ដោយ ស៊ឺន ចែងចើន|សារព័ត៌មាន ព្រៃនគរ
លោក តាំង សារៈ ប្រធានសាខាសហព័ន្ធខ្មែរកម្ពុជាក្រោម ប្រចាំប្រទេសកម្ពុជា នៅរសៀលថ្ងៃទី ៤ វិច្ឆិកា ២០១៦ បានដឹកនាំ គណៈកម្មាធិការ សមាជិក សមាជិកា នៃសាខាសហព័ន្ធខ្មែរកម្ពុជាក្រោម ទៅគោរពវិញ្ញាណក្ខន្ធសព លោក ប៉ែន សុវណ្ណ តំណាងរាស្ត្រមណ្ឌលខេត្តកំពង់ស្ពឺ នៅទីតាំងតម្កល់សព នាវត្តនួនមុនីរាមហៅវត្តថាន់ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ជាមួយគ្នានេះដែរ ព្រះចៅអធិការវត្តសាមគ្គីរង្សី និងជាប្រធានសមាគមព្រះសង្ឃខ្មែរកម្ពុជាក្រោម ព្រះតេជព្រះគុណ ថាច់ ហាសំអាង ក៏បានដឹកនាំព្រះសង្ឃជាច្រើនអង្គ ទៅគោរពវិញ្ញាណក្ខន្ធសព លោក ប៉ែន សុវណ្ណ ដែរ ។
លោក ប៉ែន សុវណ្ណ ដែលជាសមាជិករដ្ឋសភា មកពីគណបក្សសង្គ្រោះជាតិ បានទទួលមរណភាព កាលពីថ្ងៃសៅរ៍ ទី ២៩ ខែតុលា ឆ្នាំ ២០១៦ ក្នុងជន្មាយុ ៨០ ឆ្នាំ ដោយរោគាពាធ នៅគេហដ្ឋានរបស់លោកក្នុងខេត្តតាកែវ ។ សពត្រូវបានដង្ហែមកកាន់រាជធានីភ្នំពេញ ដើម្បីតម្កល់ធ្វើបុណ្យ ទៅតាមប្រពៃណីព្រះពុទ្ធសាសនា នៅវត្តនួនមុនីរាមហៅវត្តថាន់ ។
បើតាមគណៈកម្មការរៀបចំបុណ្យ គ្រោង នឹងបូជាសពលោក ប៉ែន សុវណ្ណ នៅវត្តឫស្សីសាញ់ ស្ថិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ នៅថ្ងៃទី ៦ ខែវិច្ឆិកា ឆ្នាំ២០១៦ នេះ ៕
ខាងក្រោមនេះ ជារូបថតសកម្មភាពសាខាសហព័ន្ធ និងសមាគមខ្មែរកម្ពុជាក្រោម នៅកម្ពុជា ចូលគោរពវិញាណក្ខន្ធសព លោក ប៉ែន សុវណ្ណ ។ រូបថតៈ ស៊ឺន ចែងចើន
Comments are closed.