យុវជនខ្មែរក្រោម នៅតែបន្តផ្សព្វផ្សាយនូវឯកសារច្បាប់របស់អង្គការសហប្រជាជាតិ និងឯកសារប្រវត្តិសាស្រ្តកម្ពុជាក្រោម ទោះជាត្រូវអាជ្ញាធរវៀតណាម ចោទថា ខុសច្បាប់ក៏ដោយ
ដោយ លី ឈូន
យុវជនខ្មែរក្រោម នៅតែបន្តការចែករំលែក និងផ្សព្វផ្សាយដដែលនូវឯកសារច្បាប់នានារបស់អង្គការសហប្រជាជាតិ មានច្បាប់សិទ្ធិមនុស្ស ច្បាប់សិទ្ធិជនជាតិដើម និងឯកសារប្រវត្តិសាស្ត្រកម្ពុជាក្រោម ជាដើម ។ ទោះជាការចែករំលែក ផ្សព្វផ្សាយ ឯកសារទាំងនេះ ត្រូវបានអាជ្ញាធរវៀតណាម គំរាមកំហែងក៏ដោយ។ តាមលិខិតចុះថ្ងៃទី ២០ ខែកញ្ញាកន្លងទៅ ជាលិខិតឆ្លើយតបរបស់រដ្ឋអំណាចវៀតណាម ផ្ញើជូនទៅឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស ចំពោះករណី ដែលអង្គការសហប្រជាជាតិចោទប្រកាន់វៀតណាម ថា បានរំលោភសិទ្ធិយុវជនឈ្មោះ យឿង ខាយ ដែលជាអ្នកតស៊ូមតិខ្មែរក្រោម ។ តែក្នុងលិខិតឆ្លើយតបនោះ វៀតណាម បែរជាចោទប្រកាន់ ចំពោះយុវជនរូបនោះ ថា ផ្សព្វផ្សាយសៀវភៅច្បាប់ជនជាតិដើមខុសច្បាប់នៃប្រទេសវៀតណាម និងបំភ្លៃប្រវត្តិសាស្ត្រវៀតណាម ទៅវិញ ។ ទាក់ទិននឹងករណីចោទប្រកាន់ថា យុវជនខ្មែរក្រោម ថា បំភ្លៃប្រវត្តិសាស្ត្រវៀតណាមនោះ អ្នកប្រវត្តិសាស្ត្រកម្ពុជាក្រោម ថា កម្ពុជាក្រោមមានវត្តអារាមខ្មែរក្រោម មានចំណាស់ជាងមួយពាន់ឆ្នាំមានសិលាចារឹក មានប្រាង្គប្រាសាទបុរាណ មានសិល្បៈវប្បធម៌ដ៏មានចំណាស់ ដែលបញ្ជាក់ថា ខ្មែរក្រោមជាម្ចាស់ដើមនៃទឹកដីកម្ពុជាក្រោម តែចំពោះវៀតណាមវិញ ទឡ្ហីករទាំងនេះ គ្មានឡើយ ។ អ្នកប្រវត្តិសាស្ត្រកម្ពុជាក្រោម ថា នឹងចូលខ្លួនតតាំងជាមួយវៀតណាម នៅលើឆាកអន្តរជាតិ ចំពោះការចោទប្រកាន់នេះ ។
យុវជនតស៊ូមតិខ្មែរក្រោមមួយរូបឈ្មោះតូ ហ្វាង ចឿង នៅខេត្តព្រះត្រពាំង ដែលវៀតណាមដាក់ឈ្មោះថ្មីថាត្រាវិញ(Tra Vinh) ថ្មីៗ នេះលោកតូ ហ្វាង ចឿងបានបង្ហោះ នៅលើគណនេយ្យហ្វេសប៊ុកផ្ទាល់ខ្លួនរបស់លោកថា លោកបានថតចម្លងឯកសារនានារបស់អង្គការសហប្រជាជាតិមានច្បាប់សិទ្ធិមនុស្ស សិទ្ធជនជាតិដើម ជាដើមចែកជូនទៅដល់ពលរដ្ឋខ្មែរក្រោមដោយឥតគិតថ្លៃ ដើម្បីចែករំលែកចំណេះដឹងទាំងអស់គ្នា៖ «ខ្ញុំគិតថាខ្ញុំគ្មានអ្វីចែកជូនបងប្អូនយើងទេមានតែចំណីខួរក្បាល គឺសម្រាប់យើងស្វែងយល់ទាំងអស់គ្នាអំពីច្បាប់សិទ្ធិមនុស្ស និងសិទ្ធិជនជាតិដើម រួមនិងសៀវភៅសិទ្ធិស៊ីវិល សិទ្ធិនយោបាយ ហើយនឹងសៀវភៅគោលការណ៍អភិវឌ្ឍន៍ចេរកាលរបស់អង្គការសហប្រជាជាតិដែលមានចំនួន ១៧ ចំណុចដែលហៅកាត់ថាSDGs ។ បើបងប្អូនមានចំណាប់អារម្មណ៍ចង់បានយកទៅអាននឹងខ្ញុំនឹងចែកជូនដោយឥតគិតថ្លៃ» ។
ចំណែកសកម្មជនសិទ្ធិមនុស្សខ្មែរក្រោមម្នាក់ទៀត គឺយុវជនឈ្មោះ យឿង ខាយ លោកជាកម្មករចំណាកស្រុកនៅខេត្តវាលប្រើសដែលវៀតណាមដាក់ឈ្មោះថ្មីថាដុងណាយ (Dong Nai)។ ពេលនេះលោកយឿង ខាយ កំពុងតែបន្តនូវសកម្មភាពរបស់លោកដដែល ដូចជាសកម្មភាពចែកអំណោយដល់ជនរងគ្រោះក្នុងសម័យកូវិដ ១៩ និងបន្តផ្សព្វផ្សាយនូវឯកសារនានា របស់អង្គការសហប្រជាជាតិ មានច្បាប់សិទ្ធិជនជាតិដើមនិងឯកសារប្រវត្តិសាស្ត្រខ្មែរក្រោមជាដើម ទោះបីជាថ្មី ៗ នេះ លោកត្រូវបានអាជ្ញាធរ វៀតណាម ចោទថាលោកផ្សាយបំផ្លើសប្រវត្តិសាស្ត្រក៏ដោយ ។
យុវជនយឿង ខាយ ឆ្លើយតបតាមគណនេយ្យហ្វេសប៊ុកផ្ទាស់ខ្លួនរបស់លោកថា លោកនិយាយតែការពិត តាមការមើលឃើញ មានតែវៀតណាមទេដែលបំភ្លៃប្រវត្តិសាស្ត្រទឹកដីកម្ពុជាក្រោម៖ «បាទខ្ញុំបាទយឿង ខាយមិនបានបំភ្លៃប្រវត្តិអីទេ គឺប្រវត្តិសាស្ត្រដែលខ្ញុំបានបង្ហោះពីមុន ៗ មកគឺជាប្រវត្តិសាស្ត្រពិតនៃដែនដីកម្ពុជាក្រោម ។ ហេតុផលគឺដោយសាតែរដ្ឋាភិបាល និងបក្សវៀតណាមគាត់ខ្លាចប្រជាជនខ្មែរក្រោមដឹងយល់ច្រើនពិបាកពួកគាត់គាបសង្កត់នឹងឯង។ គឺដែលរដ្ឋាភិបាលវៀតណាមចោទប្រកាន់ថាខ្ញុំបំភ្លៃប្រវត្តិសាស្ត្រ គឺខ្ញុំបានបង្ហោះប្រវត្តិសាស្ត្រកម្ពុជាក្រោមតាមប្រព័ន្ធអ៊ីនធឺណិតដូច្នេះឯង» ។
ការលើកឡើងមកនេះ គឺជាការឆ្លើយតបចំពោះលិខិតចុះថ្ងៃទី ២០ កញ្ញាកន្លង ជាលិខិតឆ្លើយតបរបស់រដ្ឋអំណាចវៀតណាម ផ្ញើជូនទៅឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ក្នុងករណីដែលស្ថាប័នសិទ្ធិមនុស្សអង្គការសហប្រជាជាតិ ចោទប្រកាន់វៀតណាមថាបានរំលោភសិទ្ធិយុវជនយឿង ខាយ ដែលជាអ្នកចែកចាយសៀវភៅច្បាប់សិទ្ធិជនជាតិដើម។
ចំពោះលិខិតឆ្លើយតបចុះថ្ងៃទី ២០ កញ្ញានោះ វៀតណាម បានចោទប្រកាន់ចំពោះយុវជនយឿង ខាយ ថាផ្សព្វផ្សាយសៀវភៅច្បាប់សិទ្ធិជនជាតិដើម ខុសនឹងច្បាប់នៃប្រទេសវៀតណាមព្រោះជាច្បាប់ថតចម្លងគ្មានប្រភពច្បាស់លាស់ ។ ហើយវៀតណាមថែបទាំងបានចោទប្រកាន់យុវជនយឿង ខាយ ថាផ្សាយបំផ្លើសប្រវត្តិសាស្ត្រទឹកដីកម្ពុជាក្រោម ដែលវៀតណាមដាក់ឈ្មោះថ្មីថាខ្មែរណាមបូ (Khmer Nam Bo) ហើយដែលវៀតណាមតែងអះអាងថា ខ្មែរក្រោមជាជនអន្តោប្រវេសន៍។
ឆ្លើយតបនឹងការចោទប្រកាន់របស់អាជ្ញាធរវៀតណាមចំពោះយុវជនខ្មែរក្រោមនេះ លោកប្រធានផែនការសហព័ន្ធខ្មែរកម្ពុជាក្រោមត្រឹងម៉ាញ់ រិន្ទ លើកឡើងនៅក្នុងវេទិកាសាធារណៈកាលពីថ្ងៃទី៣០កញ្ញាកន្លង ដែលរៀបចំឡើងដោយវិទ្យុសំឡេងកម្ពុជាក្រោម និងសារព័ត៌មានព្រៃនគរ ជាវេទិកាស្ដីពីរឿងរ៉ាវអាជ្ញាធរវៀតណាម រំលលោភសិទ្ធិយុវជនយឿង ខាយនេះឯង ។ លោកម៉ាន់ រិន្ទ ថាបើវៀតណាមចោទប្រកាន់ថាយុវជនយឿង ខាយផ្សព្វផ្សាយច្បាប់ចម្លង នៃច្បាប់ជនជាតិដើមរបស់អង្គការសហប្រជាជាតិ ដែលវៀតណាមជាហត្ថលេខីទទួលស្គាល់ច្បាប់ទាំងនោះថាខុសច្បាប់ អីចឹងវៀតណាមទៅកែប្រែនឹងអង្គការសហប្រជាជាតិទៅ ។
លោកប្រធានផែនការសហព័ន្ធខ្មែរកម្ពុជាក្រោមបន្តទៀតថា វៀតណាមគ្រាន់ជាជនពនេចរនៅកម្ពុជាក្រោម តែប៉ុណ្ណោះ ។ របបកុម្មុយនិស្ដុវៀតណាមតែងតែបំភិតបំភ័យគំរាមកំហែង ចាប់ដាក់គុកច្រវាក់ តាមកាប់សម្លាប់ ដល់ពលរដ្ឋខ្មែរក្រោមណាដែលហ៊ានរំលឹកដល់រឿងរ៉ាវពិតនៃទឹកដីកម្ពុជាក្រោម ថាជាអតីតទឹកដីរបស់ខ្មែរ។
លោកប្រធានផែនការសហព័ន្ធខ្មែរកម្ពុជាក្រោមរូបនេះ បញ្ជាក់ថា ពេលនេះ ខ្មែរក្រោមមានច្បាប់របស់អង្គការសហប្រជាជាតិ ដូចជាច្បាប់សិទ្ធិជនជាតិដើម ជាដើមជួយការពារជនស្លូតត្រង់ខ្មែរក្រោមហើយ សុំកុំខ្លាចតទៅទៀត៖ «ឥឡូវសូមមើលខេត្តព្រះត្រពាំងឬខេត្តឃ្លាំង ផ្លូវរាប់ពាន់មានផ្លូវណាដាក់ឈ្មោះវីរបុរសខ្មែរក្រោមដែរឬទេ ថាមានដែរទៅចុះគឺមាន ២, ៣នាក់ ប៉ុណ្ណោះ ដូចជាឈ្មោះលោកមហាសឺន ថុង លោកមហាវិញ គឿង ដែលធ្វើការបម្រើរបបកុម្មុយនិស្តុក្នុងសម័យឥឡូវនេះ។ ហើយបើឈ្មោះវីរបុរសខ្មែរពិតពីដើមមកមានដែរឬទេគឺឬអត់មានឃើញទេ ដូច្នេះតទៅមុខទៀតបងប្អូនត្រូវទាមទារ នូវមហាវិថីធំ ៗ នៅខេត្តព្រះត្រពាំងឱ្យដាក់ឈ្មោះវីរបុរសឧកញ៉ាសឺន គុយ ព្រោះលោកជាវីរបុរសខ្មែរក្រោម ជាបិតារបស់ខ្មែរក្រោម ជាមួយពួកអ្នកឯង យល់ ថាយ៉ាងម៉េចជារឿងរបស់ពួកអ្នកឯង តែចំពោះពលរដ្ឋខ្មែរក្រោមលោកឧកញ៉ាសឺន គុយជាបិតារបស់ខ្មែរក្រោម ខ្មែរក្រោមត្រូវតែគោរព បូជាបុព្វបុរសរបស់ខ្លួន » ។
បច្ចុប្បន្ន កម្ពុជាក្រោមមានតឹកតាងផ្ទាល់ភ្នែកជាច្រើនបង្ហាញថាជារបស់ខ្មែរ តឹកតាងទាំងនោះមិនបាច់ដើរស្រាវជ្រាវតាមបណ្ណាល័យ ឬតាមអនឡាញហ្គោហ្គលក៏បានគឺមានដូចជាវត្តសម្បួររង្សីនៅខេត្តព្រះត្រពាំងដែលមានអាយុកាលជាង ១.០០០ ឆ្នាំ។វត្តសម្បួររង្សីកសាងឡើងនៅពុទ្ធសករាជ ៩១៧ និងគ្រិស្តសករាជ ៣៧៣ ។ ក៏ដូចជាប្រាសាទព្រះធាតុ ដែលវៀតណាមហៅថា ថាបថីធាប ឬ ថាប វិញហឹង (Thap Vinh Hung) នៅក្នុងខេត្តពលលាវ (Bac Lieu) ដែលកសាងឡើងក្នុងសតវត្សទី ៩ ឧទ្ទិសទៅដល់ព្រះបាទយសោវរ្ម័នទី ៩ ជាដើម ។ ចំណែកនៅខេត្តទឹកខ្មៅ(Ca Mao) មានស្លាក ស្នាមសំណង់ប្រាសាទប្រាំល្វែង (Nam can) មានស្លាកស្នាមជើងព្រះបាទហ៊ុនទៀន (San Tien)នៅលើភ្នំដាក់ព្រះបាទ (Hon da bac) ។ល។ ហើយតឹកតាងប្រវត្តិសាស្ត្រទាំងនេះ វៀតណាមមិនមាន ចំណែកសោះឡើយនៅកម្ពុជាក្រោម (Khmer Nam Bo) ។
អ្នកប្រវត្តិសាស្ត្រកម្ពុជាក្រោម ដូចជាលោកត្រាំង ឆាតប៊ុត សព្វថ្ងៃលោករស់នៅបារាំង ដែលវណ្ណកម្មរបស់លោកមានឈ្មោះថា«កម្ពុជាក្រោមអំណាចគ្មានខ្មែរក្រោម» ។ រីឯលោកថាច់ សេរ សព្វថ្ងៃលោករស់នៅអាមេរិក ដែលវណ្ណកម្មរបស់លោកមានឈ្មោះថា «ទុក្ខខ្មែរក្រោម» ហើយនឹងលោកទៀ ថេន ជាដើម ដែលសព្វថ្ងៃលោករស់នៅឧស្ត្រាលី ហើយវណ្ណកម្មរបស់លោកមានឈ្មោះថា« រឿងរ៉ាវនៃទឹកដីកម្ពុជាក្រោម ឬ អតីតកូសាំងស៊ីន» ។
អ្នកប្រវត្តិសាស្ត្រកម្ពុជាក្រោម ទាំងអស់សុទ្ធតែអះអាងថាអស់លោកចងក្រងឯកសារទាំងនេះឡើងសុទ្ធតែផ្អែកទៅតាមឯកសារជាតិផង តាមឯកសារអន្តរជាតិផង ហើយនិងយកទៅតាមរឿងរ៉ាវពិតដែលកើតឡើងនៅកម្ពុជាក្រោម ហើយបើប្រសិនជាវៀតណាមមិនសុខចិត្តទេ សូមឡើងទៅតវ៉ានៅអង្គការសហប្រជាជាតិទាំងអស់គ្នា ៕
