វត្តមង្គលបូរីទ្រនំសេកអាជ្ញាធរវៀតណាម ព្យាយាមវាយកម្ទេចសាលាឆទានរបស់ពលរដ្ឋខ្មែរក្រោម នៅខេត្តលង់ហោរ កម្ពុជាក្រោម
ដោយ មាន ឫទ្ធិ | RFA Khmer
អាជ្ញាធរវៀតណាម នាំកងកម្លាំងប្រដាប់អាវុធជាងមួយរយនាក់ ទៅលោមព័ទ្ធវត្តមង្គលបូរីទ្រនំសេក ខេត្តលង់ហោរ ដែលវៀតណាមហៅថា ខេត្តវិញឡុង (Vinh Long) ក្នុងបំណងចាប់ព្រះសង្ឃ ដែលតវ៉ាមិនឲ្យអាជ្ញាធរវៀតណាម វាយកម្ទេចសាលាឆទានថ្មី ។ សាលាឆទាននេះ វៀតណាមចេញលិខិតវាយកម្ទេចបីលើកមកហើយ ប៉ុន្តែ ព្រះសង្ឃ និងពលរដ្ឋខ្មែរក្រោម ចេញមករារាំងមិនឲ្យវាយកម្ទេច ។
កងកម្លាំងប្រដាប់អាវុធវៀតណាម ជាងមួយរយនាក់ កាលពីព្រលប់ថ្ងៃទី ២៣ ខែធ្នូ បានលោមព័ទ្ធវត្តមង្គលបូរីទ្រនំសេក ស្រុកប្រាសាទថ្មី ខេត្តលង់ហោរ ដើម្បីចាប់ព្រះសង្ឃដែលតែងតែប្រឆាំងមិនឲ្យវៀតណាម បំផ្លាញសាលាឆទាន ដែលទើបនឹងកសាងថ្មី សម្រាប់កូនចៅខ្មែរក្រោមរៀនអក្សរខ្មែរ និងពលរដ្ឋប្រតិបត្តិជំនឿសាសនា ។
ព្រះសង្ឃគង់វត្តមង្គលបូរីទ្រនំសេក ជាសមាជិកផ្ដួចផ្ដើមកសាងសាលាឆទាន ព្រះភិក្ខុ ផេន ចន្ទតារា មានថេរដីកាប្រាប់វិទ្យុអាស៊ីសេរី នៅយប់ថ្ងៃទី ២៤ ខែធ្នូ ថា នគរបាលវៀតណាម មិនពេញចិត្តនឹងព្រះអង្គ ដែលតែងតែដឹកនាំបរិស័ទកសាងសាលាឆទាន និងដឹកនាំខ្មែរក្រោម រារាំងមិនឲ្យពួកគេរំលាយសាលាឆទាន ដែលទើបនឹងសាងថ្មីនោះ ។ ព្រះអង្គមានថេរដីកាទៀតថា អាជ្ញាធរវៀតណាម ចង់ចូលចាប់ព្រះអង្គក្នុងវត្ត តែព្រះសង្ឃ និងពុទ្ធបរិស័ទប្រមាណ ៤០ អង្គ និងនាក់ ប្ដេជ្ញាតស៊ូការពារព្រះអង្គ ទើបពួកគេដកថយ៖ «កាលពីថ្ងៃម្សិលតតាំងគ្នាវា (វៀតណាម) គ្រាន់តែរដ្ឋអំណាចយួនប្រើពាក្យប្រមាថ ចំពោះព្រះសង្ឃនឹងណា ហើយព្រះសង្ឃការពារមិនឲ្យចូលក្នុងវត្ត ។ កាលណាបើឲ្យចូលក្នុងវត្ត គឺយើងមិនអាចនឹងទប់ទល់កម្លាំងយក្សវា (យួន) បានទេ ព្រោះយើងបានតែប៉ុន្មានគ្រាប់ (នាក់) ណា ហើយគ្នាវារាប់រយមកហ្នុង យើងមិនអាចទប់ទល់បានទេ ។ អំពើហិង្សាគ្រាន់តែប្រើត្រឹមពាក្យសម្ដីតែប៉ុណ្ណឹងទេ វាក៏នៅខាងក្រៅទៅណា យើងនៅខាងក្នុងណា វាចង់ចូលយើងមិនឲ្យវាចូល យើងនៅយាមរបងជុំវិញអស់ទាំងវត្ត ហើយនិងបរិស័ទភូមិកន្រែង ជាពិសេសបរិស័ទសាលាទានភូមិកន្រែងទៅចូលរួមណា» ។
ក្នុងពេលអាជ្ញាធរវៀតណាម ប្រដាប់ដោយអាវុធជាងមួយរយនាក់ ព័ទ្ធជុំវិញវត្ត បំណងទម្លុះរបងចូលចាប់ព្រះភិក្ខុ ផេន ចន្ធតារា ព្រះសង្ឃក្នុងវត្តទូងស្គរ វាយរគាំង សូត្រធម៌ ដើម្បីផ្ដល់ដំណឹងដល់បរិស័ទ ដែលនៅឆ្ងាយពីវត្តប្រមាណ ១២ គីឡូម៉ែត្រ ពិសេសបរិស័ទនៅជុំវិញសាលាឆទានថ្មី ភូមិកន្រែង ឃុំកំពង់ ស្រុកប្រាសាទថ្មី ឲ្យមកជួយការពារព្រះសង្ឃ និងវត្តអារាម ។ ពេលពលរដ្ឋខ្មែរក្រោមមកច្រើន ហើយពុះពារការពារព្រះសង្ឃ ពួកអាជ្ញាធរវៀតណាមក៏បានដកកងកម្លាំងត្រឡប់ទៅវិញ ។
ស្រដៀងគ្នានេះដែរ ពលរដ្ឋខ្មែរក្រោមម្នាក់ ជាគណៈកម្មការកសាងសាលាឆទាន ក្នុងស្រុកប្រាសាទថ្មី ខេត្តលង់ហោរ លោក គឹម ឃីម ប្រាប់ថា វៀតណាមបានចេញលិខិតអញ្ជើញលោក និងខ្មែរក្រោមពីរនាក់ទៀត និងព្រះសង្ឃ ទៅចរចានៅសាលាឃុំជុំវិញរឿងសាលាឆទាន កាលពីរសៀលថ្ងៃទី ២៣ ខែធ្នូ តែលោក និងខ្មែរក្រោម និងព្រះសង្ឃមិនព្រមទៅ លុះព្រលប់វៀតណាម បាននាំកម្លាំងប្រដាប់អាវុធទៅចាប់ព្រះសង្ឃក្នុងវត្តមង្គលបូរីទ្រនំសេក ។ លោកបន្តថា លោកឮដំណឹងថាវៀតណាមមកប៉ុនប៉ងចាប់ព្រះសង្ឃ លោកក៏បបួលអ្នកភូមិមកជួយព្រះសង្ឃ ។ លោកស្នើឲ្យអង្គការសិទ្ធិមនុស្សពិភពលោក ជួយដល់ពលរដ្ឋខ្មែរក្រោម កុំឲ្យវៀតណាមរំលោភជំនឿសាសនា និងវាយកម្ទេចសាលាឆទានរបស់ខ្មែរក្រោម៖ «សំណូមពរដល់អង្គការសិទ្ធិមនុស្សអន្តរជាតិណា ដែលវៀតណាម ដែលជាសមាជិកសិទ្ធិមនុស្សអន្តរជាតិ គឺថា សុំអង្គការសហប្រជាជាតិ ដាក់សម្ពាធលើរដ្ឋអំណាចយួនហ្នឹងបន្តិច គឺថា ខ្លួនឯងទទួលនូវសិទ្ធិ ដែលជាអ្នកទទួលយកនូវសិទ្ធិមនុស្ស ហេតុអ្វី? មិនអនុវត្តក្នុងប្រទេសរបស់ខ្លួនណា ។ សុំឲ្យសហគមន៍អន្តរជាតិនឹងបង្វែរភ្នែកឬចក្ខុហ្នឹង សម្លឹងមើលពីការរំលោភសិទ្ធិរបស់រដ្ឋអំណាចយួនហ្នឹងណា» ។
វិទ្យុអាស៊ីសេរី មិនអាចទាក់ទងសុំការអត្ថាធិប្បាយជុំវិញបញ្ហានេះ ពីអាជ្ញាធរវៀតណាម នៅខេត្តលង់ហោរ បានទេ នៅថ្ងៃទី ២៥ ខែធ្នូ ។
ជុំវិញរឿងនេះដែរ អគ្គលេខាធិការសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ប្រចាំកម្ពុជា និងជាមេធាវី លោក សឺន ជុំជួន លើកឡើងថា អាជ្ញាធរវៀតណាម លើកកងកម្លាំងទៅព័ទ្ធចាប់ព្រះសង្ឃទាំងយប់ជាទង្វើខុសច្បាប់វៀតណាម និងរំលោភសិទ្ធិពលរដ្ឋខ្មែរក្រោម ព្រោះព្រះសង្ឃជាបុគ្គលដែលខ្មែរក្រោមលើកតម្កើង ។ លោកបន្តថា វៀតណាមគួរតែគោរពតាមច្បាប់សិទ្ធិមនុស្សអន្តរជាតិ ដែលខ្លួនទើបជាប់ជាសមាជិកអចិន្ត្រៃយ៍ នៃ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ៖ «ខ្ញុំក៏សុំសំណូមពរដែរ ទៅដល់ខាងអាជ្ញាធរវៀតណាម ដែលមានសមត្ថកិច្ចជាពិសេសដល់រដ្ឋាភិបាលវៀតណាម គួរតែណែនាំដល់សមត្ថកិច្ចរបស់ខ្លួនហ្នឹង គួរអនុវត្តឲ្យបានសមស្របទៅតាមគោលការណ៍សិទ្ធិមនុស្ស សមស្របទៅតាមគោលការណ៍ច្បាប់របស់ខ្លួនជាដើម ។ វាមិនអាចធ្វើការកំហែង កំឡុងពេលដែលរដ្ឋជាសមាជិកហើយ ហើយជារដ្ឋមួយដែលទើបតែជាប់ឆ្នោតជាសមាជិករបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិផង ហើយបង្កើតឲ្យមានបញ្ហាដូច្នេះ ខ្លួនគួរ! គួរ! គួរគិតហើយគួរតែស្វែងយល់អំពីបញ្ហានេះហើយ» ។
មេធាវីរូបនេះ ស្នើឲ្យរដ្ឋាភិបាលវៀតណាម បញ្ឈប់ធ្វើទុក្ខបុកម្នេញលើពលរដ្ឋខ្មែរក្រោម ទាំងជំនឿសាសនា សិទ្ធិបញ្ចេញមតិ សិទ្ធិរៀនអក្សរខ្មែរ និងសិទ្ធិកាន់កាប់ដីធ្លីជាដើម ។ លោកថា បើវៀតណាមនៅតែបំពាន ពលរដ្ឋខ្មែរក្រោមអាចរាយការណ៍ទៅអង្គការសិទ្ធិមនុស្សពិភពលោកប្រចាំទីក្រុងព្រៃនគរបានគ្រប់ពេល ។
កន្លងមកព្រះសង្ឃវត្តមង្គលបូរីទ្រនំសេក ត្រូវបានវៀតណាមអុកឡុកជាច្រើនលើក ដូចជា ប៉ុនប៉ងកាប់ដើមគគីរមានអាយុជាងប្រាំពីររយឆ្នាំ ទះកំផ្លៀងព្រះសង្ឃដែលរារាំងមិនឲ្យកាប់ដើមគគីរ ព្យាយាមបំផ្លាញសាលាឆទានថ្មី និងចាប់ម៉ូតូកង់បីរារាំងមិនឲ្យព្រះសង្ឃនិមន្តបិណ្ឌបាត្រជាដើម ៕
