ដោយ ថាច់ ប្រីជា គឿន | សារព័ត៌មាន ព្រៃនគរ
គណៈកម្មការសាខាសហព័ន្ធ និងសហសមាគមខ្មែរ -ខ្មែរក្រោម នៃរដ្ឋអូហៃអូ នឹងប្រារព្ធពិធីរំឭកទិវា ០៤ មិថុនា នៅថ្ងៃទី ១៨ ខែឧសភា ខាងមុខ នេះ ដើម្បីរំឭកដល់ខួប ៦៤ ឆ្នាំ ថ្ងៃបារាំងផ្ទេរអំណាចឲ្យវៀត ណាមគ្របគ្រងដែនដីកម្ពុជាក្រោម កាលពីថ្ងៃទី ០៤ ខែមិថុនា ឆ្នាំ ១៩៤៩ ។
លោក ថាច់ សេ ប្រធានសភាតំណាងនៃសហព័ន្ធខ្មែរកម្ពុជាក្រោម បានប្រាប់ វិទ្យុសំឡេងកម្ពុជាក្រោម នៅថ្ងៃទី ១២ ខែឧសភា នេះថា កម្មវិធីនេះ នឹងប្រព្រឹត្តទៅនៅភោជនិយដ្ឋានផ្កាឈូករត្ន ចាប់ពីម៉ោង ០៥ កន្លះ ដល់ ម៉ោង ១២ អធ្រាត ដោយមានការថ្លែងសុន្ទកថាចាប់អារម្មណ៍ដល់ទិវា ០៤ មិថុនា និងពិធីប្រគុំ តន្ត្រីកម្សាន្ត ពេលបញ្ចប់កម្មវិធី ។
(សំឡេង លោក ថាច់ សេ)
លោក ថាច់ សេ បានបញ្ជាក់ថា ពលរដ្ឋខ្មែរក្រោម ប្រារព្ធកម្មវិធីនេះ រៀងរាល់ឆ្នាំ គឺដើម្បីដាស់ស្មារតីឲ្យកូន ខ្មែរគ្រប់រូបចងចាំនូវប្រវត្តិរបស់ខ្លួនថា កម្ពុជាក្រោមជាដែនដីខ្មែរមួយភាគធំ ត្រូវបានបារាំងផ្ទេរអំណាចទៅ ឲ្យរដ្ឋការវៀតណាមកាន់កាប់រហូតមកដល់សព្វថ្ងៃ ។
(សំឡេង លោក ថាច់ សេ)
យោងឯកសារនៅក្នុងសៀវភៅ “ផ្លូវទៅយកសិទ្ធិសម្រេចវាសនាខ្លួនដោយខ្លួនឯង” ដែលបានបោះពុម្ព ផ្សាយដោយសហព័ន្ធខ្មែរកម្ពុជាក្រោម កាលពីឆ្នាំ ២០០៩ បានបញ្ជាក់ ដែនដីកម្ពុជាក្រោម ឬ កូស័ងស៊ីន មានផ្ទៃដី ៦៧.០០០ គីឡូម៉ែត្រការ៉េ ត្រូវបានបារាំងផ្ទេរអំណាចឲ្យវៀតណាមកាន់កាប់កាលពីថ្ងៃទី ០៤ ខែមិថុនា ឆ្នាំ ១៩៤៩ ។
យោងតាម ច្បាប់លេខ ៤៩ / ៧៣៣ ចុះថ្ងៃទី ០៤ ខែមិថុនា ឆ្នាំ ១៩៤៩ ដែលចុះហត្ថលេខាដោយប្រធា នាធិបតីបារាំង វ៉ង់សាំង អាយិយ៉ូ (Vincent Auriol) ក្នុងការប្រគល់កម្ពុជាក្រោមឲ្យក្លាយទៅជារដ្ឋចំណុះ វៀតណាម មានខ្លឹមសារដើមថា៖
“ច្បាប់លេខ ៤៩ ៧៣៣ ចុះថ្ងៃទី០៤ ខែមិថុនា ឆ្នាំ១៩៤៩
យោងតាមមតិពីសភានៃសហភាពបារាំង
• រដ្ឋសភា និងក្រុមប្រឹក្សានៃសាធារណរដ្ឋបារាំង បានសម្រេច
• រដ្ឋសភានៃសាធារណរដ្ឋបារាំងបានអនុម័ត
• ប្រធានាធិបតី នៃសាធារណរដ្ឋបារាំង ប្រកាសច្បាប់ដូចតទៅនេះ៖
មាត្រា ១ ក្នុងក្របខណ្ឌមាត្រា ៦០ នៃរដ្ឋធម្មនុញ្ញសាធារណរដ្ឋបារាំង និងតាមមតិរបស់ សភាកូស័ងស៊ីន នាសម័យប្រជុំកាលពីថ្ងៃទី ២៣ ខែមេសា ឆ្នាំ១៩៤៩ លក្ខន្តិកៈ ទឹកដីកូសាំងស៊ីន បានត្រូវកែប្រែតាម មាត្រា ដូចមានចែងខាងក្រោម។
មាត្រា ២ ទឹកដីកូសាំងស៊ីនត្រូវបានភ្ជាប់ទៅជារដ្ឋចំណុះវៀតណាម យោងតាមសេចក្តីប្រកាសរួមកាល ពី ថ្ងៃទី ០៥ ខែមិថុនា ឆ្នាំ ១៩៤៨ និងសេចក្តីប្រកាសរបស់រដ្ឋាភិបាល បារាំងកាលពីថ្ងៃទី ១៩ ខែសីហា ឆ្នាំ១៩៤៨ ។ ទឹកដីកូសាំងស៊ីនឈប់ស្ថិតនៅក្នុងលក្ខន្តិកៈ ជាទឹកដីឯនាយសមុទ្ររបស់ បារាំងទៀត ហើយ ។
មាត្រា ៣ ក្នុងករណីដែលលក្ខន្តិកៈប្រទេសវៀតណាមត្រូវកែប្រែ លក្ខន្តិកៈកូសាំងស៊ីននឹងត្រូវបានទុកជា កម្មវត្ថុនៃការ សម្រេចរបស់សភាខាងលើ ដូចមានចែងក្នុងមាត្រា ៧៥ នៃរដ្ឋធម្មនុញ្ញ (ជំពូក VIII: សភា បារាំង)
ច្បាប់នេះនឹងត្រូវបានអនុវត្តដូចជាច្បាប់រដ្ឋ ។
នៅទូឡុង ថ្ងៃទី ០៤ ខែមិថុនាឆ្នាំ ១៩៤៩
ហត្ថលេខា ប្រធានាធិបតី វ៉ង់សាំង អារិយ៉ូ (Vincent Auriol)
ហត្ថលេខា នាយករដ្ឋមន្ត្រី ហន់រី កើយ (Henri Queuille)
ហត្ថលេខា រដ្ឋមន្ត្រីទឹកដីបារាំងឯនាយសមុទ្រ ប៉ិល ក៏តេ ប្ល៉រេត (Paul Coste-Floret)
ក្រោយពីបារាំងបានចេញច្បាប់នេះ មកពលរដ្ឋខ្មែរក្រោមរាប់លានដែលជាម្ចាស់ស្រុកនៃដែនដី កម្ពុជាក្រោម ត្រូវបានឋិតនៅក្រោមអាណានិគមវៀតណាមរហូតមកដល់សព្វថ្ងៃ ៕
