សមាគមខ្មែរកម្ពុជាក្រោម ត្រៀមមេធាវី ដើម្បីជួយការពារក្ដីអតីតសង្ឃ ប៉ាង សុដា
ដោយ យន់ សាមៀន
សមាគមខ្មែរកម្ពុជាក្រោម ត្រៀមផ្តល់មេធាវី ដើម្បីជួយការពារក្ដីដល់អតីតព្រះចៅអធិការវត្ត វង្សគតបុរីសេរីភ្នំពេញ ខេត្តកំពង់ចាម ព្រះតេជព្រះគុណ ប៉ាង សុដា ក្នុងករណីមានការចោទប្រកាន់តាមផ្លូវតុលាការ ។ ការឃុំខ្លួន អតីតព្រះចៅអធិការវត្ត វង្សគតបុរីសេរីភ្នំពេញ បានបង្កើតនូវមន្ទិលសង្ស័យជាច្រើនពីចេតនារបស់អាជ្ញាធរដោយសារតែអាជ្ញាធរនៅមិនទាន់បង្ហាញជាសាធារណៈ ពីបទចោទប្រកាន់ប្រឆាំងលោក ប៉ាង សុដា នៅឡើយទេ ។
សមាគមខ្មែរកម្ពុក្រោម នៅតែបន្តតាមដានករណីអាជ្ញាធរចាប់ផ្សឹកព្រះសង្ឃខ្មែរក្រោម និងទាមទារឲ្យលាតត្រដាងករណីនេះ ឲ្យសាធារណជនបានដឹងលឺ ។ ការទាមទារនេះ ដោយសារតែអាជ្ញាធរនៅមិនទាន់បង្ហាញព័ត៌មាន និងទីកន្លែងឃុំខ្លួនលោក ប៉ាង សុដា ក្រោយលោកបានបាត់ដំណឹងខ្លួនជិតមួយសប្ដាហ៍រួចមកហើយ ។
នាយកប្រតិបត្តិសហគមន៍ខ្មែរកម្ពុជាក្រោម លោក ថាច់ សេដ្ឋា ប្រាប់វិទ្យុអាស៊ីសេរីថ្ងៃទី ៨ ខែកញ្ញា ថា ក្រុមការងារសមាគមខ្មែរកម្ពុជាក្រោម បានតាមដាន និងស្វែងរកដំណឹងព្រះសង្ឃខ្មែរក្រោម ដែលត្រូវបានអាជ្ញាធរចាប់ផ្សឹកនោះ ប៉ុន្តែមិនទទួ លបានដំណឹងអ្វីទាំងអស់គិតមកដល់ពេលនេះ ។ លោក ថាច់ សេដ្ឋា បន្តថា ការសារភាពរបស់លោក ប៉ាង សុដា តាមបណ្តាញប្រព័ន្ធឃោសនារបស់លោក ហ៊ុន សែន បានបង្កើតនូវចម្ងល់ និងអាចជាបង្ខិតបង្ខំឲ្យសារភាព៖ «បើគេបញ្ជូនទៅតុលាការយើងមានមេធាវីមានអីដែរហ្នឹង តើត្រឹមត្រូវតាមច្បាប់តាមធម៌វិន័យអីដែរ ដូច្នេះទង្វើទាំងអស់ហ្នឹងយើងធ្វើតាមច្បាប់តាមធម៌វិន័យគ្មានអីត្រូវលាក់បាំងមានអីត្រូវភ័យខ្លាចទេ ត្រូវតែលាតត្រដាងទាំងអស់គ្នា» ។
អតីតសង្ឃខ្មែរក្រោម ប៉ាង សុដា ត្រូវបានមន្ត្រីសង្ឃខេត្តកំពង់ចាម ២ អង្គចាប់ផ្សឹកបន្ទាប់មកសមត្ថកិច្ចក្រសួងមហាផ្ទៃ បានបញ្ជូនព្រះកាយមកភ្នំពេញ កាលពីថ្ងៃទី ២ ខែកញ្ញា យ៉ាងតក់ក្រហល់ ។ អាជ្ញាធរអះអាងថា ការផ្សឹកនោះអនុវត្តតាមដីការបស់ព្រះរាជអាជ្ញាសាលាដំបូងរាជធានីភ្នំពេញ ដែលចេញដីកាចាប់ខ្លួន ដើម្បីយកទៅសាកសួរ ជុំវិញបទចោទប្រកាន់ល្មើសវិធានការទប់ស្កាត់ការឆ្លងរាលដាលជំងឺកូវីដ-១៩ ។ អង្គការសង្គមស៊ីវិល មួយចំនួនបានរិះគន់ការចាប់ព្រះកាយព្រះសង្ឃខ្មែរក្រោម ក្រោយមកទើបប្រព័ន្ធឃោសនារបស់លោក ហ៊ុន សែន កាលពីថ្ងៃទី ៧ ខែកញ្ញា បានបង្ហាញវីដេអូសារភាពរបស់លោក ប៉ាង សុដា ថាលោកបានប្រព្រឹត្តអសីលធម៌ប៉ះពាល់ដល់ព្រះពុទ្ធសាសនា ។ ទោះបីយ៉ាងណា មន្រ្តីសហព័ន្ធខ្មែរកម្ពុជាក្រោម អះអាងថា លោក ប៉ាង សុដា បានសារភាពទាំងបង្ខំ ហើយលោកមិនបានប្រព្រឹត្តកំហុសនោះទេ ។
អាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញលោក អ៊ី រិន ដើម្បីសុំការបញ្ជាក់បន្ថែមជុំវិញរឿងនេះបាននៅឡើយទេ ។ ចំណែកអ្នកនំាពាក្យប៉ូលិសក្រុងភ្នំពេញលោក សាន សុខសីហា និយាយថា លោកមិនដឹងករណីនេះទេ លោកជំរុញឲ្យសាកសួរសមត្ថកិច្ចខេត្តកំពង់ចាមវិញ ។ វិទ្យុអាស៊ីសេរីមិនទាន់អាចសុំការបញ្ជាក់បន្ថែមពីស្នងការនគរបាលខេត្តកំពង់ចាមលោក ឯម កុសល បាននៅឡើយដែរ ។
ពាក់ព័ន្ធនឹងរឿងនេះ ប្រធានលេខាធិការដ្ឋានគណៈសង្ឃនាយកព្រះអង្គ ឃឹម សន មានថេរដីកាថា មុនដំបូងលោក ប៉ាង សុដា បានប្រកាន់ជំហរមិនសឹកទេ ប៉ុន្តែ ក្រោយមកទូរស័ព្ទប្រាប់ព្រះតេជព្រះគុណថា ខ្លួនមិនបួសទៀតទេ ព្រោះបានប្រព្រឹត្តកំហុសធ្វើឲ្យប៉ះពាល់សាសនា៖ «ទូរស័ព្ទមកថា ខ្ញុំករុណាសូមអភ័យទោស ដែលគ្រងស្បង់ចីពរ ឥឡូវខ្ញុំករុណាសម្រេចលាចាកសិក្ខាបទ» ។
ទោះបីយ៉ាងណា ព្រះអង្គ ឃឹម សន ធ្លាប់ប្រាប់ថា លោក ប៉ាង សុដា បានបួសឡើងវិញហើយ ក្រោយសមត្ថកិច្ចរកមិនឃើញកំហុស ប៉ុន្តែ ក្រោយមកទៀតបែរជាប្តូរព័ត៌មានថា លោក ប៉ាង សុដា បានសម្រេចចិត្តសឹក និងបួសឡើងវិញដោយចិត្តឯង ។
អតីតសង្ឃ លោក ប៉ាង សុដា ប្រសូតកាលពីឆ្នាំ ១៩៦៨ នៅស្រុកតាវិច ខេត្តឃ្លាំង កម្ពុជាក្រោម ។ កាលនៅជាសង្ឃព្រះអង្គបានទទួលតួនាទីជាព្រះចៅអធិការវត្ត វង្សគតបូរីសេរីភ្នំពេញថ្មី នៅស្រុកចំការលើ ខេត្តកំពង់ចាមតាំងពីឆ្នាំ ១៩៩៥ មកទល់សព្វថ្ងៃ ។ ក្រៅជាចៅអធិការវត្ត ព្រះអង្គជាទីប្រឹក្សា និងធម្មទូតសម្តេចព្រះសង្ឃរាជ នន្ទ ង៉ែត ទៀតផង ។ ក្រៅពីការងារសាសនាព្រះអង្គក៏សកម្មនឹងការងារសង្គមដោយឧបត្ថម្ភថវិកា ស្បៀងអាហារ និងសម្ភារៈដល់ពលរដ្ឋក្រីក្រជាដើម ៕
