ខ្មែរក្រោមប្រារព្ធខួប ៩ ឆ្នាំនៃការសុគតរបស់ព្រះតេជព្រះគុណ អ៊ាង សុខធឿន
ដោយ ស៊ឺន ចែងចើន l សារព័ត៌មាន ព្រៃនគរ
អង្គការសមាគមខ្មែរកម្ពុជាក្រោម ព្រះសង្ឃ និងពលរដ្ឋខ្មែរក្រោម ជាង ៣០ អង្គ/រូប នៅព្រឹកថ្ងៃទី ២៧ កុម្ភៈ ២០១៦ នេះ បានប្រារព្វខួប ៩ ឆ្នាំ នៃការសុគតរបស់ព្រះសង្ឃខ្មែរក្រោមមួយអង្គ ព្រះនាម អ៊ាង សុខធឿន នៅវត្តទ្រនំជ្រឹង សង្កាត់បឹងធំ ខណ្ឌពោធិ៍សែនជ័យ រាជធានីភ្នំពេញ ។
លោក យន្ត ថារ៉ូ ប្រធានមជ្ឈមណ្ឌលវប្បធម៌ខ្មែរកម្ពុជាក្រោម និងជាតំណាងរាស្ត្រមកពីគណបក្សសង្គ្រោះជាតិ ដែលជាអ្នកផ្តួចផ្តើម រៀបចំធ្វើបុណ្យគម្រប់ខួបនេះ បានរំឭកឡើង អំពីការសុគតដ៏អាថ៍កំបាំងរបស់ព្រះតេជព្រះគុណ អ៊ាង សុខធឿន ។ លោកថា ករណីសុគតរបស់ព្រះតេជព្រះគុណ អ៊ាង សុខធឿននេះ មិនមែនជារឿងធ្វើអត្តឃាត ដោយខ្លួនព្រះអង្គឯងឡើយ តែវាជារឿងឃាតកម្ម ហើយលោកស្នើឲ្យអាជ្ញាធរ ធ្វើការស៊ើបអង្កេតករណីឃាតកម្មនេះឡើងវិញ និងសែ្វងរកមុខឃាតករយកមកកាត់ទោសតាមផ្លូវច្បាប់ ដើម្បីរកយុត្តិធម៌ជូនព្រះសពព្រះតេជព្រះគុណ អ៊ាង សុខធឿន ។
កាលពីថ្ងៃ ២៧ ខែកុម្ភៈ ឆ្នាំ ២០០៧ ព្រះសង្ឃខ្មែរក្រោមព្រះនាម អ៊ាង សុខធឿន បាននិមន្តចូលរួមបាតុកម្មជាមួយព្រះសង្ឃ និងពលរដ្ឋខ្មែរក្រោម នៅមុខស្ថានទូតវៀតណាម ដើម្បីទាមទារឲ្យរដ្ឋាភិបាលវៀតណាម គោរពសិទ្ធិពលរដ្ឋខ្មែរក្រោមម្ចាស់ស្រុក ដែលកំពុងរស់នៅលើទឹកដីកំណើតរបស់ខ្លួន ។
ក្រោយពីព្រះអង្គនិមន្តទៅកាន់វត្តទ្រនំជ្រឹង ឃុំបឹងធំ ស្រុកអង្គស្នួល ខេត្តកណ្ដាលវិញ នៅថ្ងៃបន្ទាប់មានព័ត៌មាន ដែលផ្តល់មកពីអាជ្ញាធរ និងសមត្ថកិច្ចស្រុកអង្គស្នួល ខេត្តកណ្ដាលថា ព្រះអង្គបានធ្វើអត្តឃាត ដោយអារក នៅយប់ថ្ងៃ ២៧ ខែកុម្ភៈ ឆ្នាំ២០០៧ នោះ ។ ព្រះសពរបស់ព្រះអង្គត្រូវអាជ្ញាធរ និងគណៈកម្មការវត្តយកទៅបញ្ចុះក្រោយរបងវត្តទ្រនំជ្រឹង ដោយហាមប៉ះពាល់សព និងមិនព្រមឲ្យធ្វើកោសល្យវិច័យឡើយ ៕
រូបថតៈ ស៊ឺន ចែងចើន
Comments are closed.