុស្សបានចាត់ទុក ការដែលតុលាការវៀតណាមផ្ដន្ទាទោសអ្នកសរសេរប្លក់ទាំងនេះ តាមមាត្រាទី ២៥៨ ជាលេះមួយដើម្បីឃុំឃាំងក្រុមអ្នករិះគន់រដ្ឋាភិបាលដោយសន្តិវិធី តែប៉ុណ្ណោះ ។
យោងតាមអង្គការឃ្លាំមើលសិទ្ធិមនុស្ស សព្វថ្ងៃ វៀតណាមបានឃុំឃាំងអ្នកទោសមនសិការ ៦១ នាក់ ក្នុងឆ្នាំ ២០១៣ កន្លង ទៅនេះ ដែលកាលពីឆ្នាំ ២០១២ មានតែ ៤០ នាក់ប៉ុណ្ណោះ ។
រដ្ឋាភិបាលវៀតណាមបាននិយាយច្រំដែលថា ការឃុំឃាំងអ្នកទាំងនេះ ព្រោះពួកគេបានបំពានលើច្បាប់ និងមិនដែលមាន អ្នកទោសនយោបាយនៅវៀតណាមទេ ។
សូមបញ្ជាក់ថា កាលពីខែកញ្ញា ឆ្នាំ ២០១៣ រដ្ឋាភិបាលវៀតណាម ក៏បានផ្ដន្ទាទោសព្រះសង្ឃ និង ពលរដ្ឋខ្មែរក្រោម ៩ រូប ក្នុង នោះ មានម្នាក់កាត់ទោសកំបាំងមុខ ម្នាក់ៗឲ្យជាប់គុកពី ១០ ខែ ទៅ ៦ ឆ្នាំ ពីបទប្រឆាំងរដ្ឋាភិបាល ផងដែរ ។ រហូតមក ទល់នេះ ពលរដ្ឋខ្មែរក្រោមទាំងនោះ នៅកំពុងជាប់គុកនៅឡើយ ៕
