នៅក្នុងឱកាសដែលពលរដ្ឋខ្មែរក្រោមទូទាំងពិភពលោក កំពុងតែប្រារព្ធពិធីបុណ្យកាន់បិណ្ឌ និងត្រៀមប្រារព្ធពិធីបុណ្យសែន ដូនតា នៅថ្ងៃទី ២២ និង ២៣ ខែកញ្ញា ខាងមុខនេះ ពីប្រទេសកាណាដា ប្រធានសហព័ន្ធខ្មែរកម្ពុជាក្រោម លោក ថាច់ ង៉ុក ថាច់ បានចេញសារលិខិតមួយច្បាប់ក្រោមចំណងជើងថា “បុណ្យសែនដូនតាកុំភ្លេចកម្ពុជាក្រោមជាទីកំណើតរបស់យើង” ដើម្បីដាស់ស្មារតីខ្មែរក្រោមគ្រប់រូបឲ្យងាកមកជួយគិតគូរបញ្ហាកម្ពុជាក្រោមរបស់ខ្លួន ។
ខាងក្រោមជាខ្លឹមសារដើមនៃសារលិខិតនេះ ៖
“នៅថ្ងៃទី ២២ និង ២៣ ខែកញ្ញា ខាងមុខនេះ ព្រះសង្ឃ និងពលរដ្ឋខ្មែរក្រោមនៅដែនដីកម្ពុជាក្រោម នឹងប្រារព្ធពិធី បុណ្យ “សែនដូនតា” ជាពិធីបុណ្យប្រពៃណីជាតិដ៏ធំមួយដែលមានមកតាំងពីបុរាណកាល ។ ពិធីបុណ្យនេះ ធ្វើឡើង ដើម្បីឧទ្ទិស កុសលដល់បុព្វការីជនរបស់ខ្លួន ក្នុងនោះ មានមាតាបិតាជីដូនជីតា និងវីរបុរសជាតិគ្រប់ស្រទាប់ដែល បានបូជាជីវិត ដើម្បី បុព្វហេតុជាតិ និងសាសនានៅកម្ពុជាក្រោម ។ ក្រៅពីប្រារព្ធពិធីសាសនកិច្ចដើម្បីសម្ដែងនូវកតញ្ញូ តាធម៌ចំពោះបុព្វការីជន ខ្មែរ ក្រោមគ្រប់រូបក៏ត្រូវមានភារកិច្ចដ៏សំខាន់មួយទៀត គឺការការពារ និងថែរក្សាវប្បធម៌ជាតិ ខ្មែរឲ្យបានគង់វង្សផងទៀត ទើបសក្តិ សមជាអ្នកបន្តវេនបុព្វបុរសរបស់ខ្លួនដែលបានខំពុះពារទុកកេរមរតកមកឲ្យ ។
ឆ្លៀតក្នុងឱកាសបុណ្យ “សែនដូនតា” តាងនាម សហព័ន្ធខ្មែរកម្ពុជាក្រោម សូមអំពាវនាវដល់ពលរដ្ឋខ្មែរក្រោម ជាពិសេស សមាជិក នៃសហព័ន្ធខ្មែរកម្ពុជាក្រោមទូទាំងពិភពលោក នូវចំណុចមួយចំនួនដូចចខាងក្រោមថា៖
- ខ្មែរក្រោមគ្រប់រូបមិនត្រូវប្តូរទិសដៅការតស៊ូ “ដំណើរឆ្ពោះទៅកាន់មាតុភូមិកម្ពុជាក្រោម” ដោយស្ថានភាព នយោបាយ នៅប្រទេសកម្ពុជាឡើយ ។
- សេរីភាព ត្រូវកើតចេញពីញើសឈាមខ្មែរក្រោមពិតៗ មិនកើតឡើងដោយឯងៗនោះឡើយ មិនថា នៅកម្ពុជាក្រោម ឬ នៅប្រទេសណានោះទេ ។
- រដ្ឋាភិបាលយួនគ្រប់ជំនាន់បានបង្កឲ្យមានបញ្ហានៅកម្ពុជា ដើម្បីប្តូរទិសដៅការតស៊ូស្វែងរក “សិទ្ធិសម្រេច វាសនាខ្លួន ដោយខ្លួនឯង” របស់ខ្មែរក្រោមយើង ។
យុទ្ធសាស្ត្រនេះ យួនបានទទួលលទ្ធផល ២ គឺ បង្វែរទិសដៅខ្មែរក្រោម និង គ្រប់គ្រងប្រទេសកម្ពុជា បច្ចុប្បន្ន ។ អាស្រ័យ ហេតុនេះ រឿង “សិទ្ធិសម្រេចវាសនាខ្លួនដោយខ្លួនឯង” នៅកម្ពុជាក្រោម ពលរដ្ឋខ្មែរក្រោម ជាអ្នកដោះ ស្រាយ ហើយបងប្អូន ខ្មែរជាអ្នកជួយ ។ រីឯបញ្ហាប្រទេសកម្ពុជា ខ្មែរជាអ្នកឈរមុខ ហើយខ្មែរក្រោមជាអ្នកជួយដើម្បី ជៀសវាងចូលក្នុង អន្ទាក់យួន ។
សព្វថ្ងៃ យួនសប្បាយចិត្តនឹងស្ថានការនយោបាយនៅប្រទេសកម្ពុជា ដែលអាចជួយធ្វើឲ្យខ្មែរក្រោមមួយចំនួនគិត រឿង ប្រទេស កម្ពុជា ធំជាងរឿងកម្ពុជាក្រោមរបស់ខ្លួន ។
ខ្មែរក្រោមនៅក្នុងស្រុកត្រូវការសេរីភាព រក្សាវប្បធម៌ទំនៀមទំលាប ប្រពៃណី នេះជាគោលជំហររបស់សហព័ន្ធ និង កាតព្វកិច្ច របស់កូនខ្មែរក្រោមគ្រប់ៗរូប ។ ដើម្បីសម្ដែងនូវកាតញ្ញូតាធម៌ចំពោះបុព្វការីជន សូមសមាជិកនៃសហព័ន្ធ ខ្មែរកម្ពុជាក្រោម និង ពលរដ្ឋខ្មែរក្រោមនៅគ្រប់ទិសទីក្នុងពិភពលោក ងាកមកគិតគូរដល់បញ្ហាកម្ពុជាក្រោមរបស់ យើងវិញ ដើម្បីប្រជាជាតិយើង បានស្គាល់ពន្លឺ “សិទ្ធិសម្រេចវាសនាខ្លួនដោយខ្លួនឯង” នៅលើទឹកដីកម្ពុជាក្រោម នាពេលអនាគត ខាងមុខនេះ ។
ក្នុងឱកាសបុណ្យសែនដូនតាប្រពៃណីជាតិនេះ សូមសេរីភាព និងសេចក្តីសុខ កើតមានមានដល់បងប្អូនជនរួមជាតិ គ្រប់ ពេលវេលាហោង” ៕
Comments are closed.