សហព័ន្ធ​ខ្មែរ​កម្ពុជាក្រោម​ ថ្កោលទោស​មន្ត្រី​សង្ឃ​ខេត្ត​ឃ្លាំង ដែល​មិន​ឲ្យ​សកម្មជន​សង្ឃ​មួយ​អង្គ គង់​ក្នុង​វត្ត​ទាំង ៩២​ នៅ​ខេត្ត​ឃ្លាំង

0 47

ដោយ ជាតិ ចំណាន | RFA Khmer

ប្រធាន​អន្តរ​សាសនា​ នៃ ​សហព័ន្ធ​ខ្មែរ​កម្ពុជាក្រោម ថ្កោលទោស​មន្ត្រី​សង្ឃ​ខេត្ត​ឃ្លាំង ដែល​វៀតណាម ហៅថា សុកត្រាំង (Soc Trang) ហាម​មិន​ឲ្យ​ព្រះសង្ឃ​មួយ​អង្គ​ ដែល​ឈឺឆ្អាល​រឿង​សិទ្ធិមនុស្ស និង​រឿង​ទឹក​ដី​​កម្ពុជាក្រោម គឺ​សាមណេរ យឿង ខាយ គង់​ក្នុង​វត្ត​ទាំង ៩២ និង​សាលាឆទាន​ទាំង ៣៨ នៅ​ខេត្តឃ្លាំង​ ។ សាមណេរ យឿង ខាយ ចាត់​ទុក​រឿង​នេះ​ ថា ជា​រឿង​រើសអើង និង​អយុត្តិធម៌ ព្រោះ​ព្រះអង្គ មិន​បាន​ប្រព្រឹត្ត​ខុស​អ្វី​ឡើយ ។

(ស្តាំ) សាមណេរ យឿង ខាយ សកម្មជនសិទ្ធិមនុស្សខ្មែរកម្ពុជាក្រោម ​ដែលទើប​ចូល​សាង​ភ្នួស​ជាព្រះសង្ឃ​កាល​ពី​ពេល​ថ្មីៗ នេះ ។ រូបៈ ផ្តល់ឲ្យ
(ស្តាំ) សាមណេរ យឿង ខាយ សកម្មជនសិទ្ធិមនុស្សខ្មែរកម្ពុជាក្រោម ​ដែលទើប​ចូល​សាង​ភ្នួស​ជាព្រះសង្ឃ​កាល​ពី​ពេល​ថ្មីៗ នេះ ។ រូបៈ ផ្តល់ឲ្យ

ប្រធាន​ការិយាល័យ​អន្តរ​សាសនា ​នៃ ​សហព័ន្ធ​ខ្មែរ​កម្ពុជាក្រោម ភិក្ខុ ធីធី ធម្មោ ចាត់​ទុក​ទង្វើ​របស់​មន្ត្រី​សង្ឃ​ខេត្ត​ឃ្លាំងមួយ​អង្គ គឺ ភិក្ខុ តាំង នោ ដែល​ប្រកាស​រារាំង​មិន​ឲ្យ​សកម្មជន​សិទ្ធិមនុស្ស ​ដែល​ទើប​បួស​​ជា​សាមណេរ​ថ្មីថ្មោង គឺ​ព្រះតេជព្រះគុណ យឿង ខាយ គង់​ក្នុង​វត្ត​នានា​ នៅ​ខេត្ត​ឃ្លាំង​នោះ ថាជា​ទង្វើ​មិន​ត្រឹមត្រូវ និង​ធ្វើ​តាម​បញ្ជា​របស់​រដ្ឋាភិបាល​វៀតណាម ដើម្បី​លាភសក្ការៈ ។ ព្រះភិក្ខុ​ធីធី ធម្មោ មាន​ថេរដីកា ក្នុង​លិខិត​កាលពីថ្ងៃទី ១៧ ខែមករា ថា ក្នុងនាម​ព្រះអង្គ​ ដែល​តំណាង​ឲ្យ​សហព័ន្ធ​ខ្មែរ​កម្ពុជាក្រោម​ ទូទាំង​ពិភពលោក ស្នើសុំ​ឲ្យ​មន្ត្រី​សង្ឃ​អង្គ​នោះ បើក​ចិត្ត​ទូលាយ​ទទួល​ស្គាល់​សាមណេរ យឿង ខាយ ហើយ​គួរតែ​រីករាយ​ពេល​ ដែល​មាន​សកម្មជន​ខ្មែរ​ក្រោម ហ៊ាន​តស៊ូ​មតិ​ជាមួយ​វៀតណាម ដើម្បី​ផល​ប្រយោជន៍​ខ្មែរ​ក្រោម និង​គួរតែ​ជ្រះថ្លា​ ចំពោះ​កុលបុត្រ​ខ្មែរ​ក្រោម ដែល​មក​ជ្រក​ក្រោមម្លប់​ព្រះពុទ្ធសាសនា​សិក្សា​ធម៌​វិន័យ​អប់រំ​ខ្លួន ។

ព្រះសង្ឃ​ខ្មែរ​ក្រោម​ ដែល​ក្លាហាន​តតាំង​ជាមួយ​អាជ្ញាធរ​វៀតណាម ដើម្បី​សិទ្ធិ​សេរីភាព​ខ្មែរ​ក្រោម គឺ ព្រះតេជព្រះគុណ យឿង ខាយ យល់ថា មន្ត្រី​សង្ឃ​ខេត្ត​ឃ្លាំង ចេញ​លិខិត​មិន​ឲ្យ​វត្ត​ទាំង ៩២ និង​សាលាឆទានទាំង ៣៨ ក្នុង​ខេត្ត​ឃ្លាំង ស្វាគមន៍​ព្រះអង្គ ជា​ទង្វើ​អយុត្តិធម៌ និង​មិន​អាច​ទទួល​យក​បាន​ទេ ។

ភិក្ខុ ធីធី ធម្មោ៖ «គឺ​សារាចរ​បែបនេះ អាត្មា​ឃើញ​ចំពោះ​អាត្មា ​គឺ​វា​អយុត្តិធម៌​ពេក​ហើយ​បង! ហើយ​ទី ២ ទៀត ឃើញ​គោល​បំណង​មន្ត្រី​សង្ឃ​ធ្វើ​ហ្នឹង​គឺ​ធ្វើ​តាម​តែ​បញ្ជា​គេ​អ៊ីចឹង គឺ​ឃើញ​ថា​មន្ត្រី​សង្ឃ​គ្មាន​ការ​ពិចារណា ទី ៣ ទៀត ឃើញ​មន្ត្រី​សង្ឃ​ខេត្ត​ឃ្លាំង ហ្នឹង ​បាន​ចាប់​ព្រះសង្ឃ​នៅ​ក្រោម​ឱវាទ អ្នក​ស្នេហា​ជាតិ​ខ្មែរ​ក្រោម​ហ្នឹង គឺ​ឲ្យ​សឹក​ច្រើន​ណាស់»

ព្រះតេជព្រះគុណ យឿង ខាយ ជា​អតីត​សកម្មជន​សិទ្ធិមនុស្ស​ដ៏​សកម្ម​មួយ​រូប ដែល​ទើប​សម្រេច​ចិត្ត​បួស​ជា​ព្រះសង្ឃ កាល​ពី​ពេល​ថ្មីៗ​ នេះ នៅ​វត្ត​មង្គលបូរី​ទ្រនំ​សេក ស្រុក​ប្រាសាទ​ថ្មី ខេត្ត​លង់ហោរ ដែល​វៀតណាម ហៅថា ខេត្ត​វិញឡុង (Vinh Long) ។

កន្លងមក មន្ត្រី​សង្ឃ​ខេត្ត​ឃ្លាំង បាន​សហការ​ជាមួយ​អាជ្ញាធរ​វៀតណាម ចាប់​ផ្សឹក​ព្រះសង្ឃ​ខ្មែរ​ក្រោម ​ប្រាំ​ព្រះ​អង្គ​ទាំង​បង្ខំ ដោយ​ចោទ​ថា ព្រះសង្ឃ​ទាំង​ប្រាំ​អង្គ​នេះ ជា​អ្នក​ដឹកនាំ​បាតុកម្ម​ នៅ​មុខ​សាលា​បាលី​ជាន់​ខ្ពស់​ខេត្ត​ឃ្លាំង កាលពីថ្ងៃទី ៨ ខែកុម្ភៈ ឆ្នាំ ២០០៧ ធ្វើ​ឲ្យ​មាន​ការ​ចលាចល​ក្នុង​សង្គម និង​មាន​គំនិត​ប្រឆាំង​នឹង​ការ​គ្រប់គ្រង​កម្ពុជាក្រោម ​របស់​វៀតណាម ។

ជុំវិញ​រឿង​នេះ​ដែរ ព្រះចៅ​អធិការ​វត្ត​មង្គលបូរី​ទ្រនំ​សេក ព្រះភិក្ខុ ផេន ចន្ទ​តារា មាន​ថេរដីកា​ថា ព្រះសង្ឃ​ដែល​បួស​តាម​ធម៌​វិន័យ​ត្រឹមត្រូវ គឺ​អាច​គង់​នៅ​គ្រប់​វត្ត​អារាម​ នៅ​ដែនដី​កម្ពុជាក្រោម ដើម្បី​សិក្សា​អក្សរ​សាស្ត្រ​ជាតិ និង​ច្បាប់​ព្រះពុទ្ធសាសនា ។ ព្រះអង្គ​មាន​ថេរដីកា​បន្ថែម​ថា មន្ត្រី​សង្ឃ​ខេត្ត​ឃ្លាំង ដាក់​សម្ពាធ​លើ​សាមណេរ យឿង ខាយ មិន​ឲ្យ​គង់​តាម​វត្ត​នៅ​ខេត្ត​ឃ្លាំង ជា​រឿង​មួយ​មិន​សមរម្យ និង​ខុស​វិន័យ​របស់​ព្រះពុទ្ធ​ទៀត​ផង ។

ព្រះភិក្ខុ ផេន ចន្ទ​តារា៖ «សំខាន់​គឺ​យើង​ការ​បួស​វា​ត្រឹមត្រូវ​ទៅ​តាម​ព្រះពុទ្ធសាសនា គឺ​មាតាបិតា​អនុញ្ញាត​ការ​បួស​សមស្រប​ទៅ​តាម​ធម៌​វិន័យ មាន​ព្រះ​ឧបជ្ឈាយ៍​មាន​ព្រះសង្ឃ​ត្រឹមត្រូវ​ណា ។ ឯ​ចំណែក​ ដែល​លោក​ធ្វើ​ហ្នឹង យើង​ឃើញ​ថា​វា​មិន​ត្រឹមត្រូវ វា​មិន​ល្អ យើង​បួស​យក​ព្រះពុទ្ធសាសនា​ជា​គោលដៅ​ជា​ចម្បង​ណា៎ កិច្ច​ការងារ​អ្វី​វា​ទាក់ទង​ដល់​ព្រះពុទ្ធសាសនា គឺ​យើង​ធ្វើ​តាម​ព្រះពុទ្ធសាសនា ដល់​គាត់​ធ្វើ​អ៊ីចឹង​មាន​ន័យ​ថា​វា​មិន​ត្រឹមត្រូវ​ប៉ុណ្ណឹង» ។​

ច្បាប់​ព្រះពុទ្ធសាសនា ចែង​ថា ព្រះភិក្ខុ​រូប​ណា​ ដែល​ធ្វើ​មិន​ឲ្យ​ភិក្ខុ ឬ​សាមណេរ​ដទៃ ដែល​មាន​សីល​បរិសុទ្ធ ជា​អ្នក​ប្រព្រឹត្ត​តាម​ធម៌ តាម​វិន័យ បាន​ស្នាក់​នៅ​ក្នុង​ទី​អាវាស គឺ​វត្តអារាម ភិក្ខុ​រូប​នោះ​ ជា​អ្នក​ប្រព្រឹត្ត​អាក្រក់​ក្នុង​សាសនា​របស់​ព្រះពុទ្ធ ។ ជាមួយ​គ្នា​នេះ សហព័ន្ធ​ខ្មែរ​កម្ពុជាក្រោម ចាត់​ទុក​ថា ទង្វើ​របស់​មន្ត្រី​សង្ឃ​បែប​នេះ ជា​ការ​រើសអើង និង​ជា​ការ​រំលោភ​សិទ្ធិ​របស់​ព្រះសង្ឃ​ខ្មែរ​ក្រោម និង​ទាមទារ​ឲ្យ​បញ្ឈប់​ទង្វើ​នេះ​ជា​បន្ទាន់ ៕

Leave A Reply

Your email address will not be published.