សកម្មជនខ្មែរក្រោមម្នាក់ទៀត រងការកោះហៅទៅសួរនាំ ករណីចែកចាយព័ត៌មានលើបណ្ដាញសង្គមហ្វេសប៊ុក
ដោយ ស៊ឺន ចែងចើន
យុវជនខ្មែរក្រោមម្នាក់ទៀតហើយ ត្រូវបានអាជ្ញាធរមូលដ្ឋានវៀតណាម ស្រុកផ្នោដាច់នៃខេត្តព្រះត្រពាំង កោះហៅទៅសាកសួរ ជុំវិញការបង្ហោះសារ និងចែករំលែកព័ត៌មានបន្ត តាមបណ្ដាញសង្គមហ្វេសប៊ុក ។ យុវជន តោ ហ្វាង ចឿង (To Hoang Chuong) ឲ្យដឹងថា នៅវេលាម៉ោង ១ រសៀល ថ្ងៃទី ៨ មិថុនា នេះ លោក នឹងចូលទៅបំភ្លឺ នៅចំពោះអាជ្ញាធរវៀតណាម ដែលចោទរូបលោកថា បង្ហោះឯកសារក្លែងក្លាយ និងលិខិតមួយច្បាប់ខុសពីប្រវត្តិសាស្ត្រពិតរបស់ប្រទេសវៀតណាម ។
លោក តោ ហ្វាង ចឿង នៅភូមិមេរងថ្មី ឃុំមេរងថ្មី ស្រុកផ្នោដាច់ ខេត្តព្រះត្រពាំង នៃដែនដីកម្ពុជាក្រោម កាលពីថ្ងៃទី ៣១ ខែឧសភា បានបង្ហោះឯកសារមួយច្បាប់ ដោយលើកឡើងថា ជាលិខិតរបស់លោក ហូ ជីមិញ ជាប្រធានរដ្ឋនៃសាធារណរដ្ឋប្រជាធិបតេយ្យវៀតណាម ផ្ញើជូនប្រជាជាតិខ្មែរក្រោម នៅថ្ងៃទី ៣ ខែឧសភា ឆ្នាំ ១៩៤៥ ។
យោងតាមលិខិតនោះ លោក ហូ ជីមិញ បានសរសេរថា «ដែនដីកម្ពុជាក្រោមនេះ ស្ថិតនៅក្រោមការគ្រប់គ្រង និងជាកម្មសិទ្ធិរបស់ប្រជាជាតិខ្មែរក្រោម» ។ លិខិតដដែលនោះ បានបញ្ជាក់ថា «ជាមួយ នឹងការពិតនោះ ជនជាតិវៀតណាម ដែលរស់នៅលើទឹកដីកម្ពុជាក្រោម គ្រាន់តែជាអ្នកស្នាក់អាស្រ័យប៉ុណ្ណោះ គ្មានសិទ្ធិសម្រេចអ្វីឡើយ ទាក់ទង នឹងអធិបតេយ្យភាព និងសិទ្ធិធ្វើជាម្ចាស់ការ នៅលើទឹកដីនេះ» ។
ជុំវិញករណីនេះដែរ ទំព័រហ្វសប៊ុកមួយឈ្មោះ Vì Dân Phục Vụ បានចេញសេចក្តីបំភ្លឺ និងបដិសេធន៍នូវអ្វីដែលហៅថា លិខិតរបស់លោក លោក ហូ ជីមិញ ផ្ញើជូនប្រជាជនខ្មែរក្រោម ដែលលោក លោក តោ ហ្វាង ចឿង បានបង្ហោះ នៅលើគណនីហ្វេសប៊ុកផ្ទាល់ខ្លួនរបស់លោក ថាជាព័ត៌មានមិនពិត ។ ទំព័រហ្វសប៊ុកដដែលនេះ បានធ្វើការវិភាគ ដោយយោងតាមព្រឹត្តិការណ៍ចំនួន ៣ (ភ្ជាប់រូបភាព Screenshot ខាងក្រោម ) មកបញ្ជាក់ថា មិនមែនជាលិខិតរបស់លោក ហូ ជីមិញ ឡើយ ។
គួរជម្រាបជូនថា ករណីកោះហៅពលរដ្ឋខ្មែរក្រោម លោក តោ ហ្វាង ចឿង ទៅសួរនាំនេះ មិនមែនជាករណីលើកទីមួយនោះទេ ជារឿយៗ អាជ្ញាធរវៀតណាម តែងតែកោះហៅរូបលោកទៅសួរចម្លើយជាបន្តបន្ទាប់ ព្រោះតែលោកហ៊ានបញ្ចេញមតិពាកព័ន្ធ នឹងរឿងខ្មែរក្រោម នៅតាមបណ្ដាញសង្គមហ្វេសប៊ុក ហើយអាជ្ញាធរវៀតណាម ក៏ចោទលោកពីបទ ប្រឆាំង នឹងរដ្ឋភិបាល ឬមានទំនាក់ទំនង នឹងសហព័ន្ធខ្មែរកម្ពុជាក្រោម ដែលមានមូលដ្ឋាន នៅក្រៅប្រទេស ៕
សេចក្តីបំភ្លឺ និងបដិសេធន៍ ដោយទំព័រហ្វេសប៊ុកឈ្មោះ Vì Dân Phục Vụ
