អំពីយើងខ្ញុំ
សារព័ត៌មាន ព្រៃនគរ
បានបង្កើត និង ផ្សព្វផ្សាយតាមអិនធើណិត ចាប់ពីថ្ងៃទី ០១ ខែមករា ឆ្នាំ ២០០៨
បានអាជ្ញាប័ណ្ណបោះពុម្ពកាសែត ប្រចាំសប្ដាហ៍ នៅប្រទេសកម្ពុជា ចាប់ពី ពីថ្ងៃទី ១១ ខែមករា ឆ្នាំ ២០១០
សារព័ត៌មាន ព្រៃនគរ បង្កើតឡើងក្នុងគោលបំណងផ្សព្វផ្សាយនូវដំណឹងផ្សេងៗទាក់ទងនឹងជីវភាពរបស់ពលរដ្ឋខ្មែរក្រោម ដែលកំពុងរស់នៅក្នុងដែនដីកម្ពុជាក្រោម ឬភាគខាងត្បូងនៃប្រទេសវៀតណាម និងនៅជុំវិញពិភពលោក សម្រាប់ជនជាតិខ្មែរនៅប្រទេសកម្ពុជា និងក្រៅប្រទេស បានជ្រាបជាព័ត៌មានអំពីខ្មែរ ក្រោម ។
មកដល់ឆ្នាំថ្មី ថ្ងៃទី ០១ ខែមករា ឆ្នាំ ២០១៣ នេះ សារព័ត៌មាន ព្រៃនគរ មានអាយុកាល ៥ ឆ្នាំ ហើយ បើគិតចាប់តាំងពីសារព័ត៌មានមួយនេះ បានធ្វើការផ្សព្វផ្សាយតាមប្រ ព័ន្ធអិនធើណិត កាលពីថ្ងៃទី ០១ ខែមករា ឆ្នាំ ២០០៨ មក ។ រយៈពេល ៥ ឆ្នាំនេះ ការបោះពុម្ពជាកាសែតប្រចាំសប្តាហ៍ នៅប្រទេសកម្ពុជាទើបបានតែ ៣ ឆ្នាំ ប៉ុណ្ណោះ ។
ចាប់តាំងពីថ្ងៃទី ០១ ខែមករា ឆ្នាំ ២០០៨ ដល់ថ្ងៃទី ០១ ខែមករា ឆ្នាំ ២០១០ សារព័ត៌មាន ព្រៃនគរ ចេញផ្សាយប្រចាំសប្តាហ៍ តាមប្រព័ន្ធអិនធើណិតបានចំនួន ១០២ លេខ និងចាប់ពីថ្ងៃទី ០១ ខែមករា ឆ្នាំ ២០១០ ដល់ថ្ងៃទី ០១ ខែមករាឆ្នាំ ២០១៣ បានបោះពុម្ពជា កាសែតប្រចាំសប្តាហ៍នៅប្រ ទេសកម្ពុជាបានចំនួន ៣៤ លេខ ក្រោយពី សារព័ត៌មាន ព្រៃនគរ បានទទួលអាជ្ញាប័ណ្ណ ពីក្រសួងព័ត៌មានខ្មែរកាលពីថ្ងៃទី ១១ ខែមករា ឆ្នាំ ២០១០ កន្លងទៅនេះ ។
ការផ្សាយតាមគេហទំព័រ៖
ចាប់តាំងពីបានបង្កើតឡើងមក សារព័ត៌មាន ព្រៃនគរ បានធ្វើការផ្សព្វ ផ្សាយព័ត៌មានតាមរយៈ គេហទំព័រប្លក់ដែលមានអាស័យដ្ឋាន www.preynokornews.blogspot.com ហើយយើងខ្ញុំបានចុះផ្សាយ នូវអត្ថបទព័ត៌មានជារៀងរាល់ថ្ងៃ និង កាសែត ព្រៃនគរ ជាឯកសារ PDF ជារៀងរាល់ថ្ងៃអាទិត្យបន្ទាប់កាសែតបានបោះពុម្ពចេញផ្សាយនៅក្នុងប្រទេសកម្ពុជា ។
ឆ្នាំ ២០១២ នេះ សារព័ត៌មាន ព្រៃនគរ បានបង្កើតនូវគេហទំព័រថ្មីមួយទៀតដែលមានអាស័យដ្ឋាន www.preynokornews.info ដើម្បីបង្កភាពងាយស្រួលដល់មិត្តអ្នកអាន ក្នុងការចូលតាមដានព័ត៌មានថ្មីៗ និងសិក្សាស្រាវ ជ្រាវនូវអត្ថបទស្រាវជ្រាវផ្សេងៗ ដែលបានចុះផ្សាយ នៅលើគេហទំព័រថ្មីមួយនេះ ។ ក្នុងលើគេហព័រថ្មីនេះ យើងខ្ញុំនឹងធ្វើការចុះផ្សាយ នូវព័ត៌មានជាតិ អន្តរជាតិភូមិសាស្ត្រកម្ពុជាក្រោម ព្រឹត្តិ ការណ៍ប្រវត្តិសាស្ត្ររបស់ខ្មែរក្រោម ប្រ វត្តិអ្នកមានកេរ្តិ៍ឈ្មោះខ្មែរក្រោម (នរណាខ្លះនៅកម្ពុជាក្រោម?) និងព្រះ ពុទ្ធសាសនា ជាដើម ។
ចែករំលែកព័ត៌មានតាមបណ្ដាញសង្គម៖
ព័ត៌មានដែលបានចុះផ្សាយតាមគេហទំព័រ យើងខ្ញុំបានចែករំលែកអត្ថបទព័ត៌មានទាំងនេះ នៅតាមបណ្ដាញសង្គមផ្សេងៗដូចជា Facebook និង Twitter ផងដែរ ។ តាមរយៈបណ្ដាញសង្គមទាំងនេះ លោកអ្នកនឹងទទួលបានព័ត៌មានថ្មី នៅលើទំព័រ Facebook និង Twitter របស់លោកអ្នក ប្រសិនបើលោកអ្នកចុចភ្ជាប់ចូលជាសមាជិក នៃទំព័រ Facebook និង Twitter របស់ សារព័ត៌មាន ព្រៃនគរ ។
ទូរទស្សន៍ ព្រៃនគរ (PTV)៖
នៅឆ្នាំ ២០១៣ នេះ សារព័ត៌មាន ព្រៃនគរ បានបន្ថែម “កម្មវិធីទូរទស្សន៍ តាមប្រព័ន្ធអិនធើណិត” មួយទៀត ដែលកម្មវិធីនេះ យើងខ្ញុំមានធ្វើសេចក្ដីរាយការណ៍ជាវីដេអូខ្លីៗផ្សព្វផ្សាយនៅលើបណ្ដាញសង្គម Youtube ដែលមានអាសយដ្ឋាន www.youtube.com/user/preynokornews ។ សម្រាប់លោកអ្នកដែលមានភ្ជាប់ប្រព័ន្ធ អិនធើណិត អាចចូលទស្សនានូវកម្មវិធីទូរទស្សន៍របស់យើងខ្ញុំ បានគ្រប់ ពេលវេលា ។
ឆ្នាំ ២០១២ កន្លងទៅនេះ សារព័ត៌មាន ព្រៃនគរ បានផលិតថាសស៊ីឌី ចម្រៀង ផលិតកម្ម ព្រៃនគរ Vol.1 ដែលមានចំណងជើងថា “នឹកស្រុក” ។ ខ្លឹមសារនៃបទចម្រៀងទាំងនេះទាក់ទងនឹងស្ថានភាពពលរដ្ឋខ្មែរក្រោមនៅដែនដីកម្ពុជាក្រោម ដែលបាននិពន្ធ និងរៀប រៀងដោយ លោក សឺង សម្រេច ប្រធានផ្នែកព័ត៌មាននៃសហព័ន្ធខ្មែរកម្ពុជាក្រោម ។ ថាសស៊ីឌីចម្រៀងនេះ យើងខ្ញុំមានដាក់លក់នៅសហរដ្ឋអាមេរិក និងនៅសាខាសហព័ន្ធខ្មែរកម្ពុជាក្រោម ប្រ ចាំរដ្ឋនិងប្រទេសនានា ។
ឆ្នាំថ្មីនេះ យើងខ្ញុំមានគម្រោងថានឹងផលិត Vol ថ្មីជាបន្តទៀត ដើម្បីបានបំរើអារម្មណ៍លោកអ្នកគ្រប់មជ្ឈដ្ឋាន ។
បោះពុម្ពជាកាសែត នៅកម្ពុជា៖
ដោយយល់ឃើញថា ពលរដ្ឋខ្មែរនិងខ្មែរក្រោម មានកង្វះខាតលទ្ធភាពក្នុងការប្រើប្រាស់អិនធើណិត ទើបគណៈកម្មការ សារព័ត៌មាន ព្រៃនគរ សម្រេច ធ្វើការបោះពុម្ពជាកាសែតចេញផ្សាយប្រចាំសប្តាហ៍ នៅទីក្រុងភ្នំពេញ ហើយបានចែកចាយទៅដល់ពលរដ្ឋខ្មែរក្រោម នៅតាមខេត្តនានាក្នុងប្រទេសកម្ពុជា ដើម្បីពួកគាត់បានទទួលនូវព័ត៌មានថ្មីៗ ស្តីអំពីស្ថានភាពខ្មែរក្រោម នៅដែនដីកម្ពុជាក្រោម និងនៅក្នុងពិភពលោក ។
លិខិតអនុញ្ញាតច្បាប់ នៅកម្ពុជា៖
នៅថ្ងៃទី ២៨ ខែកញ្ញា ឆ្នាំ ២០១៨ ក្រសួងព័ត៌មាន បានចេញសេចក្ដីប្រកាសលេខ ៣២៥ ព.ម/ប្រក ដោយអនុញ្ញាតឲ្យគេហទំព័រ សារព័ត៌មាន ព្រៃនគរ (WWW.PREYNOKORNEWS.INFO) ផ្សាយតាមប្រព័ន្ធអ៊ីនធឺណិត ស្របតាមច្បាប់ស្ដីពីរបបសារព័ត៌មាន នៃព្រះរាជាណាចក្រកម្ពុជា ។
