យុវជនខ្មែរក្រោមម្នាក់ រងការកោះហៅឲ្យចូលបំភ្លឺសាជាថ្មី ករណីមិនទៅបង់ប្រាក់ពិន័យ
ដោយ ស៊ឺន ចែងចើន
មន្រ្តីស៊ើបអង្កេតនៃមន្ទីរព័ត៌មាន និងទូរគមនាគមន៍ខេត្តព្រះត្រពាំង នៅព្រឹកថ្ងៃអាទិត្យ ទី ១៤ មិថុនា នេះ បានចេញលិខិតកោះហៅយុវជនខ្មែរក្រោម ឲ្យចូលខ្លួនទៅឆ្លើយបំភ្លឺសាជាថ្មី ជុំវិញការមិនព្រមបង់ប្រាក់ពិន័យ តាមការកំណត់របស់អាជ្ញាធរវៀតណាម ដែលចោទប្រកាន់រូបលោកថា បង្ហោះព័ត៌មានក្លែងក្លាយ នៅលើបណ្ដាញសង្គមហ្វេសប៊ុក កាលពីថ្ងៃទី ១១ មិថុនា សប្តាហ៍កន្លង ។
កាលពីថ្ងៃទី ៨ ខែមិថុនា អាជ្ញាធរវៀតណាម នៅស្រុកផ្នោដាច់ បានចំណាយពេលសាកសួរយុវជន តោ ហ្វាង ចឿង ជិត ៥ ម៉ោង ជុំវិញករណីលោកបង្ហោះឯកសារមួយច្បាប់ ដែលលោកអះអាងថា ជាលិខិតរបស់លោក ហូ ជីមិញ មេដឹកនាំនៃប្រទេសវៀតណាម ផ្ញើជូនប្រជាជាតិខ្មែរក្រោម នៅថ្ងៃទី ៣ ខែឧសភា ឆ្នាំ ១៩៤៥ មានខ្លឹមសារថា ដែនដីកម្ពុជាក្រោម ស្ថិតនៅក្រោមការគ្រប់គ្រង និងជាកម្មសិទ្ធិរបស់ខ្មែរក្រោម ។ ចំណែក ជនជាតិវៀតណាម ដែលរស់នៅលើទឹកដីនេះ គ្រាន់ជាអ្នកស្នាក់អាស្រ័យ និងគ្មានសិទ្ធិសម្រេចអ្វីនោះទេ ទាក់ទង នឹងអធិបតេយ្យភាព និងសិទ្ធិធ្វើជាម្ចាស់ការ នៅលើទឹកដីនេះ ។ ក្រោយអាជ្ញាធរវៀតណាម សាកសួរចប់ លោកត្រូវបានចោទប្រកាន់ពីបទ បង្ហោះព័ត៌មានមិនពិត និងបង្គាប់ឲ្យលោកត្រូវទៅបង់ប្រាក់ពិន័យទៅមន្ទីរព័ត៌មាន និងទូរគមនាគមន៍ខេត្តព្រះត្រពាំង នៅថ្ងៃទី ១១ មិថុនា ។ ប៉ុន្តែ លោក តោ ហ្វាង ចឿង បដិសេធន៍មិនព្រមទទួលយកលិខិតនោះទេ ដោយសំអាងថា លោកគ្មានទោសកំហុសអ្វីឡើយ ។ លោកបញ្ជាក់ថា លោកអាចប្រឈម នឹងការពិន័យជាប្រាក់ ចាប់ពី ១០ លានដុងទៅ ២០ លានដុង ឬប្រមាណ ៥ រយដុល្លារ ទៅ ១ ពាន់ដុល្លារ ។
នៅលើគណនីហ្វេសប៊ុក យុវជន តោ ហ្វាង ចឿង បានបង្ហោះសារអមជាមួយ នឹងលិខិតកោះហៅទៅសាកសួរ ពីមន្រ្តីស៊ើបអង្កេតនៃមន្ទីរព័ត៌មាន និងទូរគមនាគមន៍ខេត្តព្រះត្រពាំង ថា លោកមិនទៅតាមការកំណត់របស់ក្រុមអាជ្ញាធរវៀតណាម ដែលបង្គាប់ឲ្យលោកទៅបង់ប្រាក់ពិន័យនោះទេ ។ លោកថា មិនមែនលោកខ្លាច ឬរត់គេចខ្លួននោះទេ ប៉ុន្តែ លោកកំពុងស្វែងរកមេធាវី ដើម្បីប្ដឹងទាស់ ទៅ នឹងការសម្រេចនេះ ។
ពាក់ព័ន្ធ នឹងរឿងនេះដែរ កាលពីថ្ងៃទី ២ មិថុនា យុវជនខ្មែរក្រោម ឈ្មោះ ថាច់ កឿង ក៏ត្រូវបានអាជ្ញាធរវៀតណាម ពិន័យលុយជាង ៧ លានដុង ឬប្រមាណជាង ៣ រយដុល្លារ ករណីបង្ហោះវីដេអូនៅលើបណ្តាញសង្គមហ្វេសប៊ុក ចោទអាជ្ញាធរវៀតណាមថា បានចែកអង្ករក្លែងក្លាយឲ្យពលរដ្ឋខ្មែរក្រោម ។
គួរជម្រាបជូនថា ករណីកោះហៅពលរដ្ឋខ្មែរក្រោម ទៅសួរនាំនេះ មិនមែនជាករណីលើកទីមួយនោះទេ ជារឿយៗ អាជ្ញាធរវៀតណាម តែងតែកោះហៅពលរដ្ឋខ្មែរក្រោមទៅសួរចម្លើយជាបន្តបន្ទាប់ ដោយសារតែពួកគាត់ហ៊ានបញ្ចេញមតិពាក់ព័ន្ធ នឹងរឿងខ្មែរក្រោម នៅតាមបណ្ដាញសង្គមហ្វេសប៊ុក ហើយអាជ្ញាធរវៀតណាម ក៏ចោទប្រកាន់ពលរដ្ឋខ្មែរក្រោមទាំងនោះ ពីបទប្រឆាំង នឹងរដ្ឋាភិបាល ឬមានទំនាក់ទំនង នឹងសហព័ន្ធខ្មែរកម្ពុជាក្រោម ដែលមានមូលដ្ឋាន នៅក្រៅប្រទេស ៕
