ដោយ ថាច់ ប្រីជា គឿន l សារព័ត៌មាន ព្រៃនគរ
ប្រធានផែនការសហព័ន្ធខ្មែរកម្ពុជាក្រោម បានថ្លែងថា ការដែលរដ្ឋាភិបាលវៀតណាម នៅតែបំភ្លៃ និង មិនទទួលស្គាល់ការពិតប្រវត្តិសាស្ត្រដែនដីកម្ពុជាក្រោម ជាបញ្ហាធ្វើឲ្យមានគំនុំជាតិសាសន៍មិនចប់ឡើយ និងថា ផ្ទុយទៅវិញ បើរដ្ឋាភិបាលវៀតណាមទទួលស្គាល់ការពិត វាអាចជាឱកាសមួយធ្វើឲ្យខ្មែរក្រោមមាន ឱកាសឈានទៅចាប់យក “សិទ្ធិសម្រេចវាសនាខ្លួនដោយខ្លួនឯង” នៅលើទឹកដីកម្ពុជាក្រោម នាពេល អនាគត ។ ការថ្លែងបែបនេះ បន្ទាប់ពីសហព័ន្ធខ្មែរកម្ពុជាក្រោម បានចូលរួមធ្វើបាតុកម្មនៅមុខស្ថានទូត វៀតណាមនៅរដ្ឋធានី Washington សហរដ្ឋអាមេរិក ដើម្បីឲ្យវៀតណាមទទួលស្គាល់ការពិតប្រវត្តិសាស្ត្រ ដែនដីកម្ពុជាក្រោម ។
នៅរដ្ឋធានី Washington ថ្ងៃទី ២៥ ខែកក្កដា ឆ្នាំ ២០១៤ ។
ការបំភ្លៃប្រវត្តិសាស្ត្រនាំឲ្យមានគំនុំជាតិសាសន៍
ព្រះសង្ឃជាច្រើនអង្គ និងពលរដ្ឋខ្មែរអាមេរិកាំងរាប់រយនាក់ ក្នុងនោះ មានសមាជិកសហព័ន្ធខ្មែរកម្ពុជា ក្រោម ផងដែរ បាននាំគ្នាធ្វើបាតុកម្មតវ៉ា កាលពីថ្ងៃសុក្រ ទី ២៥ ខែកក្កដា នេះ ដើម្បីតវ៉ា និងទាមទារឲ្យស្ថានទូតវៀតណាម ប្រចាំនៅរដ្ឋធានីវ៉ាស៊ីនតោន ទទួលស្គាល់ប្រវត្តិសាស្ត្រនៃទឹកដីកម្ពុជាក្រោម និងទាមទារឲ្យអ្នកនាំពាក្យស្ថានទូតវៀតណាម នៅកម្ពុជាសុំទោសពលរដ្ឋខ្មែរក្រោមជាសាធារណៈ ចំពោះសម្ដីដែលមន្ត្រីយួនរូបនេះ បានថ្លែងថា ដែនដីកម្ពុជាក្រោមជារបស់វៀតណាមជាយូរយារណាស់មក ហើយ ។
ប្រជាពលរដ្ឋខ្មែរប្រមាណជា ៥០០ នាក់ ដែលបានធ្វើដំណើរមកពីរដ្ឋជាច្រើន ក្នុងនោះរួមមានរដ្ឋ Georgia, North Carolina, New Jersey, Ohio, Pennsylvania, Maryland, Virginia និង DC ជាដើមបាននាំគ្នាលើកបដារៀងខ្លួនៗ នៅមុខស្ថានទូតវៀតណាម ដែលសរសេរថា “ខ្មែរក្រោម ត្រូវការសេរីភាព” “វៀតណាមត្រូវសុំទោសខ្មែរ” និង “ទទួលស្គាល់ការពិតថា ទឹកដីកម្ពុជាក្រោមជារបស់ខ្មែរ” ជាដើម ។
នៅរដ្ឋធានី Washington ថ្ងៃទី ២៥ ខែកក្កដា ឆ្នាំ ២០១៤ ។
លោក ត្រឹង ម៉ាន់ រិន្ទ ប្រធានផែនការសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក បានថ្លែងប្រាប់វិទ្យុសំឡេងកម្ពុជាក្រោមថា បាតុកម្មនេះធ្វើឡើង “ដើម្បីទាមទារឲ្យរដ្ឋាភិបាលយួនសុំទោស” ដែលមន្ត្រីស្ថានទូតវៀតណាមនៅកម្ពុជានិយាយមិនពិតរឿងប្រវត្តិសាស្ត្រដែនដីកម្ពុជាក្រោម ។
យើងទៅធ្វើបាតុកម្មហ្នឹង គឺដើម្បីទាមទារឲ្យរដ្ឋាភិបាលយួនហ្នឹងសុំទោស ដែលវានិយាយមិនពិតរឿងប្រវត្តិសាស្ត្រ របស់ខ្មែរកម្ពុជាក្រោម ។
លោក ត្រឹង ម៉ាន់ រិន្ទ បានថ្លែងថា តំណាងស្ថានទូតវៀតណាម នៅរដ្ឋធានី Washington មិនបានទទួល ញត្តិរបស់ក្រុមអ្នកតវ៉ាទេ ហើយជម្រុញឲ្យអ្នកតវ៉ាផ្ញើញត្តិមកស្ថានទូតតាមរយៈប្រៃសណីយ៍វិញ ដែលទង្វើនេះ លោកអះអាងថា ជារងើកភ្លើងមួយធ្វើឲ្យពលរដ្ឋខ្មែរកាន់តែក្ដៅចិត្ត ហើយបន្តធ្វើបាតុកម្មនៅមុខ ស្ថានទូតវៀតណាមតទៅទៀត ។
ញត្តិហ្នឹងយើងឲ្យប៉ូលិស្តហ្នឹង ទៅគោះទ្វារវា ដើម្បីឲ្យញត្តិ ក៏ប៉ុន្តែគេប្រាប់ប៉ូលិស្តមកវិញថា គេមិនទទួលទេ ព្រោះអ៊ី វានៅជាន់លើ ។ ប៉ូលិស្តហ្នឹងចុះមកប្រាប់យើងថា វាមិនទទួលទេ វាថាបើយើងចង់ផ្ញើជូន ត្រូវផ្ញើតាមប្រៃសណីយ៍ ។
ចំពោះសម្ដីរបស់អ្នកនាំពាក្យស្ថានទូតវៀតណាមនៅកម្ពុជា លោក ត្រឹង វ៉ាំង ថុង ដែលបានថ្លែងថា ទឹកដីកម្ពុជាក្រោម ជារបស់វៀតណាមតាំងពីយូរយារណាស់មកហើយនោះ មិនមែនជាសម្ដីឯកជនរបស់ លោក ត្រឹង វ៉ាំង ថុង ទេ តែនេះជាសម្ដីដែលបានថ្លែងចេញទៅតាមគោលមាគ៌ាបក្សកុម្មុយនិស្តវៀត ណាម ដើម្បីកុំឲ្យកូនចៅជនជាតិយួនជំនាន់ក្រោយមានវិប្បដិសារីថា ដូនតាជនជាតិយួនបានប្លន់ទឹកដី របស់ប្រទេសជិតខាងធ្វើជារបស់ខ្លួន ។
តំណាងទូតវៀតណាមហ្នឹងមិនមែននឹកឃើញនិយាយខ្លួនឯងទេ ពីព្រោះនេះជាគោលការណ៍របស់បក្សកុម្មុយនិស្ត យួន គេបំផ្លើសប្រវត្តិសាស្ត្រ ដើម្បីកុំឲ្យកូនចៅគេមានវិប្បដិសារីថា គេប្លន់ទឹកដីជាតិសាសន៍ផ្សេងអ៊ីចឹង ដើម្បីកុំឲ្យកូនចៅគេពេលធំឡើងមានអារម្មណ៍ថា ខ្លួនហ្នឹងជាអ្នកមានទោស ។
លោក ត្រឹង ម៉ាន់រិន្ទ បានថ្លែងបន្តទៀតថា ប្រសិនបើរដ្ឋាភិបាលវៀតណាមនៅតែបំភ្លៃ និងមិនទទួលស្គាល់ ការពិតប្រវត្តិសាស្ត្រ នៃដែនដីកម្ពុជាក្រោមទេ ពលរដ្ឋខ្មែរក្រោមនៅកម្ពុជាក្រោមនឹងមិនស្ងប់រម្ងាប់ទេ ។ រីឯជនជាតិយួនវិញ មានការយល់ច្រឡំថា ខ្មែរក្រោមជាជនអន្តោប្រវេសន៍មកពីប្រទេសកម្ពុជា ដែលធ្វើ ឲ្យមានការគុំគួនរវាងជាតិសាសន៍មិនមានទីបញ្ចប់ឡើយ ។ សម្រាប់ពលរដ្ឋខ្មែរនៅកម្ពុជា ពួកគេនឹង មិនសុខចិត្ត ហើយកើតទៅជាកំហឹងផ្ទុះឡើងដែលអាចឈានទៅដល់ការងើបឡើងប្រឆាំងនឹងជនជាតិ យួនដែលកំពុងរស់នៅក្នុងប្រទេសកម្ពុជា សព្វថ្ងៃ ។
វាធ្វើឲ្យចិត្តប្រជាជនយើង ខ្មែរក្រោមអត់មានស្ងប់រម្ងាប់ទៅបានទេ ទីមួយ ។ ទីពីរ វាធ្វើឲ្យកូនចៅយួនធំទៅថ្ងៃក្រោយ ហ្នឹង មានការយល់ច្រឡំថា យើងជាខ្មែរហ្នឹងជាជនអន្តោប្រវេសន៍ នៅប្រទេសវៀតណាម នៅប្រទេសយួន ទៅវិញ មិនមែនជាជនជាតិដើម មិនមែនជាម្ចាស់ទឹកដីទៀតទេ វាក្លាយទៅជាជនអន្តោប្រវេសន៍ ។ ហើយកូនចៅខ្មែរវិញយល់ឃើញថា ជាដីទឹករបស់ខ្មែរ ហ្អែងនិយាយវាមិនត្រូវ ។ បើចឹង កំហឹងគុំកួនមានកាន់តែ ច្រើនឡើងៗ ទីមួយនៅកម្ពុជាក្រោម ។ នៅកម្ពុជាវិញ ប្រជាពលរដ្ឋខ្មែរ គេមិនសប្បាយចិត្ត មិនសុខចិត្ត ។ ហេតុដូច្នោះហើយ ក្នុងចំនួនប្រជាពលរដ្ឋខ្មែររាប់លាននាក់ មិនសប្បាយចិត្ត មិនសុខចិត្តហ្នឹង យើងអាចសន្និដ្ឋាន បានថា មានអ្នកណាម្នាក់វាចិត្តក្ដៅ អាចធ្វើរឿងណាដែលវាខុសច្បាប់ នាំឲ្យអន្តរាយទៅដល់ប្រជាពលរដ្ឋស្លូតត្រង់យួនដែលកំពុងរស់នៅប្រទេសកម្ពុជា សព្វថ្ងៃ ។
ផ្ទុយទៅវិញ ប្រសិនបើរដ្ឋាភិបាលវៀតណាមទទួលការពិតប្រវត្តិសាស្ត្រនៃដែនដីកម្ពុជាក្រោមទេ មានន័យ ថា រដ្ឋាភិបាលវៀតណាមបានទទួលស្គាល់ថា ខ្មែរក្រោមជាជនជាតិដើមនៃដែនដីកម្ពុជាក្រោម ដែលកត្តា នេះ វាស្មើនឹងការផ្ដល់សិទ្ធិឲ្យខ្មែរក្រោមបានទទួលនូវ “សិទ្ធិសម្រេចវាសនាខ្លួនដោយខ្លួនឯង” តាមសេចក្ដី ប្រកាសរបស់អង្គការសហប្រជាជាតិស្ដីពីសិទ្ធិជនជាតិដើម ដែលវៀតណាមជាប្រទេសហត្ថលេខី ។ នេះ បើតាមការបញ្ជាក់របស់ លោក ត្រឹង ម៉ាន់ រិន្ទ ។ លោក ម៉ាន់ រិន្ទ បន្តទៀតថា ការដែលវៀតណាមទទួល ស្គាល់ខ្មែរក្រោមថា ជនជាតិដើមនោះ វៀតណាមអាចធ្វើប្រជាមតិមួយសម្រាប់ខ្មែរក្រោមជ្រើសរើសនូវរបប នយោបាយណាមួយក្នុងចំណោមរបបទាំងបី គឺ ទីមួយ រស់នៅជាមួយយួនដូចសព្វថ្ងៃ ទីពីរខ្មែរក្រោម បង្កើតជារដ្ឋស្វយ័តមួយ និងទីបី បង្កើតទៅជារដ្ឋឯករាជ្យមួយនៅកម្ពុជាក្រោម ។
កាលណាគេទទួលស្គាល់ទឹកដីហ្នឹងថា ជាទឹកដីរបស់ខ្មែរពីមុន ហើយខ្មែរក្រោមជាម្ចាស់ដើមនៅទឹកដីហ្នឹង បាន ន័យថា គេទទួលស្គាល់ថា យើងជាជនជាតិដើម នៅក្នុងប្រទេសវៀតណាម ។ បើគេទទួលស្គាល់ថា យើងជនជាតិ ដើមនៅប្រទេសវៀតណាមទេ យួនហ្នឹងបានចុះហត្ថលេខា បានទទួលស្គាល់សេចក្ដីប្រកាសសិទ្ធិរបស់ជនជាតិ ដើម នៅថ្ងៃដប់បី ខែប្រាំបួន ឆ្នាំសូន្យប្រាំពីរ [ថ្ងៃទី ១៣ ខែកញ្ញា ឆ្នាំ ២០០៧] នៅអង្គការសហប្រជាជាតិ ។ ក្នុងសេចក្ដីប្រកាសនោះ មាត្រាទី ៣ គេឲ្យជនជាតិដើមហ្នឹង មានសិទ្ធិសម្រចវាសនាខ្លួនដោយខ្លួនឯង ។ បើយួន ទទួលស្គាល់ យើងត្រូវឲ្យយួនធ្វើប្រជាមតិ តើខ្មែរក្រោមចង់ជ្រើសរើសយកលទ្ធិមួយណា យករបបមួយណា ដើម្បី ឲ្យខ្មែរកម្ពុជាក្រោម ។ ពេលហ្នឹងយើងមានបីជម្រើស ទីមួយនៅជាមួយយួនដូចសព្វថ្ងៃ ទីពីរអាចក្លាយទៅ ជារដ្ឋស្វ័យត ទីបីបង្កើតទៅជារដ្ឋឯករាជ្យមួយ ។ ហ្នឹងហើយជាចំណុចមួយដែលធ្វើឲ្យយួនហ្នឹងមិនទទួលស្គាល់ [ខ្មែរក្រោមជាជនជាតិដើម] រហូតដល់សព្វថ្ងៃហ្នឹង ។ នៅក្នុងអង្គការសហប្រជាជាតិ គេបានចោទសួរយួន ជាពិសេស ប្រទេសចិនបានចោទសួរតែម្ដងថា ឥឡូវនេះ ខ្មែរក្រោមគេថា គេជាជនជាតិដើម តើអ្នកអ្នកឯងហៅគេ ជាអ្វី ?
មិនត្រឹមមិនបានសុំទោសពលរដ្ឋខ្មែរជាសាធារណៈទេ អ្នកនាំពាក្យស្ថានទូតវៀតណាមនៅកម្ពុជា លោក ត្រឹង វ៉ាំង ថុង បានថ្លែងបញ្ជាក់ជំហរសាជាថ្មីម្ដងទៀតថា ទឹកដីកម្ពុជាក្រោម ដែលលោកហៅថា “ណាមបូ” នោះ “ជាដែនដីមិនអាចកាត់ផ្ដាច់ចេញពីប្រទេសវៀតណាម ត្រូវបានអន្តរជាតិទទួលស្គាល់ និងសូម្បីព្រះរាជាណាចក្រកម្ពុជាក៏បានទទួលស្គាល់ដែរ ” ។ លោក ត្រឹង វ៉ាំង ថុង ថ្លែងយ៉ាងនេះ ប្រាប់ព័ត៌មាន BBC ភាសាយួនដែលបានចេញផ្សាយកាលពីថ្ងៃទី ០៩ ខែកក្កដា ឆ្នាំ ២០១៤ បន្ទាប់ពី មានការធ្វើបាតុកម្មនៅមុខស្ថានទូតវៀតណាម កាលពីថ្ងៃទី ០៨ ខែកក្កដា កន្លងទៅនេះ ។
ឆ្លើយតបនឹងអ្នកធ្វើបាតុកម្មនៅមុខស្ថានទូតវៀតណាម លោក ត្រឹង វ៉ាំង ថុង បានថ្លែងថា អ្នកដែលធ្វើ បាតុកម្មនោះ លោកមិនដឹងថា “ពួកគេមានគំនិត ឬ គោលបំណងយ៉ាងណាទេ” តែការទាមទារនោះ ត្រូវបានលោកត្រឹង វ៉ាំង ថុង ចាត់ទុកថា “ជាទង្វើមិនសមហេតុផលឡើយ” ។
លោក ត្រឹង វ៉ាំង ថុង បានថ្លែងថា៖
“ចំពោះអ្នកធ្វើបាតុកម្ម ខ្ញុំមិនដឹងថា ពួកគេមានគំនិត និងគោលបំណងយ៉ាងណានោះទេ ឥឡូវនេះ ពួកគេទាមទារយ៉ាងនេះ វាជារឿងមួយមិនសមហេតុផលទាល់តែសោះ ការទាមទាររបស់ពួកគេ មិនបាន ផ្អែក ទៅលើមូលដ្ឋាន ច្បាប់ឡើយ”
បញ្ជាក់អំពីប្រវត្តិសាស្ត្រដែនដីកម្ពុជាក្រោម លោក ត្រឹង វ៉ាំង ថុង បានថ្លែងថា៖
“បារាំងបានចូលធ្វើអាណានិគមវៀតណាម និងឥណ្ឌូចិន នៅឆ្នាំ ១៨៥៨ ។ ឆ្នាំ ១៨៦៣ បារាំងបាន ចូលកម្ពុជា និង ពេលដែលបារាំងចូលឥណ្ឌូចិន វៀតណាម និងកម្ពុជា បារាំងមិនបានកាត់ដីវៀតណាម ឲ្យកម្ពុជា ហើយបារាំងក៏មិនបានកាត់ដីកម្ពុជាឲ្យវៀតណាម ដែរ ។ រហូតដល់ពេលប្រជាជនវៀតណាម ប្រជាជនកម្ពុជា ប្រជាជនលាវ តស៊ូដើម្បីទាមទារឯករាជ្យ បង្ខំឲ្យបារាំងដកអាណានិគមចេញពីឥណ្ឌូចិន ពីវៀតណាម លាវ និងកម្ពុជា ។ ពេលដកអាណានិគមចេញទៅ បារាំងក៏មិនបានកាត់ដីកម្ពុជាឲ្យវៀត ណាម ហើយក៏មិនបានកាត់ដីវៀតណាមឲ្យកម្ពុជា ដែរ ” ។
កាលពីដើមខែមិថុនា ឆ្នាំ ២០១៤ កន្លងមកនេះ អ្នកនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាំង ថុង បានប្រាប់វិទ្យុអាស៊ីសេរីតាមទូរស័ព្ទថា ទឹកដីកម្ពុជាក្រោមជារបស់វៀតណាមជាយូរយារ ណាស់មកហើយ ។ ចាប់ពីពេលនោះមក សមាគមយុវជន និងសមាគមខ្មែរកម្ពុជាក្រោម បានធ្វើបាតុកម្មតវ៉ាជាបន្តបន្ទាប់ ដើម្បីឲ្យស្ថានទូតវៀតណាម សុំទោសនិងទទួលស្គាល់ការពិត ប៉ុន្តែរហូតមកដល់ពេលនេះ នៅពុំមានទាន់មានការឆ្លើយតបណាមួយនោះឡើយ ។
ដោយព្រះតេជព្រះគុណ ថាច់ យួង និងបានបញ្ចុះខណ្ឌសីមា
កាលពីឆ្នាំ ១៩៩៨ ។
យោងតាមប្រវត្តិសាស្ត្រ ដែនដីកម្ពុជាក្រោម ជាទឹកដីមួយផ្នែករបស់ប្រទេសកម្ពុជា ឋិតនៅភាគត្បូង ប្រទេសវៀតណាម ត្រូវបានបារាំងកាត់ឲ្យវៀតណាមនៅថ្ងៃទី ០៤ ខែមិថុនា ឆ្នាំ ១៩៤៩ ។ មកដល់ឆ្នាំ ២០១៤ នេះ មានរយៈពេល ៦៥ ឆ្នាំ ហើយដែលពលរដ្ឋខ្មែរក្រោមរស់នៅក្រោមការត្រួតត្រារបស់អាណា និគមវៀតណាមន្តពីអាណានិគមបារាំង ។
យោងតាមបញ្ជីវត្តខ្មែរនៅកម្ពុជាក្រោម វត្តសម្បូររង្សី ហៅ វត្តសម្បួរ ឋិតនៅក្នុងខេត្តព្រះត្រពាំង បានស្ថាបនាឡើងក្នុង គ. ស. ៣៧៣ ព. ស. ៩១៧ បើគិតមកទល់នឹងឆ្នាំ ២០១៤ វត្តនេះ មានអាយុកាល ១៦៤១ ឆ្នាំហើយ ។ បើយោងតាមឆ្នាំកសាងវត្តសម្បួររង្សីនេះ និងតាមឯកសារប្រវត្តិសាស្ត្រយួនថា ស្ដេចត្រកូល ង្វៀង បានចូលមកសុំទឹកដីព្រៃនគរពីស្ដេចខ្មែរដើម្បីធ្វើសង្គ្រាមជាមួយស្ដេចយួនត្រកូកទ្រិន នៅចុងសតវត្សរ៍ទី ១៧ នាឆ្នាំ ១៦៩៨ ឃើញថា ជនជាតិយួនបានចូលមកវាតទីដែនដីកម្ពុជាក្រោម ក្រោយខ្មែរក្រោមកសាងវត្តសម្បួររង្សី ១៣១៦ ឆ្នាំ ៕
Comments are closed.