កំណត់ហេតុនៃសន្និបាតប្រចាំ ២០១៤ របស់សហព័ន្ធខ្មែរកម្ពុជាក្រោម

54

សហព័ន្ធខ្មែរកម្ពុជាក្រោម

សន្និបាតប្រចាំឆ្នាំ ២០១៤

ថ្ងៃទី ១៣, ១៤ ខែធ្នូ ឆ្នាំ ២០១៤

ក្រុងឡងប៊ីច រដ្ឋកាលីហ្វ័រញ៉ា សហរដ្ឋអាមេរិក

ថ្ងៃទី ១ នៃសន្និបាតប្រចាំឆ្នាំ ២០១៤ នៅថ្ងៃទី ១៣ ខែធ្នូ ឆ្នាំ ២០១៤ ។ រូបថត ថាច់ ប្រីជា គឿន
ថ្ងៃទី ១ នៃសន្និបាតប្រចាំឆ្នាំ ២០១៤ នៅថ្ងៃទី ១៣ ខែធ្នូ ឆ្នាំ ២០១៤ ។ រូបថត ថាច់ ប្រីជា គឿន

នៅ​ព្រឹក​ថ្ងៃ​សៅរ៍ ៧ រោច ខែ​មិគសិរ ឆ្នាំមមី ឆស័ក ព​. ស​. ២៥៥៨ ត្រូវ​នឹង​ថ្ងៃ ទី ១៣ ខែធ្នូ គ​. ស​. ២០១៤ ជា​ថ្ងៃ​ដែល​សហព័ន្ធ​ខ្មែរ​កម្ពុជា​ក្រោម​កំណត់​យក​ជា​ថ្ងៃ​ដំបូង​នៃ​សម័យសន្និបាត ប្រចាំឆ្នាំ ២០១៤ ។ សន្និ បាត ​នេះ​ប្រារព្ធ​ឡើង​ចំនួន ២ ថ្ងៃ គឺ​នៅ​ថ្ងៃ​សៅរ៍​, អាទិត្យ ទី ១៣, ១៤ ខែធ្នូ គ​. ស​. ២០១៤ នៅ​វត្ត​កម្ពុជា​ក្រោម វិថីអ័​រ​ហ្គែ​ន ក្រុង​ឡង​ប៊ីច រដ្ឋ​កាលីហ្វ័រ​ញ៉ា សហរដ្ឋអាមេរិក ។​

​នៅវេលា​ម៉ោង ៩ ព្រឹក បន្ទាប់ពី​ដំណល់​នៃ​គណៈកម្មការ​នាយក និង​សមាជិក​សមាជិកា​នៃ​សហព័ន្ធ​ខ្មែរ​កម្ពុជា​ក្រោម ដែល​បាន​និមន្ត និង​អញ្ជើញ​មកពី​រដ្ឋ​និង​ប្រទេស​នានា ក៏បាន​ជួបជុំគ្នា​ដោយ​របៀប​សុជីវធម៌​ក្នុង​សន្និបាត​យ៉ាង​រម្យទម​, សន្និបាត​ប្រចាំឆ្នាំ ២០១៤ នៃ​សហព័ន្ធ​ខ្មែរ​កម្ពុជា​ក្រោម ក៏បាន​ធ្វើឡើង​ក្រោម​អធិបតីភាព​នៃ​គណៈកម្មការ​នាយ​ករប​ស់​សហព័ន្ធ​ខ្មែរ​កម្ពុជា​ក្រោម ។ លោក ​សុខ នី​ម មក​អំពី​រដ្ឋ ណូ​ត​ខា​រ៉ូ​ឡា​ណា និង អ្នកស្រី ​ថាច់ សុមាលី​ន មក​អំពី​រដ្ឋ​វ៉ា សី​ង​តោន​ស្តេត ក៏បាន​ចាប់ផ្តើម​ឧទ្ទេសនាម​នូវ​សមាសភាព​នៃ​គណៈកម្មការ​នាយក​នៃ​សហព័ន្ធ​ខ្មែរ​កម្ពុជា​ក្រោម គឺ ៖

លោក ថាច់ ង៉ុក ថាច់ ប្រធានប្រតិបត្តិ នៃសហព័ន្ធខ្មែរកម្ពុជាក្រោម ។ រូបថត ថាច់ ប្រីជា គឿន
លោក ថាច់ ង៉ុក ថាច់ ប្រធានប្រតិបត្តិ នៃសហព័ន្ធខ្មែរកម្ពុជាក្រោម ។ រូបថត ថាច់ ប្រីជា គឿន
  1. ​លោក ថាច់ វៀន អធិបតី​, មកពី​ប្រទេស​បារាំង​
  2. លោក ថាច់ ង៉ុ​ក ថាច់ ប្រធាន​ប្រតិបត្តិ​, មកពី​ប្រទេស​កាណាដា​
  3. លោក សឺ​ង ហួរ អគ្គលេខាធិការ​, រដ្ឋ​កាលីហ្វ័រ​ញ៉ា សហរដ្ឋអាមេរិក​
  4. លោក ចៅ រៀប ប្រធានសភា​ព្រឹទ្ធាចារ្យ​, រដ្ឋ​វ៉ា​សី​ង​តោន​ស្តេត សហរដ្ឋអាមេរិក​
  5. លោក ថាច់ សេ ប្រធានសភា​តំណាង​, រដ្ឋ​អូ​ហាយ​អូ សហរដ្ឋអាមេរិក​
  6. លោក ប្រាក់ សេរី​វុឌ្ឍិ៍ អនុប្រធាន​ទី ១, រដ្ឋ​កាលីហ្វ័រ​ញ៉ា សហរដ្ឋអាមេរិក​
  7. ​លោក ចៅ សេរី អនុប្រធាន​ទី ២ , រដ្ឋ​កាលីហ្វ័រ​ញ៉ា សហរដ្ឋអាមេរិក ។​
គណៈកម្មនាយក នៃសហព័ន្ធខ្មែរកម្ពុជាក្រោម នៅក្នុងសន្និបាត ថ្ងៃទី ១៣ ខែធ្នូ ឆ្នាំ ២០១៤ ។ រូបថត ថាច់ ប្រីជា គឿន
គណៈកម្មនាយក នៃសហព័ន្ធខ្មែរកម្ពុជាក្រោម នៅក្នុងសន្និបាត ថ្ងៃទី ១៣ ខែធ្នូ ឆ្នាំ ២០១៤ ។ រូបថត ថាច់ ប្រីជា គឿន

សមាសភាពនៃតំណាងនានា

ព្រះ​វត្តមាន​ព្រះសង្ឃ​រួមមាន ព្រះតេជព្រះគុណ កាន សុ​ផា​ណា​ឫទ្ធិ ប្រធាន​សមាគម​ព្រះសង្ឃ​ខ្មែរ​កម្ពុជា​ក្រោម ប្រចាំ​ព្រះរាជាណាចក្រ​កម្ពុជា​, ព្រះតេជព្រះគុណ សឺ​ង យ៉ឹ​ង​រតនា ប្រធាន​នាយកដ្ឋាន​ព័ត៌មាន​នៃ​សហព័ន្ធ​ខ្មែរ​កម្ពុជា​ក្រោម​, ព្រះតេជព្រះគុណ ថាច់ ប្រីជា​គឿន និពន្ធ​នាយក សារព័ត៌មាន ព្រៃនគរ និង ភិក្ខុ នាថ​សី​លោ ត្រឹង ថាច់ យុង វត្ត​ខេមររ​ង្សី ក្រុង​សាន់​ហូ​ស្សេ រដ្ឋ​កាលីហ្វ័រ​ញ៉ា , ព្រះតេជព្រះគុណ ទេព សុវណ្ណ ព្រះចៅអធិការ​វត្ត​ខ្មែរ​សាមគ្គី ក្រុង​ឌែនវ៉ើ រដ្ឋ​កូ​រូ​រ៉ា​ដូ​, ព្រះតេជព្រះគុណ ថាច់ ហាន់ ព្រះចៅអធិការ​វត្ត​ពុទ្ធិក​ខ្មែរ ក្រុង​ឡាស​វ៉េ​ហ្គាស រដ្ឋ​នេ​វ៉ា​ដា​, ព្រះតេជព្រះគុណ យ័​ញ តូន​, ព្រះតេជព្រះគុណ គឹម មឿ​ន វត្ត​សូ​រិ​យ​រង្សី ក្រុង​ហ្វី​ឡា​ឌែ​ល​ភា រដ្ឋ​ផែន​ស៊ីវ​វ៉ែន​ញ៉ា​, ព្រះតេជព្រះគុណ ថាច់ ច័ន្ទ​សុ​ភី ព្រះចៅអធិការ​វត្ត ធម្ម​រង្សី កម្ពុជា​ក្រោម រដ្ឋ​ញ៉េវ​ជើ​ស៊ី ។​

ព្រះសង្ឃរួមក្នុងសន្និបាត ។ រូបថត ថាច់ ប្រីជា គឿន
ព្រះសង្ឃរួមក្នុងសន្និបាត ។ រូបថត ថាច់ ប្រីជា គឿន

ព្រមទាំង​វត្តមាន លោក​បណ្ឌិត ខូ​ប​ភើ ទីប្រឹក្សា​ជាន់ខ្ពស់​នៃ​សហព័ន្ធ​ខ្មែរ​កម្ពុជា​ក្រោម (Dr. Joshua Cooper, KKF Senior Advisor) ។ លោក សឺ​ង សម្រេច ឧត្ដម​ទីប្រឹក្សា​សហព័ន្ធ​ខ្មែរ​កម្ពុជា​ក្រោម នៅ​ទីក្រុង Long Beach រដ្ឋ California, លោក ត្រឹង សារុង ប្រធាន​សាខា​សហព័ន្ធ​ខ្មែរ​កម្ពុជា​ក្រោម ប្រចាំ​ទ្វីប​អឺរ៉ុប មកពី​ប្រទេស​អី​តា​លី​, អ្នកស្រី កៀង សុធី ប្រធាន​គណៈកម្មាធិការ​យុវជន​នៃ​សហព័ន្ធ​ខ្មែរ​កម្ពុជា​ក្រោម មកពី​រដ្ឋ​ផ្លរីដា សហរដ្ឋអាមេរិក​, លោក ស្តិ​ប​ផាន (Stephan) អ្នកស្រាវជ្រាវ​រឿង​ខ្មែរក្រោម មកពី​ប្រទេស​អាល្លឺម៉ង់​ ​រួមទាំង​វត្តមាន​របស់​អស់លោក ប្រធាន​តំបន់​, ប្រធាន​សាខា និង​អស់​សមាជិក​សមាជិកា នៃ​សហព័ន្ធ​ខ្មែរ​កម្ពុជា​ក្រោម​ទាំង​ក្នុង ​និង​ក្រៅ​សហរដ្ឋអាមេរិក នូវ​អស់លោក​គណៈកម្មការ ពុទ្ធបរិស័ទ​វត្ត​កម្ពុជា​ក្រោម ក្រុង​ឡង​ប៊ី​ច រដ្ឋ​កាលីហ្វ័រ​ញ៉ា សហរដ្ឋអាមេរិក ។ ព្រះ​វត្តមាន និង​វត្តមាន​ក្នុង​ទី​សន្និបាត រួមទាំង​អស់ជាង ១០០ អង្គ និង​រូប ។​

​លំដាប់​តម​ក លោក​អធិបតី ថាច់ វៀន តំណាង​ទី​សន្និបាត​អុជ​ធូប​ធ្វើ​សក្ការបូជា​ឧកញ៉ា សឺង គុយ ជា​វីរបុរសជាតិ​កម្ពុជា​ក្រោម ។​

លោក ថាច់ វៀន អធិបតីសហព័ន្ធខ្មែរកម្ពុជាក្រោម អុជធូបបូជាចំពោះ វីរបុរសជាតិកម្ពុជាក្រោម សឺង គុយ ។ រូបថត ថាច់ ប្រីជា គឿន
លោក ថាច់ វៀន អធិបតីសហព័ន្ធខ្មែរកម្ពុជាក្រោម អុជធូបបូជាចំពោះ វីរបុរសជាតិកម្ពុជាក្រោម សឺង គុយ ។ រូបថត ថាច់ ប្រីជា គឿន

លោក ថាច់ វ៉ាង មកពី​រដ្ឋ​តេច​សាស ជា​អ្នកចាត់ចែង​ពិធី​គោរព​ទង់ជាតិ​, គោរព​វិញ្ញាណក្ខន្ធ បុព្វ​វីរ​សមណៈ និង បុព្វ​វីរបុរស​កម្ពុជា​ក្រោម ។ មុននឹង​ប្រារព្ធ​ពិធី​នេះ លោក​បាន​រៀបរាប់​រំឭក​ឡើងវិញ​នូវ​ទុក្ខសោក​នាដកម្ម​របស់​ខ្មែរក្រោម នៅ​កម្ពុជា​ក្រោម ដែល​ត្រូវ​យួន​រំលោភបំពាន​ឈ្លានពាន​ជិះជាន់ កាប់សម្លាប់​មាន​ដុត​ទាំង​រស់ កប់​ទាំង​ស្រស់​ជាដើម ព្រមទាំង​ពណ៌នា​គុណូបការៈ​និង​វីរភាព​ដ៏​អង់អាច​ក្លាហាន​របស់​បុព្វ​វីរ​សមណៈ បុព្វ​វីរបុរស​កម្ពុជា​ក្រោម និង​ការតស៊ូ​ប្តូរជីវិត​ដោយ​សាច់​ស្រស់​ឈាម​ស្រស់​របស់​ព្រះសង្ឃ​និង​ប្រជាពលរដ្ឋ​ខ្មែរក្រោម នៅ​កម្ពុជា​ក្រោម ក្នុង​បុព្វហេតុ​ជាតិ សាសនា មាតុភូមិ​កម្ពុជា​ក្រោម ។​

​បន្ត​ពី​នោះមក លោក​អាចារ្យ ឡឹម ខាយ ក៏​នាំ​ទី​សន្និបាត​ប្រារព្ធ​សាសន​និយម​កិច្ច ដោយ​តាំងធម៌​នមស្ការ​ព្រះ​រតនត្រៃ​សង្ខេប ហើយ​អារាធនា​ព្រះសង្ឃ​ស្វាធ្យាយ​ជយ​ន្តោ​ជា​ជយមង្គល​ជូ​នទី​សន្និបាត ។​

កាលបើ​សាសន​និយម​កិច្ច​ចប់​ភ្លាម លោក​អធិបតី ថាច់ វៀន ក៏ប្រកាស​បើក​ទីប្រជុំ ។​

​ផ្តើម​សន្និបាត​ដោយ​លោក សឺ​ង ហួរ ជា​អគ្គលេខាធិការ​នៃ​សហព័ន្ធ​ខ្មែរ​កម្ពុជា​ក្រោម ឡើង​ធ្វើ​របាយការណ៍​ប្រចាំឆ្នាំ ២០១៤, លោក​បាន​ផ្តើមឡើង​ដោយ​តាំង​ជា​សំនួរ​ជូ​នទី​សន្និបាត​ថា ហេតុអ្វី​យើង​ត្រូវ​មក​ប្រជុំ ? បន្ទាប់ពី​ធ្វើ​របាយការណ៍​រួចរាល់​លោក​អគ្គលេខាធិការ បានប្រកាស​គោលការណ៍​សហព័ន្ធ​ខ្មែរ​កម្ពុជា​ក្រោម​, លោក​បានលើកឡើង​នូវ​ករណី​រដ្ឋាភិបាល​កុម្មុយនីស្ត​យួន ចាប់បង្ខំ ព្រះតេជព្រះគុណ លីវ នី និង ព្រះតេជព្រះគុណ ថាច់ ធឿន ផ្សឹក ព្រមទាំង​ចាប់​ប្រជាពលរដ្ឋ​ខ្មែរក្រោម​មួយចំនួនទៀត ដែលមាន​ការជាប់​ពាក់ព័ន្ធ​ដាក់ពន្ធនាគារ​ទាំង​រំលោភបំពាន​, លោក​បានទាមទារ​ឲ្យ​រដ្ឋាភិបាល​យួន​ដោះលែង​ព្រះសង្ឃ និង​អ្នកទោស​ដែល​ត្រូវ​យួន​ចោទប្រកាន់​ទាំងនោះ ដោយ​កំហិត​ឥត​លក្ខខណ្ឌ ។ លោក​បានធ្វើ​សេចក្តី​បញ្ជាក់ថា សិទ្ធិសេរីភាព​សម្រេច​វា​សនា​ខ្លួន​ដោយ​ខ្លួនឯង គឺ យើង​ត្រូវ​ទាមទារ​ដោយ​ខ្លួនឯង ពោលគឺ​យើង​ត្រូវ​ពឹង​ខ្លួនឯង​ស្វែងរក​ទី​ពឹ​ឲ្យ​ខ្លួនឯង​ទើបបាន​សម្រេច​សមបំណង ដូចដែល​លោក​បា​រ៉ា​ក់ ​អូ​បា​ម៉ា ប្រធានាធិបតី អាមេរិក បាន​ថ្លែងថា “​សិទ្ធិសេរីភាព​សម្រេច​វា​សនា​ខ្លួន​ដោយ​ខ្លួនឯង គឺ​ត្រូវ​ទាមទារ​ដោយ​ខ្លួនឯង​” ។​

​លោក ចៅ រៀប ប្រធានសភា​ព្រឹទ្ធាចារ្យ សហព័ន្ធ​ខ្មែរ​កម្ពុជា​ក្រោម​ឡើង​ធ្វើ​របាយការណ៍រ​អំពី​កិច្ចការ ដែល​លោក​ទទួលបន្ទុក​ក្នុង​ឆ្នាំ ២០១៤ ថា​នៅមាន​ខ្វះចន្លោះ​ខ្លះ មិនទាន់បាន​ពេញ​កំពុង​សមបំណង​នៅឡើយ ។ លោក​បាន​សង្កត់ធ្ងន់ថា យើង​គ្រប់គ្នា​ត្រូវ​ប្រុងប្រយ័ត្ន​ទៅលើ​ឧបាយកល​ដ៏​ពិសពុល​របស់​យួន ២ ប្រការ គឺ ទី ១ ឧបាយកល​បំបែក​សាមគ្គី​, ទី ២ ឧបាយកល​បំបាក់ស្មារតី ។​

​លោក ថាច់ សេ ប្រធានសភា​តំណាង សហព័ន្ធ​ខ្មែរ​កម្ពុជា​ក្រោម ថ្លែងថា​គោលដៅ​របស់​សហព័ន្ធ​ខ្មែរ​កម្ពុជា​ក្រោម គឺ នៅតែ​ព្យាយាម​រិះរក​គ្រប់​មធ្យោបាយ​ឲ្យ​ខ្មែរក្រោម​ទូទាំង​កម្ពុជា​ក្រោម និង​លើ​ឆាក​អន្តរជាតិ បាន​យល់ដឹង​នូវ​តម្លៃ​អក្សរសាស្ត្រ សាសនា វប្បធម៌ ប្រវត្តិសាស្ត្រ ភូមិសាស្ត្រ និង​ភាពអយុត្តិធម៌ ការរស់នៅ​គ្មាន​សេរីភាព ការរង​គំនាប​គាបសង្កត់​ពី​រដ្ឋាភិបាល​កុម្មុយនីស្ត​យួន ព្រមទាំង​តម្រូវការ​ដ៏​ទទូច​របស់​ខ្មែរក្រោម នៅ​កម្ពុជា​ក្រោម ។ លោកក៏បានបញ្ជាក់ថា កាលពីដើម យួនហៅ សហព័ន្ធខ្មែរកម្ពុជាក្រោម ថាជាពួកប្រតិកិរិយាទៅកាន់ប្រជាពលរដ្ឋរបស់គេ ដើម្បីឃោសនាវាយប្រហារសហព័ន្ធខ្មែរកម្ពុជាក្រោម ក្នុងគោលបំណងគម្រាមសម្លុតខ្មែរក្រោមក្នុងស្រុកកុំឲ្យជឿទុកចិត្ត ហើយមានទំនាក់ទំនង ឬផ្តល់ព័ត៌មានពិតដែលមានការឆ្លុះបង្ហាញអំពីទង្វើជិះជាន់ រំលោភសិទ្ធិខ្មែរក្រោមជាជនជាតិដើមដល់សហព័ន្ធខ្មែរកម្ពុជាក្រោម, ប៉ុន្តែក្នុងពេលថ្មី ៗ នេះ គឺក្រោយពីសហព័ន្ធខ្មែរកម្ពុជាក្រោម បានតស៊ូមតិលើឆាកអន្តរជាតិជាមួយនឹងរដ្ឋាភិបាលកុម្មុយនីស្តយួន ជាច្រើនឆ្នាំកន្លងមក ស្ថានីយទូរទស្សន៍យួន ក្រុងព្រែកឫស្សីបែរមកហៅ សហព័ន្ធខ្មែរកម្ពុជាក្រោម ថាអង្គការខ្មែរក្រោមទៅវិញ ព្រោះអ្វី ? ព្រោះសហព័ន្ធខ្មែរកម្ពុជាក្រោម គឺជាអង្គការអន្តរជាតិមួយស្របច្បាប់ ដែលតែងតែគោរពតាមច្បាប់អន្តរជាតិយ៉ាងខ្ជាប់ខ្ជួន ជាហេតុនាំបណ្តាលឲ្យយួនលែងហ៊ានព្រហើនដូចមុនទៀត ។ ទន្ទឹមនឹងនោះ​លោក​ក៏បាន​ស្ងើចសរសើរ​គុណសម្បត្តិ និង​ភាព​អត់ធ្មត់​តស៊ូ​លះបង់​រាល់​កិច្ចការផ្ទាល់ខ្លួន និង​កិច្ចការ​សង្គម​គ្រួសារ ដើម្បី​បម្រើ​ជាតិ​ដោយស្មោះ​ស្ម័គ្រ​របស់លោក ថាច់ ង៉ុ​ក ថាច់ ប្រធាន​ប្រតិបត្តិ​សហព័ន្ធ​ខ្មែរ​កម្ពុជា​ក្រោម ដែល​បានធ្វើ​ឲ្យ​កម្ពុជា​ក្រោម​មានឈ្មោះ​បោះ​សំឡេង​ពេញ​ពិភពលោក ដោយ​គេ​បាន​ស្គាល់​កម្ពុជា​ក្រោម​ជា​នរណា​គ្រប់គ្នា ។ សេចក្តី​ត្រង់នេះ​លោក​សូម​ចាត់ទុក​លោក ថាច់ ង៉ុ​ក ថា​ច់ ថា​ជា​រដ្ឋបុរស​កម្ពុជា​ក្រោម​មួយរូប ដ៏​កម្រ​មាន​អ្នកធ្វើ​ដូច ។​

​លោក ប្រាក់ សេរី​វុឌ្ឍិ៍ អនុប្រធាន​ទី ១ សហព័ន្ធ​ខ្មែរ​កម្ពុជា​ក្រោម បាន​ឡើង​ពន្យល់​បំភ្លឺ​អំពី​អត្ថន័យ និង​អត្ថប្រយោជន៍​ពិតប្រាកដ​នៃ​ទង់ជាតិ​កម្ពុជា​ក្រោម ។

លោក ប្រាក់ សេរីវុឌ្ឍិ៍ ។ រូបថត ថាច់ ប្រីជា គឿន
លោក ប្រាក់ សេរីវុឌ្ឍិ៍ ។ រូបថត ថាច់ ប្រីជា គឿន

​លោក ថាច់ ង៉ុ​ក ថា​ច់ ប្រធាន​ប្រតិបត្តិ សហព័ន្ធ​ខ្មែរ​កម្ពុជា​ក្រោម ថ្លែងថា គោលការណ៍​សហព័ន្ធ​ខ្មែរ​កម្ពុជា​ក្រោម គឺ​ធ្វើ​ឲ្យ​ខ្មែរក្រោម​ក្លាយជា​អ្នកក្លាហាន​សុភាពបុរស សុភាព​នារី មិនមែន​ធ្វើ​ឲ្យ​ទៅជា​អ្នកក្លាហាន​ព្រហើនកោងកាច ដល់​កម្រិត​គេ​លែង​រាប់អាន លែង​អាណិត លែង​ជួយ​យកអាសា​នោះទេ គឺ​ធ្វើយ៉ាងណា​ឲ្យ​គេ រាប់អាន ចូលចិត្ត អាណិត​ស្រឡាញ់ ឲ្យ​គេ​ជ្រួតជ្រាប​អំពី​ទុក្ខលំបាក អំពី​គោលការណ៍ និង​គោលដៅ ព្រមទាំង​តម្រូវការ​ចាំបាច់​របស់​ខ្លួន ទើប​គេ​ជួយ​ជ្រោមជ្រែង​យកអាសា ។​

​អ្នកស្រី កៀង សុធី ប្រធាន​គណៈកម្មាធិការ​យុវជន​នៃ​សហព័ន្ធ​ខ្មែរ​កម្ពុជា​ក្រោម​, ធ្វើ​របាយការណ៍ និង​សម្ដែង​ការពេញចិត្ត​ចំពោះ​ការងារ និង​លទ្ធផល​កា​ងារ​ដែល​ខ្លួន​ទទួលបាន ។ អ្នកស្រី​បាន​ប្តេជ្ញា​ថា បើទុកជា​ការងារ​រប​ស់​ខ្លួន​ជួប​ការលំបាក​ខ្លះ ក្នុងការ​ធ្វើដំណើរ​ទៅមក​ដើម្បី​បំពេញបេសកកម្ម​ពីរ​ដ្ឋ​មួយ​ទៅ​រដ្ឋ​មួយ និង​ពី​ប្រទេសមួយ​ទៅ​ប្រទេសមួយ ដោយ​ត្រូវ​លះបង់​ការងារ​ផ្ទាល់ខ្លួន និង​តួនាទី​ជា​ស្ត្រី​មេផ្ទះ​ក៏ដោយ អ្នកស្រី​នៅតែ​ខិតខំ​ប្រឹងប្រែង​ធ្វើខ្លួន​ឲ្យ​បានជា​ស្ត្រី​ខ្មែរក្រោម និង​ជា​យុវជន​ខ្មែរក្រោម​គំរូ ឬ​ជា​ទិដ្ឋានុគតិ​នៃ​យុវជន​ខ្មែរក្រោម ទាំង​ក្នុង​និង​ក្រៅ​កម្ពុជា​ក្រោម ។ ទន្ទឹមនឹងនោះ អ្នកស្រី​ក៏បាន​ស្ងើចសរសើរ និង​មាន​អំណរ​យ៉ាង​ពន់ពេក​ចំពោះ​ការយកចិត្តទុកដាក់​លើ​បញ្ហា​ជាតិ របស់​ឪពុកម្តាយ​យុវជន​ទាំង​ក្នុង និង​ក្រៅ​កម្ពុជា​ក្រោម​នា​សម័យ​ហ្វេ​ស​ប៊ុ​ក​នេះ ហើយ​អ្នកស្រី​ស្នើ​សូម​ឲ្យ​យុវជន​ទាំងអស់ មាន​ស្មារតី​ប្រឹងប្រែង​ព្យាយាម​តាមដាន​ព័ត៌មាន​សហព័ន្ធ​ខ្មែរ​កម្ពុជា​ក្រោម កុំ​បង្អង់ កុំ​ធ្វេសប្រហែស ដើម្បី​សាបព្រោះ​បណ្តុះបណ្តាល​ថ្នាល​ស្មារតី​ស្នេហា​ជាតិ ។​

លោក​បណ្ឌិត ខូ​ប​ភើ (Joshua Cooper) ទីប្រឹក្សា​ជាន់ខ្ពស់​នៃ​សហព័ន្ធ​ខ្មែរ​កម្ពុជា​ក្រោម បាន​ថ្លែង​អំពី​គោលការណ៍​សហព័ន្ធ​ខ្មែរ​កម្ពុជា​ក្រោម ដោយ​ការពន្យល់​បំភ្លឺ​លើ​គោលជំហរ​នៃ​ការតស៊ូ​ទាមទារ​សិទ្ធិសេរីភាព​សម្រេច​វាស​នា​ខ្លួន​ដោយ ​ខ្លួនឯង​តាមច្បាប់​អន្តរជាតិ របស់​សហព័ន្ធ​ខ្មែរ​កម្ពុជា​ក្រោម ។​

បណ្ឌិត Joshua Cooper ថ្លែងទៅកាន់អ្នកចូលរួម ។ រូបថត ថាច់ ប្រីជា គឿន
បណ្ឌិត Joshua Cooper ថ្លែងទៅកាន់អ្នកចូលរួម ។ រូបថត ថាច់ ប្រីជា គឿន

សន្និបាតឈប់សម្រាកទទួលភោជនាហារ នៅវេលាម៉ោង ១២ និង ៣០ នាទី

ទីសន្និបាតបើកឡើងវិញវេលារសៀល ម៉ោង ១៣ និង ៤០ នាទី

ឧទ្ទេសនាម គណៈកម្មការ និង​ពុទ្ធបរិស័ទ​វត្ត​កម្ពុជា​ក្រោម ថតរូប​អនុស្សាវរីយ៍​ជុំគ្នា ។ លោក ​ថាច់ និ​ន តំណាង​គណៈកម្មការ​ថ្លែង​សុន្ទរកថា​ ស្តីអំពី​ការកសាង​វត្ត​ដោយ​ចិត្ត​ស្មោះស្ម័គ្រ​ដើម្បី​ជា​បូជា​ចំពោះ​ជាតិ សាសនា ព្រោះ​តាំងពី​បុរាណកាល​រៀងមក​វត្ត​អារាម​ជា​តួ​អាយុជីវិត​ជាតិ សាសនា កម្ពុជា​ក្រោម ជាឃ្លាំង​វប្បធម៌ អក្សរសាស្ត្រ ប្រពៃណី ទំនៀមទម្លាប់ និ​ងជា​សាលា​រៀនចំណេះ​ទូទៅ ហើយក៏​ជាទី​ប្រយុទ្ធ​ប្រឆាំងនឹង​កម្លាំង​ឈ្លានពាន ទាំង​ជាទី​ប្រជុំ​គំនិត​ជាតិ គំនិត​នយោបាយ​តស៊ូ​ទាមទារ​សិទ្ធិសេរីភាព​របស់​ខ្មែរក្រោម ។​

​ព្រះតេជព្រះគុណ សឺ​ង យ៉ឹ​ង​រតនា ប្រធាន​នាយកដ្ឋាន​ព័ត៌មាន នៃ​សហព័ន្ធ​ខ្មែរ​កម្ពុជា​ក្រោម ធ្វើ​របាយការណ៍​អំពី​ការងារ​ព័ត៌មាន​សហព័ន្ធ​ខ្មែរ​កម្ពុជា​ក្រោម ដែល​អាច​ប្រព្រឹត្ត​ទៅមុខ​បាន​ក៏​អាស្រ័យ​កម្លាំង​ពីរ​យ៉ាង គឺ ​កម្លាំង​ស្ម័គ្រចិត្ត និង​កម្លាំង​ឧ​ត្ថ​ម្ភ​គាំទ្រ របស់​បុគ្គលិក​ព័ត៌មាន និង​របស់​សមាជិក​ស​មា​ជិ​កា​ទាំងអស់​, បណ្តា​កម្លាំង​ទាំងពីរ​នេះ បើ​កម្លាំង​ណា​នីមួយ​ថមថយ​ក៏​មិនអាច​ដំណើរការ​ទៅបាន​ស្រួល​ដែរ ប្រៀបដូចជា​មនុ​ស្សម្នាក់ ៗ ត្រូវ​សម្បទា​ដោយ​កម្លាំង​ពីរ​ប្រការ គឺ​កម្លាំងកាយ និង​កម្លាំងចិត្ត បើ​កម្លាំង​ណាមួយ​ទ្រុឌទ្រោម​ក៏​ជីវិត​លែង​សុខ​សប្បាយ​, សូមជម្រាបថា សព្វថ្ងៃនេះ​ ចំពោះ​បុគ្គលិក​ព័ត៌មាន​សហព័ន្ធ​ខ្មែរ​កម្ពុជា​ក្រោម​នៅ​សហរដ្ឋអាមេរិក និង​កាណាដា សុទ្ធតែ​ធ្វើ​ដោយ​ស្ម័គ្រចិត្ត​ទាំងអស់​,​ ឯ​នៅ​ប្រទេស​ថៃ និង ​កម្ពុជា យើង​ត្រូវតែ​ជួយ​ឧ​ត្ថ​ម្ភ​ប្រាក់​ដើម្បី​ទ្រទ្រង់​ជីវភាព​ជូន​បុគ្គលិក ហេតុនេះ​សូម​សមាជិក​សមាជិកា​ទាំងអស់​ជ្រាប ហើយ​ជួយ​ឧ​ត្ថ​ម្ភ​ព័ត៌មាន​កម្ពុជា​ក្រោម​យើង​ឲ្យ​បាន​ដំណើរការ​ស្រួល ព្រោះ​ព័ត៌មាន​សហព័ន្ធ​ខ្មែរ​កម្ពុជា​ក្រោម​ជា​ប្រភព​ឬ​ជា​គន្លឹះ ឬក៏​ជា​កូនសោ​នៃ​ស្មារតី​ស្នេហា​ជាតិ និង ចំណេះដឹង​ក្នុងការ​ទាមទារ​សិទ្ធិសេរីភាព​សម្រេច​វាស​នា​ខ្លួន​ដោយ​ខ្លួនឯង​របស់​ខ្មែរក្រោម ជាពិសេស​ខ្មែរក្រោម​នៅ​កម្ពុជា​ក្រោម ។ ព័ត៌មាន​កម្ពុជា​ក្រោម​មាន​ផ្សាយ​តាម​វិទ្យុ​សំឡេង​កម្ពុជា​ក្រោម www.vokk.net, វែបសាយ​ខ្មែរក្រោម www.khmerkrom.org, គេហទំព័រ សារព័ត៌មាន ព្រៃនគរ http://preynokornews.blogspot.com, ទូរទស្សន៍​ព្រៃនគរ (PTV), ព្រឹត្តិបត្រ “​កម្ពុជា​ក្រោម​” នៃ​សហព័ន្ធ​ខ្មែរ​កម្ពុជា​ក្រោម និង​ការចែករំលែក​ផ្សាយ​តាម បណ្តាញ​ហ្វេ​ស​ប៊ុ​ក​ជាដើម ។ ទន្ទឹមនឹងនោះ​យើង​បានចេញ​ព្រឹត្តិបត្រ​លេខ ពិសេស​ចុងឆ្នាំ ២០១៤ នេះ​មាន​កម្រាស់ ៨៨ ទំព័រ មាន​គោល​មាតិកា​ព័ត៌មាន​ពិសេស ៗ ដូចជា លោក​ ចៅ ហេន បាន​ចេញទៅ​តាំងទី​លំនៅ នៅ​សហរដ្ឋអាមេរិក​, អំពី​សហព័ន្ធ​ខ្មែរ​កម្ពុជា​ក្រោម​, ប្រវត្តិ​មហាសន្និបាត​សកល​នៃ​ខ្មែរ​កម្ពុជា​ក្រោម ទាំង ៩ លើក (១៩៨៥ – ២០១២), ប្រវត្តិ​លោក ​សឺ​ន ទួន និង​ជនរងគ្រោះ​ក្នុង​របប​អាណានិគម​យួន ។​

​សូម​អស់លោក​-​អ្នក​សមាជិក​សមាជិកា​មេត្តា​ជាវ​ព្រឹត្តិបត្រ​អាន​កុំ​ខាន ការ​ជាវ​ព្រឹត្តិបត្រ​សហព័ន្ធ​ខ្មែរ​កម្ពុជា​ក្រោម​ទៅ​អាន ឈ្មោះថា​បាន​ជម្រុញ​វិស័យ​ព័ត៌មាន​ឲ្យ​មានដំណើរ​ការណ៍​លឿន​ទៅមុខ ។​

​គម្រោងការ ឆ្នាំ ២០១៥ នេះ​នឹងមាន​ការផលិត CD, DVD ចម្រៀង​ស្នេហា​ជាតិ​, ព្រឹ​ត្ត​ប​ត្រ​សហព័ន្ធ​ខ្មែរ​កម្ពុជា​ក្រោម​ប្រចាំខែ ។ ហេតុនេះ​សូម​អស់លោក​-​អ្នក​រង់ចាំ​ស្តាប់​កម្សាន្ត និង​អាន​កុំ​ខាន ។​

បន្ទាប់មកទៀត គឺ​របាយការណ៍​របស់​ប្រធាន​ប្រចាំ​តំបន់​នីមួយ ៗ និង​ប្រធាន​សាខា​នានា ដែលបានអញ្ជើញមកពីប្រទេស, រដ្ឋ និងក្រុង​ផ្សេង ៗ ចូលរួម​ក្នុង​សន្និបាត មានដូចជា លោក ដា​ញ់ ងារ រដ្ឋ​ច​ចា​, លោក ថាច់ គា រដ្ឋ​ណូ​ត​ខា​រ៉ូ​ឡាយ​ណា​, លោក គឹម សាង ក្រុង​អូ​លែ​ន​ដូ រដ្ឋ​ផ្លរីដា​, លោក ថាច់ រិ​ន ក្រុង​សែន​ភី​ត រដ្ឋ​ផ្លរីដា​, លោក ត្រឹង ជី រដ្ឋ​តេច​សាស​, លោក ថាច់ ឫទ្ធី រដ្ឋ​អូ​ខ្លា​ហូ​មា , លោក ឡឹម វ៉ាន ដាន រដ្ឋ​អាយ​អូ​វ៉ា , លោក សឺ​ង សា​រុម រដ្ឋ​កូ​រ៉ូ​រ៉ា​ដូ​, លោក ថាច់ វ៉ាង រដ្ឋ​តេច​សាស អាន​លិខិត​របាយការណ៍​តំណាង រដ្ឋ​ជីកា​ហ្គូ និង​រដ្ឋ អី​ល​ឡឺ​ណ​យ​, លោក ថាច់ សាង រដ្ឋ​តេច​សាស , លោក ថាច់ តង រដ្ឋ​កាលីហ្វ័រ​ញ៉ា , លោក ត្រឹង សារុង ប្រទេស​អី​តា​លី ។​

សន្និបាតថ្ងៃទី ១ បិទនៅវេលាម៉ោង ៥ ។

លោក ត្រឹង សារុង ប្រធានប្រចាំអឺរ៉ុប ។ រូបថត ថាច់ ប្រីជា គឿន
លោក ត្រឹង សារុង ប្រធានប្រចាំអឺរ៉ុប ។ រូបថត ថាច់ ប្រីជា គឿន

ថ្ងៃទី ២ នៃសន្និបាតសហព័ន្ធខ្មែរកម្ពុជាក្រោម

​ថ្ងៃអាទិត្យ ៨ រោច ខែ​មិគសិរ ឆ្នាំមមី ឆស័ក ព​. ស​. ២៥៥៨ ត្រូវ​នឹង​ថ្ងៃ ទី ១៤ ធ្នូ គ​. ​ស​. ២០១៤ ជា​ថ្ងៃ សន្និបាត​ទី ២ ត្រូវបាន​ចាប់ផ្តើម​ឡើង​ដោយ​សំឡេង​គោរព​ទង់ជាតិ​យ៉ាង​គឹកកង​រំពង​នៅវេលា​ម៉ោង ៩ និង ៣៣ នាទី​គួរ​ឲ្យ​ព្រឺរោម !

បន្ទាប់មក​លោក សឺ​ង សម្រេច ទីប្រឹក្សា​នៃ​សហព័ន្ធ​ខ្មែរ​កម្ពុជា​ក្រោម​បានប្រកាស​បើក​អង្គស​ន្និបាត ។ លោក​បាន​បញ្ជាក់ថា លោក​បាន​ស្បថ ៣ លើក គឺ​លើក​ទី ១ ឆ្នាំ ១៩៦២ នៅមុខ​ព្រះ​ឆាយា​លក្ខណ៍ ព្រះបាទ​នរោត្តម ក្នុង​ព្រះវិហារ​ព្រះ​កែវ​មរកត លើក​ទី ២ នៅ​ព្រះ​បរមរាជវាំង​លើក​ទី ៣ នៅ​រដ្ឋ​ផែន​ស៊ី​វី​ញ៉ា ក្នុងពេល​បង្កើត​សហព័ន្ធ​ខ្មែរ​កម្ពុជា​ក្រោម ថា​ស្មោះត្រង់​មិន​ក្បត់ជាតិ​លុះ​រលត់​សង្ខារ ។ ទន្ទឹមនឹងនោះ លោក​ថា លោក​បាន​សិក្សា​នូវ​សតិបដ្ឋាន​សូត្រ ក្នុង​សុ​ត្ត​ន្ត បិដក​ព្រះពុទ្ធសាសនា ហើយ​បាន​យក​នូវ​គោល​ធម៌​សតិបដ្ឋាន​សូត្រ​មក​អនុវត្ត​ក្នុង​ជីវិត​ប្រចាំថ្ងៃ និង​ក្នុង​ជីវិត​នយោបាយ ក្នុង​គោលការណ៍​រម្តោះ​ទុក្ខ​ខ្មែរក្រោម​សម្រេច​វាសនា​ខ្លួន​ដោយ​ខ្លួនឯង ដូច​ព្រះពុទ្ធដីកា​ថា ព្រះ​តថាគត​ទាំងឡាយ​គ្រាន់តែ​ជា​អ្នក​ប្រាប់ផ្លូវ អ្នក​ទាំងឡាយ​ត្រូវ​ស្វែងរក​សេរីភាព​រួច​ចាក​ទុក្ខ​ជា​ស្ថាពរ​ដោយ​ខ្លួនឯង ។ លោក​បាន​បញ្ជាក់ថា ក្នុងពេល​ថ្មី​នេះ​យើង​សុទ្ធសឹង​បានដឹង​ទាំងអស់គ្នា​ថា រដ្ឋាភិបាល​កុម្មុយនីស្ត​យួន បាន​កម្ទេចចោល​នូវ​ខ្លោងទ្វារ​ខេត្ត​ព្រះ​ត្រពាំង ជា​កេរដំណែល​វប្បធម៌ ភ័ស្តុតាង​ប្រវត្តិសាស្ត្រ ដែល​ចាត់ទុកជា​ដួងព្រលឹង​ខ្មែរក្រោម នៅ​កម្ពុជា​ក្រោម ជា​ទង្វើ​រំលោភបំពាន​លើ​សេចក្តីប្រកាស​ជា​សកល​របស់​អង្គការសហប្រជាជាតិ ស្តីអំពី​សិទ្ធិ​ជនជាតិដើម ត្រង់​មាត្រា ទី ១១ ចំណុច​ទី ១ ដែល​បាន​ចែងថា “​ជនជាតិដើម មាន​សិទ្ធិ​ប្រតិបត្តិ និង​ធ្វើ​ឲ្យ​រស់​ឡើងវិញ នូវ​ប្រពៃណី​ទំនៀមទម្លាប់​ជា​វប្បធម៌​របស់ខ្លួន ។ សិទ្ធិ​នេះ​រួមមាន​ទាំង​សិទ្ធិ​ក្នុងការ​ថែរក្សា​ការពារ និង​អភិវឌ្ឍន៍​អ្វីដែល​បង្ហាញ​ពី​អត្តសញ្ញាណ វប្បធម៌​របស់ខ្លួន ដែលមានពីអតីតកាលក្តី ក្នុងបច្ចុប្បន្នកាលក្តី និងអនាគតកាលក្តី ដូចជា​តំបន់បុរាណដ្ឋាន និង​ទី​ស្ថាន​ប្រវត្តិសាស្ត្រ បុរាណវត្ថុ ក្បាច់រចនា ពិ​ធី​កម្ម បច្ចេកវិទ្យា និង​សិល្បៈ ទស្សនីយភាព ព្រមទាំង​អក្សរសាស្ត្រ​” ។ លោក​បាន​ប្រៀបប្រដូច​ខ្មែរក្រោម​ទៅនឹង​ដើមឈើ ចំណែក​ការរំលោភបំពាន​ជិះជាន់​របស់​រដ្ឋាភិបាល​យួន​ទៅនឹង​ខ្យល់ព្យុះសង្ឃរា​, ប៉ុន្តែ​ខ្យល់ព្យុះសង្ឃរា​មិនមែន​សុទ្ធតែ​អាច​បក់​រំលើង​ព្រៃស្រោង​ព្រៃ​ក្រា​ស់បាន​ដូច​ចិត្ត​នោះទេ​, ក្នុង​លោក​នេះ​ពិតមែន​តែមាន​ព្យុះ​សង្ឃរាជា​គ្រោះធម្មជាតិ​រឿយ ៗ ក៏ពិតមែន តែ​ទន្ទឹមនឹងនោះ​ព្រៃស្រោង ព្រៃ​ក្រាស់​ក៏​នៅតែ​លូតលាស់​ចម្រើន​ពាសពេញ​ពិភពលោក ហើយ​មានច្បាប់​អភិរក្ស​ការពារ​ទៀតផង ។ យ៉ាងណាមិញ​បើ​ខ្មែរក្រោម​ព្រមព្រៀង​សាមគ្គី​គ្នា​ដូច​ព្រៃស្រោង ព្រៃ​ក្រាស់ ក៏​កម្រ​នឹង​រលំរលើង​ដោយ​ព្យុះសង្ឃរា​យួន​ឈ្លានពាន​ដូច្នោះ​ដែរ ហើយ​មុខជា​បាន​ឈានដល់​សេចក្តីចម្រើន​ដូច ដែល​យើង​បាន​ដៅ​ទុក​ជាមិនខាន ។​

​ភិក្ខុ នាថ​សី​លោ ត្រឹង ថាច់​យុង បាន​លើក​នូវ​អ​បរិហា​និ​យ​ធម៌​ទាំង ៧ ប្រការ ដែល​គោល​ធម៌ ឬ​គោលការណ៍​ការពារ​សេច​ក្តី​ចម្រើន​រុងរឿង​, សាមគ្គីភាព​, សុខសន្តិភាព​, បូរណភាព​ទឹកដី​, ឯករាជ្យ និង​ស្ថិរភាព​នយោបាយ មិន​ឲ្យ​វិនាស​សាបសូន្យ ។ ធម៌​ទាំង ៧ ប្រការ​នោះ​ព្រះសម្មាសម្ពុទ្ធ​ទ្រង់​ត្រាស់​សំដែង​នឹង​ពួក​ស្តេច​លិ​ច្ឆ​វី ក្នុង​ដែន​វ​ជ្ជី និង​ភិក្ខុសង្ឃ ក្នុង​គម្ពីរ​សុត្តន្តបិដក អ​ង្គុ​ត្ត​រ​និកាយ សត្ត​ក​និបាត វ​ជ្ជី​វគ្គ និង​គម្ពីរ​ទីឃនិកាយ មហាវគ្គ មហា​បរិនិព្វាន​សូត្រ ដើម្បី​ការពារ​ប្រទេសជាតិ និង​សង្គម​សង្ឃ​ឲ្យ​ស្ថិតនៅក្នុង​សេចក្តីសុខ​ចម្រើន​រុងរឿង​អស់កាល​ជា​អង្វែង ។ គឺ ទី ១ ត្រូវមាន​ការប្រជុំ​គ្នា​រឿយ ៗ ប្រជុំគ្នា​ដោយ​ច្រើន​, ទី ២ ត្រូវ​ព្រមព្រៀងគ្នា​ប្រជុំ ព្រម​គ្នា​លើកលែង​ប្រជុំ ព្រមព្រៀងគ្នា​ធ្វើ​កិច្ច​ដែល​ត្រូវធ្វើ​, ទី ៣ មិន​បញ្ញត្តិ​ច្បាប់ (​ដែល​ព្រះពុទ្ធ ឬ​ប្រាជ្ញ​បណ្ឌិត​ជាន់​ដើម​) មិនបាន​បញ្ញត្តិ មិន​ដក​ច្បាប់ ដែល​បាន​បញ្ញត្តិ​រួចហើយ កាន់​តាម ប្រព្រឹត្ត​តាម នូវ​ច្បាប់​ធរមាន​, ទី ៤ ត្រូវធ្វើ​សក្ការៈ គោរព រាប់អាន បូជា នូវ​ពួក​ជន​មាន​វយ​វុ​ឌ្ឃិ ចម្រើន​ដោយ​វ័យ និង​ជន​ជា​គុណវុឌ្ឍិ ចម្រើន​ដោយ​គុណធម៌ ដោយ​ចំណេះវិជ្ជា ដោយ​បទពិសោធន៍​, ទី ៥ មិន​លុះ​អំណាច​តណ្ហា ឈ្លក់​វង្វេង​ក្នុង​កាមគុណ​, ទី ៦ ត្រូវធ្វើ​សក្ការៈ គោរព រាប់អាន បូជា រក្សា​នូវ​កេរដំណែល​វប្បធម៌ សាសនា អក្សរសាស្ត្រ ប្រពៃណី​ទំនៀមទម្លាប់​ដែល​បុព្វបុរស​របស់ខ្លួន​ធ្លាប់​បានធ្វើ​សក្ការៈ គោរព រាប់អាន បូជា​ប្រកបដោយ​ធម៌​, ទី ៧ ត្រូវ​ចាត់ចែង​ឲ្យ​ត្រឹមត្រូវ នូវ​ការរក្សា​ការពារ និង​ការគ្រប់គ្រង​ប្រកបដោយ​ធម៌ ក្នុង​អ្នកមាន​សីល មានចំណេះ​វិជ្ជា ដោយ​បំណង​ថា ធ្វើ​ដូចម្តេច​ហ្ន៎ ! អ្នកមាន​សីល មានចំណេះ​វិជ្ជា ទាំង​លាយ ដែល​មិនទាន់​មក ក៏​សូម​ឲ្យ​មកកាន់​ដែក​ដី​របស់​យើង ដែល​មក​ស្រាប់​ហើយ ក៏​សូម​ឲ្យ​ឋិត​នៅ​សុខ​សប្បាយ​ក្នុង​ដែនដី​របស់​យើង ។ កាលបើ​សហព័ន្ធ​ខ្មែរ​កម្ពុជា​ក្រោម​ប្រតិបត្តិ​ក្នុង​អ​បរិហា​និ​យ​ធម៌​ទាំង ៧ នេះ អស់កាល​ត្រឹមណា សេចក្តីចម្រើន​រុងរឿង សាមគ្គីធម៌ សិទ្ធិសេរីភាព នឹងមាន​ប្រាកដ​ដល់​សហព័ន្ធ​ខ្មែរ​កម្ពុជា​ក្រោម​អស់កាល​ត្រឹមណោះ សេចក្តី​សាបសូន្យ​មិន​មាន​ឡើយ សត្រូវ​យកឈ្នះ​មិនបាន បំបែកបំបាក់ មិន​បាក់ មិន​បែក​ឡើយ ។​

ភិក្ខុ ត្រឹង ថាច់ យុង ថ្លែងទៅកាន់អ្នកចូលរួម ។ រូបថត ថាច់ ប្រីជា គឿន
ភិក្ខុ ត្រឹង ថាច់ យុង ថ្លែងទៅកាន់អ្នកចូលរួម ។ រូបថត ថាច់ ប្រីជា គឿន

​លោក​បណ្ឌិត ខូ​ប​ភើ (Joshua Cooper) ទីប្រឹក្សា​ជាន់ខ្ពស់​នៃ​សហព័ន្ធ​ខ្មែរ​កម្ពុជា​ក្រោម បាន​ឡើង​ថ្លែង​ការបន្ថែម​អំពី​ច្បាប់​សិទ្ធិមនុស្ស​អន្តរជាតិ​ទាំងអស់​មាន ៩ មាត្រា ក្នុងនោះ​យួន​បាន​ចុះហត្ថលេខា​ទទួល​អនុវត្ត​ចំនួន ៧ មាត្រា​រួចមកហើយ នៅសល់ ២ មាត្រា គឺ​ទោស​ធ្វើ​ទារុណកម្ម និង​ទោស​ប្រហារជីវិត ដែល​យួន​នៅ​មិនទាន់​ចុះហត្ថលេខា​ទទួល​យកទៅ​អនុវត្ត​ជា​ធរមាន និង​ច្បាប់​សិទ្ធិ​ជនជាតិដើម​ដែល​ចេញ​សេចក្តីប្រកាស​ដោយ​អង្គការសហប្រជាជាតិ ដែល​យួន​បាន​ចុះហត្ថលេខា​ទទួល​យកទៅ​អនុវត្ត ព្រមទាំង​ការទទួលយក​នូវ​ការអនុវត្ត​សិទ្ធិមនុស្ស និង​អភិវឌ្ឍន៍​សង្គម (MDG) របស់​រដ្ឋាភិបាល​កុម្មុយនីស្ត​យួន ។​

លោក ចៅ សេរី អនុប្រធាន​ទី ១ នៃ​សហព័ន្ធ​ខ្មែរ​កម្ពុជា​ក្រោម បានបញ្ជាក់​បន្ថែម​ពីលើ​ការចុះហត្ថលេខា​ទទួល​អ​នុ​វត្ត​នូវ​ច្បាប់​អន្តរជាតិ​នានា​មានច្បាប់​ស្តីពី​សិទ្ធិមនុស្ស ច្បាប់​ស្តីពី​សិទ្ធិ​ជនជាតិដើម ច្បាប់​ស្តីពី​សិទ្ធិ​កុមារ ច្បាប់​ស្តីពី​សិទ្ធិ​ស្ត្រី​ជាដើម ហើយ​លោក​បាន​អំពាវនាវ​សូម​ឲ្យ​ព្រះសង្ឃ​និង​ប្រជាពលរដ្ឋ​ខ្មែរក្រោម ក្នុងស្រុក​ជួយ​ផ្តល់ព័ត៌មាន​ជាក់ស្តែង ដែល​កើតមានឡើង​នៅក្នុង​ទឹកដី​កម្ពុជា​ក្រោម ដល់​សហព័ន្ធ​ខ្មែរ​កម្ពុជា​ក្រោម​ឲ្យ​បាន​ទាន់​ហេតុការណ៍​ដោយ​វៃ​ឈ្លាស​កុំបី​រួញ​រា បើទុកជា​រដ្ឋាភិបាល​យួន​ល្បី​ខាង​រឹតត្បិត​គាបសង្កត់​មិន​គោរព​សិទ្ធិ​សារព័ត៌មាន​ក៏ដោយ ក៏​យើង​ត្រូវតែ​ហ៊ាន​រើបម្រះ​ឲ្យ​ត្រូវ​តាម​កាលៈ ទេសៈ ​ផងដែរ មិនត្រូវ​ដេក​ផ្សំ​ដួល​មួល​ផ្សំ​គ្រេច​នោះ​ឲ្យ​សោះ ។​

ព្រឹត្តិបត្រ កម្ពុជាក្រោម ។ រូបថត ថាច់ ប្រីជា គឿន
ព្រឹត្តិបត្រ កម្ពុជាក្រោម ។ រូបថត ថាច់ ប្រីជា គឿន

​បង្កើត​ក្រុម​ពិភាក្សា​ការងារ​ស្វែងរក​ដំណោះស្រាយ និង​គម្រោងការណ៍​សម្រាប់​ឆ្នាំ ២០១៥ មាន​ចំនួន ៦ ក្រុម គឺ​៖ ទី ១ ក្រុម​ស្ត្រី ,​ទី ២ ក្រុមយុវជន​, ទី ៣ ក្រុម​សាសនា​, ទី ៤ ក្រុម​សាងសង់​, ទី ៥ ក្រុម​ចាស់ព្រឹទ្ធាចារ្យ , ទី ៦ ក្រុម​ហេ​រ​ញ្ញិ​ក ។​

​សន្និបាត​បាន​បិទ​នៅវេលា​ម៉ោង ១២ និង ៣០ នាទី ដើម្បី​ទទួលទាន​ភោជនាហារ ។​

​បន្ទាប់មក​សន្និបាត​បា​ន​បើក​ឡើងវិញ​នៅពេល​រសៀល ម៉ោង ១៣ និង ៣០ នាទី ។​

ក្រុម​នីមួយ ៗ ក៏បាន​រៀប​តាំង​ជារង្វង់​មូល​ចាប់ផ្តើម​ពិភាក្សាគ្នា​អំពី​កិច្ចការ​របស់ខ្លួន ។​

​បន្ទាប់ពី​ក្រុម​នីមួយ ៗ បាន​ពិភាក្សា​កិច្ចការងារ​ក្នុង​រយៈពេល ៤៥ នាទី បានសម្រេច​ជា​ស្ថាពរ​ហើយ ក៏បាន​ចេញ​ជា​របាយការណ៍​ឯកភាព​រៀង ៗ ក្រុម ហើយ​បានសម្រេច​លើកឡើង​នូវ​របាយការណ៍​នោះ​ជូន​គណៈកម្មការ​នាយក​ធ្វើការ​សម្រេច ។​

លោក ថាច់ ង៉ុ​ក ថាច់ ប្រធាន​ប្រតិបត្តិ បាន​ឡើង​ផ្ដល់​អនុសាសន៍​ដល់​ក្រុម​នីមួយៗ ឲ្យ​ខំប្រឹង​ធ្វើ​កិច្ច​របស់ខ្លួន​ឲ្យ​បានសម្រេច​ជោគជ័យ​កុំបី​ធ្វេស ហើយ​លោក​ក៏បាន​ឧទ្ទេសនាម​លោក សឺ​ង ហួរ អគ្គលេខាធិការ​ឡើង​ប្រកាសសេចក្តី​សម្រេច​សន្និបាត​សហព័ន្ធ​ខ្មែរ​កម្ពុជា​ក្រោម ឆ្នាំ ២០១ ៤ ។​

​សេចក្តីសម្រេច​សន្និបាត​សហព័ន្ធ​ខ្មែរ​កម្ពុជា​ក្រោម ឆ្នាំ ២០១៤ ដើម្បី​អនុវត្ត​ឆ្នាំ ២០១៥ រួមមាន ៣ ប្រការ​គឺ​៖

១. កិច្ចការ​អន្តរជាតិ (INTERNATIONAL BEST PRACTICES)

២. កិច្ចការ​នៅ​កម្ពុជា​ក្រោម (KAMPUCHEA-KROM BEST PRACTICES)

៣. កិច្ចការ​នៅ​កម្ពុជា និង តាម​តំបន់ (Cambodia and REGIONAL BEST PRACTICES)

​លោក ថាច់ ង៉ុ​ក ថាច់ ប្រធាន​ប្រតិបត្តិ បាន​ជម្រាប​ឡើងវិញ​អំពី​កិច្ចការ​បង្រួបបង្រួម​បញ្ញវ័ន្ត​ខ្មែរ​ទាំង​បញ្ញវ័ន្ត​កម្ពុជា​ក្រោម និង​បញ្ញវ័ន្ត​កម្ពុជា ព្រមទាំង​បញ្ញវ័ន្ត​អន្តរជាតិ​ដើម្បី​រៀបរៀង​សៀវភៅ​ស​ប្រមូលផ្ដុំ​ឯកសារ​ប្រវត្តិសាស្ត្រ​កម្ពុជា​ក្រោម ។​

​ចុងក្រោយបង្អស់​លោក ​ថា​ច់ វៀន អធិបតី សហព័ន្ធ​ខ្មែរ​កម្ពុជា​ក្រោម បានប្រកាស​បិទ​សន្និបាត​នៅវេលា​ម៉ោង ៥ និង ១៣ នាទី ។​

​មុននឹង​បញ្ចប់​អង្គសន្និបាត​បាន​អារាធនា​ព្រះសង្ឃ​ស្វាធ្យាយ ​ជយ​ន្តោ​ជា​ជយមង្គល ព្រមទាំង​ថតរូប​ជុំគ្នា​ទុកជា​អនុស្សាវរីយ៍ ។​

​សន្និបាត​សហព័ន្ធ​ខ្មែរ​កម្ពុជា​ក្រោម​ប្រចាំឆ្នាំ ២០១៤ ចប់​ដោយ​បរិបូណ៌ !

​ជយោ​សហព័ន្ធ​ខ្មែរ​កម្ពុជា​ក្រោម !

​ធ្វើ​នៅ​វត្ត​កម្ពុជា​ក្រោម ក្រុង​ឡង​បី​ច រដ្ឋ​កាលីហ្វ័រ​ញ៉ា សហរដ្ឋអាមេរិក​

ថ្ងៃអាទិត្យ ៨ រោច ខែ​មិគសិរ ឆ្នាំ មមី ឆស័ក ពុទ្ធសករាជ ២៥៥៨

​ត្រូវ ​នឹង​ថ្ងៃ ទី ១៤ ធ្នូ គ្រិស្ត​ក​រាជ ២០១៤

​អ្នកធ្វើ​កំណត់ហេតុ​

​ភិក្ខុ នាថ​សី​លោ ត្រឹង ថាច់ យុង​

ថតរូបអនុស្សាវរីយ៍ បន្ទាប់ពីបញ្ចប់កិច្ចប្រជុំដំណាច់ឆ្នាំ នៃសហព័ន្ធខ្មែរកម្ពុជាក្រោម នៅ វត្តកម្ពុជាក្រោម ទីក្រុង Long Beach រដ្ឋ California សហរដ្ឋអាមេរិក ថ្ងៃទី ១៤ ខែធ្នុ ឆ្នាំ ២០១៤ ។
ថតរូបអនុស្សាវរីយ៍ បន្ទាប់ពីបញ្ចប់កិច្ចប្រជុំដំណាច់ឆ្នាំ នៃសហព័ន្ធខ្មែរកម្ពុជាក្រោម នៅ វត្តកម្ពុជាក្រោម ទីក្រុង Long Beach រដ្ឋ California សហរដ្ឋអាមេរិក ថ្ងៃទី ១៤ ខែធ្នុ ឆ្នាំ ២០១៤ ។

Comments are closed.