ដោយ ថាច់ ប្រីជា គឿន l សារព័ត៌មាន ព្រៃនគរ
សាខាសហព័ន្ធខ្មែរកម្ពុជាក្រោម ប្រចាំរដ្ឋ Washington នឹងប្រារព្ធខួប ១៤ ឆ្នាំ ថ្ងៃសហព័ន្ធខ្មែរកម្ពុជាក្រោម បានចូលជាសមាជិកពេញសិទ្ធិនៃអង្គការប្រជាជាតិគ្មានតំណាង ហៅកាត់ជាភាសាអង់គ្លេសថា UNPO នៅ ថ្ងៃទី ២៥ ខែកក្កដា ខាងមុខនេះ ។ ពិធីនេះ មានការចូលរួមពី លោក ថាច់ ង៉ុក ថាច់ ប្រធានសហព័ន្ធខ្មែរ កម្ពុជាក្រោមជាអធិបតី និង លោក ចៅ រៀប ប្រធានសភាព្រឹទ្ធាចារ្យនៃសហព័ន្ធខ្មែរកម្ពុជាក្រោម ដើម្បីថ្លែង ការអំពីសកម្មភាពថ្មីៗរបស់សហព័ន្ធខ្មែរកម្ពុជាក្រោម និងលទ្ធផលកដែលខ្មែរក្រោមបានទទួលក្រោយពី ១៤ ឆ្នាំ ដែលសហព័ន្ធខ្មែរកម្ពុជាក្រោម បានចូលជាសមាជិកអង្គការ UNPO ។
នេះជាកម្មវិធីមួយដែលសាខាសហព័ន្ធខ្មែរកម្ពុជាក្រោម តែងតែប្រារព្ធជារៀងរាល់ឆ្នាំ ដើម្បីសម្ដែងការអបអរ សាទរចំពោះសហព័ន្ធខ្មែរកម្ពុជាក្រោម បានចូលជាសមាជិកអង្គការប្រជាជាតិគ្មានតំណាង កាលពីថ្ងៃទី ១៥ ខែកក្កដា ឆ្នាំ ២០០១ នៅទីក្រុងឡាអេ ប្រទេសហូឡង់ ។
ចាប់តាំងពីឆ្នាំ ២០០១ មក សហព័ន្ធខ្មែរកម្ពុជាក្រោម ដែលហៅកាត់ជាភាសាអង់គ្លេសថា KKF មាន មូលដ្ឋាននៅសហរដ្ឋអាមេរិក បានចូលជាសមាជិកអង្គការអន្តរជាតិ ជាច្រើន ដូចជា សហព័ន្ធកីឡាទូក ប្រណាំងអន្តរជាតិ (IDBF), វេទិកាអចិន្ត្រៃយ៍នៃអង្គការសហប្រជាជាតិស្ដីពីបញ្ហាជនជាតិដើម (UNPFII) , វេទិកាអនុសញ្ញាអន្តរជាតិស្តីពីការបំបាត់រាល់ទម្រង់នៃការរើសអើងប្រឆាំងនឹងស្ត្រី (Convention on the Elimination of All Forms of Discrimination Against Women) ហៅកាត់ថា CEDAW និងគណបក្សចម្រុះជាតិសាសន៍ (TPR) នៅអឺរ៉ុប ជាដើម ។
តាមរយៈការចូលសមាជិកនៃអង្គការអន្តរជាតិទាំងនេះ សហព័ន្ធខ្មែរកម្ពុជាក្រោម បានធ្វើតស៊ូមតិដោយសន្តិ វិធី និងអហិង្សានៅលើឆាកអន្តរជាតិជាច្រើននៅទូទាំងពិភពលោក ដើម្បីទាមទារឲ្យរដ្ឋាភិបាលបក្សកម្មុយ និស្តវៀតណាមគោរពសិទ្ធិខ្មែរក្រោម ម្ចាស់ស្រុក នៃដែនដីកម្ពុជាក្រោម សព្វថ្ងៃ ។
យោងតាមគេហទំព័រជាផ្លូវការរបស់អង្គការ UNPO បានបញ្ជាក់ថា អង្គការនេះ ជាក្រុមចលនាអន្តរជាតិមួយ ធ្វើការតស៊ូដោយសន្តិវិធី អហិង្សា និងលទ្ធិប្រជាធិបតេយ្យ តំណាងឲ្យក្រុមជនជាតិដើម, ជនជាតិភាគតិច និងជនជាតិនៅតាមដែនដីដែលត្រូវបានគេវាតទីយក ហើយមិនមានការទទួលស្គាល់ ។ បច្ចុប្បន្ន អង្គការ UNPO មានប្រជាជាតិជាសមាជិកចំនួន ៤៣ នៅក្នុងពិភពលោក ។ ពួកប្រជាជាតិជាសមាជិក UNPO ទាំងនោះបានរួបរួមគ្នាធ្វើការតស៊ូ ដើម្បីជម្រុញឲ្យមានការគោរពសិទ្ធិមនុស្សជាមូលដ្ឋាន, ការពារវប្បធម៌របស់ ពួកគេមិនឲ្យបាត់បង់ និងស្វែងរកដំណោះស្រាយដោយសន្តិវិធីដើម្បីទប់ស្កាត់រាល់វិបត្តិដែលជះឥទ្ធិពលមក លើខ្លួនពីសំណាក់បរទេស ឬ ពីប្រទេសដែលដាក់អាណានិគមលើខ្លួន ។
អង្គការ UNPO បានបង្កើតឡើង កាលពីឆ្នាំ ១៩៩១ នៅវិមានសន្តិភាព (Peace Palace) នាទីក្រុងឡាអេ (The Hague) នៃប្រទេសហូឡង់ ដោយមានការចូលរួមពីសហស្ថាបនិកចាប់ពីចំនួន ១៥ ជាសមាជិក ។ បន្ទាប់ពី ២៤ ឆ្នាំ ដែលអង្គការ UNPO បានបង្កើតឡើង មានសមាជិកកើនកើនឡើងដល់ជាង ៧០ ហើយបច្ចុប្បន្ននេះ មានសមាជិកនៅសល់ចំនួន ៤៣ តែប៉ុណ្ណោះ បន្ទាប់សមាជិកមួយចំនួន បានឯករាជ្យ ហើយសមាជិកមួយចំនួនត្រូវដាច់សមាជិកភាព ព្រោះមិនបានបំពេញតាមលក្ខខណ្ឌដែល UNPO តម្រូវ ការ ។
យោងតាមគោលការណ៍របស់អង្គការ UNPO សមាជិកទាំងអស់ រួមទាំងសហព័ន្ធខ្មែរកម្ពុជាក្រោម ផង ត្រូវគោរពគោលធំៗចំនួន ៥ គឺ អហិង្សា, សិទ្ធិមនុស្ស, លទ្ធិប្រជាធិបតេយ្យ, សិទ្ធិសម្រេចវាសនាខ្លួនដោយខ្លួនឯង, ការពារបរិស្ថាន និង ការយោគយល់ ៕
Comments are closed.