ពលរដ្ឋ​ខ្មែរក្រោម នៅតែ​ប្រឈម​ផល​លំបាក ក្នុង​ការរស់នៅ​កម្ពុជា​

0 81

ដោយ ស៊ឺន ចែងចើន | VOKK

ទោះបីជា​រាជរដ្ឋាភិបាល​កម្ពុជា បានប្រកាស​ជា​សាធារណៈ​ថា ពលរដ្ឋ​ខ្មែរ ដែលមាន​ដើមកំណើត នៅឯ​ដែនដី​កម្ពុជា​ក្រោម ពេលមកដល់​ប្រទេស​កម្ពុជា គឺជា​ប្រជាពលរដ្ឋ​ខ្មែរ​ក្តី តែ​ក្នុងស្ថានភាព​ជាក់ស្តែង​ច្បាប់​ជាតិ ពុំបាន​ចែង​ពី​បែបបទ​ផ្នែក​រដ្ឋបាល ឬ​ផ្លូវច្បាប់​ឲ្យ​បានជា​ក់លាក់ ដើម្បី​ឲ្យ​ខ្មែរក្រោម​អាច​ទទួលបាន​សិទ្ធិ​នេះ នៅឡើយ​ទេ ។ ស្រប​ពេលដែល​លក្ខខណ្ឌ​តម្រូវ​តឹងរឹង សម្រាប់​បុគ្គល​ម្នាក់ៗ ខ្មែរក្រោម​ជាច្រើន​ពុំ​អាច​ទួលបាន​ឯកសារ​បញ្ជាក់​អត្តសញ្ញាណ និង​ទទួលបាន​សិទ្ធិ​ផ្សេងៗ ដែល​បុគ្គល​ម្នាក់​គួរ​ទទួលបាន​ក្នុងនាម​ជា​ពលរដ្ឋ​នោះទេ ។

​យោងតាម​របាយការណ៍​កន្លងមក​របស់​អង្គការ សមាគម​ខ្មែរ​កម្ពុជា​ក្រោម មាន​មូលដ្ឋាន​នៅ​ប្រទេស​កម្ពុជា បាន​បង្ហាញថា ភាគច្រើន​នៃ​ពលរដ្ឋ​ខ្មែរក្រោម ដែល​កំពុង​រស់នៅ​លើទឹក​ដី​កម្ពុជា ចង់​រស់នៅ​ជា​អចិន្ត្រៃយ៍ នៅលើ​ទឹកដី​នេះ ។ តាម​របាយការណ៍​មួយ​ក្រោម​ចំណងជើង​ថា “​សិទ្ធិ​ជា​ពលរដ្ឋ​របស់​ខ្មែរក្រោម​នៅ​កម្ពុជា​” បាន​បង្ហាញថា ខ្មែរក្រោម​ដែល​ពុំមាន​អត្តសញ្ញាណប័ណ្ណ​បន្ត​ប្រឈម នឹង​ផល​លំបាក​នានា ក្នុងការ​រស់នៅក្នុង​ប្រទេស​កម្ពុជា រួមមាន​ការរើសអើង កង្វះ​លំនៅដ្ឋាន និង​កង្វះ​ការទទួលស្គាល់ ពី​អាជ្ញាធរ​មួយចំនួន ។​

​ពលរដ្ឋ​ខ្មែរក្រោម ដែល​បានផ្តល់​បទសម្ភាសន៍​ជាមួយ​វិទ្យុ​សំឡេង​កម្ពុជា​ក្រោម ភាគច្រើន​បានលើកឡើង​ដូចៗ គ្នា ពី​បញ្ហា​ប្រឈម​របស់​ពួកគាត់​ថា រង​ការបដិសេធ​ធ្វើ​អត្តសញ្ញាណប័ណ្ណ​សញ្ជាតិ​ខ្មែរ ពី​សំណាក់​អាជ្ញាធរ​មូលដ្ឋាន ។ បើទោះជា​ពលរដ្ឋ​ខ្មេរ​ក្រោម​ទាំងនោះ មួយចំនួន​មាន​អត្តសញ្ញាណប័ណ្ណ​គំរូ​ចាស់​ហួស​សុពលភាព​ក៏ដោយ តែ​សមត្ថកិច្ច​នៅតែ​មិន​ព្រម​ប្តូរ ឬ​ធ្វើ​ជូន​ពលរដ្ឋ​ខ្មែរក្រោម​ឡើយ ដោយ​លើក​ហេតុផល​ថា ជួប​ការលំបាក​លើ​ទិដ្ឋភាព​ច្បាប់ ឬ​ពួកគាត់​ជា​ខ្មែរក្រោម ។​

​អង្គការ​សមាគម​ខ្មែរ​កម្ពុជា​ក្រោម ប៉ាន់ប្រមាណ​ថា ពលរដ្ឋ​ខ្មែរក្រោម ដែល​កំពុង​រស់នៅ​លើទឹក​ដី​កម្ពុជា មាន​ប្រមាណ ១ លាន​នាក់ ។​

​ជារឿយៗ ក្រុម​អង្គការ សមាគម​ខ្មែរ​កម្ពុជា​ក្រោម តែង​រក​ឱកាស ដើម្បី​ជួបពិភាក្សា​ផ្ទាល់​ជាមួយ​មន្ត្រី​ក្រសួងមហាផ្ទៃ ដើម្បី​ពន្យល់​ពី​ការស្នើ​បង្កើត​ឲ្យ​មាន​បទដ្ឋាន​គតិយុត្តិ​ជាក់លាក់ សម្រាប់​ឋានៈ​ជា​ពលរដ្ឋ​របស់​ខ្មែរក្រោម ៕

Leave A Reply

Your email address will not be published.