នៅថ្ងៃពុធ ទី ០៥ ខែកុម្ភៈ ខាងសប្ដាហ៍នេះ សហព័ន្ធខ្មែរកម្ពុជាក្រោមនៅតាមប្រទេសនានា ក្នុងទ្វីបអ៊ឺរ៉ុបនឹងជួបជុំគ្នាធ្វើបាតុកម្ម នៅមុខការយាល័យអង្គការសហប្រជាជាតិ នាទីក្រុងហ្សឺណែវ ប្រទេសស្វិស ដើម្បីប្រតិកម្មនឹងរដ្ឋាភិបាលវៀតណាម ដែលបានរំលោភសិទ្ធិ លើពលរដ្ឋខ្មែរក្រោមនៅកម្ពុជាក្រោម ។ ការធ្វើបាតុកម្មនេះ ស្របពេលដែលតំណាងរដ្ឋាភិបាលវៀតណាមចូល បំភ្លឺការពាររបាយការណ៍សិទ្ធិមនុស្សរបស់ខ្លួន នៅចំពោះមុខក្រុមប្រឹក្សាសិទ្ធិមនុស្សនៃអង្គការ សហប្រជាជាតិ ដែលកាត់ជា ភាសាអង់គ្លេសថា UPR នាទីក្រុងហ្សឺណែវ ប្រទេសស្វិស នាថ្ងៃទី ០៥ ខែកុម្ភៈ នេះ ។
នៅថ្ងៃទី ០២ ខែកុម្ភៈ ម្សិលមិញនេះ អ្នកស្រី ថាច់ សុភាព ប្រធានសាខាសហព័ន្ធខ្មែរកម្ពុជាក្រោម នៅប្រទេសស្វិស បានបញ្ជាក់ប្រាប់ វិទ្យុសំឡេងកម្ពុជាក្រោម ថា ការធ្វើបាតុកម្មនេះ មានការចូលពីពលរដ្ឋខ្មែរ និងខ្មែរក្រោម មកពី ប្រទេសនា ក្នុងទ្វីបអ៊ឺរ៉ុប មានដូចជា អ៊ីតាលី, ស្វិស, បារាំង និងហូឡង់ ជាដើម ក្នុងនោះ មានការចូលពី លោក ថាច់ ង៉ុក ថាច់ ប្រធានសហព័ន្ធខ្មែរកម្ពុជាក្រោម មកពីប្រទេសកាណាដា និង លោក សឺន ជុំជួន ប្រធានបណ្ដាញ យុវជនខ្មែរកម្ពុជាក្រោម ដែលជាអង្គការក្រៅរដ្ឋាភិបាលខ្មែរក្រោមមួយនៅទីក្រុងភ្នំពេញ ប្រទេស កម្ពុជា ត្រូវបាន សហហព័ន្ធខ្មែរកម្ពុជាក្រោមនៅអ៊ឺរ៉ុប ធានាឲ្យចូលរួមក្នុងការធ្វើបាតុកម្មនេះ ផងដែរ ។
អ្នកស្រី ថាច់ សុភាព បានបញ្ជាក់ថា៖
“ឥឡូវហ្នឹង ដូចអ្នកមកពីខ្មែរ គេមកដល់ហើយ ។ ថ្ងៃបី [៣ កុម្ភៈ] ហ្នឹង បង ថាច់ គាត់ចុះកប៉ាលហោះ នៅហ្សឺណែវ (Geneva Airport) ។ រួចថ្ងៃទី ៥ អ្នកមកពីហូឡង់ អ្នកមកពីបែលហ្ស៊ីក អ្នកមកពីអល្លឺម៉ង អ្នកមកពីប៉ារិស … និយាយឲ្យចំ គឺខ្មែរនៅអ៊ឺរ៉ុបហ្នឹងមកទាំងអស់” ៕
