ដោយ សឺង វិចិត្រ- ក្រសួងវប្បធម៌ កីឡា ទេសចរណ៍ វៀតណាម និង ក្រសួងវប្បធម៌ និង វិចិត្រសិល្បៈកម្ពុជា បាន សហការ គ្នាប្រារព្ធកម្មវិធីសម្ដែងវប្បធម៌រយៈពេល ១ សប្ដាហ៍នេះ នៅខេត្តកំពង់ឫស្សី (Ben Tre ) និង ខេត្តឃ្លាំង រហូតដល់ថ្ងៃទី ២៣ ខែធ្នូ ខាងមុខនេះ ។
យោងតាមព័ត៌មានយួនក្នុងស្រុកបានបញ្ជាក់អំពីមូលហេតុនៃការសម្ដែងកម្មវិធីនេះថា ដើម្បី «លើកកម្ពស់ទំនាក់ទំនង លើ វិស័យ វប្បធម៌ និងបង្ហាញអំពីសិល្បៈ ប្រពៃណី របស់កម្ពុជា នៅក្នុងប្រទេសវៀតណាម និងចូលរួមក្នុងការពង្រឹង និងពង្រីកមិត្តភាព សាមគ្គីរវាងវៀតណាម និងកម្ពុជា ។
ថ្លែងបើកកម្មវិធី លោក គង់ កន្ថារ៉ា អនុរដ្ឋលេខាធិការក្រសួងវប្បធម៌ និងវិចិត្រសិល្បៈកម្ពុជា និង លោក វឿង យ្វី បៀន (Vương Duy Biên) អនុរដ្ឋមន្ត្រីក្រសួងវប្បធម៌ កីឡា និងទេសចរណ៍វៀតណាម បានសង្កត់ធ្ងន់ថា ព្រឹត្តិការណ៍វប្បធម៌ នេះមានន័យសំខាន់ណាស់ ។
នេះជាឱកាសមួយសម្រាប់ពលរដ្ឋវៀត ណាម បានដឹងកាន់តែច្បាស់អំពីទឹកដី នឹងប្រជាជនកម្ពុជា ។ ទន្ទឹមនឹងនោះ ក៏ ជម្រុញឲ្យមានទំនាក់ទំនងមិត្តភាព និងសហការរវាងប្រជាពលរដ្ឋរបស់ប្រទេសទាំងពីរកាន់តែលូតលាស់ប្រសើរជាង ។
ក្រោយពីបើកកម្មវិធី សិល្បករខ្មែរមកពីប្រទេសកម្ពុជា នឹងសម្ដែងជូនទស្សនិកជនយួនបានទស្សនានូវកម្មវិធីសិល្បៈ ច្រៀង រាំ មានដោយរបាំប្រពៃណី ក្បាច់គុណបុរាណខ្មែរ និងបទចម្រៀងស្ដីអំពីមិត្តភាពរវាងប្រជាជនប្រទេសទាំងពីរ កម្ពុជា និងវៀតណាម ៕
