ក្រុមអ្នកប្រើ បណ្ដាញសង្គម Facebook បានរិះគន់ និងខឹងសម្បាយ៉ាងខ្លាំង ចំពោះក្រុមសិល្បៈ មួយនៅដែនដីកម្ពុជាក្រោម ដែលបានយកទំនុកភ្លេងខ្មែរទៅច្រៀងជាទំនុកច្រៀងយួន នៅពេលកន្លងមកនេះ ។ ពួកគេរិះគន់ថា ទង្វើនេះធ្វើឲ្យអាប់អោន ដល់កិត្តិយសខ្មែរ និងសាបរលាបនូវវប្បធម៌ ខ្មែរនៅកម្ពុជាក្រោមបន្តិចម្ដងៗ ។ ក្រុមសិល្បៈដែលត្រូវរិះគន់បានឆ្លើយតបថា បទចម្រៀងទាំងនេះ ធ្វើឡើងដើម្បីយកទៅប្រឡង នៅហាណូយ ក្នុងគោលបំណងបម្រើនយោបាយ (phuc vu chinh tri) ។
អ្នកប្រើគណនេយ្យ Facebook ជាច្រើនបានបង្ហោះ និង ចែករំលែក នូវវីដេអូឃ្លីបបង្ហាញពីក្រុមសិល្បៈខ្មែរមួយនេះ នៅដែនដី កម្ពុជាក្រោម ដែលបានសម្ដែងច្រៀងជាបទចម្រៀងជាភាសាយួន និង ប្រើទំនុកភ្លេងខ្មែរ ។ ពួកបានរិះគន់និងខឹងសម្បា យ៉ាងខ្លាំងចំពោះក្រុមសិល្បៈនេះ ដោយប្រការផ្សេងៗ រាប់មិនអស់ ។
អ្នកខ្លះសរសេរនៅលើ Facebook របស់ខ្លួនថា ពេលឃើញបទចម្រៀងនេះភ្លាម ចង់តែលោតទឹក សម្លាប់ខ្លួន, អ្នកខ្លះថា អនាគតខ្មែរក្រោមនឹងក្លាយទៅជាយ៉ាងណា, ខ្លះថា កែឆ្នៃបែបគំនិតល្ងង់ខ្លៅ, អ្នកខ្លះសួរថា អ្នកណាជាអ្នកតែង និង ដឹកនាំឲ្យច្រៀងបទចម្រៀងបែបនេះ ធ្វើឲ្យខូចទំនុកភ្លេងខ្មែរ អស់ហើយ, អ្នកខ្លះរិះគន់ជាបែបពាក្យកាព្យថា៖
“លង់នឹងទឹកលុយ
ធ្វើផ្ទុយកន្លង
ប្រព្រឹកខុសឆ្គង
ព្រោះតែចង់ល្បី ។
ខិតខំហក់លោត
របូតស្ទាលថ្មី
បង្អាប់បំភ្លៃ
កេរពីដូនតា ។
វប្បធម៌ខ្លួន
មិនថួនរក្សា
ប្រែទៅប្រហារ
ឲ្យអស់តម្លៃ ។
លុយមានកម្លាំង
ខ្លាំងឥតឧបមេយ្យ
អាចទិញដូងចៃ
វីវក់វង្វេង” ។
ក្រុមសិល្បៈដែលរងការរិះគន់បានឆ្លើយតបថា បទចម្រៀងទាំងនេះ ធ្វើឡើងដើម្បីយកទៅប្រឡងនៅ ទីក្រុងហាណូយក្នុងគោល បំណង ឲ្យគណៈកម្មការឲ្យពិន្ទុះច្រើន និងក្នុងគោលបំណងបម្រើនយោបាយ របស់បក្សកុម្មុយនិស្តយួន ។
ស្ត្រីម្នាក់ដែលធ្វើការនៅក្នុងសិល្បៈមួយនេះបានលបប្រាប់ វិទ្យុ សំឡេង កម្ពុជាក្រោម (VOKK) ថា ខ្លួនមានការសោកស្ដាយ និង ព្រួយបារម្ភយ៉ាងខ្លាំងចំពោះការរិះគន់ និង ឈប់ គាំ ទ្រពីសំណាក់ប្រជនជន ។ ស្ត្រីដដែលបានបញ្ជាក់ថា ថ្ងៃក្រោយ ខ្លួននឹងមិន សម្ដែងបែបយួនកាត់ខ្មែរទៀតទេ ហើយនឹងព្យាយាមផលិតនូវកម្មវិធីថ្មីៗដែលមានលក្ខណៈជាខ្មែរពិតៗ ដើម្បី បម្រើប្រជាជន ។
(សំឡេង)
ជារឿយៗ គេតែងតែសង្កេតឃើញក្រុមសិល្បៈខ្លះ នៅកម្ពុជាក្រោម បានផលិត និងសម្ដែងនូវបទចម្រៀង ខ្មែរប្រែទៅយួន ។ ពលរដ្ឋខ្មែរក្រោមរិះគន់ថា នេះជាទង្វើមួយធ្វើឡើង ដើម្បីផ្គាប់ផ្គុនរដ្ឋាភិបាលអាណានិគមយួនពីក្រុមអ្នកសម្ដែង ហើយ បានក្លាយទៅជាវប្បធម៌កាឡៃ នៅដែនដីកម្ពុជាក្រោម ៕
