វត្តអារាម​នានា នៅ​កម្ពុជាក្រោម ចូលរួម​ផ្សព្វផ្សាយ​សារ​អប់រំ​ដល់​ពលរដ្ឋខ្មែរ​ក្រោម ដើម្បី​ការពារ​កុំ​ឲ្យ​ឆ្លង​ជំងឺ​ផ្លូវដង្ហើម​ថ្មី (កូ​វីដ​-១៩​)

0 417

ដោយ ស៊ឺន ចែង​ចើន

ពិភពលោក កំពុងតែ​រួមគ្នា​ប្រយុទ្ធ​ប្រឆាំង​ និង​ចាត់វិធានការ ពី​ការ​រីក​រាលដាល​សាកល ដោយសារ​មេរោគ​កូ​វីដ​-១៩ កំពុង​រាតត្បាត​ ដែល​បណ្តាល​ឲ្យ​មនុស្ស​ស្លាប់ និង​អ្នក​ឆ្លង​មេរោគ​ថ្មីនេះ បាន​កើនឡើង​ជា​រៀងរាល់ថ្ងៃ​ និង​ក្នុង​ចំនួន​ដ៏​ច្រើន ហើយ​កំពុងតែ​បន្ត​រីក​រាលដាល​យ៉ាង​លឿន​ឥត​ឈប់ឈរ​ នៅ​ជុំវិញ​ពិភពលោក ។ ចំណែក នៅ​កម្ពុជាក្រោម ដែល​មាន​ពលរដ្ឋខ្មែរ​ក្រោម ជាង ៧ លាន​នាក់​ កំពុង​រស់នៅ​ក្នុងទឹក​ដី​កំណើត ដែល​បច្ចុប្បន្ន​ស្ថិតនៅ​ភាគ​ខាងត្បូង​នៃ​ប្រទេស​វៀតណាម​ ក៏​កំពុង​ជួប​បញ្ហា​ប្រឈម នឹង​រង​ផល​ប៉ះពាល់ ចំពោះ​ការ​រីក​រាលដាល​នៃ​ជំងឺ​កូ​វីដ​-១៩​ នៅ​ទូទាំង​ប្រទេស​នោះ​ផង ។

ពិធីបង្សុកូល និងស្រង់ទឹកព្រះ នៅដែនដីកម្ពុជាក្រោម
ពិធីបង្សុកូល និងស្រង់ទឹកព្រះ នៅដែនដីកម្ពុជាក្រោម

បើ​តាម​កាសែត​រដ្ឋាភិបាល​វៀតណាម GVP គិត​ត្រឹម​ថ្ងៃទី ២៥ ខែមីនា វៀតណាម មាន​ករណី​ឆ្លង​សរុប​ទាំងអស់ ១៤១​ ក្នុង​នោះ ១៧ នាក់ បាន​ចាកចេញ​ពី​មន្ទីរពេទ្យ​ក្រោយ​ព្យាបាល​ជាសះស្បើយ ។ យ៉ាងណាមិញ វៀតណាម ក៏​រំពឹង​ថា ករណី​ឆ្លង​ថ្មី នឹង​កើនឡើង​ថែមទៀត​ ព្រោះ​ការ​ធ្វើដំណើរ​តាមផ្លូវអាកាស​ទៅ​វៀតណាម​ ពិសេស​មក​ពី​តំបន់​ដែល​រង​ការវាយប្រហារ​ដោយ COVID​-19​ ធ្ងន់ធ្ងរ នៅតែ​បន្ត​មាន​ដដែល ។

ក្នុង​កាលៈទេសៈ ជុំវិញ​ការ​ផ្ទុះឡើង​ជំងឺ​កូ​វីដ​-១៩​ កំពុង​រីក​រាលដាល​ខ្លាំង​យ៉ាង​ដូច្នេះ វត្តអារាម នៅ​កម្ពុជាក្រោម ដែល​ជា​កន្លែង​សម្រាប់​ប្រា​រម្ធ​កម្មវិធី​តាម​បែប​ព្រះពុទ្ធ​សាសនា​ និង​ជាទី​កន្លែង​គោរព​បូជា​ប្រតិបត្តិ​ជំនឿ​របស់​ខ្មែរក្រោម ផង​នោះ​ បាន​ដើរតួ​នាទី​យ៉ាង​សំខាន់​ក្នុង​ការចូលរួម​ផ្សព្វផ្សាយ​សារ​អប់រំ​បន្ថែម ពីលើ​ចំណាត់ការ​របស់​រដ្ឋាភិបាល​ ក្នុង​ការ​ប្រយុទ្ធ​ប្រឆាំង នឹង​ការវិវឌ្ឍន៍​នៃ​ជំងឺ​កូ​វីដ​-១៩​ ដល់​ពុទ្ធបរិស័ទ​ចំណុះជើងវត្ត​នី​មួយ​ៗ ។ ជាពិសេស​ការ​ប្រកាន់យក​នូវ​ការអនុវត្ត​អនាម័យ​ល្អ​ និង​សុវត្ថិភាព​ចំណីអាហារ នៅ​តាម​វត្តអារាម​ផង​ដែរ ។

វត្ត​នាគ​វនា​រាម (ខ្ទឹង​) ស្ថិតនៅ​ភូមិ​ប្រាសាទ ឃុំ​សំរោង ស្រុក​កំពង់ធំ ខេត្ត​ព្រះត្រពាំង​ បច្ចុប្បន្ន​ជា​សង្កាត់​ទី ៧ ទីក្រុង​ព្រះត្រពាំង ដែល​មាន​ព្រះសង្ឃ​គង់នៅ​ ចំនួន ៣៣ អង្គ ព្រះតេជព្រះគុណ ត្រឹង យ៉ឹង ជា​ព្រះចៅ​អធិការ​ បាន​សរសេរ​សារ​មួយ​បង្ហោះ​នៅ​លើ​បណ្តាញ​សង្គម​ហ្វេសប៊ុក កាលពី​ថ្ងៃទី ២១ ខែមីនា​ បង្ហាញ​ពី​អនុវត្ត​នូវ​វិធានការ​ការពារ​ពី​វីរុស​កូ​រ៉ូ​ណា ដោយ​អនុញ្ញាត​ឲ្យ​ព្រះសង្ឃ​ផ្អាក​ការ​និមន្ត​ចេញទៅ​បិណ្ឌបាត​ នៅ​តាម​វេន ឬភូមិ​នី​មួយ​ៗ ដើម្បី​ការពារ​សុខភាព​ព្រះសង្ឃ និង​ពុទ្ធបរិស័ទ​ ក្នុង​គ្រា​បារម្ភ​ពី​ការ​ឆ្លង​កូ​វីដ​-១៩ ។

ព្រះវិហារវត្ត​នាគ​វនា​រាម (ខ្ទឹង​) ។ រូបៈ Minh Đăng
ព្រះវិហារវត្ត​នាគ​វនា​រាម (ខ្ទឹង​) ។ រូបៈ Minh Đăng

ព្រះអង្គ​មានពុទ្ធដីកា​បន្ថែម ប្រាប់​អ្នក​សារព័ត៌​ព្រៃនគរ​ តាម​ទូរសព្ទ នៅ​ថ្ងៃអង្គារ​នេះ ថា នៅ​កម្ពុជាក្រោម​ ដោយ​បច្ចុប្បន្ន​មានការ​រីកចម្រើន​នៃ​វិស័យ​បច្ចេកវិទ្យា ដូច្នេះ​ ពលរដ្ឋខ្មែរ​ក្រោម​ម្នា​ក់ៗ មានការ​យល់ដឹង​ច្រើន​ ពី​ការ​ផ្សព្វផ្សាយ​សារ​អប់រំ​ពី​វិធី​បង្ការ​កូ​វីដ​-១៩ ។ ពួក​គេ​ប្រើ​កម្មវិធី​បណ្តាញ​សង្គម​ ដើម្បី​ទទួល​បាន​ព័ត៌មាន លឿន​រហ័ស និង​ការ​រក្សា​ទំនាក់ទំនង និង​ទទួល​បាន​ព័ត៌មាន​ ពី​អាជ្ញាធរ​សុខាភិបាល ពាក់ព័ន្ធ នឹង​រោគរាតត្បាត​ជាស​កល ដូចជា កូ​វីដ​-១៩ ។ ម្ល៉ោះហើយ​ ​ពួក​គេ​ក៏​មានការ​ប្រុងប្រយ័ត្ន និង​មាន​វិធានការ​ការពារ​ខ្លួន​បាន​យ៉ាង​ល្អ​ផង ។ ​

ព្រះតេជព្រះគុណ ត្រឹង យ៉ឹង មានពុទ្ធដីកា​ថា «ជា​ការចូលរួម​ទាំងអស់គ្នា​ ទាំង​ពិភពលោក មិនមែន​តែ​លោក និង​ផ្ស​ក់​អី​ទេ ។ ផ្ស​ក់​ឥឡូវ គេ​មានការ​ភ្ញាក់រឭក​ច្រើនណាស់​ ព័ត៌មាន​គេ​ដឹង​រាល់គ្នា ហ្វេសប៊ុក​មាន​រាល់ដៃ ។ ចំពោះ​វត្ត​គេ​ត្មា​មិនដឹង​ តែ​ចំពោះ​លោក​ក្នុង​វត្ត អាត្មា​មានគំនិត​អ៊ីចឹង ត្មា​មិន​ឲ្យ​លោក​ទៅ​បិណ្ឌបាត​ ហើយ​មាន​ផ្ស​ក់​គេ​ប្រគេន​ម្ហូបអាហារ លោក​ឆាន់​ទៅ​ធ្វើការ ជិតដល់​បុណ្យចូលឆ្នាំ ។ ចំពោះ​រឿង​ការ​ការពារ​ហ្នុង បើ​យើង​មិន​មាន​ឈឺ​យើង​ត្រូវតែ​ការពារ​ដែរ ព្រះ​លោក​ឲ្យ​ការពារ​ថែរក្សា​ កាយបរិហារ ព្រះ​លោក​ឲ្យ​ធ្វើ​ចុង​ដែរ​ហ្នុង ត្រូវ​ហាត់ប្រាណ ត្រូវ​ដុះធ្មេញ​ ត្រូវ​រៀបចំខ្លួន​ប្រាណ បិណ្ឌបាត​គឺជា​ការហាត់ប្រាណ​ឲ្យ​បែ​កញឹស នមស្សការ​អីហ្នឹង​ជា​តួនាទី​របស់​លោក​»

ព្រះតេជព្រះគុណ ត្រឹង យ៉ឹង ស្នើ​ដល់​ពុទ្ធបរិស័ទ​ឲ្យ​ពាក់​ម៉ាស់​ការពារ​ ពេល​ដើរចូល​មក​ក្នុង​ទីអារាម​ដ្ឋាន​វត្ត​ម្តង​ៗ ដើម្បី​បង្ការ​ការ​ឆ្លង​មេរោគ​ប្រភេទ​ថ្មីនេះ ។ បន្ថែម​ពីលើ​នេះ​ ព្រះអង្គ​ក៏​សូម​អំពាវនាវ​ដល់​សទ្ធា​ជ្រះថ្លា​នៃ​ពុទ្ធបរិស័ទ ប្រគេន​ទេយ្យទាន​ និង​សម្ភារៈ​ដែល​ព្រះសង្ឃ​អាច​ប្រើប្រាស់​បាន ។ ជាពិសេស​ឲ្យ​ចូលរួម​បរិច្ចាគ ចំណីអាហារ​ មាន​បន្លែ ផ្លែឈើ ប្រេងឆា អង្ករ ទឹក​អាល់កុល​លាងដៃ ម៉ាស់ និង​ឧបករណ៍​ការ​ពារ​ផ្សេង​ៗ រហូតដល់​ជំងឺ​កូ​វីដ​-១៩​ នេះ បាន​ធូរស្បើយ ។

តំណាង​គណៈ​សង្ឃា​ភិបាល នៃ​វត្ត​មួយ​ស្ថិតនៅ​ស្រុក​កំពង់ស្ពាន​ នៃ​ខេត្ត​ព្រះត្រពាំង ព្រះតេជព្រះគុណ ឯករាជ្យ ថាច់ ថ្លែង​ក្នុង​លក្ខខណ្ឌ​សុំ​មិន​បញ្ចេញ​សំឡេង​ មានពុទ្ធដីកា​ថា នៅ​រៀងរាល់ថ្ងៃ​ឧបោសថសីល និង​ថ្ងៃបុណ្យ​ទាន​ក្នុង​វត្ត​ម្តង​ៗ ព្រះអង្គ​តែង​ទូន្មាន​អប់រំ​ពុទ្ធបរិស័ទ​ឲ្យ​មានការ​ប្រតិបត្តិ​ការពារ​ខ្លួន​ ពី​ជំងឺ​កូ​វីដ​-១៩ ឲ្យបាន​ល្អ ស្របតាម​ការណែនាំ​របស់ ក្រសួងសុខាភិបាល ។

ព្រះអង្គ​មានពុទ្ធដីកា​ថា «ផ្សព្វផ្សាយ​សារ​អប់រំ​សំ​ខាន់​ៗ ដើម្បី​ទប់ស្កាត់​ការ​ឆ្លង​រាលដាល​នៃ​មេរោគ​ Covid​-19 នេះ ទៅដល់​ព្រះសង្ឃ​គណៈកម្មការ អាចារ្យវត្ត​ លោកតា លោកយាយ និង​ពុទ្ធបរិស័ទ​ចំណុះជើងវត្ត​របស់​ខ្លួន ។ ណែនាំ​ទៅ​ពុទ្ធបរិស័ទ ប្រសិនបើ​មាន​អ្នកមាន​អាការ​ក្តៅ​ខ្លួន​ ក្អក ហៀរសំបោរ ឈឺបំពង់ក ពិបាក​ដកដង្ហើម ជាដើម ត្រូវតែ​បញ្ជូន​ទៅពេទ្យ​ជាបន្ទាន់​»

ខិតប័ណ្ណផ្សព្វផ្សាយ ស្ដីពីវិធីបង្ការ ការពារ និងការទប់ស្កាត់ការរីករាលដាលជំងឺ COVID-19 នៅក្នុងវត្ត មុនីរង្សី «មេពាំង» ស្រុកកំពង់ស្ពាន-ខេត្តព្រះត្រពាំង ។ រូបពីហ្វេសប៊ុកៈ Ekareach Thach
ខិតប័ណ្ណផ្សព្វផ្សាយ ស្ដីពីវិធីបង្ការ ការពារ និងការទប់ស្កាត់ការរីករាលដាលជំងឺ COVID-19 នៅក្នុងវត្ត មុនីរង្សី «មេពាំង» ស្រុកកំពង់ស្ពាន-ខេត្តព្រះត្រពាំង ។ រូបពីហ្វេសប៊ុកៈ Ekareach Thach

គិត​ត្រឹម ថ្ងៃទី ២៥ មីនា​ សាលាគណ​ខេត្ត និង​សមាគម​ព្រះសង្ឃ​សាមគ្គី​ស្នេហាជាតិ​ខេត្ត​ព្រះត្រពាំង​ នៅ​មិនទាន់​មាន​សង្ឃប្រកាស ឬសារាចរណែនាំ ស្ដីពី​វិធានការ​បង្ការ និង​ទប់ស្កាត់​ការ​រាតត្បាត​នៃ​ជំងឺ​កូ​វីដ​-១៩​ នៅ​គ្រប់​វត្តអារាម​ទូទាំង​ខេត្ត នៅឡើយ​ទេ ។

យ៉ាងនេះ​ក្តី កាលពី​ថ្ងៃទី ៣១ មករា​ សមាគម​ពុទ្ធសាសនា​វៀតណាម ដែល​ជា​អង្គការ​ចាត់តាំង​នយោបាយ​របស់​រដ្ឋាភិបាល​បក្ស​កុម្មុយនិស្ត​វៀតណាម​ មាន​ឥទ្ធិពល​ខ្លាំង​មក​លើ​ពុទ្ធសាសនា​ខ្មែរ នៅ​ដែនដី​កម្ពុជាក្រោម​ ឲ្យ​ឋិតនៅ​ក្រោម​ការ​បញ្ជា​របស់​ខ្លួន​នោះ បាន​ចេញ​សេចក្តី​ប្រកាស​ណែនាំ​ឲ្យ​មេដឹកនាំ​ស្ថាប័ន​សាសនា​ និង​អង្គការ​សាសនា​នានា នៅ​តាម​ខេត្ត​/ក្រុង ទូទាំង​ប្រទេស​ ចូលរួម​ធ្វើសកម្មភាព​យ៉ាងសកម្ម ក្នុង​ការ​បង្ការ​ និង​ទប់ស្កាត់​ការ​ឆ្លង​រីក​រាលដាល​នៃ​ជំងឺ​រលាក​សួត ដែល​បង្ក​ដោយ​វីរុស​កូ​រូ​ណា​ថ្មី ឲ្យ​មានប្រសិទ្ធភាព​ ។

សេចក្តី​ប្រកាស​ព័ត៌មាន​ ដែល​ចុះហត្ថលេខា​ដោយ​ព្រះសង្ឃ​យួន ធិត ទៀន​ញ៉ើន (Thích Thiện Nhơn​) ជា​ប្រធាន​ក្រុមប្រឹក្សា​ភិបាល​នៃ​សមាគម​ពុទ្ធសាសនា​វៀតណាម​ បាន​សរសេរ​នៅក្នុង​ន័យ​ដើម​យ៉ាង​ដូច្នេះ​ថា «សមាគម​ពុទ្ធសាសនា​វៀតណាម​គ្រប់​ជាន់ថ្នាក់​ ត្រូវ​បង្កើន​ការ​ផ្សព្វផ្សាយ ពី​វិធានការ​បង្ការ​ការពារ​ និង​ប្រយុទ្ធ​ប្រឆាំង​ជំងឺ​កូ​វិដ​-១៩ ដល់​ព្រះសង្ឃ ដូនជី និង​ពុទ្ធបរិស័ទ នៅ​គ្រប់​ខេត្ត​/ក្រុង​ ទូទាំង​ប្រទេស​ទាំងអស់ ដើម្បី​ចូលរួម​ចំណែក​កាត់បន្ថយ​ការ​ឆ្លង​ជំងឺ​នេះ​»

តាមន័យ​ដើម​នៃ​លិខិត​ប្រកាស​នេះ​ បន្ថែម​ទៀត​ថា «បង្កើន​ការឃោសនា និង​ចលនា​ដល់​ប្រជាជន​ អនុវត្ត​វិធានការ​តឹង​រឹង ដើម្បី​ការពារ​ជំងឺឆ្លង COVID​-19​ ដោយ​អំពាវនាវ​ប្រជា​ពុទ្ធបរិស័ទ​ទាំងអស់ ចូលរួម​រក្សា​អនាម័យ ដើម្បី​បង្ការ បញ្ចៀស​ អំពី​ការ​ឆ្លង​រីក​រាលដាល នៃ​មេរោគ​នេះ ។ ត្រូវ​ពាក់​ម៉ាស់​ការពារ​នៅពេល​ដើរចូល​វត្ត និង​ជំរុញ​ដល់​វត្តអារាម​នី​មួយ​ៗ ចែក​ម៉ាស់ ដល់​ពុទ្ធបរិស័ទ​ចំណុះជើងវត្ត និង​ភ្ញៀវ​ទេសចរ ពេល​មក​វត្ត ។ ត្រូវ​ផ្អាក​រាល់​សកម្មភាព​នៃ​ការ​ជួបជុំ​តាម​គ្រប់រូប​ភាព​តាម​លក្ខណៈ​សាសនា​ ។ ហាមប្រាម​មិន​ឲ្យ​ជួបជុំគ្នា ទ្រង់ទ្រាយ​ធំ គ្រប់បែបយ៉ាង​»

ស្រដៀងគ្នា​នេះ​ដែរ​ គណៈកម្មការ​សាសនា​រដ្ឋាភិបាល​នៃ​សាធារណរដ្ឋ​សង្គមនិយម​វៀតណាម កាលពី​ថ្ងៃសុក្រ​ទី ២០ មីនា​ ក៏បាន​ចេញ​សេចក្តី​ប្រកាស​ព័ត៌មាន ស្នើ​ឲ្យ​អង្គការ​សាសនា និង​កន្លែង​គោរព​បូជា​នានា​ បញ្ឈប់​ការរៀបចំ​ពិធីបុណ្យ​ពាក់ព័ន្ធ នឹង​ការចូលរួម​ពិធី​សាសនា ការ​ធ្វើសន្និសីទ​ និង​សកម្មភាព​បែប​សាសនា​នានា ដែល​មាន​មនុស្ស​ប្រមូល​ផ្តុំ​ច្រើន ។

គណៈកម្មាធិការ​រដ្ឋាភិបាល​ ទទួលបន្ទុក​កិច្ចការ​សាសនា របស់​ប្រទេស​វៀតណាម បាន​ឲ្យដឹង​ទៀត​ថា​ គណៈកម្មាធិការ​បាន​ដាក់កំហិត​នូវ​ព្រឹត្តិ​ការណ៍​ជាក់លាក់ ដែល​ត្រូវ​លុបចោល​នោះ​ រួមមាន​ពិធីបុណ្យ Easter (ពិធីបុណ្យ​គ្រិស្ត​សាសនិក​) ពិធីបុណ្យ​វិសាខបូជា ពិធីបុណ្យ​ចូលឆ្នាំ​ខ្មែរ​របស់​ពរ​ដ្ឋ​ខ្មែរក្រោម​ ដែល​គ្រោង​ធ្វើ​នៅ​ខែមេសា សមាជ​របស់​អ្នក​កាន់សាសនា Cao Dai និង​ការប្រជុំ​ប្រចាំឆ្នាំ​ នៃ​សាសនា Baha’i រួម​ទាំង​សាស​នា​ផ្សេង​ៗ ទៀត​ ក្នុង​ប្រទេស​វៀតណាម ។ លើស​ពីនេះ គណៈកម្មការ​សាសនា​នៃ​រដ្ឋាភិបាល​វៀតណាម ក៏បាន​ព្រមាន​ ប្រឆាំង នឹង​អង្គការ​សាសនា​ណា ដែល​បញ្ជូន​សមាជិក​របស់​ខ្លួន ទៅ​ចូលរួម​ព្រឹត្តិ​ការណ៍​តាមរយៈ​ពិធី​សាសនា​ នៅក្នុង​ប្រទេស​ដទៃទៀត និង​ទទួលយក​ភ្ញៀវ​សាសនា ដែល​មក​ពី​តំបន់ ដែល​រងគ្រោះ ដោយ​វីរុស​កូ​រ៉ូ​ណា​ ។

ផ្ទុយពី​សារាចរ​ហាមប្រាម​របស់​គណៈកម្មការ​សាសនា​រដ្ឋាភិបាល​វៀតណាម​ ដែល​មិន​អនុញ្ញាត ឲ្យ​ពលរដ្ឋខ្មែរ​ក្រោម ប្រា​រព្វ​ពិធីបុណ្យ​ចូលឆ្នាំ​ប្រពៃណី​ជាតិខ្មែរ​ ។ សេចក្តី​ប្រកាស​ព័ត៌មាន​ដាច់ដោយឡែក​មួយទៀត ចុះ​ថ្ងៃទី ១១ មីនា​ ដោយ​គណៈកម្មាធិការ​ប្រជាជន​ខេត្ត​ត្រា​វិញ (ព្រះត្រពាំង​) បង្គាប់​ឲ្យ​ស្ថាប័ន​ពាក់ព័ន្ធ​រៀបចំ​កម្មវិធី​បុណ្យចូលឆ្នាំ​ថ្មី ប្រពៃណី​ជាតិ ឆ្នាំ ២០២០​ ជូន​ប្រជាពលរដ្ឋ​ខ្មែរក្រោម ដែល នឹង​ចូល​មកដល់ ចាប់ពី​ថ្ងៃ​ចន្ទ ៦ រោច ដល់​ថ្ងៃ​ព្រ​ហស្ប​ត៍​ ៩ រោច ដែល​ត្រូវ នឹង​ថ្ងៃទី ១៣ ដល់​ថ្ងៃទី ១៦ មេសា ខាងមុខនេះ ។

សេចក្តី​ប្រកាស​ព័ត៌មាន​ដដែល​បញ្ជាក់​ថា​ «សាលារៀន​ ក្រុមហ៊ុន រោងចក្រ​ និង​ការិយាល័យ​រដ្ឋ និង​ឯកជន​ទាំងអស់ ត្រូវ​បង្ក​លក្ខណ​ងាយស្រួល​ដល់ និស្សិត​ សិស្សសាលា កម្មករ បុគ្គលិក និង​កម្មាភិបាល ដែល​កំពុងតែ​រៀន និង​ធ្វើការ​នៅ​តាម​សាលា​ រោងចក្រ និង​ការិយាល័យ​រដ្ឋ​នានា បាន​ឈប់សម្រាក​ ដើម្បី​ចូលរួម​អបអរសាទរ​ពិធីបុណ្យ​ចូលឆ្នាំ​ថ្មី ប្រពៃណី​ជាតិខ្មែរ ចំនួន ៤ ថ្ងៃ​ ចាប់ពី​ថ្ងៃទី ១៣​-១៤​-១៥ និង ១៦ ខែមេសា​»

ពាក់ព័ន្ធ​ នឹង​បុណ្យចូលឆ្នាំ​ប្រពៃណី​ជាតិខ្មែរ នា​ពេល​ខាងមុខនេះ​ដែរ ព្រះតេជព្រះគុណ​ ឯករាជ្យ ថាច់ មានពុទ្ធដីកា​ថា វត្ត​របស់​ព្រះអង្គ​ នៅតែ​ប្រព្រឹត្តទៅ​ជា​ធម្មតា​តាម​ទំនៀមទម្លាប់​ប្រពៃណី ។ ប៉ុន្តែ​ គ្រាន់តែ​បង្អាក់​កម្មវិធី​មួយចំនួន ជាអាទិ៍​ ពិធី​ដង្ហែ​មហា​សង្រ្កាន្ត​ជុំវិញ​ភូមិស្រុក ពិធីរាប់បាត្រ​ព្រះសង្ឃ ជាដើម ។

ព្រះតេជព្រះគុណ ថាច់ ឯករាជ​ មានពុទ្ធដីកា​ថា «ផ្អាក​កម្មវិធី​ខ្លះ ដូចជា​ ពុទ្ធបរិស័ទ​ចូលរួម​ពិធី​ដង្ហែ​មហា​សង្រ្កាន្ត​ទៅតាម​ភូមិស្រុក​ ដើម្បី​ត្រៀម​ទទួល​ទេវតា​ឆ្នាំ​ថ្មី សកម្មភាព​លេងសប្បាយ កម្សាន្ត សកម្មភាព​លក់ដូរ​ ម្ហូបអាហារ នៅក្នុង​បរិវេណ​វត្តអារាម សកម្មភាព​សម្តែង​សិល្បៈ ។ល។»

គិត​ត្រឹម​ថ្ងៃទី ២៥ មីនា​ ប្រទេស​វៀតណាម បាន​រក​ឃើញ​អ្នក​ផ្ទុក​ជំងឺ​កូ​វីត​-១៩ ចំនួន ១៤១ នាក់​ហើយ ។ ក្នុងចំណោម​អ្នក​ឆ្លង​ទាំង ១៤១ នាក់ នោះ​ គឺ​មាននៅ​តាម​បណ្តា​ខេត្ត​មួយចំនួន​នៃ​ទឹក​កម្ពុជាក្រោម ដូចជា ទីក្រុង​ព្រៃនគរ (Hồ Chí Minh​) ៣៥ នាក់ ខេត្ត​ព្រះត្រពាំង (Trà Vinh​) ២ នាក់​ ខេត្ត​មាត់ជ្រូក (An Giang​) ៣ នាក់ ខេត្ត​ពល​លាវ (Bạc​ Liêu​) ២ នាក់ ខេត្ត​កំពង់​ឬស្សី (Bến Tre​) ១ នាក់ ខេត្ត​អូរ​កាប់ (Bà Rịa – Vũng Tàu​) ១ នាក់ និង​ខេត្ត​កំពង់គោ (Long An​) ១ នាក់ ។ ប៉ុន្តែ មិនទាន់​មាន​សេចក្ដីរាយការណ៍​ថា មាន​ពលរដ្ឋខ្មែរ​ក្រោម​ បាន​ឆ្លង​មេរោគ​កូ​វីដ​-១៩ នេះ នៅឡើយ​ទេ ។

ព្រះតេជព្រះគុណ ឯករាជ្យ ថាច់ អំពាវនាវ​ឲ្យ​ពលរដ្ឋខ្មែរ​ក្រោម​ ​ដែល​កំពុង​រស់នៅ​លើទឹក​ដី​កំណើត ត្រូវ​ចេះ​ការពារ​ខ្លួន​ ដើម្បី​បង្ការ​កុំ​ឲ្យ​ឆ្លង​ងឺ​កូ​វីដ​-១៩ ។ ជាពិសេស ពលករ​ខ្មែរក្រោម​ ដែល​កំពុងធ្វើការ​ងារ នៅ​តាម​ទីក្រុង​ព្រៃនគរ និង​ខេត្ត​ទួល​តា​មោក​ ត្រូវ​សម្អាត​អនាម័យ​ផ្ទាល់ខ្លួន ថែរក្សា​សុខភាព តាម​ការណែនាំ​របស់ក្រ​សួង​សុខាភិបាល​ ឲ្យបាន​ខ្ជាប់ខ្ជួន ហើយ​បើ​មាន​អាការៈ​គួរឲ្យ​សង្ស័យ សូម​ប្រញាប់​ទៅ​មន្ទីរពេទ្យ ។

ទិន្នន័យ​អ្នក​ឆ្លង អ្នក​ស្លាប់ និង​អ្នកជា​សះស្បើយ​ពីជម្ងឺ​​កូ​វីដ​-១៩ គិត​ត្រឹម​យប់​ម៉ោង ១០ ថ្ងៃទី ២៣ ខែមីនា ឆ្នាំ ២០២០ ។ រូបៈ Screenshot
ទិន្នន័យ​អ្នក​ឆ្លង អ្នក​ស្លាប់ និង​អ្នកជា​សះស្បើយ​ពីជម្ងឺ​​កូ​វីដ​-១៩ គិត​ត្រឹម​យប់​ម៉ោង ១០ ថ្ងៃទី ២៣ ខែមីនា ឆ្នាំ ២០២០ ។ រូបៈ Screenshot

សូម​បញ្ជាក់​ផង​ដែរ​ថា គិត​មកដល់ពេលនេះ​ ប្រទេស និង​ដែនដី ១៩៧ ហើយ ដែល​ប្រកាស​ពី​ករណី​ឆ្លង​មេរោគ​កូ​វីដ​-១៩ ដោយ​សរុប​ជា​តួរ​លេខ​មាន​ជាង ៤៣០០០០​ នាក់ អ្នក​ស្លាប់​ជាង ១៩០០០ នាក់ ខណៈ​អ្នកជា​សះស្បើយ​ពី​ជម្ងឺ​នេះ ជាង ១១១០០០ នាក់ ៕

Leave A Reply

Your email address will not be published.