ពលរដ្ឋខ្មែរក្រោម រស់នៅលើទឹកដីកំណើតបង្ហោយរកជំនួយ ខណៈជំងឺកូវីដរាតត្បាតខ្លាំង
ដោយ យន់ សាមៀន | RFA Khmer
ពលរដ្ឋខ្មែរក្រោម រស់នៅស្ទើរទូទាំង ២១ ខេត្តនៅលើទឹកដីកំណើត កំពុងដង្ហោយហៅឲ្យសប្បុរសជនផ្តល់ជំនួយ ក្នុងរយៈពេលនៃការបិទខ្ទប់របស់រដ្ឋាភិបាលអាជ្ញាធរវៀតណាម ដើម្បីការពារជំងឺកូវីដ-១៩ ។ មន្ត្រីសហព័ន្ធខ្មែរកម្ពុជាក្រោម អះអាងថា ស្របពេលដែលអាជ្ញាធរអនុវត្តវិធានការប្រឆាំងនឹងជំងឺឆ្លងនេះ មន្ត្រីវៀតណាមខ្លះបានឆ្លៀតពេលធ្វើទុក្ខបុកម្នេញ និងកេងប្រវ័ញ្ចខ្មែរក្រោមបន្ថែមទៀត ។
ខ្មែរក្រោម ដែលត្រូវបានអាជ្ញាធរវៀតណាម បង្ខំឲ្យធ្វើចត្តាឡីស័ក កំពុងខ្វះស្បៀងអាហារ បរិភោគ និងថវិកាដើម្បីដោះស្រាយជីវភាពប្រចាំថ្ងៃ ។ ពួកគេខ្លះថា អាជ្ញាធរវៀតណាម បានបង្ខំឲ្យពួកគេទិញសម្ភារៈចាំបាច់ ដែលមានតម្លៃថ្លៃជាង ៣ ដងនៃតម្លៃធម្មតា ក្នុងពេលនៃការបិទខ្ទប់ ។
យុវជនខ្មែរក្រោម លោក តោ ហ្វាងចឿង រស់នៅខេត្តព្រះត្រពាំង ប្រាប់វិទ្យុអាស៊ីសេរី កាលពីថ្ងៃទី ២៨ សីហាថា លោកត្រូវបានអាជ្ញាធរវៀតណាម ចាប់ឲ្យធ្វើចត្តាឡីស័ក កំពុងជួបប្រទះបញ្ហាជីវភាព ដោយសារតែលោកមិនអាចទៅប្រកបមុខរបរលក់ដូរបន្តិចបន្តួច និងត្រូវអាជ្ញាធរមិនឲ្យចេញទៅប្រមូលផលស្រូវទុំ ដែលនឹងបណ្ដាលឲ្យខូចខាតទាំងស្រុង ។ លោក តោង ហ្វាងចឿង ឲ្យដឹងទៀតថា អាជ្ញាធរវៀតណាម បានផ្តល់ម្ហូបអាហារ និងអង្ករខ្លះដែរ ប៉ុន្តែ មិនគ្រប់គ្រាន់សម្រាប់គ្រួសាររបស់លោកឡើយ ក្នុងពេលដែលខេត្តលោករបស់នៅ កំពុងមានការរាតត្បាតខ្លាំង ។ លោកសំណូមពរឲ្យអាជ្ញាធរវៀតណាម ជួយពលរដ្ឋទូទៅដោយគ្មានការរើសអើង៖ «ឲ្យរដ្ឋាភិបាលជួយគិតគូរសេដ្ឋកិច្ចខ្មែរក្រោម ចំពោះអ្នកធ្វើចត្តាឡីស័ក ព្រោះធ្វើទៅត្រូវចោលផ្ទះសម្បែងរយៈពេល ២០ថ្ងៃ។ ចោលជ្រូក ចោលស្រូវ ជាពិសេស ស្រូវដល់ច្រូតហើយ ប៉ុន្តែរដ្ឋាភិបាលគេមិនអើពើយើង ខាតផលប្រយោជន៍យើង» ។
ស្រដៀងគ្នានេះ យុវជនខ្មែរក្រោម លោក ថាច់ កឿង បច្ចុប្បន្នកំពុងស្នាក់នៅទីក្រុង ព្រៃនគរ ដើម្បីស្វែងរកការងារធ្វើ បានបាត់បង់ការងារធ្វើចាប់តាំងពីខែឧសភាមកម្ល៉េះ ហើយលោកមិនអាចធ្វើដំណើរទៅស្រុកកំណើតបានទៀត ។ យុវជនរូបនេះបន្តថា កន្លែងលោកស្នាក់នៅមិនមានសប្បុរសជនផ្តល់ជំនួយដល់ទីកន្លែងទេ គឺមានតែសប្បុរសជនខ្លះផ្ញើលុយតាមធនាគារឲ្យសម្រាប់ទិញអង្ករចែកគ្ នា។ បច្ចុប្បន្ន អាជ្ញាធរវៀតណាម បានលក់សម្ភារៈចាំបាច់មួយចំនួនឲ្យខ្មែរក្រោមដែរ ប៉ុន្ តែទំនិញទាំងនោះថ្លៃជាងទីផ្សារ៖ «បាទហ្នឹងហើយ វាលក់ថ្លៃបីបួនដង។ បើយើងទិញយើងទូរស័ព្ទទៅឲ្យគេ គេនឹងយកមកដាក់នៅមាត់ទ្វារយើង ហើយលុយហ្នឹងយើងវេរទៅឲ្យគេ» ។
បញ្ហាជីវភាព និងម្ហូបអាហារដែលពលរដ្ឋកំពុងជួបប្រទះនេះ ស្របពេលប្រទេសវៀតណាម កំពុងរងគ្រោះខ្លាំងដោយសារតែជំងឺ Covid-19 ។ នៅវៀតណាមយ៉ាងហោចណាស់ក៏មានជាង ៤ សែនករណី និងអ្នកស្លាប់មានជាងមួយម៉ឺននាក់ ។ ដោយឡែកខ្មែរក្រោមរាប់ពាន់នាក់បានឆ្លងជំងឺ Covid-19 ហើយខ្មែរក្រោម ២០ នាក់ស្លាប់ និងព្រះសង្ឃមួយអង្គបានសុគត ។ ខ្មែរក្រោមស្លាប់ច្រើនជាងគេ គឺនៅទីក្រុងព្រៃនគរ ។
ប្រធាននាយកដ្ឋានព័ត៌មានសហព័ន្ធខ្មែរកម្ពុជាក្រោមព្រះភិក្ខុ ស៊ឺង យ៉ឹងរតនា មានថេរដីកាថា អាជ្ញាធរវៀតណាមមិនសូវយកចិត្តទុក្ខដាក់នឹងពលរដ្ឋខ្មែរក្រោម ដែលប្រឈមនឹងជំងឺ Covid-19 នោះទេ ហើយថែមទាំងឆ្លៀតកេងចំណេញពីខ្មែរក្រោមទៀត ។ ព្រះអង្គបន្តថា ស្ថានភាពខ្មែរក្រោមរងគ្រោះដោយសារតែជំងឺ Covid-19 បង្កឲ្យមានក្ដីបារម្ភយ៉ាងខ្លាំង៖ «អាត្មាភាពសំណូមពរវៀតណាមត្រូវតែយកចិត្តទុក្ខដាក់យកការខុសត្រូវ ចំពោះពលរដ្ឋខ្មែរក្រោម ដែលមានជំងឺ covid-19 ដែលជួបការលំបាកក្នុងជីវភាពគ្រួសារក្ដី គឺរដ្ឋាភិបាលវៀតណាមហ្នឹងមិនត្រូវរើសអើងពូជសាសន៍ខ្មែរក្រោមទេ បាទ» ។
ព្រះភិក្ខុ ស៊ឺង យ៉ឹងរតនា ក៏ស្នើឲ្យសប្បុរសជនទាំងឡាយជួយដល់ពលរដ្ឋខ្មែរក្រោម ដែលកំពុងខ្វះខាតជីវភាពដោយសារតែអាជ្ញាធរវៀតណាម កំពុងរាំងខ្ទប់ទីកន្លែង ដែលពួកគេកំពុងរស់នៅ៖ «បងប្អូនជនរួមជាតិទាំងអស់នៅជុំវិញពិភពលោកហ្នឹង គឺត្រូវជួយជាអាហារស្បៀងដល់ពលរដ្ឋខ្មែរក្រោម ដែលកំពុងតែជួបការលំបាកនៅតាមបណ្ដាខេត្តក្រុងនៅលើទឹកដីកម្ពុជាក្រោម ព្រោះការរាតត្បាតជំងឺកូវីដ១៩ មានការតឹងតែងយ៉ាងខ្លាំង» ។
បច្ចុប្បន្នពលរដ្ឋខ្មែរក្រោម រាប់លាននាក់កំពុងរស់នៅក្នុងខេត្ត ២១ ក្រោមការគ្រប់គ្រងរបស់អាជ្ញាធរនៃរដ្ឋាភិបាលវៀតណាម ក្រោយបារាំងបានកាត់ទឹកដីខ្មែរក្រោម ទាំងខុសច្បាប់ ទៅឲ្យវៀតណាមកាលពី ៧២ ឆ្នាំមុន ៕
