ប្រែសម្រួលពីភាសាអង់គ្លេសទៅជាខ្មែរដោយ ថាច់ ប្រីជា គឿន
ឆ្នាំថ្មី ២០១៥ បានឈានមកដល់ ជាពេលវេលាមួយ ដើម្បីរំឭកយើងឲ្យឆ្លុះបញ្ចាំងនូវដំណើរការតស៊ូ ដែល សមាជិក និងអ្នកគាំទ្ររបស់សហព័ន្ធខ្មែរកម្ពុជាក្រោម បានធ្វើនៅក្នុងឆ្នាំ ២០១៤ កន្លងទៅនេះ ដើម្បីស្វែងរកយុត្តិធម៌ សម្រាប់ខ្មែរក្រោមនិងបានត្រៀមខ្លួន ជាស្រេច ក្នុងការអនុវត្តនូវអ្វី ដែលសហព័ន្ធខ្មែរកម្ពុជាក្រោម បានចេញផែនការ សម្រាប់ឆ្នាំ ២០១៥ ខាងមុខនេះ ។
ទោះបី ក្នុងឆ្នាំ ២០១៤ កន្លងទៅនេះ យើងបានជួបនូវបញ្ហាប្រឈមមួយចំនួន ក៏ប៉ុន្តែនៅតែជាឆ្នាំមួយដែល ទទួល បានជោគជ័យសម្រាប់ខ្មែរក្រោមនៅកម្ពុជា ក្រោមនិងនៅបរទេស ។ យើងបានពង្រីកការទាក់ទងល្អដោយការបើក ចំហតាមរយៈប្រព័ន្ធផ្សព្វផ្សាយតាម បណ្ដាញសង្គម និងទទួលបានជោគជ័យក្នុងការធ្វើការរួមគ្នាដើម្បី បំពេញតាម សេចក្តីសម្រេចដែលសហព័ន្ធ ខ្មែរកម្ពុជាក្រោម បានដាក់បញ្ចូលទៅក្នុងផែនការ សកម្មភាពប្រចាំឆ្នាំ ។
ឆ្លៀតក្នុងឱកាសនេះ ខ្ញុំសូមគូសបញ្ជាក់នូវភារកិច្ចដ៏ សំខាន់មួយចំនួនដែលយើងបានធ្វើការរួមគ្នាបានជោគជ័យ នៅ ក្នុងឆ្នាំ ២០១៤ កន្លងទៅនេះ ក្នុងការនាំយកនូវការរំលោភសិទិ្ធមនុស្សប្រឆាំងនឹងខ្មែរក្រោមពីរដ្ឋាភិបាលវៀតណាម នៅកម្ពុជាក្រោមធ្វើឱ្យមានការចាប់អារម្មណ៍ពីសហគមន៍អន្តរជាតិ ។ កិច្ចការទាំងនេះ រួមមានការចូលរួមសន្និសីទ និងកិច្ចប្រជុំប្រចាំឆ្នាំ ដូចជា វេទិកាអចិន្ត្រៃយ៍នៃអង្គការសហប្រជាជាតិស្ដីពីបញ្ហាជនជាតិដើម (UNPFII) នៅញូវយ៉ក, សហរដ្ឋអាមេរិក វេទិកាអ្នកជំនាញនៃសិទ្ធិជនជាតិដើម (EMRIP) នៅទីក្រុងហ្សឺណែវ, ប្រទេសស្វិស សន្និសីទស្ដីពីធម្មនុញ្ញអង្គការសហប្រជាជាតិ នៅទីក្រុង San Francisco, រដ្ឋ កាលីហ្វញ៉ា សហរដ្ឋអាមេរិក និង យើងបានជោគជ័យក្នុងការដាក់របាយការណ៍ទៅក្នុងការអង្គការសហប្រជាជាតិសម្រាប់ការពិនិត្យឡើងវិញ លើកទី ពីរដែលប្រទេសវៀតណាមចូលបំភ្លឺអំពីបញ្ហាសិទ្ធិមនុស្សនៅ UPR ក្នុងខែមេសា ។ យើងបានបញ្ចុះបញ្ចូលរដ្ឋ ដែលជាអ្នកចោទសួរ និងផ្ដល់អនុសាសន៍ទៅវៀតណាមក្នុងអំឡុងពេលពិនិត្យ ។ ប្រទេសវៀតណាមត្រូវបានគេ ចោទសួរ និង ការផ្តល់អនុសាសន៍ ដោយអ្នកការទូតចំនួន ១០៦ ។ វៀតណាមគឺជាប្រទេសមួយក្នុងចំណោម ប្រទេសដែលត្រូវបានគេចោទសួរភាគច្រើនក្នុងអំឡុងការពិនិត្យ UPR ។ នៅថ្ងៃទី ២០ ខែ មិថុនា វៀតណាម បានច្រានចោលនូវអនុសាសន៍ជាគន្លឹះចំនួន ៤៥ ចំណុច ក្នុងចំណោមអនុសាសន៍ទាំង ២២៧ ទាក់ទង នឹងបញ្ហា សិទ្ធិមនុស្សជាមូលដ្ឋាន ដូចជា សេរីភាពសារព័ត៌មាន, ការបញ្ចេញមតិខាងសាសនា និងការបង្កើតសមាគម ជាដើម ។ នេះបង្ហាញឲ្យឃើញថា ប្រទេសវៀតណាមមិនបានអនុវត្តតាមការប្តេជ្ញាចិត្តរបស់ខ្លួនជាសមាជិកផ្លូវការ របស់ក្រុមប្រឹក្សាសិទ្ធិមនុស្សអង្គការសហប្រជាជាតិ នោះទេ ។
នៅក្នុងខែវិច្ឆិកា វៀតណាមជាថ្មីម្តងទៀតត្រូវបានពិនិត្យឡើងវិញដោយអ្នកជំនាញរបស់អង្គការសហប្រជាជាតិស្ដីពី កតិកាសញ្ញាអន្តរជាតិ នៃសិទ្ធិសេដ្ឋកិច្ច សង្គមកិច្ច និងវប្បធម៌ ។ ប្រធាននៃគណៈកម្មាធិការយុវជនរបស់សហព័ន្ធ ខ្មែរកម្ពុជាក្រោម (KKFYC) បានឡើងអានសេចក្ដីថ្លែងការណ៍មួយនៅមុនពេលបើកកិច្ចប្រជុំនេះ ដើម្បីផ្តល់ អនុសាសន៍ដល់អ្នកជំនាញ បានជ្រាបនូវរបាយការណ៍ដែលសហព័ន្ធខ្មែរកម្ពុជាក្រោមបានដាក់សំណើរួចហើយ ទៅកាន់គណៈកម្មាធិការរបស់អង្គការ សហប្រជាជាតិ ។ ក្នុងអំឡុងពេលនៃការពិនិត្យ អ្នកជំនាញម្នាក់បានសួរ ទៅគណៈប្រតិភូវៀតណាមថា៖ “ប្រជាជនខ្មែរក្រោម ត្រូវបានគេចាត់ជាថ្នាក់ដូចម្តេច -ជនជាតិភាគតិចឬ នៅពេលដែលពួកគេចង់ បានការទទួលស្គាល់ថា ជាជនជាតិដើម ?” ទាក់ទងនឹងសេចក្តីថ្លែងការណ៍ របស់វៀតណាមដែលបានបញ្ជាក់ថា៖ “មិនមានជនជាតិដើមនៅក្នុងប្រទេសវៀតណាមទេ” ។ គណៈប្រតិភូវៀត ណាមមិនមានចម្លើយសមស្របណាមួយជាមួយនឹងអ្នកជំនាញទេ ពីព្រោះវារំលោភលើឆន្ទៈរបស់ខ្មែរក្រោមដែល ត្រូវ បានគេទទួលស្គាល់ថាជាជនជាតិដើម ។
រឿងមួយដែលសមាជិកនិងអ្នកគាំទ្ររបស់សហព័ន្ធខ្មែរកម្ពុជាក្រោមគួរតែមានមោទនភាពនោះ គឺថា សមាជិកដែល ជាអ្នកជំនាញនៃនីតិវិធីពិសេសរបស់អង្គការសហប្រជាជាតិ បានផ្ដល់ការទុកចិត្តទៅលើអ្វីដែលសហព័ន្ធខ្មែរកម្ពុជា ក្រោមបានរាយការណ៍ ។ មុនពេលអ្នករាយការណ៍ពិសេស ឬអ្នកជំនាញឯករាជ្យរបស់អង្គការសហប្រជាជាតិរូប ណាមានគម្រោងទៅទស្សនកិច្ចនៅប្រទេសវៀតណាម ពួកគេតែងតែទាក់ទងទៅសហព័ន្ធខ្មែរកម្ពុជាក្រោម ដើម្បី ស្នើសុំព័ត៌មានអំពីស្ថានភាពរបស់ខ្មែរក្រោមនៅកម្ពុជាក្រោម ទាក់ទងនឹងប្រធានបទដែលពួកគេមានការចាប់ អារម្មណ៍និងមានការព្រួយបារម្ភលើបញ្ហាសិទ្ធិមនុស្ស ។ លោក Heiner Bielefeldt, ប្រេសិត ពិសេសនៃអង្គការ សហប្រជាជាតិស្តីពីសេរីភាពសាសនាបានទៅទស្សនាប្រទេសវៀតណាមចាប់ពី ថ្ងៃទី ២១ ដល់ ៣១ ខែកក្កដា ឆ្នាំ ២០១៤ កន្លងទៅនេះ ។ មុនដំណើរទស្សនកិច្ចរបស់លោក ជំនួយការរបស់លោកបានទាក់ទងសហព័ន្ធខ្មែរកម្ពុជា ក្រោមដើម្បីប្រមូលព័ត៌មានទាក់ទងនឹងការរំលោភសិទ្ធិសាសនាពី រដ្ឋាភិបាលវៀតណាមលើខ្មែរក្រោម និងសុំឈ្មោះ វត្តអារាមនៅកម្ពុជាក្រោមណាដែលពួកគេអាចចូលទស្សនាបាន ។ ក្នុងសន្និសីទសារព័ត៌មាន នៅទីក្រុងហាណូយ ពេលបញ្ចប់ដំណើរទស្សនកិច្ចរបស់លោក លោកបានថ្លែងថា៖ «ផ្ដល់ស្វ័យភាពដល់សហគមន៍សាសនា ដើម្បីពួកគេបានធ្វើសកម្មភាពដោយឯករាជ្យ នឹងជាមធ្យោបាយសាកល្បងមួយសម្រាប់ការអភិវឌ្ឍសេរីភាពជំនឿ សាសនា នៅក្នុងប្រទេសវៀតណាម ។ ស្ថានភាពបច្ចុប្បន្ន អ្នកប្រតិបត្តិសាសនាដែលមានជំហរឯករាជ្យ ដូចជា មិនមានសុវត្ថិភាព និងប្រឈមនឹងការរឹតត្បិតយ៉ាងធ្ងន់»។
នៅក្នុងកិច្ចប្រជុំមួយនៅទីក្រុងប៉ារីស ប្រទេសបារាំង នាខែវិច្ឆិកា សហព័ន្ធខ្មែរកម្ពុជាក្រោមបានជួបក្រុមអ្នកស្រាវជ្រាវ នៅប្រទេសកម្ពុជាដែលរស់នៅក្នុងប្រទេសបារាំង ដើម្បីធ្វើការលើគម្រោងចងក្រងសៀវភៅមួយដែលមានឈ្មោះថា “សៀវភៅស ” ស្ដីពីប្រវត្តិសាស្ត្រពិតនៃដែនដីកម្ពុជាក្រោម ។
ក្រៅពីការអនុវត្តទទួលបានជោគជ័យក្នុងការផែនការ ឆ្នាំ ២០១៤ សហព័ន្ធខ្មែរកម្ពុជាក្រោមក៏នៅមានការមួយ ចំនួនដែលយើងមិនអាចធ្វើបានដោយសារតែមានការព្រួយបារម្ភអំពីសុវត្ថិភាពនិងកម្រិតធនធាន ។ កិច្ចការទាំង នោះរួមមាន “សន្និសីទនៅទីក្រុងបាងកក និងខេត្តឈៀងម៉ៃ, ប្រទេសថៃ” និង “ការធ្វើឱ្យទាន់សម័យលើគម្រោង សៀវភៅ” ។ យើងនឹងមើលឡើងវិញនូវផែនការដែលមិនទាន់បានបញ្ចប់ទាំងនេះ ហើយនឹងអនុវត្តវារួមជាមួយផែន ការឆ្នាំ ២០១៥ ប្រសិនបើអាចធ្វើទៅបាន ។
នៅក្នុងកិច្ចប្រជុំប្រចាំឆ្នាំ នៃសហព័ន្ធខ្មែរកម្ពុជាក្រោម នៅទីក្រុង Long Beach ចាប់ពី ថ្ងៃទី ១២ ដល់ ១៤ ខែធ្នូ ឆ្នាំ ២០១៤ ដែលជាសមាជិកសហព័ន្ធខ្មែរកម្ពុជាក្រោម និងអ្នកគាំទ្រមកពីជុំវិញពិភពលោកបានចូលរួមនោះ បាន បញ្ចប់ទៅដោយសម្រេចប្រកាសនូវដំណោះស្រាយ និងផែនការសម្រាប់ឆ្នាំ ២០១៥ ដើម្បីសហព័ន្ធខ្មែរកម្ពុជាក្រោម អនុវត្តដូចតទៅ៖
១-កិច្ចការអន្តរជាតិ (INTERNATIONAL BEST PRACTICES)
- ពង្រឹងពង្រីកទំនាក់ទំនង សម្រាប់ជួយសំឡេងសហព័ន្ធខ្មែរកម្ពុជាក្រោមឲ្យកាន់តែប្រសើរឡើង ដោយធ្វើ ការនិងចូលរួមជាដៃគូជាមួយអង្គការសិទ្ធិមនុស្ស អង្គការជនជាតិដើម និង ក្រុមជនជាតិភាគតិចដទៃទៀត លើរាល់បញ្ហាសំខាន់ៗចំពោះ ខ្មែរក្រោម ។
- បង្កើនល្បឿនការប្តេជ្ញាចិត្តទាមទារសិទ្ធិសម្រចវាសនាខ្លួនដោយខ្លួនឯង ដោយប្រើគោលដៅសំអាងលើ អង្គការ UNPO, សេចក្ដីប្រកាសជាសកលរបស់អង្គការសហប្រជាជាតិស្ដីពីសិទ្ធិមនុស្ស (UNDHRS) និង សេចក្ដីប្រកាសជាសកលរបស់អង្គការសហប្រជាជាតិស្ដីពីសិទ្ធិជនជាតិដើម (UNDRIPS) ជាយន្ត ការយុទ្ធសាស្ត្រ ។
- អនុវត្តយុទ្ឋសាស្ត្រ និងការងារភាពឆ្លាតវៃដើម្បីបង្កើនតំណាងសកល ជាមួយនឹងទីភ្នាក់ងារអន្តរជាតិនៃអង្គ ការសហប្រជាជាតិសហភាពអឺរ៉ុប និងអាស៊ាន ។
- ធ្វើការងារជួបប្រជុំជាមួយតំណាងសភាជាតិ នៅក្នុងប្រទេសរបស់ខ្លួន ។
២-កិច្ចការនៅកម្ពុជាក្រោម (KAMPUCHEA-KROM BEST PRACTICES)
- ថែរក្សាទំព័រ Facebook របស់សហព័ន្ធដោយគណៈកម្មាធិការយុវជនសម្រាប់គោលបំណងផ្សាយព័ត៌មាន និងជួយអប់រំ និង កម្សាន្ត ។
- អនុវត្តផែនការដើម្បីទទួលមេដឹកនាំកំពូលនៃសកម្មភាពសហព័ន្ធ និងបន្ថែមការទទួលខុសត្រូវបន្ថែមទៀត ទៅលើការងារបច្ចុប្បន្ន នៃយុវជនខ្មែរក្រោម ។
- គ្រប់គ្រងហេរញ្ញវត្ថុ ការអនុវត្តធម្មតា និងទទួលខុសត្រូវ ក្នុងការអនុលោមតាមច្បាប់គណនេយ្យ ។
- គម្រោងបន្ទាន់សម័យសៀវភៅ “នរណាជានរណានៅកម្ពុជាក្រោម” ។
- គម្រោងសរសេរសៀវភៅស ។
- បង្កើតសមាគមព្រះសង្ឃខ្មែរក្រោមនៅសហរដ្ឋអាមេរិក និង កិច្ចប្រជុំប្រចាំឆ្នាំរួមគ្នាជាមួយនឹងសហព័ន្ធ ខ្មែរកម្ពុជាក្រោម ។
៣-កិច្ចការនៅកម្ពុជា និងតាមតំបន់ (Cambodia and REGIONAL BEST PRACTICES )
- ធ្វើបុណ្យផ្កា ឬ ពិធីបុណ្យនៅអាមេរិក នៅរាជធានីភ្នំពេញ និងរួមគ្នាជាមួយនឹងសហព័ន្ធខ្មែរកម្ពុជា ក្រោមក្នុងពេលប្រជុំ ។
- រៀបចំកិច្ចប្រជុំជាមួយសមាគម និងអ្នកដឹកនាំនៅមូលដ្ឋានខ្មែរក្រោមនៅក្នុងព្រះរាជាណាចក្រកម្ពុជា និងនៅកម្ពុជាក្រោម ។
- ធ្វើបុណ្យខួប ៦៦ ឆ្នាំ នៃទិវា ៤ មិថុនា នៅវត្តសាមគ្គីរង្សី ទីក្រុងភ្នំពេញ ។
គោលដៅចម្បងរបស់សហព័ន្ធខ្មែរកម្ពុជាក្រោម គឺផ្តោតលើការលើកកម្ពស់ និងការពារសិទ្ធិជាមូលដ្ឋានដែលត្រូវ បាន រំលោភសិទ្ធិលើពលរដ្ឋខ្មែរក្រោមនៅកម្ពុជាក្រោមពីសំណាក់រដ្ឋាភិបាលវៀតណាម ។ ដូច្នេះ ការងាររបស់សហ ព័ន្ធខ្មែរកម្ពុជាក្រោម ត្រូវបានប្រកាសជាសាធារណៈនៅលើអ៊ីនធើណិត និងព័ត៌មាននៃសហព័ន្ធខ្មែរកម្ពុជាក្រោម ។ សហព័ន្ធខ្មែរកម្ពុជាក្រោមមិនមានរបៀបវារៈណាមួយលាក់បាំងសម្រាប់ការចូលពិនិត្យមើលនោះទេ ។ ដូច្នេះ ប្រជា ជនខ្មែរក្រោមដែលកំពុងរស់នៅក្រៅប្រទេសដែលបានមកទស្សនាប្រទេសកំណើតរបស់ពួកគេនៅកម្ពុជាក្រោម នឹង មិនគួរត្រូវបានសួរចម្លើយ ពីអាជ្ញាធរអំពីកិច្ចការរបស់សហព័ន្ធខ្មែរកម្ពុជាក្រោម នោះទេ ។
ក្នុងនាមជាខ្មែរក្រោម យើងមិនដែលបោះបង់ក្តីសង្ឃឹមនិងសាមគ្គីភាពរបស់យើងដើម្បីការពារ និងរក្សាអត្តសញ្ញាណ ជាខ្មែររបស់យើងនៅលើដីដូនតារបស់យើងទេ ។ យើងនឹងធ្វើការរួមគ្នាជាថ្មីម្តងទៀត ដើម្បីសម្រេចឱ្យបាននូវផែន ការសម្រាប់ឆ្នាំ ២០១៥ ខាងមុខនេះ ។ ដំណោះស្រាយរបស់សហព័ន្ធខ្មែរកម្ពុជាក្រោម គឺយើងធ្វើដើម្បីនាំយកសេរី ភាព យុត្ដិធម៌ និងលទ្ធិប្រជាធិបតេយ្យសម្រាប់ពលរដ្ឋខ្មែរក្រោមរបស់យើងដែលមិនមានសំឡេង នៅកម្ពុជាក្រោម ដែលធ្វើពួកគេមានជំនឿ និងមានអារម្មណ៍ថា ពន្លឺនៃសេរីភាព នឹងត្រូវបានជះពន្លឺទៅលើមាតុភូមិរបស់ក្នុងពេល ឆាប់ៗខាងមុខនេះ ។
ក្នុងទេសកាលឈប់សម្រាកចុងឆ្នាំ ២០១៤ និងការមកដល់នៃឆ្នាំថ្មី ២០១៥ ក្នុងនាមសហព័ន្ធខ្មែរកម្ពុជាក្រោម ខ្ញុំ ព្រះករុណា ខ្ញុំបាទ សូមប្រគេន និងជូនពរដល់ព្រះសង្ឃ និងលោកអ្នកនាងជនរួមជាតិ ឲ្យបានប្រកបតែសុភមង្គល មានសុខភាពល្អ និងវិបុលភាពគ្រប់ប្រការ ។
សូមឆ្នាំថ្មីនាំមកឲ្យខ្មែរក្រោមនៅក្នុងមាតុភូមិកម្ពុជាក្រោមជាទីកំណើតរបស់យើងនូវ សេរីភាព យុត្តិធម៌ និង លទ្ធិ ប្រជាធិបតេយ្យ កុំបីអាក់ខាន ។
ដោយសេចក្ដីគោរពរាប់អានពីខ្ញុំព្រះករុណា ខ្ញុំបាទ
ថាច់ ង៉ុក ថាច់
ប្រធានប្រតិបត្តិសហព័ន្ធខ្មែរកម្ពុជាក្រោម
………………………..
Comments are closed.