ដោយ ថាច់ ប្រីជា គឿន l សារព័ត៌មាន ព្រៃនគរ
ពុទ្ធបរិស័ទនៅក្នុងភូមិអូរតាពៅ ឃុំកំពង់ទូក ស្រុកកំពង់ធំ ខេត្តព្រះត្រពាំង ទើបតែបានធ្វើបុណ្យបញ្ចុះខណ្ឌសីមា វត្តសុវណ្ណនទីសិរីឧត្ដម (អូរតាពៅ) នៅថ្ងៃទី ៩ និងទី ១០ ខែកក្កដា ឆ្នាំ ២០១៤ ត្រូវនឹងថ្ងៃពុធ ១៣ កើត និងថ្ងៃ ព្រហស្បតិ៍ ១៤ កើត ខែអាសាឍ ឆ្នាំ មមី ឆស័ក ពុទ្ធសាសរាជ ២៥៥៨ ។ វត្តនេះ បានក្លាយជាវត្តផ្លូវការចាប់ពីថ្ងៃ បុណ្យបញ្ចុះខណ្ឌសីមា នេះតទៅ ក្រោយពីទីតាំងកសាងវត្តនេះ ធ្លាប់ជាសាលាឆទានធ្វើបុណ្យសុន្ទរទានរបស់ពុទ្ធ បរិស័ទខ្មែរក្រោមនៅក្នុងតំបន់មួយនេះ អស់ជាច្រើនឆ្នាំកន្លងមក ។
តាមការប្រកាសរបស់មន្ត្រីសង្ឃខ្មែរក្រោមនៅខេត្តព្រះត្រពាំង បានឲ្យដឹងថា នេះជាវត្តទី ១៤២ របស់ខេត្តព្រះត្រពាំង ដែលពីមុនមកខេត្តនេះ មានតែ ១៤១ វត្តប៉ុណ្ណោះ ។ វត្តដែលមានអាយុកាលចាស់ជាងគេនៅក្នុងខេត្តព្រះត្រពាំង និងនៅដែនដីកម្ពុជាក្រោម គឺវត្តសម្បូររង្សី (សម្បូរ) ស្ថិតនៅភូមិតាខៅ (Trà Kháo) ឃុំក្រសាំង (Hòa Ân) ស្រុកកំពង់ស្ពាន (Câu Kè) ខេត្តព្រះត្រពាំង បានស្ថាបនាឡើងក្នុង ព. ស. ៩១៦ គ. ស. ៣៧៣ បើគិតមកទល់នឹងឆ្នាំ ២០១៤ វត្តនេះ មានអាយុកាល ១៦៤១ ឆ្នាំហើយ ។
យោងតាមការថ្លែងរបស់ព្រះតេជព្រះគុណ ថាច់ សុខសាន្ត ព្រះចៅអធិការវត្តអង្គររាជបូរី (អង្គ) ឋិតនៅក្នុងទីរួមខេត្ត ព្រះត្រពាំង និងជាប្រធានសមាគមព្រះពុទ្ធសាសនាវៀតណាម នៃរដ្ឋាភិបាលបក្សកុម្មុយនិស្តវៀតណាម បានថ្លែង កាលពីថ្ងៃទី ១៣ ខែកុម្ភៈ ឆ្នាំ ២០១៤ ថា វត្តនៅកម្ពុជាក្រោមសព្វថ្ងៃមាន ៤៤៥ វត្ត ព្រះសង្ឃ មាន ៨.៧៥០ អង្គ ក្នុងនោះ ខេត្តព្រះត្រពាំង មាន ៣.៦១៦ អង្គ ។
សូមបញ្ជាក់ថា វត្តសុវណ្ណនទីសិរីឧត្ដម (អូរតាពៅ) នៅមិនទាន់បានកសាងរោងព្រះវិហារនៅឡើយ តែព្រះសង្ឃ និងគណកម្មការវត្តបានបញ្ចុះខណ្ឌសីមានៅសាលាឆទានសន្មតិជាព្រះវិហារ ៕
Comments are closed.