ដោយ ស៊ឺន ចែងចើន| VOKK
លេខាធិការដ្ឋាន ដែលជាបណ្តុំនៃអង្គការសមាគមខ្មែរកម្ពុជាក្រោម ប្រចាំប្រទេសកម្ពុជា នៅថ្ងៃទី ៩ ខែសីហានេះ បានប្រារព្វទិវាអន្តរជាតិនៃជនជាតិដើមពិភពលោក ។ សម្រាប់ឆ្នាំ ២០១៧ ទិវាជនជាតិដើមអន្តរជាតិពិភពលោក គឺជាខួបលើកទី ២៣ ប្រារព្ធនៅទូទាំងពិភពលោក និងជាលើកទី ១៣ សម្រាប់ប្រទេសកម្ពុជា ។
ពិធីនេះធ្វើឡើង នៅឯទីស្នាក់ការកណ្តាលរបស់សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ ស្ថិតនៅភូមិគោកឃ្លាំង សង្កាត់ភ្នំពេញថ្មី ខណ្ឌសែនសុខ នៅវេលាម៉ោង ៨ ព្រឹក ដោយមានការនិមន្ត និងអញ្ជើញចូលរួម ពីសំណាក់ព្រះសង្ឃ និងពលរដ្ឋខ្មែរក្រោមជាង ១០០ អង្គ/នាក់ ។
ការប្រារព្វទិវាអន្តរជាតិនៃជនជាតិដើមពិភពលោកលើកទី ២៣ ក្រោមប្រធានបទ «ខ្មែរក្រោម ត្រូវតែបានទទួលស្គាល់ថា ជាជនជាតិដើម»។ ដោយខ្មែរក្រោមយល់ឃើញថា នៅថ្ងៃទី ១៣ ខែកញ្ញា ឆ្នាំ ២០១៧ គឺមានរយៈពេល ១០ ឆ្នាំហើយ ដែលវៀតណាមជាប្រទេសហត្ថលេខីមួយ ក្នុងបណ្ដាប្រទេសទាំង ១៤៣ បានគ្រាំទ្រលើសេចក្តីអនុម័តនេះ នៅមិនទាន់បានគោរព និងលើកស្ទួយសិទ្ធិជនជាតិដើមខ្មែរក្រោមម្ចាស់ស្រុក នៅដែនដីកម្ពុជាក្រោម ដែលកំពុងរស់ក្រោមអាណានិគមរបស់ខ្លួន ឲ្យពេញលេញនៅឡើយទេ ។
នៅក្នុងទិវានេះដែរ គឺមានគោលបំណងដើម្បីផ្សព្វផ្សាយ ពីសិទ្ធិជនជាតិដើម ដែលត្រូវបានអនុម័តច្បាប់ ដោយមហាសន្និបាត អង្គការសហប្រជាជាតិ ស្តីពីសិទិ្ធជនជាតិដើម កាលពីថ្ងៃទី ១៣ ខែកញ្ញា ឆ្នាំ ២០០៧ ដែលមានចំនួន ៤៦ មាត្រា ចូលជាធូរមាន ដោយតម្រូវឲ្យប្រទេសនានា លើពិពភលោក ត្រូវគោរពសិទ្ធិមូលដ្ឋានរបស់ជនជាតិដើម ជាម្ចាស់ទឹកដី ។
លោក សឺង ជុំជួន ប្រធានលេខាធិការដ្ឋាន និងជានាយកកម្មវិធី សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បានឡើងធ្វើបទបទបង្ហាញ អំពីការអភិរក្សវប្បធម៌ ប្រពៃណី ទំនៀមទម្លាប់ ព្រះពុទ្ធសាសនាខ្មែរ នៅដែនដីកម្ពុជាក្រោម និងបទបង្ហាញផ្សេងទៀត ពាក់ព័ន្ធ នឹងសិទ្ធិជនជាតិដើម ។
ប្រធានសាខាសហព័ន្ធខ្មែរកម្ពុជាក្រោម ប្រចាំនៅព្រះរាជាណាចក្រកម្ពុជា លោក តាំង សារៈ ក៏បានឡើងធ្វើបទបង្ហាញ អំពីប្រវត្តិខ្មែរក្រោម ដែលត្រូវបានចាត់ទុកថា ជាជនជាតដើម ។ បើតាមលោក តាំង សារៈ និយមន័យដែលហៅថា ជនជាតិដើមនោះ គឺជនជាតិទាំងឡាយណាដែលជាម្ចាស់ដើម ឬម្ចាស់ស្រុកនៃទឹកដីនោះ ជនជាតិនោះហើយ ដែលគេហៅថា ជនជាតិដើម ។
គួររំឭកថា ទិវាអន្តរជាតិនៃជនជាតិដើមពិភពលោក ត្រូវបានអនុម័តដោយកិច្ចប្រជុំពេញអង្គរបស់អង្គការសហប្រជាជាតិក្នុងឆ្នាំ ១៩៩៤ សំដៅលើកស្ទួយសិទ្ធិរបស់ជនជាតិដើម តាមរយៈការទទួលស្គាល់ជាសាធារណៈ និងជំរុញការយល់ដឹងទូទៅរបស់ប្រជាជនអំពីវប្បធម៌ និងបញ្ហារបស់ជនជាតិដើម នៅក្នុងពិភពលោក ។
ចំណែកសេចក្តីប្រកាសជាសាកល ស្តីពីសិទ្ធិជនជាតិដើមវិញ ក៏ត្រូវបានគេប្រារឰជារៀងរាល់ឆ្នាំ នៅពាសពេញជុំវិញពិភពលោក ដោយក្រុមជនជាតិដើមនានា រួមទាំងខ្មែរក្រោម នៅក្រៅប្រទេសផង ។ កាលបរិច្ឆេទ ១៣ ខែកញ្ញា ត្រូវបានជ្រើសរើសឡើង ដើម្បីរំឭកដល់ការអនុម័ត និងការប្រកាសនូវសេចក្តីប្រកាសជាសាកល ស្តីពីសិទ្ធិជនជាតិដើម កាលពីថ្ងៃទី ១៣ ខែកញ្ញា ឆ្នាំ ២០០៧ ។ សេចក្តីប្រកាស ជាសាកលនេះ បានទទួលស្គាល់នូវសិទ្ធិ និងសេរីភាពជាមូលដ្ឋានរបស់ជនជាតិ ដើមភាគតិចទាំងអស់ ទាំងស្ត្រី និងបុរស នៅគ្រប់ទីកន្លែងទាំងអស់ ក្នុងពិភពលោក ដោយមិនមានការរើសអើងអ្វីទាំងអស់ ជាពិសេស នៅក្នុងមាត្រានៃសេចក្តីប្រកាសនេះ បានចែងអំពី «សិទ្ធិស្វ័យសម្រេច វាសនាខ្លួន ដោយខ្លួនឯង» របស់ជនជាតិដើម ។
តួលេខអង្គការសហប្រជាជាតិបង្ហាញថា ជនជាតិដើមលើពិភពលោកមានប្រមាណ ៣៧០ លាននាក់ រស់នៅក្នុងប្រទេសជាសមាជិកអង្គការសហប្រជាជាតិ ។ ក្រុមជនជាតិដើមទាំងនោះ កំពុងតែប្រឈម នឹងការរំលោភបំពាន បំបិទសិទ្ធិសេរីភាពជាមូលដ្ឋាន ដោយជាតិសាសន៍ ឬដោយប្រទេសអាណានិគម ។ ជាពិសេសពួកគេទាំងនោះ កំពុងប្រឈម នឹងបញ្ហាសិទ្ធិកាន់កាប់ដីធ្លី វប្បធម៌ ភាសា និងប្រពៃណីផ្សេងៗ ជាដើម៕
រូបថតខ្លះៗ ក្នុងពិធីខួបឆ្នាំទី ២៣ នៃទិវាជនជាតិដើមពិភពលោក ។ រូបថតៈ ស៊ឺន ចែងចើន
Comments are closed.