អាជ្ញាធរយួន បំបិទសេរីភាពនៃការបញ្ចេញមតិរបស់ពរដ្ឋខ្មែរក្រោម នៅលើបណ្តាញសង្គម
អាជ្ញាខេត្តឃ្លាំង នៃរដ្ឋាភិបាលបក្សកុម្មុយនិស្តវៀតណាម នៅថ្ងៃទី ២៣ មេសា បានកោះហៅពលរដ្ឋក្រោមម្នាក់ ទៅសាកសួរ ជុំវិញការប្រើប្រាស់បណ្ដាញសង្គម ដោយអាជ្ញាធរវៀតណាម ចាត់ទុកថា ជាករណីខុសច្បាប់ ។
យោងតាមលិខិតកោះហៅមួយច្បាប់ ចេញដោយបញ្ជាការដ្ឋានកងទ័ពការពារព្រំដែន នៃច្រកទ្វារព្រំដែន ឃុំឡាយហ្វា ដែលចុះហត្ថលេខាដោយមេនគរបាលប៉ុស្តិ៍ច្រកទ្វារព្រំដែន វរសេនីយ៍ទោ ង្វៀន វ៉ាន់ទ្រុង (Nguyễn Văn Trung) បានកោះហៅទៅសួរចម្លើយ ចំពោះពលរដ្ឋខ្មែរក្រោមម្នាក់ឈ្មោះ គឹម ហុងមីល (Kim Hồng Mil) នៅភូមិព្រៃជាប់ ឃុំទឹកសាប ស្រុកជ្រោយ ញ ខេត្តឃ្លាំង ។
លិខិតកោះហៅដដែល បានបង្គាប់ឲ្យ លោក គឹម ហុងមីល ទៅប៉ុស្តិ៍ការពារព្រំដែន (ព្រំដែនសមុទ្រ) ឃុំឡាយហ្វា (Lai Hoa) ស្រុកវិញចូវ (Vinh Chau) នៃ ខេត្តឃ្លាំង នៅវេលាម៉ោង ១៤ និង ០០ នាទី ថ្ងៃទី ២៣ មេសា ២០២០ ដើម្បី «សួរនាំនូវរឿងរ៉ាវមួយចំនួន ពាក់ព័ន្ធ នឹងការប្រើប្រាស់បណ្តាញសង្គម» ។
វិទ្យុសំឡេងកម្ពុជាក្រោម បានព្យាយាមទាក់ទងពលរដ្ឋខ្មែរក្រោម ដែលរងការកោះហៅនេះ ដើម្បីចង់ដឹងព័ត៌មានម្អិត ជុំវិញនៃការសាកសួរពីអាជ្ញាធរយួននេះដែរ ។ ប៉ុន្តែ នៅមិនទាន់ទទួលបានការឆ្លើយតប នៅឡើយទេ ។
ជារឿយៗ ព្រះសង្ឃ និងពលរដ្ឋខ្មែរក្រោម តែងតែត្រូវអាជ្ញាធរនៃអាណានិគមយួន កោះហៅទៅសួរចម្លើយជាបន្តបន្ទាប់ ដោយចោទពីបទ ប្រឆាំង នឹងរដ្ឋភិបាល ឬមានទំនាក់ទំនង នឹងខ្មែរក្រោម នៅក្រៅប្រទេស ។
