ពលរដ្ឋខ្មែរក្រោមរស់នៅកម្ពុជា អះអាងថាបុណ្យចូលឆ្នាំថ្មី នៅកម្ពុជាក្រោមសប្បាយជាង ព្រោះរក្សាបានប្រពៃណីខ្មែរ
ដោយ គឹម សាវតា
ចាប់ពីថ្ងៃសុក្រ ៩ រោច ដល់ថ្ងៃអាទិត្យ ១១ រោច ខែចេត្រ ព.ស.២៥៦៦ គឺជាថ្ងៃបុណ្យចូលឆ្នាំថ្មីប្រពៃណីខ្មែរ ពោលគឺជាថ្ងៃដែលពលរដ្ឋខ្មែរនៅគ្រប់ទីសទីប្រារព្វពិធីបែបប្រពៃណី និងមានកម្មវិធីសប្បាយៗ ជាច្រើនដើម្បីចូលរួមអបអរ ។ សម្រាប់ពលរដ្ឋខ្មែរក្រោម ដែលមករស់នៅកម្ពុជាក្រោម បានអះអាងថា កម្មវិធីអបអរឆ្នាំថ្មី នៅដែនដីកម្ពុជាក្រោម គឺមានភាពសប្បាយជាងនៅកម្ពុជា ព្រោះថា កម្មវិធីសប្បាយៗ និងបែបប្រពៃណីខ្មែរ គឺត្រូវបានរៀបចំនៅតាមវត្តអារាម ។
លោក គឹម តារា ប្រកបរបរកាត់សក់ ជាពលរដ្ឋខ្មែរក្រោមមួយរូបមកខេត្តព្រែកឫស្សី បានប្រាប់អ្នកសារព័ត៌ព្រៃនគរ និង សំឡេងកម្ពុជាក្រោម (VOKK) ថា លោកមករស់នៅរាជធានីភ្នំពេញប្រទេសកម្ពុជា ប្រមាណជាង ១០ ឆ្នាំមកហើយ ប៉ុន្តែលោកមិនអាចបំភ្លេចស្រុកកំណើតរបស់លោកបានឡើយ ជាពិសេសពេលមានបុណ្យទានសំខាន់ៗ ដូចជាបុណ្យចូលឆ្នាំប្រពៃណីខ្មែរ និងបុណ្យភ្ជុំបិណ្ឌជាដើម ។ លោកបន្តថា ទាំងមុន និងក្រោយការរាតត្បាតជំងឺកូវីដ-១៩ គឺលោកតែងតែទៅលេងស្រុកកំណើតដើម្បីអបអរសាទរបុណ្យចូលឆ្នាំថ្មី ព្រោះលោកនៅតែមានអារម្មណ៍ថា សប្បាយរីករាយជាងការប្រារព្វនៅកម្ពុជា បើទោះជាប្រពៃណីទំនៀមទម្លាប់ស្រដៀងគ្នាក្តី ។ អ្វីដែលលោកឃើញថា សប្បាយជាងនៅកម្ពុជានោះ មិនត្រឹមតែជាស្រុកកំណើតរបស់ខ្លួនប៉ុណ្ណោះទេ គឺការរៀបចំល្បែងប្រជាប្រិយតាមរបៀបខ្មែ រនៅមានច្រើន ហើយអ្នកចូលរួមក៏មានច្រើនជាងនៅកម្ពុជាផងដែរ ។
អ្នកស្រី សាន សុខន អ្នកប្រកបរបរលក់ទឹកអំពៅ នៅម្ដុំក្រោមពេទ្យមិត្តភាពកម្ពុជា-រូស្ស៊ី មានស្រុកកំណើត នៅស្រុកកញ្ជោង ខេត្តព្រះត្រពាំង ក៏បានអះអាងថា នៅដែនដីកម្ពុជាក្រោម ក៏មានរៀបចំកម្មវិធីកម្សាន្តសប្បាយផងដែរ ដូចជាបោះអង្គុញ វាយក្អម ទាញព្រ័ត្រ និងរាំវង់ តាមវត្តអារាម គឺមិនសូវមានការរៀបចំដាច់ដោយឡែក នៅតាមផ្ទះ ឬកន្លែងផ្សេងនោះទេ ដែលធ្វើឱ្យអ្នកមកចូលរួមច្រើន ពោលគឺមានអ្នកចូលរួមច្រើនតាំងពីព្រឹក ព្រោះត្រូវយកចង្ហាន់ទៅប្រគេនព្រះសង្ឃ និងរសៀលដល់យប់ គឹមានលេងល្បែងប្រជាប្រិយខ្មែរ ។
លោក លឹម វ៉ាងកេវ ពលរដ្ឋខ្មែរក្រោមមួយរូបទៀត មកពីស្រុកថ្កូវ ខេត្តព្រះត្រពាំង ដែលតែងតែទៅលេងស្រុកកំណើតជាញឹកញាប់ បានប្រាប់ពីអ្វីដែលគួរឱ្យកត់សម្គាល់មួយទៀតថា ដោយសារតែមានបណ្ដាញសង្គមច្រើន នៅកម្ពុជាក្រោម យុវជន និងចាស់ព្រឹទ្ធារ្យ នៅដែនដីកម្ពុជាក្រោម បានសហការគ្នា្នក្នុងការរៀបចំពិធីបែបសាសនា និងល្បែងប្រជាប្រិយខ្មែរតាមវត្តអារាមនានា ហើយផ្សព្វផ្សាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ ។ អ្វីដែលមាននៅដែនដីកម្ពុជាក្រោម ធ្វើឱ្យខ្មែរនៅគ្រប់ទិសទីចង់ដឹង ចង់ឃើញក្នុងនោះមានខ្មែរ ដែលមានដើមកំណើត នៅកម្ពុជា ក៏បានទៅលេងក្នុងឱកាសបុណ្យឆ្នាំថ្មីប្រពៃណីខ្មែរ នៅដែនដីកម្ពុជាក្រោម ជាបន្តបន្ទាប់ផង ។
លោក សឺន សែត ប្រធានក្រុមប្រឹក្សាភិបាលសម្ព័ន្ធសមននិសិត្ស-និសិត្សខ្មែរកម្ពុជាក្រោម មានប្រសាសន៍ក្នុងពិធីអបអរឆ្នាំថ្មី ដែលប្រារព្ធធ្វើនៅបុរីព្រៃនគរ ស្ថិតនៅភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ កាលពីពេលថ្មីៗ នេះថា បើទោះជាស្ថិតក្រោមការគ្រប់គ្រងរបស់អជ្ញាធរវៀតណាមក្តី ប៉ុន្តែ ពលរដ្ឋខ្មែរក្រោម ដែលកំពុងរស់នៅលើទឹកដីកកម្ពុជាក្រោម នៅតែប្រារព្ធពិធីបែបវប្បធម៌ប្រពៃណីខ្មែរយ៉ាងខ្ចាប់ខ្ជួន ដើម្បីបញ្ជាក់ថា ខ្លួនជាខ្មែរ ជាម្ចាស់ទឹក ម្ចាស់ដីលើទឹកដីដែលខ្លួនរស់នៅ ។ លោកបន្តថា ផ្ទុយទៅវិញប្រសិនបើខ្មែរក្រោម មិនខិតខំថែរក្សាអ្វីជារបស់ខ្មែរនោះទេ គេអាចថាមិនមានខ្មែរ រស់នៅដែនដីកម្ពុជាក្រោមនោះទេ ខណៈដែលដែនដីដែលខ្លួនរស់នៅ កំពុងត្រួតត្រាដោយវៀតណាមស្រាប់ ។
យោងតាមឯកសារដែលចុះផ្សាយដោយក្រសួងវប្បធម៌ និងវិចិត្រសិល្បៈ បានឱ្យដឹងថា ទំនៀមពិធីចូលឆ្នាំប្រព្រឹត្តទៅចំនួន ៣ ថ្ងៃ ។ ថ្ងៃដំបូងជាថ្ងៃមហាសង្ក្រាន្ត ថ្ងៃទី ២ ជាថ្ងៃ វនបត ថ្ងៃទី ៣ ជាថ្ងៃឡើងស័ក ។ រីឯការកំណត់ខែ ថ្ងៃ ម៉ោង នាទី ដែលឆ្នាំចាស់ត្រូវផុតកំណត់ ហើយទេព្តាឆ្នាំថ្មីត្រូវចុះមកទទួលតំណែងពីទេព្តាឆ្នាំចាស់នោះ គេអាចដឹងបានដោយប្រើក្បួនហោរាសាស្ត្របុរាណ គឺក្បួនមហាសសង្ក្រាន្តត ៕
