គណៈមន្ត្រីសង្ឃខ្មែរ ចាត់តាំងកម្មវិធីប្រឡងបញ្ចប់ថ្នាក់ពុទ្ធិកសិក្សាទូទាំងខេត្តខេត្តព្រះត្រពាំង
ដោយ ស៊ឺន ចែងចើន
ខេត្តព្រះត្រពាំង៖ កម្មវិធីប្រឡងយកសញ្ញាបត្រពុទ្ធិកមធ្យមសិក្សាបឋមភូមិ និង ទុតិយភូមិ បានចាប់ផ្តើមហើយ នៅថ្ងៃសុក្រ ទី ២២ ខែមករា នេះ នៅខេត្តព្រះត្រពាំង ដែនដីកម្ពុជាក្រោម ។ កម្មវិធីប្រឡងរួមបញ្ចប់ថ្នាក់ទូទាំងខេត្ត មានបេក្ខជនប្រឡងមកពីស្រុក និង ទីក្រុងទាំង ៨ ក្នុងខេត្តមួយនេះ សរុប ៤៧៤ អង្គ និង រូប ។
គណៈមន្ត្រីសង្ឃ គណៈកម្មការមេប្រយោគ គ្រូបង្រៀន និង បេក្ខសមណសិស្ស-សិស្សទាំង ២ ថ្នាក់ នៃសាលាពុទ្ធិកមធ្យមសិក្សាបឋមភូមិឆ្នាំទី ៤ ឬថ្នាក់បាលីរង និង សាលាពុទ្ធិកមធ្យមសិក្សាទុតិយភូមិឆ្នាំទី ៣ ឬថ្នាក់គរុកោសល្យទី ៣ នៅទូទាំងខេត្តព្រះត្រពាំង ដែលបាននិមន្តមកសិក្សា នៅតាមវត្តអារាមនានា ក្នុងខេត្តមួយនេះ បានមកជួបជុំគ្នា នៅមណ្ឌលប្រឡង វត្តសិលាទ្រ (ថ្មទល់) ឋិតនៅសង្កាត់ទី ៩ ទីក្រុងត្រាវិញ (ព្រះត្រពាំង) ដើម្បីចូលរួមក្នុងកម្មវិធីប្រឡងរួមបញ្ចប់ថ្នាក់ខេត្ត ប្រព្រឹត្តទៅរយៈពេល ៣ ថ្ងៃ ចាប់ពីថ្ងៃសុក្រ ៩ កើត ដល់ថ្ងៃអាទិត្យ ១១ កើត ខែមាឃ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី ២២ ខែមករា ដល់ថ្ងៃទី ២៤ ខែមករា គ្រិស្តសករាជ ២០២១ ក្រោមការចាត់តាំងរបស់អាគារសិក្សាធិការនៃគណៈមន្ត្រីសង្ឃថ្នាក់ខេត្តព្រះត្រពាំង ។
យោងតាមរបាយការណ៍ របស់គណៈកម្មការរៀបចំកម្មវិធីប្រឡងផ្នែកពុទ្ធិកសិក្សាថ្នាក់ខេត្ត ដែលបង្ហោះ នៅលើគណនីហ្វេសប៊ុករបស់ព្រះតេជព្រះគុណ Khmer Srey Pheap ដែលជាសមាជិកគណៈកម្មការរៀបចំកម្មវិធីប្រឡងផ្នែកពុទ្ធិកសិក្សា បានបង្ហោះជាសាធារណៈ នៅលើបណ្តាញសង្គមហ្វេសប៊ុក នៅថ្ងៃទី ២២ ខែមករា ឲ្យដឹងថា សមណសិស្សទាំង ២ ថ្នាក់ ដែលបានចូលប្រឡងរួមបញ្ចប់ថ្នាក់ ក្នុងឆ្នាំសិក្សាពុទ្ធសករាជ ២៥៦៤ នេះ សរុបទាំងអស់មានចំនួន ៤៧៤ អង្គ និង រូប (សិស្សបឋមភូមិ ចំនួន ៣៤៦ អង្គ+រូប និង សិស្សទុតិយភូមិ ចំនួន ១២៨ អង្គ+រូប) ក្នុងនោះ ក៏មានមានយុវ័ន យុវតី ចូលរួមប្រឡងផង ។ ចំណែកគណៈកម្មការមេប្រយោគ ដែលបាននិមន្ត និង អញ្ជើញមកពីវត្តនានា ដើម្បីកែវិញ្ញាសា និង សម្រេចលទ្ធផលប្រឡង មានចំនួន ២៤១ អង្គ និង រូប (ព្រះសង្ឃ ១៣៥ អង្គ លោកគ្រូ ៩៩ រូប និង អ្នកគ្រូ ០៧ រូប) ។ សរុបបេក្ខសមណសិស្ស-សិស្សទាំង ២ ថ្នាក់ និង គណៈកម្មការមេប្រយោគ មានចំនួន ៧១៥ អង្គ និង រូប ។
របាយការណ៍ដដែល បានបញ្ចាក់ថា បេក្ខជនដែលជាសមណសិស្ស និង សិស្ស សិក្សាផ្នែកពុទ្ធិកមធ្យមសិក្សាបឋមភូមិ និង ទុតិយភូមិទូទាំងខេត្តព្រះត្រពាំង មានទាំងអស់ ២១ បន្ទប់ ដោយក្នុងនោះ ថ្នាក់ពុទ្ធិកម្យមសិក្សាបឋមភូមិ មាន ១៧ បន្ទប់ និង ថ្នាក់ពុទ្ធិកមធ្យមសិក្សាទុតិយភូមិ មាន ៤ បន្ទប់ ។
ចំណែកវិញ្ញាសាប្រឡង សម្រាប់ថ្នាក់ពុទ្ធិកមធ្យមសិក្សាបឋមភូមិឆ្នាំទី ៤ មានចំនួន ១២ គឺព្រះវិន័យ តែងសេចក្ដី សរសេរតាមអាន ធម្មបទ វេយ្យាករណ៍បាលី ភាសាខ្មែរ ព្រះគាថា ព្រះអភិធម្ម ទស្សនៈពុទ្ធសាសនា អង់គ្លេស ទូរេនិទាន គណិតវិទ្យា និង ថ្នាក់ពុទ្ធិកមធ្យមសិក្សាទុតិយភូមិឆ្នាំទី ៣ មានចំនួន ១០ វិញ្ញាសា គឺសរសេរតាមអាន ព្រះបាតិមោក្ខ បរមាធិប្បាយ សាសនាសកលលោក កំណាព្យខ្មែរ ភាសាខ្មែរ សម្ព័ន្ធ មង្គលត្ថទីបនី អង់គ្លេស គណិតវិទ្យា ។
កម្មវិធីប្រឡងនេះដែរ ក៏នឹងប្រកាសលទ្ធផល និង ប្រគេនរង្វាន់លើកទឹកចិត្តដល់បេក្ខសមណសិស្ស ពីគណៈកម្មការប្រឡង នៅរាត្រីថ្ងៃទី ២៤ ខែមករា ។ ពិធីប្រកាសលទ្ធផលនៃការប្រឡងសញ្ញាបត្រ នឹងមានការនិមន្ត និង អញ្ចើញចូលរួមពីព្រះសង្ឃ និង ពុទ្ធបរិស័ទខ្មែរក្រោម នៅចំណុះជើងវត្តនានា នៃខេត្តព្រះត្រពាំង ។
គួរជម្រាបជូនថា នៅក្នុងខែបុស្ស ពុទ្ធសករាជ ២៥៦៤ កន្លងទៅនេះ ជារដូវកាល ដែលគណៈកម្មការសង្ឃខ្មែរថ្នាក់ស្រុក នៃខេត្តព្រះត្រពាំង ក៏បានរៀបចំកម្មវិធីប្រឡងបញ្ចប់កម្មវិធីសិក្សារបស់សមណសិស្សទូទាំងស្រុកផងដែរ ។ កម្មវិធីប្រឡងរួមបញ្ចប់ថ្នាក់ទូទាំងស្រុក ក្រោមការចាត់តាំងរបស់សមាគមសង្ឃស្រុកទាំង ៨ រួមមាន ស្រុកកំពង់ស្ពាន ស្រុកផ្នោដាច់ ស្រុកថ្កូវ ស្រុកញ្ចោង ស្រុកកន្លង់ ស្រុកមាត់សមុទ្រ ស្រុកកំពង់ធំ និងទីក្រុងព្រះត្រពាំង ។ ស្រុក នីមួយៗ បានរៀបចំកម្មវិធីប្រឡងរួម នៅក្នុងមណ្ឌលប្រឡង នៅក្នុងវត្តណាមួយ ដែលបានទទួលធ្វើជាម្ចាស់ផ្ទះ ក្នុងការទទួលសមណសិស្ស និង សិស្សមកពីវត្តនានាទូទាំងស្រុក ។
កម្មវិធីសិក្សាថ្នាក់ពុទ្ធិកសិក្សា នៅកម្ពុជាក្រោម ជាកម្មវិធីសិក្សាមួយ ផ្ដោតលើការរៀនអក្សរសាស្ត្រខ្មែរ និង ភាសាបាលី ក្រោមការចាត់តាំងរបស់គណៈមន្ត្រីសង្ឃខ្មែរ នៅដែនដីកម្ពុជាក្រោម ដែលមានឈ្មោះថា «សមាគមព្រះសង្ឃសាមគ្គីស្នេហាជាតិ» ។ សមាគមព្រះសង្ឃសាមគ្គីស្នេហាជាតិ បានបង្កើតឡើង នៅក្នុងឆ្នាំ ១៩៦៥ ដោយព្រះតេជព្រះគុណ សឺង វង់ (Son Vong) អតីតព្រះបាឡាតគណខេត្តព្រះត្រពាំង ។ សមាគមមួយនេះ ដើរតួនាទីបណ្ដុះបណ្ដាលវិស័យអប់រំដល់ពលរដ្ឋ និង ព្រះសង្ឃខ្មែរក្រោម បានសិក្សារៀនសូត្រទាំងផ្នែកពុទ្ធចក្រ និង អាណាចក្រ ។
នៅកម្ពុជាក្រោម ដែលមានផ្ទៃដីប្រមាណ ៦៧.៧០០ គីឡូម៉ែត្រក្រឡា ចែកចេញជា ២១ ខេត្ត/ក្រុង មានពលរដ្ឋខ្មែរក្រោមមិនតិចជាង ៧ លាននាក់ មានវត្តព្រះពុទ្ធសាសនាខ្មែរចំនួន ៤៦១ (ខេត្តព្រះត្រពាំង មានវត្តខ្មែរទាំងអស់ចំនួន ១៤៣ វត្ត) និង មានព្រះសង្ឃខ្មែរក្រោម មិនតិចជាង ១ ម៉ឺនអង្គនោះទេ បើគិតត្រឹមឆ្នាំ ២០១៤ កំពុងតែប្រតិបត្តិព្រះពុទ្ធសាសនា ប្រពៃណី ទំនៀនទម្លាប់ វប្បធម៌ អរិយធម៌ និង សិក្សាអក្សរសាស្ត្រជាតិខ្មែរ បានគង់វង្សតរហូតមកដល់សពថ្ងៃ ៕
